Jesús shina causashunchij huillashunchij tandanacuipi yachanapaj ayudacuna
3-9 DE MAYO
BIBLIAPI TIYAJ VALISHCA YUYAICUNA | NÚMEROS 27-29
“Jehová Dios shina tucuicunata alli tratashunchij”
w13 15/6 pág. 10 párr. 14
Jehová Diosca tucuicunata igualtami chasquin
14 Zelofehadpaj 5 ushushicunami Moisespajman rishpaca: “Ñucanchij yaya churicunata mana charishcallamanta, paipaj shutita anchuchishpa familiacunata chingachinaca mana allichu” nircacuna. Shinallataj: “Ñucanchij yayapaj huauquicuna japishca allpamanta ashata chaupishpa ñucanchijman cuichij” nishpami mañarcacuna. ¿Moisesca imatataj rurarca? ¿‘Jehová Diospaj mandashcacunataca mana cambiai tucunichu’ nircachu? Mana. “Chai huarmicuna mañashcataca Mandaj Diostami tapugrirca” (Números 27:2-5). Jehová Diosca cashnami nirca: “Zelofehadpaj ushushicunaca paicuna japina cashcallatatajmi mañacuncuna. Paicunapaj yaya japina cashcataca paicunapaj yayapaj huauquicuna japishca allpamanta chaupishpa chai ushushicunaman cuichij” nircami. Pero chai huarmicunallaca mana beneficiarircachu. Ashtahuanpish Moisesmanca cashna nichunmi mandarca: “Israelcunamanta maijan cashpapish cꞌari huahuata mana charishpa huañujpica, pai japina cashcataca ushushicuna japichun” nircami (Números 27:6-8; Josué 17:1-6). Chai punllacunamantami Diospaj mandashcacunaca israelita huarmicuna chashna shina preocupacionta ama charichun ayudarca.
w13 15/6 pág. 11 párr. 15
Jehová Diosca tucuicunata igualtami chasquin
15 Jehová Diospaj mandashcacunaca sumajmi carca. Chaimantami paica tucui israelitacunata shinallataj ni pipaj ayudata mana charij huarmicunatapish igual tratarca (Salmo 68:5). Zelofehadpaj ushushicunapaj ejemplohuan, Bibliapi tiyaj shujtaj ejemplocunahuanpishmi Jehová Diosca tucui paita sirvijcunata igual tratashcata ricuchin (1 Samuel 16:1-13; Hechos 10:30-35, 44-48).
w13 15/6 pág. 11 párr. 16
Jehová Diosca tucuicunata igualtami chasquin
16 Jehová Dios shina tucuicunata igual tratangapajca ¿imatataj rurana canchij? Puntapica tucuicuna igual cashcatami yuyana canchij. Chashnami tucuicunata alli tratashun. Ñucanchijca pita mana chꞌicanyachishpa igualta trataj shinami yuyanchij. Shinapish juchayujcuna cashcamantami huaquinpica ñucanchij yuyaicunaca pandachinlla. Pero ¿shujtajcunaca yuyanchu ñucanchijcuna tucuicunata igualta tratashcata? Jesuspi yuyashun, paica shuj cutinca paipaj amigocunataca: “Runa Aichayujtaca gentecunaca ¿pi cashcatataj yuyancuna?” nishpami tapurca (Mateo 16:13, 14). Chai shinallatajmi ñucanchijcunaca shuj alli amigotaca: “¿Tucui gentecunatachu igualta tratani?” nishpa tapuna canchij. Chai amigollataj, ‘cullquiyuj gentecunata ricushpa, shujtaj raza gentecunata ricushpaca chꞌicanyachishpami tratangui’ nijpica ¿imatataj rurana canchij? Jehová Diostami mañana canchij ñucanchij yuyaicunata cambiangapaj, tucuipi pai shina yuyangapaj (Mateo 7:7; Colosenses 3:10, 11).
