2 Crónicas
31 Fiesta tucurishca qꞌuipaca tucui chaipi caj israelitacunaca Judá llajtapi tiyaj llajtacunamanmi llujshircacuna. Adorana pilarcunatapish, adorana postecunatapishmi ñuturcacuna. Shinallataj adorana lugarcunata,* altarcunatapishmi ñuturcacuna. Chai runacunaca Judapi, Benjaminpi, Efrainpi, Manasespi tiyaj tucui laya altarcunatami tucui tucuchircacuna. Chai qꞌuipaca tucui israelitacunami paicuna maipi causashca llajtacunaman tigrarcacuna.
2 Chaimi Ezequiasca sacerdotecunata, levitacunatapish grupocunapi churarca. Paica sacerdotecunapish, levitacunapish rurana cashcata rurachunmi chashna churarca. Paicunaca rupachishca ofrendacunata, Dioshuan alli tucungapaj sacrificiocunatapishmi curcacuna. Shinallataj Jehová Diospaj huasi muyundijpi tiyaj patiocunapaj* pungucunapimi Diosta sirvishpa, paita pagui nishpa alabarcacuna. 3 Rupachishca ofrendacunapajmi rey charishca huaquin cosascunata curcacuna. Chai huaquin cosascunaca tutamanta ladopi, chishi ladopi cuna rupachishca ofrendacunapaj, sábado punllapi, llullu lunacunapi, fiestacunapi rupachishca ofrendacunapajmi carca. Chaitaca Jehová Diospaj Leypi quillcashca shinami rurarcacuna.
4 Ashtahuanpish Ezequiasca, Jerusalenpi causaj gentecunataca sacerdotecunaman, levitacunaman, paicunaman cuna cashca ofrendacunata cuichij. Chashnami paicunaca Jehová Diospaj leypi mandashca shina paicunapaj trabajocunataca tucuita pajtachingacuna nishpami mandarca. 5 Ezequías chashna mandajpimi israelitacunaca paicunapaj chagracunapi punta pꞌucushca granocunata, llullu vinotapish, aceitetapish, mieltapish, paicunapaj chagracunapi pꞌucushca shujtaj granocunamantapish achcata apamurcacuna. Israelitacunaca paicunapaj chagrapi tucui imalla japishcacunamantaca cada chungamanta shujtami apamurcacuna. 6 Judá llajtapi tiyaj llajtacunapica Israel llajtamanta gentecunapish, Judá llajtamanta gentecunapishmi causacurcacuna. Paicunaca huagracunatapish, ovejacunatapish cada chungamanta shujtami apamurcacuna. Diospajlla chꞌicanyachishca cosascunatapish cada chungamanta shujtami apamurcacuna. Diospajlla chꞌicanyachishca cosascunataca paicunapaj Jehová Diospajmi chuyayachircacuna. Tucuita apamushpami achca montoncunapi churarcacuna. 7 Paicunaca paicunapaj ofrendacunataca tercer quillapimi montonai callarircacuna. Pero séptimo quillapimi ofrendacunata cushpa tucuchircacuna. 8 Ezequiaspish, mandajcunapish shamushpaca montonashca ofrendacunata ricushpami Jehová Diosta alabarcacuna. Israel llajtapi causajcunatapishmi bendiciarcacuna.
9 Ezequiasca sacerdotecunatapish, levitacunatapish chai montonashca ofrendacunamantami tapurca. 10 Shinapish Sadocpaj familiamanta sacerdotecunata mandaj Azariasca Ezequiasmanca: “Jehová Diospaj huasipaj ofrendacunata apamui callarishcamantaca gentecunaca huijsa pajtatami micucushcacuna. Shinapish achcami sobrashca. Jehová Diosca paipaj pueblotami bendiciashca. Tucui caimi sobrashca” nircami.
11 Chaita ricushpami Ezequiasca Jehová Diospaj huasipi huaquichina cuartocunata* allichichun mandarca. Chaimi chai huaquichina cuartocunataca allichircacuna. 12 Ofrendacunatapish, cada chungamanta shujtapish,* Diospajlla chꞌicanyachishca cosascunatapish mana shaicushpami apamushpa catircacuna. Tucui caicunata ricuchunca levita Conaniastami churarcacuna. Paipaj huauqui Simeipish paipaj qꞌuipami tucui caicunataca ricuj carca. 13 Rey Ezequías mandajpimi Conaniastapish, paipaj huauqui Simeitapish Jehiel, Azazías, Náhat, Asahel, Jerimot, Jozabad, Eliel, Ismakías, Máhat, Benaya ayudajcuna carca. Azariaspish Diospaj huasitami ricuj carca. 14 Imnapaj churi Coreca inti llujshin ladopi punguta cuidajmi carca. Paica Diospaj huasipi shungumanta cushca ofrendacunata cuidangapajmi encargado carca. Shinallataj Jehová Diosman cushca ofrendacunata, Diospajlla ashtahuan chꞌicanyachishca cosascunatapish sacerdotecunamanmi cuj carca. 15 Coreca Edén, Miniamín, Jesúa, Semaya, Amarías, Secaniastami mandacurca. Paicunaca sacerdotecunapaj llajtacunapimi carca. Gentecuna apamushca ofrendacunatami paicunapaj huauqui sacerdotecunamanca grupocunapi jovencuna cajpipish, mayorcuna cajpipish tucuicunaman igualta chaupishpa cujcuna carca. Paicunaca tucuita alli pajtachijcuna cashcamantami chai cargotaca charircacuna. 16 Shinallataj cada punlla Jehová Diospaj huasipi sirvinaman shamuj cꞌaricunaca paicunapaj grupocunapi rurana trabajota pajtachingapajmi shamujcuna carca. Paicunapish, quimsa huatacunamanta ñaupajman caj paicunapaj churicunapish chaipi cushca micunatami chasquijcuna carca. Tucui paicunami cada familiamanta registrashcacunapi quillcashca carcacuna.
17 Sacerdotecunapish, levitacunapish paicunapaj grupopi imata rurana cashcapimi cada familiamanta registrashca carcacuna. Pero levitacunamantaca 20 huatayujcunamanta huichimanmi cada familiamanta registrashcacuna carca. 18 Cada familiamanta registrashcacunapurapica paicunapaj huarmicuna, churicuna, ushushicuna, uchilla huahuacuna, tucui paicunapaj familiacunapishmi quillcashca carcacuna. Paicunaca Diospajllata rurajcuna cashcamantami chuyayarishca carcacuna. 19 Shinallataj cada familiamanta registrashcacunapurapica Aaronpaj huahua huahuacunamanta sacerdotecunami quillcashca carcacuna. Paicunaca paicunapaj llajtacuna muyundijpi tiyaj michina allpacunapimi causajcuna carca. Tucui llajtacunapica huaquin cꞌaricunatami agllarcacuna. Chai cꞌaricunataca sacerdotecunaman, levitacunapaj cada familiamanta registrashcacunaman micunacunata cuchunmi mingashcacuna carca.
20 Ezequiasca tucui caitami Judá llajtapi rurarca. Shinallataj paica paipaj Jehová Diospaj ñaupajpica allita rurashpa, cashcata rurashpa, cazushpami causarca. 21 Ezequiasca tucui shunguhuanmi paipaj Diospaj huasipi trabajocunataca callarirca. Paica Diosta sirvingapajca Leypipish, mandamientocunapipish nishcatami tucui shunguhuan cazurca. Chaimantami tucui alli llujshirca.