TAPUI 7
¿Jacu ñucahuan siririshun nijpica imatataj rurasha?
¿IMATATAJ RURANGUIMAN?
Caipi yuyai: Sandraca ishqui quillacunatami Pablohuan rijsinacushpa puricun. Paicunaca cada horami telefonopi cayanacun mensajecunatapish cachanacuncuna. Achca huatacunata rijsirinacushca shinami sintirincuna. Shinallataj caishuj imata nigrishcatapish ñami yachancuna.
Paicunaca maquimanta japirinacushpa, huaquinpillami muchanacushcacuna. Cunanca Pabloca mana chaillata rurasha ninchu Sandrahuanmi siririnata munacun. Sandraca Pablohuan mana siririsha nishpapish “¿Ñucata saquijpica? ¡Paillami alhaja shimicunahuan cushichin, achcatami cꞌuyanacunchij!” ninmi.
Enamoradota charingapaj ña huatacunata charishpapish ¿Can Sandra cashpaca imatataj ruranguiman?
YUYAI
Taita Diosca cazadocunalla chayarinacuchunmi mandarca. Manaraj cazarashpa chayarinacushpaca chaita mana valichishcatami ricuchingui. Yuyai: Shuj alhaja mushuj camisata cujpica, ¿chai camisahuan mapata pꞌichanguimanchu?
Pájaro shina huairapi jahuamanta shitarishpaca llaqui tucunguimi. Shinallatajmi Dios mandashcata mana cazushpaca llaqui tucungui. Diosca ama huainayachun ninmi. Chaimantami manaraj cazarashca cashpaca mana pihuan chayarinacuna cangui (1 Tesalonicenses 4:3).
¿Ima llaquicunatataj charingui? Bibliapica: “Huainayajca, paipaj cuerpopaj llaquipajllatajmi juchallin” ninmi (1 Corintios 6:18). ¿Cai shimicunaca imatataj yachachin?
Achca jovencunaca manaraj cazarashpa shuj cꞌarihuan o shuj huarmihuan siririshcamantami cashna sintirishcacuna:
ARREPINTIRISHCACUNAMI: Achca jovencunami manaraj cazarashpa pihuan siririshpa chayarishcacuna. Chai qꞌuipaca achcatami arrepintirishcacuna.
ISHQUINDIJPURA CONFIANZATA ÑA MANA CHARINCUNACHU: Siririshca qꞌuipaca huaquincunaca, ¿pihuanshi ashtahuan siririshca canga? nishpami tapurincuna.
MANA CꞌUYANACUSHPA CATINCUNACHU: Achca solteracunaca paicunahuan siririchunllaca mana munanchu. Ashtahuanpish cꞌuyachun, cuidachunmi munancuna. Achca solterocunaca shuj solterahuan siririshca qꞌuipaca ña mana paihuan casha nincunachu.
Ama cungaringui: Manaraj cazarashpa pihuan chayarinacushpaca cambaj cuerpotami mapayachingui. Chaita mana rurashpaca achca valishcami cangui (Romanos 1:24). ¡Pihuan siririshpa ama chayarinacuichu!
Cazarangacama ama pihuan siririchu (1 Tesalonicenses 4:3). Cazarashca qꞌuipami cambaj cusahuan o huarmihuan mana preocuparishpa cushilla chayarinacungui. Manaraj cazarashpa pihuan siririjcunaca arrepintirishpa, caishujpi ña mana crishcamantami cꞌuyanata saquishcacuna. ¡Achca llaquicunatami charishcacuna! (Proverbios 7:22, 23; 1 Corintios 7:3.)
¿IMATATAJ NINGUIMAN?
Canta cꞌuyajca mana llaquichingachu. Ashtahuanpish canta cushichingapajmi imatapish ruranga.
Canmanta preocuparishpaca Dios mana munashcata rurachunca mana mañangachu (Hebreos 13:4).