¿Diosca cashna causachunchu munarca?

¿TELEVISIONPI, radiopica ima laya noticiacunatataj uyanchij? Shuhuacuna, macanacuicuna, huañuchijcunapish tiyashcatami uyanchij. Shinallataj ñucanchijllapitaj yuyashun. Familiacuna ungushcamanta, huañushcamanta llaquillachari canchij. Canpish Job shinachari “musparina llaquicunamari jahuanpi shamushca” nishpa yuyacungui (Job 3:26).

Cashna tapurishcanguichu:

• ¿Ñucapish, shujtaj gentecunapish llaquilla causachunchu Diosca munarca?

• ¿Llaquicunata chꞌimbapurangapajca imataj ayudai tucun?

• ¿Cai Allpapica cushilla causai tucushunchu?

Cai tapuicunataca Bibliami alli cutichin.

BIBLIAPICA DIOSMI CUSHILLA CAUSAITA CAI ALLPAMAN APAMUNGA NINMI.

‘Diosca paicunapaj ñahuicunamantaca, tucui huiquitami pꞌichanga. Huañuipish, huacaipish, llaquipish, nanaipish ña mana ashtahuan tiyangachu.’ (Apocalipsis 21:4)

“Cojocunapish taruga shinami saltacungacuna.” (Isaías 35:6)

‘Mana ricujcunapaj ñahuicunapish pascashcami canga.’ (Isaías 35:5)

Diosca huañushcacunata causachingami. (Juan 5:28, 29)

‘Caipi causajcunaca “ungushcami cani” nishpa pi mana ningacunachu.’ (Isaías 33:24)

‘Allpapica urcu puntacunacamami grano pꞌucunga.’ (Salmo 72:16)

BIBLIAMANTA YACHASHPA CUSHILLA CAUSAI

Página 4 y 5-pi ricurij yuyaicunaca “shuj muscuillami can” nishpa ama yuyaichu. Diosmi chaitaca rurasha nin. Pai ima shina pajtachinataca Bibliapimi yachachin.

Shinallataj cunan punllacunapi cushilla causangapaj imata rurana cashcatami Bibliaca yachachin. Cunanca canpi yuyai. ¿Huaquinpi cullqui illaj saquirishcanguichu? ¿Familia ucupi problemacunata charishcanguichu? ¿Familiata ungüicuna japishcachu? ¿Maijanpish huañushcachu? Cai laya llaquicunata chꞌimbapurangapajmi Bibliaca ayudan. Catij tapuicunatapish cutichishpami Bibliaca ñucanchijta cushichin:

• ¿Imamantataj llaquilla causanchij?

• ¿Llaquicuna japijpica imatataj rurana canchij?

• ¿Familiahuan cushilla causangapajca imatataj rurana canchij?

• ¿Huañushpaca imashi tucunchij?

• ¿Ñucanchij huañushca familiacunata cutin ricushunchu?

• ¿Dios imata rurasha nishpapish pajtachinataj cashcataca imamantataj crina canchij?

Cai librota rezacushpaca Bibliamanta yachasha nishcatami ricuchingui. Cai libroca achcatami ayudanga. Paginacunapaj ura chaquipica cada parrafopaj tapuicunami ricurin. Testigo de Jehovacunaca tapushpa, cutichishpami Bibliamanta yachachinchij. Achca gentecunami chashna yachachichun munan. Canpish chashna yachasha nishpaca allimi canga. Biblia imata yachachishcata can alli entendichun Yaya Dios ayudachun.