YACHAI 42
¿Soltero canamanta, cazarashca canamantaca Bibliapica imatataj nin?
Huaquin gentecunaca cushilla cangapajca cazaranami can nincunami. Pero ni tucui cazadocunachu cushilla causan, ni tucui solterocunachu llaquilla causan. Bibliapica soltero cana, cazarashca canaca Dios cushca regalomi can ninmi.
1. ¿Soltero cashpaca imatataj rurai tucunchij?
Bibliapica: “Cazarajpish allitami ruran cutin mana cazarajpish ashtahuan allitami ruran” ninmi (1 Corintios 7:32, 33, 38-ta liyipai, NWT). Cai versopica ‘mana cazarajca ashtahuan allitami ruran’ ninmi. ¿Imamanta? Diosta sirvij solterocunaca mana cazarashca cashcamantami paicunapaj cusamanta o huarmimanta mana preocuparina can. Chaimantami Jehová Diosta sirvingapajca ashtahuan tiempota charincuna. Por ejemplo, shujtaj ladocunaman rishpami Diosmanta huillai tucuncuna. Jehová Diosta ashtahuan rijsingapajpish tiempotami charincuna.
2. ¿Leypi cazaranaca imamantataj alli can?
Ima shinami solterocunaca bendicioncunata charin, chashnallatajmi cazarashcacunapish bendicioncunata charin. Bibliapica: “Shujlla causanapaj randica, ishqui causanami ashtahuan alli” ninmi (Eclesiastés 4:9). Pero cazarashcacuna bendicioncunata charichunca Bibliapi ima nishcatami cazuna can. Leypi cazarashcacunaca cantaca cꞌuyasha, respetasha, cꞌuyaihuanmi cuidasha nishpami cazarancuna. Chashna cazarashca cashcamantami paicunapish, paicunapaj huahuacunapish seguros sintirincuna. Pero leypi mana cazarashcacunaca mana chashna sintirincunachu.
3. ¿Cazaranamantaca Jehová Diosca imatataj yuyan?
Jehová Diosca punta cꞌarita, punta huarmita cazarachishpaca: ‘Cꞌarica, paipaj yaya mamata saquishpa paipaj huarmihuan tandanacuchun’ nircami (Génesis 2:24). Cusa huarmica huañungacamami cꞌuyarishpa, tandanacushpa causana can. Chashna causachunmi Diosca munan. Paica divorciarichunca mana munanchu. Pero ¿shuj cusa o huarmi huainayajpica? Chaipica Jehová Diosca mana culpata charij cusa o huarmi divorciarinata o mana divorciarinata decidichunmi saquin (Mateo 19:9).a Jehová Diosca paita sirvijcuna shujlla cꞌarihuan, shujlla huarmihuanmi cazarachun munan (1 Timoteo 3:2).
ASHTAHUAN YACHAI
Soltero cashpapish o cazarashca cashpapish cushilla causangapaj, Jehová Diosta cushichingapaj imata rurana cashcata yachashun.
4. Soltero cashpa Jehová Diosta ashtahuan sirvi
Jesuspajca soltero canaca shuj regalomi carca (Mateo 19:11, 12). Mateo 4:23-ta liyipai. Qꞌuipaca cai catij tapuicunatami yachashun:
¿Jesús soltero cashcamantaca ima shinataj paipaj Yayataca sirvirca? ¿Shujtajcunata ayudangapajpish imatataj rurarca?
Diosta sirvij solterocunaca Jesús shinami cushilla causai tucuncuna. VIDEOTA ricui. Qꞌuipaca cai catij tapuitami yachashun.
¿Solterocunaca ima shinataj Diosta ashtahuan sirvi tucuncuna?
¿Caita yacharcanguichu?
Bibliapica cazarangapaj ima edadta charina cashcataca mana ninchu. Chaipaj randica Bibliapica: ‘Ña mana yalli huambraraj cashpaca cazarachunlla’ ninmi (1 Corintios 7:36, NWT). Ña mana yalli huambraraj cashpaca aichapi chayarina munaillamantaca mana cazarangacunachu.
5. Pihuan cazaranata alli agllai
Pihuan cazaranata agllanaca valishca decisionmi can. Mateo 19:4-6, 9-ta liyipai. Qꞌuipaca cai catij tapuitami yachashun:
¿Solterocunaca manaraj cazarashpaca imamantataj alli yuyana can?
