CAPÍTULO 8
¿Diospaj gobiernoca imataj can?
1. ¿Jesusca paita catijcunamanca imatataj yachachirca?
JESÚS cai Allpapi cashpaca Yaya Diosta ima shina mañanatami paita catijcunamanca yachachirca. Chai mañaitaca padrenuestro oración nishpami rijsinchij.
2. ¿Jesusca ima shina mañachuntaj yachachirca?
2 Jesusca: ‘Diostaca, jahua pachapi caj ñucanchij Yaya, cambaj jucha illaj shutitaca, alli nishca cachun. Can mandana punlla [o cambaj gobierno, NM] ña chayamuchun. Jahua pachapipish cai pachapipish cambaj munai pajtarichun nishpa mañanguichij’ nircami (Mateo 6:9-13). Jesusca ¿imamantataj shina mañachun yachachirca? (Nota 20-ta ricui).
3. ¿Cunanca imatataj yachagrinchij?
3 Diospaj shuti Jehová cashcata, cai Allpapi alaja causaita cugrishcataca ñami yachashcanchij. Cunanca cai tapuicunamantami yachagrinchij: Jesusca, ‘cambaj gobierno shamuchun’ nishpaca ¿imatataj yachachisha nirca? ¿Diospaj gobiernoca imataj can? Diospaj shuti alli nishca cachun, gentecuna alli causachunca ¿cai gobiernoca imatataj ruranga?
¿DIOSPAJ GOBIERNOCA IMATAJ CAN?
4. a) ¿Diospaj gobiernoca imataj can? b) ¿Diosca paipaj gobiernopi mandaj cachunca pitataj agllashca?
4 Diospaj gobiernoca jahua pachapi Yaya Dios churashca shuj gobiernomi can. Chai gobiernopi mandaj cachunca Diosca Jesustami agllashca. Chaimantami Bibliapica Jesustaca: “Mandajcunapajpish Mandaj, Jatun Mandajcunapajpish Jatun Mandaj” nin (Apocalipsis 17:14). Jesusca tucui mandajcunata yalli poderta charishcamantami ñucanchijpajca allicunata ruranga.
5. a) ¿Diospaj gobiernoca maimantataj mandanga? b) ¿Chai gobiernoca picunatataj mandanga?
5 Jesusca 40 punllacuna causarishca huashami jahua pachaman tigrarca. Chai qꞌuipami Jehová Diosca paipaj gobiernopi Rey cachun Jesustaca churarca (Hechos 2:33). Diospaj gobiernoca jahua pachamantami cai Allpapi causajcunata mandanga (Apocalipsis 11:15). Chaimantami Bibliapica ‘Diospaj gobiernoca jahua pachapimi can’ nin (2 Timoteo 4:18).
6, 7. ¿Jesusca imamantataj cai pacha mandajcuna shina mana can?
6 Bibliapica Jesusmi tucui mandajcunamanta ashtahuan alli mandaj can ninmi. Cai Allpapi mandajcunaca tucuicunami huañun. Pero Jesusca nunca mana huañungachu (Romanos 6:9). Chaimantami Jesús ñucanchijpaj imata rurashcaca huiñaipaj alli canga.
7 Jesusca llaquij alli Reymi canga. Chaimantami Bibliapica: ‘Mandaj Diospaj espiritumi paipi causanga. Chai espirituca: Yuyaisapa canata, alli yachaita, imatapish rurai tucunata, imatapish yachaj canata, Mandaj Diosllata manchana yuyaita cuj espiritumi canga’ ninmi. Shinallataj Jesús mandacushpaca, ñahuita ricushpallaca mana mandangachu. ‘Paica shujtajcuna huillashcata uyashcallahuanca mana allichingachu. Ashtahuanpish paica pi parte mana tucushpami, huajchacunataca cashcata rurashpa allichinga’ ninmi (Isaías 11:2-4). ¿Cashna mandajta charinata munanguichu?
8. ¿Jesusllachu jahua pachapica mandagrin?
8 Bibliapica, Jesushuan jahua pachapi mandachunca Yaya Diosca huaquin gentecunatami agllashca ninmi. Chaimantami apóstol Pabloca Timoteomanca: “Llaquicunatapish apashpaca, paihuanmi mandashun” nirca (2 Timoteo 2:12). ¿Mashna gentecunataj Jesushuanca mandanga?
9. a) ¿Jesusca mashna gentecunahuantaj mandanga? b) ¿Yaya Diosca ima horamantataj 144 mil gentecunataca agllai callarirca?
