Valishca perlatami tarircanchij

Winston, ¿ima shinataj Diosmanta yachai callarircangui?

Ñucaca Australia llajtapimi Diosta mana rijsij familiapi huiñarcani. Campopi causashcamantami ñuca familiallahuan pasaj carcani. 12 huatacunata charishpami Diosta mashcai callarircani. Shuj cutinca, Diostami, cantaca allimi rijsisha nini nishpa mañarcani. Ña jovenyashpaca campota saquishpami Adelaida nishca llajtapi trabajanaman rircani. 21 huatata charishpaca Sydney nishca llajtaman ringapajmi vacacionta llujchircani. Chai llajtapimi ñuca huarmi tucuna Pamelata rijsircani. Paica israelismo británico nishca religiontami catij carca. Pamelaca: “740 huatapi Jesús manaraj huacharijpimi Israel llajtamantaca achca israelitacunata prezu aparcacuna. Chai israelitacunami Britania llajtapi causanaman rircacuna. Paicunami ñucanchij ñaupa yaya mamacuna can” nircami. Adelaida llajtamanta tigrashpaca cai temamantami ñuca trabajopi shuj compañeroman parlarcani. Paica testigocunahuanmi Bibliamanta yachai callarishca carca. Testigocunapaj crishcacunamanta paihuan parlanacushpami, uchillapi Diosta mañashcata yuyarircani. Yaya Diosmanta, paipaj gobiernomantami ñuca compañeroca yachachirca. Chai yachachishcacunaca ñucapajca valishca perlacuna shinami carca (Mateo 13:45, 46).

Pamela canpish soltera cashparajmi Diosmanta yachanata munarcangui ¿nachu? ¿Ashata parlai tucunguichu?

Ari. Ñucaca Coffs Harbour nishca llajtapimi huiñarcani. Ñuca yaya mama, ñuca abuelitocunaca israelismo británico nishca religión yachachishcatami crijcuna carca. Chaimi ñucaman, ñuca punta ñañaman, ñuca uchilla turiman, ñuca primocunamanpish: “Británicos nishca gentecunamanta shamujcunatami Diosca chasquin” nishpa yachachijcuna carca. Paicuna shina yachachijpipish chai cierto cashcataca mana tanto crircanichu. Diosmantapish carupi cashcatami sintircani. Chaimi 14 huatacunata charishpaca anglicana, bautista, adventista iglesiacunaman rircani. Pero chai iglesiacunapica Diosmantaca imata mana yacharcanichu.

Tiempo huashaca Sydney llajtapimi ñuca familiahuan causanaman rircanchij. Chai llajtapimi ñuca cusa tucuna Winstonta rijsircani. Paica religionmanta ñucahuan parlashca huashaca testigo de Jehovacunahuanmi Bibliata yachai callarishca carca. Chaimi pai quillcashca cartacunapica Bibliapi achca versocunata liyichun nij carca. Pai chashna quillcajpimi ashata pꞌiñarircani. Pero asha ashami pai alli religionpi cashcata cuenta japircani.

1962 huatapi, 18 huatacunata charishpami Winston causan llajtapi causanaman rircani. Winstonca shuj familiahuan causachunmi parlashca carca. Paicunaca Thomas y Janice Sloman shutimi carca. Cai cusa huarmica Papúa Nueva Guinea llajtapimi misioneros cashcarca. Paicunaca ñucataca allimi tratajcuna carca, Diospaj Shimitapishmi alli yachachircacuna. Chai qꞌuipaca Winstonhuanmi cazararcani. Ishquindij achca llaquicunata chꞌimbapurana cashpapish Diostami cushilla sirvishcanchij.

Winston, ¿cazarashca qꞌuipaca ima shinataj Diosta sirvircanguichij?

Cazarasha huashaca Jehová Diosca mushuj asignacioncunatami curca (1 Corintios 16:9). Chai tiempopimi huauqui superintendente Jack Porterca paipaj huarmihuan ñucanchij congregacionta visitarca. Paicunami ñucatapish Pamelatapish precursores cachun animarcacuna. Chaimi pichca huatacunata precursores shina sirvircanchij. Cutin, 29 huatacunata charijpimi superintendente tucuchun sucursalmanta nombrarcacuna. Ñucaca Kiribati, Nauru, Niue, Samoa, Samoa Norteamericana, Tokelau, Tonga, Tuvalu y Vanuatupi tiyaj congregacioncunatami visitana carcani. Chai tiempopica Fiyi llajtapi tiyaj sucursalmi chai islacunapi tiyaj congregacioncunata ricuj carca. Cunanca ñucapish, huauqui Jack Porterpish Autralasia comité de sucursalpimi sirvicunchij.

