Septiembre quillamanta callarishpaca, cai pꞌangapica “Bibliahuan yachachishunchij” nishca mushuj presentacioncunami llujshinga. Chashnami shuj tapuihuan, shuj versohuan Biblia imata yachachishcata shujtajcunaman ricuchi tucushun.

Gentecuna ashtahuan yachasha nijpica, cutin visitangapajmi shuj publicacionta saqui tucunchij o shuj videotami ricuchi tucunchij. Parlanacushpaca asha punllacuna qꞌuipallami tigrana canchij. Mushuj presentacioncuna taca Yachachin libromantami surcushun. Chai libropica cada capítulo tucurijpimi shuj cuadro ricurin. Chai cuadropi ricurij versocunaca gentecunata cutin visitangapaj, Bibliallahuan yachachingapajmi ayudan.

Huiñai causaita charingapajca shuj solo ñanmi tiyan (Mt 7:13, 14). Ñucanchijca chꞌican chꞌican llajtacunamanta gentecunahuan, chꞌican chꞌican costumbrecunata charij gentecunahuami parlanacunchij. Chaimantami paicuna yachana munaita charichun sumajta yachachina canchij (1Ti 2:4). Biblia imallata yachachishcata ricushpa, Bibliahuan alli yachachishpaca cushicushpami huillashun, shinallataj achca gentecunami Bibliamanta ñucanchijhuan yachangacuna (2Ti 2:15).

Muyundij allpapimi gentecunaca llaquilla causashcamanta ayudachun minishtincuna (Ec 4:1). Septiembrepica Huillaj revistatami tucui gentecunaman saquina canchij. ¿Ñucanchijtaca pitaj ayudai tucun? Cai revistami chaita yachachin. Shinashpaca, llaquilla cajcunata ayudana cashcamantaca ñahui ñahui parlanacushpami revistata saquina canchij. Chaimanta huasipi mana pi cajpica revistata mana saquinachu canchij.

REVISTAHUAN CASHNA HUILLASHUNCHIJ

“Tucuicunami llaquilla cashpaca ayudachun minishtinchij. ¿Pitaj ñucanchijta ayudai tucun? [2 Corintios 1:3, 4-ta leyipai]. Cai revistaca llaquilla cajpi Yaya Dios ñucanchijta ayudai tucushcatami yachachin”.

Gentecuna ashtahuan yachasha nishpa revistata chasquijpica:

¿IMAMANTATAJ BIBLIAMANTA YACHANA CANCHIJ? VIDEOTA RICUCHI

Qꞌuipaca Bibliamantami yachachisha nini ni.

CUTIN VISITANGAPAJ ALLI PARLANACUI

¿Diosca imamantataj llaquicuna tiyachun saquishca?, nishpa tapui o shujtaj tapuita rurai. Tigramushpami cutichisha nishpa ri.