9 Apóstol Juanca shuj muscuipimi 144 mil gentecuna jahua cielopi Jesushuan mandacujta ricurca. Chaitaca capítulo 7-pimi ña yacharcanchij. ¿Cai 144 mil gentecunaca picunataj can? Jesushuan mandangapaj Diosta alli sirvijpuramanta agllashcacunami can. Chaimantami apóstol Juanca: ‘Paicunaca Oveja [o Jesús] maita rishcata catijcunami. Cai pachapi causajcunapaj chaupimanta randishpa quishpichishcacunami carca’ nirca (Apocalipsis 14:1, 4-ta liyipai). Cai agllashcacuna huañushpaca cielopimi causarincuna (Apocalipsis 5:10). Yaya Diosca 144 mil gentecunataca apostolcuna causai tiempomantami agllai callarirca.
10. ¿Jesuspish, 144 mil agllashcacunapish imamantataj alli mandajcuna canga?
10 Jesusca shuj alli mandajmi canga. Apóstol Pabloca, Jesuspish ñucanchij shinallatajmi llaquicunata ahuantarca nircami. Chaimantami Jesusca ñucanchij ima shina sintirijta, imapi pandarijtaca alli yachan (Hebreos 4:15; 5:8). Diosca ñucanchijta cꞌuyashpami Jesushuan mandachunca huaquin gentecunata agllashca. Cai 144 mil agllashcacunapish ñucanchij layallataj juchayujcuna cashcamantami ungüicunahuan, llaquicunahuan sufrircacuna. Chaimantami paicunaca ñucanchij causaitaca alli intindingacuna. Jesuspish, 144 mil agllashcacunapish ñucanchij problemacunata alli intindij cashcata yachashpami tranquilo sintirinchij.
¿DIOSPAJ GOBIERNOCA IMATATAJ RURANGA?
11. ¿Jesusca imamantataj ‘Diospaj munai jahua pachapi pajtarichun mañanguichij’ nirca?
11 Jesusca paita catijcunataca, ‘Diospaj munai jahua pachapipish pajtarichun Diosta mañanguichij’ nishpami yachachirca. ¿Imamantataj shina nirca? Capítulo 3-pi yachashca shinaca Diablomi Diospaj contra tucurca. Paipaj contra tucujpipish Jehová Diosca Diablotapish, millai angelcunatapish jahua pachapi asha tiempota causashpa catichunmi saquirca. Chaimantami jahua pachapica mana tucuicuna Diospaj munaita ruracurcacuna. Diablomanta, millai angelcunamantaca capítulo 10-pimi yachashun.
12. ¿Apocalipsis 12:10-pica ima ishqui yuyaicunamantataj parlan?
12 Bibliapi nishca shinaca, Jesusca Rey tucushca huashallami Diablohuan macanacuna carca (Apocalipsis 12:7-10-ta liyipai). Apocalipsis 12:10-pi nishca shinaca, puntapica Jesusca jahua pachapimi mandai callarina carca. Qꞌuipaca Diablotami cai Allpaman shitana carca. Cai ishqui yuyaicuna ima shina pajtarishcatami cunanca yachashun.
13. ¿Diablota cai Allpaman shitajpica alli angelcunaca ima shinataj sintirircacuna?
13 Diablota, millai angelcunata cai Allpaman shitajpimi alli angelcunaca cushicurcacuna. Chaimantami Apocalipsis 12:12-pica, “cielopish, chaipi causajcunapish cushicuichij” nin. Cunanca jahua pachapica Diospaj munaita rurashpami tucuicuna tandalla, cushilla causacuncuna.
Diablota, millai angelcunata cai Allpaman shitashca horasmantami achca llaquicunata charinchij. Pero chashna llaquicunaca ñallami tucuringa.
14. ¿Diablota cai Allpaman shitashcamantaca causaica ima shinataj can?
14 Cai Allpapi causaica mana jahua pachapi shinachu can. Diabloca jahua pachamanta paita shitajpi, “pai munashcata rurana punllacuna ashalla cashcata yachashpami, jatunta pꞌiñarishpa” cai Allpaman uriyamushca (Apocalipsis 12:12). Chaimantami Diabloca llaquicunata churashpa gentecunata llaquichicun.
15. ¿Yayitu Diosca cai Allpahuanca imatataj ruranata munan?
15 Diosca cai Allpa paraíso tucuchun, gentecunapish jucha illaj causachunmi munarca. Diospaj munaica cunancama mana cambiashcachu (Proverbios 2:21). ¿Diospaj gobiernoca ima shinataj cai Allpata shuj paraisota ruranga?
16, 17. ¿Daniel 2:44-pica imatataj yachachin?
16 Daniel 2:44-pica: “Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu” ninmi. ¿Cai versoca imatataj nisha nin?
17 Puntapica, ‘chai jatun mandajcuna mandacui punllacunapimi Diosca shuj mandanata o gobiernota churanga’ ninmi. ¿Caica imatataj yachachin? Diospaj gobierno mandashpa callarijpica huaquin gobiernocunami cai pachapica mandacunaraj carca. Shinallataj Diospaj gobiernoca huiñai huiñaitami mandanga, shujtaj gobiernocunaca mana tiyangachu. Ashtahuancarin Diospaj gobiernoca tucui gobiernocunata tucuchishpami cai Allpata para siempre mandanga. Diospaj gobierno chashna mandajpimi cai Allpapica sumajta causashun.