Bibliapi curita mashcaj shina mashcashunchij
it-2 pág. 525
Ofrendacuna
Vinota tallina. Moisesman cushca leypi mandashca shinaca, israelitacunaca Diosman sacrificiocunata cucushpaca vinotapishmi tallijcuna carca. Ashtahuantajca Dios cusha nishca Allpapi ña cashpami chashna sacrificiocunataca cujcuna carca (Números 15:2, 5, 8-10). Diosman sacrificiocunata cucushpaca alli vinotami altar jahuapi tallijcuna carca (Números 28:7, 14-taca Éxodo 30:9; Números 15:10-huan comparai). Apóstol Pablo Filipos crijcunaman quillcashpaca:“Diosta sirvicushcamanta, cancuna crishcamantapish, Diosman sacrificiota cushca jahuapi, vinota tallicushca shinami ñucaca cashcani. Chaimantami tucui cancunahuan cushicuni” nircami. Apóstol Pabloca tucui paipaj causaihuan huauqui panicunata sirvicushcamantami Diosman sacrificiota cushca jahuapi vinota tallicushca shinami cashcani nirca (Filipenses 2:17). Pai huañuna ñaupallami Timoteoman quillcashpaca: “Ñucaca Taita Diosman cushpa rupachinapaj animal jahuapi vinota tallicushca shinami cani. Ñuca rina punllapish cꞌuchullapimi” nircami (2 Timoteo 4:6, NM).
10-16 DE MAYO
BIBLIAPI TIYAJ VALISHCA YUYAICUNA | NÚMEROS 30, 31
“Ñucanchij ari nishcata pajtachishunchij”
it-2 pág. 1213 párr. 1
Ari nina
Ari nishcataca pajtachinatajmi carca. Israelitacunaca paicunapaj munaimantami ari nircacuna. Pero Diospaj Leypica shuj runa ari nishpaca chaitataj pajtachina cashcatami mandarca. Shinaca shuj israelita tucui almahuan Jehová Diosman ari nishcata mana pajtachishpaca paipaj causaihuanmi pagana carca (Números 30:2; Romanos 1:31, 32-ta ricupai). Shinaca causaica peligropimi carca. Chaimantami Bibliapica animan imatapish manaraj ari nishpa alli yuyarichun. Moisesman cushca leypica: “Mandaj Dios cancunapaj Taita Diosman imata cuna tucushpa cancuna mana pajtachijpica, Mandaj Dios cancunapaj Taita Diosca llaquichingami. Paipaj ñaupajpica juchayujmi tucunguichij. Can imata mana cuna tucushca cashpaca, mana juchayuj tucunguichu” nircami (Deuteronomio 23:21, 22).
it-2 pág. 1212
Ari nina
Jehová Diosmanmi shuj promesata rurashpa ari nijcuna carca. Por ejemplo ofrendata cungapaj, tucui causaipi paita sirvingapaj, shinallataj huaquin cosascunata ama rurangapajpish. Paicunapaj munaimantami chaicunata pajtachingapaj ari nijcuna carca. Ari ninaca shuj juramento shinami can. Chaimantami Bibliapi huaquin versocunapica ari nina, pajtachina shimicunaca ricurin (Números 30:2; Mateo 5:33). Ari ninaca shungupi imata yuyarishcata huillanami. Cutin juramentoca autoridadcunapaj ñaupajpi pajtachishatajmi nishcatami ricuchin. Pajtachina cashcata ricuchingapajmi shuj juramentota rurajcuna carca (Génesis 26:28; 31:44, 53).
w04 1/8 pág. 27 párr. 3
Numerosmanta valishca yuyaicuna
30:6-8. ¿Diosta sirvij cꞌaricunaca paicunapaj huarmicuna ari nishcataca jarcana derechota charinchu? Jehová Diosca cunan punllacunapi paita sirvijcuna cada uno ari ninacushcata rurachunmi munan. Por ejemplo Jehová Diosman mingaringapajca cada unomi shuj ari ninacuita ruranchij (Gálatas 6:5). Chai ari nishcataca cusacunaca mana chingachi tucunchu. Shinaca cutin huarmicunapish paicunapaj cusacunata ladoman saquishpa, Diospaj Shimipi mandashcata mana cazushpaca shuj ari ninacuita mana ruranachu can.
