¿Ima shinataj Diospajman cꞌuchuyai tucunchij?

1. Diosca ¿tucui mañashcacunatachu uyan?

Tucuicuna paita mañashpa paipajman cꞌuchuyachunmi Diosca munan (Salmo 65:2). Shinapish, mana tucui mañashcacunatachu uyan. Shuj cusa paipaj huarmita maipish cachun rimajpica, Diosca cusapaj mañashcacunata mana uyanchu nishpami Bibliaca yachachin (1 Pedro 3:7). Israelitacuna cutin cutin mana allicunata rurajpica, paicunapaj mañashcacunataca Diosca mana uyarcachu. Shinapish, jatun juchacunapi urmajpipish shungumanta llaquirishpa Diosta mañajpica paica uyanmi. Isaías 1:​15; 55:7-ta rezapai.

Cai videota ricui: Diosca ¿tucui mañashcacunatachu uyan?

2. Diostaca ¿ima shinataj mañana canchij?

Jehová Dios ñucanchijta rurashcamanta, pai ñucanchij Dios cashcamantami paillata mañana canchij (Mateo 4:​10; 6:9). Juchayujcuna cashcamantaca Jesuspaj shutipimi mañana canchij. Jesusmi ñucanchij juchacunamanta huañurca (Juan 14:6). Cutin cutin chaillatataj nishpa o ima quillcashcata rezashpa mañachunca Diosca mana munanchu. Chaipaj randica shungumanta mañachunmi munan. Mateo 6:7; Filipenses 4:​6, 7-ta rezapai.

Shungu ucullapi mañajpipish ñucanchijta Ruraj Diosca uyanmi (1 Samuel 1:​12, 13). Ima horapish mañachunmi munan. Jataricushpa, dormigricushpa, micugricushpa, ima llaquicunata chꞌimbapuracushpapish Diosta mañanallami canchij. Salmo 55:22; Mateo 15:​36-ta rezapai.

3. Tandanacuicunaca ¿ima shinataj ayudan?

Diosta mana crij gentecunapurapimi causanchij. Paicunaca shamuj punllacunapi Dios imata ruragrijta parlajpica, chanzata rurashpami asincuna. Chaita ricushpami huaquinpica Diospajman cꞌuchuyanata saquisha nishun (2 Timoteo 3:​1, 4; 2 Pedro 3:​3, 13). Chaimantami caishujmanta chaishujmanta cushichinacungapaj tandanacuna canchij. Hebreos 10:​24, 25-ta rezapai.

Diosta servijcunahuan tandanacushpaca ashtahuanmi Diospajman cꞌuchuyashun. Testigo de Jehovacunapaj tandanacuicunaca paicunapaj alli causaita, paicunapaj crishcata ricushpa ñaupajman catichunmi ayudanga. Romanos 1:​11, 12-ta rezapai.

4. ¿Ima shinataj Diospajman cꞌuchuyai tucungui?

Bibliapi yachashcata yuyarishpami Diospajman ashtahuan cꞌuchuyai tucungui. Dios rurashcacunapi, pai mandashcacunapi, pai imata rurasha nishcapimi alli yuyana cangui. Bibliapi yachashcata alli yuyana, Diosta mañanaca, Dios tucuita yalli cꞌuyaj, alli yachaj cashcata entendichunmi ayudanga. Josué 1:8; Salmo 1:​1-3-ta rezapai.

Diospi crishpa, paipi shunguta churashpallami paipajman ashtahuan cꞌuchuyangui. Diosta crinaca tarpushca granocuna shinami can. Tarpushcacunapica yacuta, abonota churanami minishtirin. Ñucanchij crishcacunata tarpushca granocunata shina cuidangapajca imamanta chashna crishcatami alli yuyarina canchij. Mateo 4:4; Hebreos 11:​1, 6-ta rezapai.

5. Diospajman cꞌuchuyashpaca ¿ima bendicioncunatataj charishun?

Paita cꞌuyajcunataca Diosca achcatami cꞌuyan. Ñucanchij crishcacunamanta, huiñai causaita japinamanta ama imapish caruyachichunmi Diosca cuidan (Salmo 91:​1, 2, 7-10). Llaquipi churaj mana alli ruraicunapipish ama urmachun, cushilla causachunmi Diosca yachachin. Salmo 73:​27, 28; Santiago 4:​4, 8-ta rezapai.