YACHAI 08
Jehovapaj amigomi cai tucungui
Jehová Diosca pai ima shina cashcata, paipaj munai maijan cashcata rijsichunmi munan. Paipaj yachachishcacunatapish rijsichunmi munan. Ashtahuantajca paipaj amigo tucuchunmi munan. Pero ¿Diospaj amigo cai tucunguichu? (Salmo 25:14-ta liyipai). ¿Paipaj amigo cangapajca imatataj rurana cangui? Bibliapimi cai tapuicunata cutichin. Chaipimi Diospaj amigo cana valishca cashcata yachangui.
1. ¿Diosca imata rurachuntaj mañan?
Santiago 4:8-pica: “Diosman cꞌuchuyaichij paipish cancunapajman cꞌuchuyangami” ninmi. ¿Cai shimicunaca imatataj nisha nin? Jehová Diosca paipaj amigo cachun munashcatami ricuchin. Maijancunapajca Jehová Diosta mana ricushcamantaca paipaj amigo canaca sinchimi ricurin. Pero Bibliapica Yaya Dios ima shina cashcatami huillan. Bibliamanta yachashpaca Diosta mana ricui pudishpapish paipaj amigosmi cai tucunchij.
2. ¿Imamantataj Jehová Diosca alli amigo can?
Jehová Dios shina cꞌuyajca pi mana tiyanchu. Paica can imata minishtishcata mañachun, cushilla causachunmi munan. Ima llaquicuna ‘yuyailla cashpaca’ Diosman minganallami cangui. Paica canmantami preocuparin (1 Pedro 5:7-ta liyipai). Yayito Diosca ñucanchijta uyangapaj, cushichingapaj, ñucanchij amigo cangapajca listomi can (Salmo 94:18, 19-ta liyipai).
3. ¿Jehová Diosca paipaj amigocunamantaca imatataj munan?
Jehová Diosca tucuicunatami cꞌuyan. Pero ashtahuantajca ‘cashcata rurajcunahuanmi’ amigo can (Proverbios 3:32). Diosca paipaj amigocuna allicunata rurachunmi munan. Huaquincunaca mana alli ruraicunata saquishpa, allicunata ruranataca mana pudishunchu nincunami. Pero, Jehová Diosca cꞌuyaj cashcamantami tucui shunguhuan paita sirvingapaj esforzarijcunataca chasquin (Salmo 147:11; Hechos 10:34, 35).
ASHTAHUAN YACHAI
Jehová Diospaj amigo cangapaj imata rurana cashcata, paipaj amigo cana imamanta valishca cashcata yachai.
4. Abrahamca Diospaj amigomi carca
Bibliapi Abrahammanta yachashpami Diospaj amigo canata yachangui. Abrahammanta ashtahuan yachangapajca Génesis 12:1-4-ta liyipai. Qꞌuipaca cai catij tapuicunatami yachashun:
¿Diosca Abrahamta imata rurachuntaj mañarca?
¿Jehová Diosca Abrahammanca imatataj cusha nirca?
¿Jehová Dios chaita nijpica Abrahamca imatataj rurarca?
5. Jehová Diosca paipaj amigocuna paita cazuchunmi munan
Maipica ñucanchij amigocuna ñucanchijmanta ima rurashpa ayudachunmi shuyanchij.
Por ejemplo, ¿cambaj amigocunaca canmanta imata rurachuntaj munanguiman?
1 Juan 5:3-ta liyipai. Qꞌuipaca cai catij tapuitami yachashun:
¿Jehová Diosca paipaj amigocuna imata rurachuntaj shuyan?
Jehová Diosca ñucanchij causaipi cambiocunata rurashpa, paita cazuchunmi munan. Isaías 48:17, 18-ta liyipai. Qꞌuipaca cai catij tapuitami yachashun:
¿Imamantataj Jehová Diosca paipaj amigocuna cambiocunata rurachun shuyan?
Shuj alli amigoca paipaj amigota cuidangapaj, ayudangapajmi imallatapish ruran. Jehová Diospish cai alli amigo shinami can.
6. Jehová Diosca paipaj amigocunataca ayudanmi
Jehová Diosca paipaj amigocuna paicunapaj problemacunahuan chꞌimbapurachunmi ayudan. VIDEOTA ricui. Qꞌuipaca cai catij tapuitami yachashun:
¿Cai videopi ricurij huarmi llaquilla yuyaicunahuan cajpica Jehová Diosca ima shinataj ayudarca?
Isaías 41:10, 13-ta liyipai. Qꞌuipaca cai catij tapuicunatami yachashun:
¿Jehová Diosca paipaj amigocunamantaca imatataj rurasha nin?
¿Jehová Dios alli amigo cashcataca imamantataj cringui?
Ñucanchij alli amigocunaca minishtishca tiempopimi ayudancuna. Chashnallatajmi Jehovapish cantaca ayudanga.
7. Jehová Diospaj amigo cangapajca paihuanmi parlanacuna canchij, paitami uyana canchij
Pihuan siempre parlanacushpaca paihuanmi alli apanacunchij. Salmo 86:6, 11-ta liyipai. Qꞌuipaca cai catij tapuicunatami yachashun:
¿Jehová Dioshuan parlanacungapajca imatataj rurana cangui?
¿Jehová Dios ñucanchijhuan parlanacungapajca imatataj ruran?
Ñucanchijca Jehová Diosta mañashpami paihuan parlanchij. Cutin Jehová Diosca paihuan parlachunca Bibliatami cushca.
HUAQUINCUNACA: “Diospaj amigo canataca mana pudishunchu” nincunami.
¿Jehová Diospaj amigo cai tucushcataca ima versohuantaj ricuchinguiman?
YUYARISHUNCHIJ
Jehová Diosca paipaj amigo cachun munashcamantami paipajman cꞌuchuyachun ayudanga.
Yuyaringapaj tapuicuna
¿Jehová Diosca paipaj amigocunataca ima shinataj ayudan?
¿Imamantataj Jehová Diosca ñucanchij causaipi cambiocunata rurachun mañan?
¿Jehová Diospaj amigo tucuna sinchi cashcatachu yuyangui? ¿Imamantataj chashna yuyangui?
CAICUNATAPISH RICUI
¿Diospaj amigo canaca ima shinataj ayudan?
“Jehová Diosta rijsinatami minishtinchij” (Huillaj, 15 de febrero de 2003)
Jehová Diospaj amigo cangapaj imata rurana cashcata yachai.
Diospaj amigo cana ima shina shuj huarmita ayudashcata yachai.
Huaquin jovencuna Jehová Diosta rijsishcamanta ima shina sintirishcata ricui.