Huaquin islacunapi causajcunaca testigo de Jehovacunatami manchajcuna carca. Chaimantami ñucanchijca alli yuyashpa imatapish rurana carcanchij (Mateo 10:16). Huaquin congregacioncunapi ashalla huauqui panicuna tiyashcamantami, paicunapaj huasicunapi pozadata cunataca mana cui pudircacuna. Chaimantami huaquinpica mana Testigo gentecunapaj huasicunapi saquirij carcanchij. Paicunaca allimi ñucanchijtaca tratarcacuna.

Winston, ¿imamantataj traducinataca achcata munangui?

Tonga nishca islapi causajcunaca tongano shimitami parlancuna. Chai punllacunapica paicunapaj shimipimi ashalla publicacioncuna tiyarca. Inglés shimipi La verdad que lleva a vida eterna nishca librohuanmi estudiajcuna carca. Chai punllacunallapitajmi ancianocunapajca shuj curso tiyarca. Chai cursopi cashpapish quimsa ancianocunami tongano shimiman La verdad nishca librota traducircacuna. Ñuca huarmica maquinapi escribishpami ayudarca. Qꞌuipaca Estados Unidospi chai librota imprimichunmi cacharcanchij. Cai tucui trabajotaca 8 semanacunapillami tucurchircanchij. Huauquicuna mana tanto intidirinalla shimicunapi traducishca cajpipish achcacunami Diosmanta yachai callarircacuna. Ñucapish ñuca huarmipish traducinataca mana yacharcanchijchu. Pero gentecuna Bibliamanta yachana munaita charishcata ricushpami traducinata munarcanchij.

Pamela, ¿chai islacunapi causanaca Australia llajtapi shinachu carca?

Mana. Chai islacunapi causanaca sinchimi carca. Huaquin lugarcunapica achca chuspicuna, achca piricucuna, ungüicunami tiyarca. Shinallataj juillu cunuj pushtucunami tiyarca. Huaquin punllacunaca ashalla micunatami charircanchij. La mayoría gentecunaca fale nishca huasicunapimi causajcuna carca. Chai huasicunaca jahuata ugshahuan tapachishcallami carca. Ña tutayamujpi huasiman chayashpaca mama cucha yacuta, lunatami ricuj carcanchij. Chaicunata ricui horasmi Yaya Diosta mañaj carcanchij. Chashnami llaquilla sintirinapaj randica cushilla sintircanchij.

Huahuacunaca blanco gentecunata ricushpaca ashatami mancharijcuna carca. Shuj cutinca, Niue islamanmi rircanchij. Chaipimi shuj huahuaca ñuca cusapaj rigra millmata tuparishpaca, “cambaj plumacunatami munani” nirca. Paica runacuna rigrapi millmata charijtaca mana nunca ricushcachu carca. Chaimantami shina nirca.

Chai islacunaca alajami carca. Pero doctorcuna, yanuna yacupish mana tanto tiyarcachu. Pobrella gentecunata ricushpami llaquilla sintirircanchij. Ñucanchij huauqui panicunaca cashna shina causaita charishpapish tranquilomi causajcuna carca. Paicunaca familiacunapaj cꞌuchullapi causashcamanta, Jehová Diostapish tandalla sirvishcamantami cushilla sintirijcuna carca. Paicunata ricushpami ñucanchijpish minishtirishcallahuan causanata yacharcanchij.

Pamela, ¿yacutaca maimantataj apamuj carcangui? ¿Ima shinataj yanuj carcangui?

Ñuca yayitumi tullpapi yanunata, minishtirishca cosascunahuan causanata yachachirca. Chaimantami paitaca achcata agradicini. Shuj punllaca Kiribati llajtamanmi rircanchij. Chaipica ugsha huasipimi saquirircanchij. Chai huasica patacunapish carrisohuan, pambapish coralhuanmi rurashca carca. Yanungapajca shuj tullpatami rurarcani. Nina japirichunca coco millmacunatami churaj carcani. Cutin yacutaca shuj pozomantami apamuna carcani. Pozomanta yacuta llujchingapajca filapimi achca huarmicuna shayacushca carcacuna. Yacuta llujchingapajca 2 metros caspi puntapimi shuj baldeta huatajcuna carca. Ñucaca baldeta pozopi shitashpaca nima yacuta mana llujchi tucurcanichu. Chaita ricushpami huaquin huarmicunaca asircacuna. Pero shuj huarmimi yacuta ima shina llujchinata yachachirca. Chai islapi causajcunaca ñucanchijtaca cꞌuyaihuanmi ayudajcuna carca.

Winston, Pamela Diostaca cushillami sirvircanguichij. ¿Islacunapi causajcunaca ima shinataj carca?