Bibliapi curita mashcaj shina mashcashunchij
it-2 pág. 26 párr. 3
Jefté
Ñaupa punllacunapi yaya mamacunaca paicunapaj huahuacuna tucui vida Jehová Diosta sirvichunmi Diospaj carpa huasipi saquigrijcuna carca. Jehová Diosmi yaya mamacunamanca chai derechota curca. Por ejemplo Anapi yuyashun. Paica paipaj huahua Samuel manaraj huacharijpimi Jehová Diospaj huasipi paita sirvichun saquigringapaj ari nirca. Chashna ari nishcata paipaj cusa Elqaná yachaj chayashpaca paita mana jarcarcachu. Ashtahuanpish de acuerdomi carca. Anaca paipaj huahua Samuelta chuchumanta raquishcahuanmi Diospaj huasiman aparca. Paihuanca shuj animaltapishmi sacrificiota rurangapaj aparca (1 Samuel 1:11, 22-28; 2:11). Cutin Sasonpish nazareo shina tucui vida Jehová Diosta sirvingapajmi mingarishca carca (Jueces 13:2-5, 11-14; yaya paipaj ushushimanta derechosta charishcata yachangapajca Números 30:3-5, 16-ta ricupai).
17-23 DE MAYO
BIBLIAPI TIYAJ VALISHCA YUYAICUNA | NÚMEROS 32, 33
“Chai llajtapi causajcunatami anchuchina canguichij”
w10 1/8 pág. 23
¿Yacharcanguichu?
¿Ñaupa Testamentopica achca cutin ‘lomacunapi tiyaj altarcunamantami’ parlan chaica imataj can?
Israelitacunaca Dios cusha nishca Allpamanmi ña yaicugrirca. Chai allpapica cananeocunami causarca. Chaimi Jehová Diosca cashna nirca: “Rumimanta rurashca dioscunatapish, fierrota yacuyachishpa imamanpish rijchaj paicunapaj dioscunatapish tucuita ñutunguichij. Lomacunapi rurashca paicunapaj altarcunatapish tucuita ñutunguichij” (Números 33:52). Lomacunapi tiyaj altarcunapimi cananeocunaca yanga dioscunata adorajcuna carca. Cai altarcunataca jahua lomacunapi, mana cashpaca rucu yura ucucunapi, huaquinpica cuidadcunapimi charircacuna (1 Reyes 14:23; 2 Reyes 17:29; Ezequiel 6:3). Chaipica altarcunallaca mana tiyarcachu ashtahuanpish columnas o racu caspicunami tiyarca. Shinallataj imagencuna, inciensota rupachingapaj cosascuna, shujtaj cosascunapishmi yanga dioscunata adorangapajca tiyarca.
w08 15/2 pág. 27 párrs. 5, 6
Israelitacuna shina ama pandarishunchij
Israelitacunapaj punllapica achca trampacunami tiyarca. Cunan punllacunapipish chashnallatajmi tiyaj. Cuna punlla gentecunapajca cullqui, famoso gentecuna, politicocuna, huaquin religionta pushajcuna, hasta familiacunallatajmi paicunapajca dioscuna shina can. Caicunamanta mana cuidarishpaca ñucanchij causaipimi punta lugarpi churai tucunchij. Shinallataj Jehová Diosta mana cꞌuyajcunahuan amigos tucushpaca Diosta sirvinatami saqui tucushun.