18. ¿Diospaj gobiernohuan cai pachapaj mandajcunahuan macanacuitaca ima shutihuantaj rijsinchij?
18 Diabloca cai pachapi mandajcunata umashpami, ‘tucuita rurai tucuj Diospaj jatun punllapaj tucui Allpa pachapi mandajcuna macanacunaman richun’ tandachinga. Cai macanacuitaca Armagedón nishpami rijsinchij. Armagedonpimi cai pacha mandajcunaca Diospaj gobiernohuan macanacungacuna (Apocalipsis 16:14, 16; nota 10-ta ricui).
19, 20. ¿Imamantataj Diospaj gobierno mandachun minishtinchij?
19 Juchayujcuna cashcamantami ungunchij, huañunchij. Pero Diospaj gobierno cai Allpata mandacujpica tucuicunami huiñaita causashun. Bibliapica: “Taita Diosca, cai pachapi causajcunataca yallitaj cꞌuyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” ninmi (Juan 3:16).
20 Achca gentecunami llullashpa, umashpa, huainayashpa causancuna. Paicuna mana cambiajpica Yayitu Diosca Armagedón macanacuipimi tucuchinga (Salmo 37:10-ta liyipai). Shinallataj cai pachapi mandajcunaca shuhuajcuna, llaquichijcunami can. Gentecunapaj problemacunatapish mana allichi tucushcacunachu. Ashtahuanpish gobiernocunaca gentecuna Yayitu Diosta cazuchunca mana ayudancunachu. Chaimantami Bibliapica, “shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” nin (Eclesiastés 8:9).
21. ¿Diospaj gobiernoca cai Allpapica imatataj ruranga?
21 Armagedón macanacui qꞌuipami Diospaj gobiernoca Yaya Dios munashcata cai Allpapi pajtachinga. Diablopish, millai angelcunapish huichcashcami cangacuna (Apocalipsis 20:1-3). Chai qꞌuipaca ungüicuna illajmi huiñaita causashun. Jesús quishpichishcamantami paraíso Allpapica chashna causashun (Apocalipsis 22:1-3; nota 21-ta ricui). Diospaj gobierno cai Allpata mandacujpimi tucui gentecunaca Diospaj shutitaca respetangacuna. Chashnami Diospaj shutica alli nishca canga.
¿JESUSCA IMA HORAMANTATAJ MANDAI CALLARIRCA?
22. ¿Jesusca jahua pachaman tigrashcahuanchu mandai callarirca?
22 Jesús cai Allpapi cashpaca, ‘Diosta mañacushpaca, can mandana punlla ña chayamuchun nishpa mañanguichij’ nircami. Chai punllacunapica Diospaj gobiernoca manaraj mandacurcachu. Puntapica Diosca paipaj gobiernopi mandachunmi Jesusta churana carca. ¿Jesús jahua pachaman tigrancachu Diosca paitaca mandaj cachun churarca? Mana. Jesús asha punllacuna causarishca huashami apóstol Pedropish, Pablopish Salmo 110:1-pi nishcacuna Jesuspi ima shina pajtarishcata alli intindichircacuna. Cai profeciapimi Diosca Jesustaca: ‘Canta pꞌiñajcunata cambaj chaqui sarunapi ñuca churangacama ñuca alli ladopi tiyari’ nirca (Hechos 2:32-35; Hebreos 10:12, 13). Chaimantami Jesusca Reyta shina nombrangacama jahua pachapi shuyana carca.
Diospaj gobiernomi cai Allpapica Diospaj munaita pajtachinga.
23. a) ¿Diospaj gobiernopica Jesusca ima horamantataj mandai callarirca? b) ¿Shamuj capitulopica imatataj yachashun?
23 Diospaj gobiernopica Jesusca 1914 huatapimi mandai callarirca. Diosta sirvijcunaca 1914 huatacuna manaraj chayajpimi Bibliapi nishca huaquin profeciacuna pajtarinataca alli intindircacuna. Chai huatacunapi imalla pasashcata ricushpami ñucanchijpish Jesús mandai callarishcata crinchij (Salmo 110:2; nota 22-ta ricui). Jesús mandai callarishca qꞌuipami Diablotaca cai Allpaman shitarca. Chaimantami Diablopajca “pai munashcata rurana punllacunaca” ashalla faltan ninchij (Apocalipsis 12:12). Catij yachaipimi Diablopaj “munashcata rurana punllacunaca” ashalla faltashcata yachashun. Shinallataj Diospaj gobierno cai Allpapi ima shina Diospaj munaita pajtachigrijtami ricushun.