ña mandacurca. Shinashpaca Danielpaj profeciaca Jesús manaraj huacharijpi 455 huatapimi pajtari callarirca.

Danielca chai huatamanta callarishpa Mesías chayangacama mashna huatacuna pasana cashcatami huillan. Danielpaj profeciapica “canchis semanacuna, sujta chunga ishqui semanacunami canga” ninmi. Sumajpica 69 semanacunami tucun. ¿69 semanacunaca mashna huatacunataj can? Achca Bibliacunapi ricuchishca shinaca, chai semanacunaca mana 7 punllacunatachu charirca, chai semanacunaca 7 huatacunatami charirca. Ñaupa judiocunaca 7 huatacunata charij semanacuna tiyashcataca allimi entendircacuna. Por ejemplo, cada 6 huatacuna qꞌuipaca sábado nishca shuj huatatami yuyarina carca (Éxodo 23:10, 11). Shinashpaca 69 semanacunaca, cada semanami 7 huatacunata charin. Cuentata rurajpica 483 huatacunami tucun.

Cunanca chai huatacunata cuentanallami minishtirin. Jesús manaraj huacharishca 455 huatamanta, 483 huatacunata menosyachishpa cuentajpica, Jesús huacharishca qꞌuipa 29 huatamanmi chayanchij. Chai huatapi bautizarishpami Jesusca Mesías tucurca (Lucas 3:1, 2, 21, 22).a ¿Manachu Danielpaj profeciaca alli pajtarishca?

JEHOVÁ DIOSCA Bibliata quillcaj profetacunamanmi Quishpichij Mesiasmanta huillarca. Maipi huacharinata, ima shina huillanata, ima shina huañunatami paicunaman huillarca. Chaita ricushpaca jahuallami Mesías pi cashcata yachanchij. Profetacuna huillashcacunaca tucuimi Jesuspi pajtarirca. Mesías maipi huacharishcata, huahua cashpa ima tucushcata ricuchij tucui profeciacuna ima shina pajtarishcata ricushun.

Profeta Isaiasca, Davidpaj familiamantami Mesiasca shamunga nircami (Isaías 9:7). Chaica pajtarircami, Jesusca rey Davidpaj familiamantami shamurca (Mateo 1:1, 6-17).

Diospaj profeta Miqueaspish, Mesiasca ‘Efrata llajtapi caj Belenpimi’ huacharinga, paica mandajmi canga nircami (Miqueas 5:2). Jesús huacharina punllacunapica Israel llajtapica ishqui Belén llajtacunami tiyarca. Shujca janaj lado Nazaret cꞌuchupimi carca. Caishujca ura lado Jerusalén cꞌuchupimi carca. Jerusalén cꞌuchupi caj Belén llajtami ñaupaca Efrata shuti carca. Jesús chai llajtapi huacharijpimi chai huillashca profeciaca pajtarirca (Mateo 2:1).

Shujtaj profeciapica, paipaj Churita ‘Egipto’ llajtamanta Dios cayana cashcatami huillarca. Chaica pajtarircami. Jesús uchilla cajpica Egipto llajtamanmi pusharcacuna. Qꞌuipaca rey Herodes huañujpimi paipaj llajtaman tigrarca. Cai profeciapish pajtarircami (Oseas 11:1; Mateo 2:15).

Página 200-pi, “Profecía” filapica Mesías imalla tucuna cashcata huillaj versocunami ricurin. Chai versocunata, “Pajtarishca” filahuan chꞌimbapurashpa yachai. Chashna rurashpaca Diospaj Shimi mana llulla cashcatami tucui shunguhuan cringui.

Cai versocunata rezacushpaca, Jesús manaraj huacharijpi achca huatacuna ñaupaman quillcashcatami yuyarina cangui. Jesusllatajmi cashna nirca: “Moisés Mandashcapipish, Profetacuna quillcashcapipish, Salmocunapipish ñucamanta tucui imalla tucuna cashcata huillashcacuna pajtachunmi chashna tucurca” nircami (Lucas 24:44). Cambaj Bibliallapitaj ricushca shinaca tucui profeciacunami pajtarirca.

ACHCA gentecunami Trinidadpi crin. Yayapish, Churipish, jucha illaj Espiritupish shujllami can, igualmi can, tucuitami rurai tucun, paicunataca pipish mana rurarcachu nincunami. Shinashpaca Trinidadpi crijcunaca, Yayapish Diosmi can, Churipish Diosmi can, jucha illaj Espiritupish Diosmi can nincunami. Chashna yuyashpaca shujlla Diosmi can nincunami.