Alli cusata o alli huarmita agllangapajca Biblia ima nishcatami catina cangui. Diosta cꞌuyaj, alli sirvij cꞌarihuan o huarmihuanmi cazarana cangui.b 1 Corintios 7:39 y 2 Corintios 6:14-ta liyipai. Qꞌuipaca cai catij tapuicunatami yachashun:
¿Cazarasha nishpaca imamantataj Diosta alli sirvijhuan cazarana cangui?
¿Diosta mana sirvijhuan cazarajpica Jehová Diosca ima shinashi sintiringa?
Chꞌican animalcunata yapuchun churajpica ishquindijcunami sufringacuna. Chashnallatajmi Diosta sirvij cꞌari o huarmi Diosta mana sirvijhuan cazarajpica achca problemacunata charingacuna.
6. Matrimoniota Jehová Dios ricushca shina ricui
Ñaupa punllacunapica israelitacunaca paicunallapi yuyashpami paicunapaj huarmicunamanta divorciarijcuna carca. Malaquías 2:13, 14, 16-ta liyipai. Qꞌuipaca cai catij tapuitami yachashun:
¿Yangamanta divorciarijcunataca imamantataj Jehová Diosca pꞌiñan?
Huainayajpi o divorciarijpica mana culpata charij cusata, huarmita, huahuacunatapishmi llaquichin.
VIDEOTA ricui. Qꞌuipaca cai catij tapuitami yachashun:
Diosta mana sirvijhuan cazarashca cashpaca, ¿ima shinataj cushilla causai tucungui?
7. Cazarashcacunaman Dios cushca consejocunata cazui
Cazarashcacunaman Dios cushca consejocunata cazunaca huaquincunapajca sinchimi can.c Pero Jehová Diosca paita cazungapaj esfuerzota rurajcunataca achcatami bendician. VIDEOTA ricui.
Hebreos 13:4-ta liyipai. Qꞌuipaca cai catij tapuicunatami yachashun:
¿Cazarashcacunaman Dios cushca mandashcacunata cazunaca sinchichu can? ¿Imamantataj chashna ningui?
Jehová Diosca paita sirvijcuna leypi cazarachunmi munan. Shinallataj divorciarinata decidijpica autoridadcunapaj ñaupajpi divorciarichunmi munan. Maipi causashpapishmi caitaca rurana canchij. Tito 3:1-ta liyipai. Qꞌuipaca cai catij tapuitami yachashun:
¿Cambaj matrimonio legalizashca cashcataca segurochu cangui?
HUAQUINCUNACA: “¿Igual causangapajca cazaranachu minishtirin?” nishpami tapuncuna.
¿Quiquinca imatataj ninguiman?
YUYARISHUNCHIJ
Soltero cana, cazado canaca Jehová cushca regalocunami can. Solterocunapish, cazadocunapish Dios munashca shina causashpami cushilla causai tucunchij.
Yuyaringapaj tapuicuna
¿Solterocunaca ima shinataj Diosta ashtahuan sirvi tucun?
Bibliapi nishca shinaca ¿imamantataj Diosta sirvijcunapuraca cazarana alli can?
Bibliapi nishca shinaca ¿imamantataj shuj cusa o shuj huarmica divorciari tucun?
CAICUNATAPISH RICUI
¿‘Cristota catijllahuan cazaranaca’ imatataj nisha nin?
Manaraj cazarashpa alli decisioncunata agllangapaj imata rurana cashcata shuj videopi ricui.
Shuj huauquica Diosta sirvingapajmi tucuita huashaman saquirca. Yaya Dios paita bendiciashcata imamanta seguro cashcata yachai.
Diosta sirvijca manaraj divorciarishpa o manaraj separarishpaca, ¿imapitaj yuyana can?
“‘Taita Dios tandachishcataca’ respetashunchij” (Huillaj, diciembre de 2018)
a Huainayana juchapi mana urmajpipish imamanta separari tucushcata ashtahuan yachangapajca nota 4-ta ricui.
b Huaquin llajtacunapica yaya mamacunaca paicunapaj huahuacuna pihuan cazaranatami agllancuna. Alli yaya mamacunaca chai cꞌari o chai huarmi cullquita charijta ricunapaj randica Jehová Diosta alli sirvishcatami ricuna can.
c Shuj cꞌarihuan o shuj huarmihuan apanacushpalla causashpaca quiquinllatajmi paihuan cazaranata o paita saquinata decidina cangui.