Diosca ¿pitaj can?

1. ¿Imamantataj Diosta adorana canchij?

Ñucanchijman causaita cushcamanta, tucuita rurashcamantami Diosllata adorana canchij. Paica, ñaupa tiempomanta, huiñai huiñaicama causaj Diosmi can (Salmo 90:2). Bibliapi tiyaj alli huillaicunataca paimi cushca (1 Timoteo 1:11). Apocalipsis 4:​11-ta rezapai.

2. ¿Diosca ima shinataj can?

Diosca mana ñucanchij shina aichayuj tulluyujchu can. Shuj espiritumi can. Chaimantami paitaca mana ricui tucunchij (Juan 1:18; 4:24). Pai rurashcacunata ricushpami pai ima shina cashcata yachai tucunchij. Diosca tucui laya frutacunata, sisacunata rurashpami cꞌuyaj, alli yachaj cashcata ricuchishca. Jahua pachata, cai pachata ricushpami Yaya Dios achca poderta charishcata yachanchij. Romanos 1:​20-ta rezapai.

Shinallataj Bibliata rezashpami Diosta rijsi tucunchij. Gentecunata Dios ima shina cuidashcata, ima ruraicuna paipaj ñaupajpi alli o mana alli cashcata, pai ima shina sintirishcatapish Bibliapimi yachachin. Salmo 103:​7-​10-ta rezapai.

3. ¿Diosca ima shutitaj can?

Jesús yachachishpaca ‘Jahua pachapi caj ñucanchij Yaya, cambaj jucha illaj shutica, alli nishca cachun’ nircami (Mateo 6:9, QCH 2010). Jatun Dios, Mandaj Dios nishpa Yaya Diosta rijsijpipish, paica shuj shutitami charin. Shujtaj shimicunapi chꞌican chꞌican laya nijpipish quichuapica Jehová ninchijmi. Huaquincunaca Yavé ninmi. Bibliapica ninmi: “Cambaj shuti Jehová cashcata gentecuna yachachun” nishpa (Salmo 83:​18, NM). Castellano o español Bibliacunapica achca versocunapimi Diospaj shutica ricurin.

Tauca Bibliacunapica Diospaj shutita churanapaj randica, Mandaj Dios, Jatun Dios nishpami churashca. Shinapish, Bibliata ñaupa quillcashca shimicunapica Diospaj shutica casi 7.000 cutinmi ricurin. Gentecunaman yachachishpaca Jesusca Diospaj shutitapishmi huillarca. Hebreos 2:​12-ta, Biblia en Quichua Chimborazo, 2010-pi rezapai.

Cai videota ricui: ¿Diosca ima shutitaj can?

4. ¿Diosca ñucanchijmanta preocuparinchu?

Jehová Dios ñucanchijta cꞌuyashpaca, ¿imamantataj llaquicuna tiyachun saquishca? Huaquincunaca ninmi paita cꞌuyashcata ricuchichunmi pruebacunata churan nishpa. Mana chashnachu can. Job 34:​10-ta rezapai.

Jehová Diosca allita o mana allita ñucanchijllataj agllachunmi saquishca. Imata agllai tucushpapish, Diosta servinatami agllana canchij (Josué 24:15). Achca gentecunaca mana allita ruranatami agllan. Chaimantami achca llaquicuna tiyan. Llaquicunata ricushpaca Diosca achcatami llaquirin. Génesis 6:​5, 6-ta rezapai.

Ñucanchijta cꞌuyashcamantami Jehová Diosca cushilla causachun munan. Paica ñallami tucui llaquicunata tucuchinga. Shinapish ¿imamantataj llaquicuna tiyachun saquishca? Chaitaca página 16, 17-pimi yachashun. 2 Pedro 2:9; 3:​7, 13-ta rezapai.

5. ¿Ima shinataj Diospajman cꞌuchuyai tucunchij?

Jehová Diosca ñucanchijmanta preocuparishcamantami paipajman cꞌuchuyachun munan. Chaipajca paitami mañana canchij (Salmo 65:2; 145:18). Huaquinpi pandarishpapish paipaj munaita rurajpica Diosca cushicunmi. Ñucanchij juchacunata perdonangapajpish shuyacunmi. Juchayujcuna cashpapish Diospaj amigocuna tucunata pudinchijmi. Salmo 103:​12-​14; Santiago 4:8-ta rezapai.

Dios causaita cushcamantami tucuimanta yallica paita cꞌuyana canchij (Marcos 12:30). Paimanta yachashpa, pai mandashcacunata cꞌazushpami paita cꞌuyashcata ricuchinchij. Chashnami Diospajman ashtahuan cꞌuchuyashun. 1 Timoteo 2:4; 1 Juan 5:3-ta rezapai.