Winston: Huauqui panicunaca carupi causashcamantami shujtaj testigocunata mana rijsircacuna. Chaimantami cada seis quilla paicunata visitachun cushilla shuyajcuna carca. Pero paicunapaj costumbrecunataca mana ratochu intindircanchij. Por ejemplo, micunata carashpaca tucuimi carajcuna carca. Paicunapaj micunata sobrachina cashcata mana yachashcamantami tucui micuj carcanchij. Pero qꞌuipaca micunata sobrachina cashcatami cuenta japircanchij. Ñucanchij chashna rurajpipish huauqui panicunaca pacienciatami charijcuna carca.

Achca gentecunami, cai islallapimi testigo de Jehovacunaca tiyan nishpa yuyajcuna carca. Pero ñucapish ñuca huarmipish huauqui panicunata visitanaman rijpica muyundij Allpapi testigocuna tiyashcatami cuenta japircacuna.

Pamela: Kiribati llajtapica uchilla congregacionmi tiyarca. Chai congregacionpica shuj ancianollami tiyarca. Paica Itinikai Matera nishca turimi carca. Paica ñucanchijta alli chasquingapajmi tucuita ruraj carca. Shuj punllaca canastapimi shuj lulunllata ñucanchijpaj apamushcarca. Chai llajtapica luluncunaca mana tanto tiyajchu carca. Chai turi ñucanchijmanta sustarishcata ricushpami cushilla sintirircanchij.

Pamela, cambaj huahuaca huijsapi cashparajmi huañushcarca. ¿Cai jatun llaquita ahuantangapajca imatataj rurarcangui?

1973 huatapi, Pacífico Sur llajtapi cashpami huijsayuj tucurcani. Chaimantami Australia llajtaman tigrarcanchij. Pero chuscu quilla qꞌuipallami ñuca huahuaca huijsapi huañurca. Ñucapish, ñuca cusapish dimastij llaquillami sintircanchij. Achca huatacuna qꞌuipaca La Atalaya del 15 de abril de 2009 revistapimi, “¿Shuj huahua huijsapi huañushpaca cutin causaringachu?” nishca tapui llujshirca. Chaipica: ‘Diosca, mamapaj huijsapi huañuj huahuacunata causachinata o mana causachinatami ricunga. Paica cashcata rurajmi can. Chaimantami Diablopaj ruraicunata chingachichunca Jesusta agllashca. Chashnami Yaya Diosca libri llaquicunata tucuchinga’ nircami (1 Juan 3:8). Chaita liyishpami tranquilo sintirircanchij. Shinallataj Dios cusha nishcacunata japina yuyailla causanatami yacharcanchij.

Ñucanchij huahua huañushca huashaca Australia Betelpimi asha quillacunata sirvircanchij. Qꞌuipaca ñuca cusaca cutinmi superintendente shina sirvi callarirca. 1977 huatamanta 1981 huatacamaca Nueva Gales del Sur, Sydney llajtacunapimi chashna sirvircanchij. Chai huashaca Australia Betelmanmi cutin invitarcacuna. Cunancamami chaipi sirvicunchij. Pero cunanca chai Beteltaca Australasia sucursal nishpami rijsinchij.

Winston, manaraj comité de sucursalpi sirvishpaca achca islacunapimi sirvircangui. ¿Chai islacunapi causaj testigocunataca cunanca ima shinataj ayudangui?

Sucursalmanta cai huauqui panicunata ayudangapajmi sinchita trabajacuni. Puntaca Australia sucursalmanta Samoa y Samoa Norteamericana nishca llajtacunapi tiyaj congregacioncunatami ricuj carcanchij. Qꞌuipaca Nueva Zelandapi tiyaj congregacioncunatapishmi ayudai callarircanchij. Cunanca Australia, islas Cook, Niue, Nueva Zelanda, Samoa, Samoa Norteamericana, Timor Oriental, Tokelau y Tonga nishca llajtacunapi Diospaj obra ñaupajman catichunmi ayudacunchij. Chai llajtacunatami Australasia sucursalpaj shutipi visitashcani.

Caita tucuchingapajca caitami nisha ninchij: Jehová Diosca cꞌuyajmi can. Paica tucui gentecuna quishpirichunmi munan. Diostaca mana yuyajcunallachu mashcancuna. Jovencunapishmi paimanta yachanata munancuna. Familiacuna Diosta sirvichun jarcasha nijpipish ñaupajmanmi catina canchij (2 Reyes 5:2, 3; 2 Crónicas 34:1-3).

Bibliataca 50 huatacuna huashamanmi yachai callarircanchij. Cai tucui huatacunatami Yaya Diosta sirvingapajca achcata esforzarishcanchij. Diospaj yachachishcacunaca valishca perlacuna shinami can. Paimanta yachanataca manataj saquishunchu.