TAPUI 9
¿Evolucionpi crinachu cani?
¿IMATATAJ RURANGUIMAN?
Caipi yuyai: Alexca Dios tucuita rurashcatami crin, shinapish colegiopica shuj profesorca gentecunaca evolucionmantami shamunchij nishpami yachachin. Chashna nijpimi Alexca: ¿Ciertochu canga? nishpa yuyan. “Cientificocuna chaita nijpica ñucaca evolucionpimi crina cani” nishpami yuyacun.
Can Álex cashpaca, ¿librocunapi evolucionmanta yachachishcallamantachu crina cangui?
YUYAI
Huaquin gentecunaca tucui tiyashcacunaca yangamanta tiyai callarircallami nincunami. Shujtajcunaca Diosmi tucuita rurarca nincunami. Imamantataj chaita cringui nijpica mana imata ni tucuncunachu.
Huaquincunaca Dios tucuita rurashcataca iglesiapi yachachishcallamantami chashna crincuna.
Shujtajcunaca colegiopi yachachijpimi evolucionpi crincuna.
CASHNAMI TAPURINA CANGUI
Hebreos 3:4-pica: “Tucui huasicunaca gentecuna rurashcallami.Ashtahuanpish tucui imalla tiyajcunata rurajca Diosmi” ninmi. ¿Cai versopi nishcataca cringuichu?
“Tucui imalla tiyashcacuna yangamanta tiyai callarircallami” nijcunaca shuj huasitapish pi mana rurarcachu nishpa pandata yuyaj shinami can.
HUAQUINCUNACA: Shuj jatun tugyai tiyashcamantami cai Allpapish tucui imalla tiyashcacunapish tiyai callarirca nincunami. Chaitaca Big Bang nishpami rijsincuna.
1 ¿Big Bang nishcaca imamantataj tiyarca?
2 ¿Tucui imalla tiyashcacunaca yangamantachu tiyai callarirca? O ¿pi rurajpichu tiyai callarirca? ¿Imatataj ninguiman?
SHUJTAJCUNACA: Gentecunaca animalcunamantami shamunchij nincunami.
3 Monocunamanta shamushpaca ¿imamantataj gentecunaca monocunata yalli ashtahuan yachajcuna canchij?
4 Shuj robotta rurangapajca alli yachaj runami minishtirin. Yuyai: ¿Gentecunataca manachu shuj ashtahuan alli yachaj rurashca canga?
CUTIN SHUJTACUNACA: Evolucionca ciertomi can nincunami.
5 Evolucionpi crij gentecunaca, ¿paicunallatajchu estudiashpa yachashcacuna canga?
6 Yachaj gentecunaca evolucionca ciertomi can nincunami. ¿Mashna gentecunataj paicuna chashna nishcallamanta evolucionpi crincuna?
Juliaca: “Shuj bosqueta puricushpa, shuj sumaj huasita ricushpaca yuracuna chaipi urmashcamantami chai huasi ricurishca nishpaca mana yuyanguimanchu. Ashtahuanpish pimi rurashca canga ninguimanmi. Shinaca, ¿imamantataj tucui tiyashcacunaca yangamanta ricurircalla nishpa crina canchij?” ninmi.
Huen shuti huarmica: “Shuj fabricami tugyarca. Chaipi tiyaj tintacuna tucui ladocunata jicharishcamantami shuj jatun diccionario ricurirca nijpica ¿cringuimanchu?” ninmi.
¿IMAMANTATAJ DIOSPI CRINGUI?
Bibliapica ima alli cashcatapish ima mana alli cashcatapish alli ricuichij ninmi (1 Tesalonicenses 5:21). Canca allimi ricuna cangui, mana cai catij yuyaicunata catishpallachu Diospi crina cangui:
CAN YUYASHCAMANTA: “Ñuca shungu ucupica achca poderta charij Dios tiyashcatami yuyani”.
SHUJTAJCUNA CRISHCAMANTA: “Ñuca llajtapica tucuicunami Diospi crincuna”.
SHUJTAJCUNA CRICHUN NISHCAMANTA: “Ñuca familiaca Diospimi crina cangui nincunami”.
Shujtajcuna nishcallapi crinapaj randica, imamanta Diospi crishcatami alli angui.
Teresaca: “Colegiopi ñucanchij cuerpo ima shina cashcata ñucanchijman yachachijpica Dios tiyashcatami ashtahuan crini. Tucui ñucanchij cuerpoca imata rurangapajpish valishcami can. ¡Chaita yachanaca sumajmi can!” ninmi.
Ricardoca:“Jatun edificiota ricushpa, barcota o carrota ricushpaca ‘¿pitaj chaita rurarca?’ nishpami tapurini. Carroca achca piezacunatami charin. Carro alli purichunca shuj alli yachaj runami rurashca canga. Carrota alli yachaj runa rurashca cajpica, ¿manachu gentecunataca maijan ashtahuan alli yachaj rurashca canga?” ninmi.
Antonioca: “Colegiopi cienciamanta ashtahuan yachachijpica evolucionpica ña mana crinichu. Ñucaca, evolucionpi crinapaj randica Dios tucuita rurashcatami ashtahuan crini” ninmi.
CAIPI YUYAI
Cientificocunaca achca tiempota estudiashpapish evolucionmantaca chꞌican chꞌican yuyaicunatami charincuna. Yachajcunami canchij nishpapish mana shujlla yuyaicunata charincunachu. Shinaca, ¿evolucionpi crinachu canchij?