Baal yanga diosta sirvijcunaca huainayashpami adorajcuna carca. Chai mapa ruraicunami israelitacunatapish Jehová Diosmanta caruyachirca. Cunan punllacunapipish huaquin Diosta sirvijcunaca cashna shina trampacunapimi urmashcacuna. Por ejemplo huaquincunaca curiosos cashcamantami paicunalla huasipi cashpaca computadorata japichishpa rato mapa cosascunata ricui tucun. Chashnami paicunapaj concienciata mapayachin. Shuj Diosta sirvijpish pornografiata ricuna juchapi urmashpaca llaquimi canman.
it-1 pág. 410 párr. 4
Canaán
Jehová Diosca cananeocunata tucui tucuchichunmi Moisesta mandarca. Chai mandashcacunatami Josueca ni shuj shimillatapish mana anchuchishpa “tucuita pajtachirca” (Josué 11:15). Pero israelitacunaca chai mandashcacunataca mana cazurcacunachu. Tucui cananeocunata tucuchinapaj randica huaquincuna causashpa catichunmi saquirca. Chaimantami israelitacunaca achca llaquicunata charircacuna. Paicunaca Jehová Diospaj mandashcacunata cazushpa tucui cananeocunata huañuchishca cajpica chai gentecunallami huañunman carca. Pero chaita mana cazushcamantami israelitacunapish huañurcacuna, shinallataj macanacuipi, huainayanapi, yanga dioscunata adoranapipish chagrurircacuna (Números 33:55, 56; Jueces 2:1-3, 11-23; Salmo 106:34-43). Jehová Diosca israelitacunataca advirtircami cananeocunahuan chagrurishpa paicunapaj ushushicunahuan cancunapaj churicunahuan cazarachijpi, paicunapaj religionta, paicunapaj mapa costumbrecunata catijpica cananeocunata shinallatajmi cancunatapish ‘shungu tigrashpami chai allpamanta chingachisha’ nircami (Éxodo 23:32, 33; 34:12-17; Levítico 18:26-30; Deuteronomio 7:2-5, 25, 26).
Bibliapi curita mashcaj shina mashcashunchij
it-2 pág. 238 párr. 2
Linderocuna
Allpacunata cada familiacunaman sorteashpa cushca huashaca linderocunatami ricuna carca. Linderocunata churangapajca cada familiacuna mashna cashcatami ricuna carca. Chaimi Bibliapica: “Chai llajtataca sorteashpa, cada familia ima shina cashca shinallataj japinguichij. Achca cajmanca achcata cunguichij. Ashalla cajmanca ashallata cunguichij. Sorteajpi maipimi urman, chaitataj cunguichij. Cancunapaj yayacunamanta mirarishca aillucuna ima shina cashca shinallataj japinguichij” (Números 33:54). Shinaca allpata sorteashpa cujpica maipi urmashcapi japishpaca mana cambianachu carca. Pero cada familiacunata ricushpami maichica allpata cuna cashcata curca. Por ejemplo, Judapaj familiaca ashallami carca. Pero allpaca achca cashcamantami Simeonpaj familiaman ashata chaupishpa curca (Josué 19:9).
24-30 DE MAYO
BIBLIAPI TIYAJ VALISHCA YUYAICUNA | NÚMEROS 34-36
“Jehová Diosca ñucanchij miticunami”
Jehová Diospi miticushunchij
4 Shuj israelita mana munaimanta shujtaj runata huañuchishca cashpapish culpayujmi carca (Génesis 9:5). Pero mana munaimanta huañuchishcamantami, Jehová Diosca paita llaquishpa juzgachun nirca. Huañushcapaj familiamanta shuj cꞌari paitapish ama huañuchichunca 6 miticuna llajtamantaca shujmanmi callpana carca. Chai llajtamantaca sumo sacerdote huañungacamami mana llujshina carca (Números 35:15, 28).
Jehová Diospi miticushunchij
6 Shuj israelita mana munaimanta pita huañuchishca cashpaca shuj miticuna llajtamanmi callpana carca. Punguman chayashpaca ancianocunamanmi huillana carca. Ancianocunaca paitaca allimi chasquina carcacuna (Josué 20:4). Qꞌuipaca maipimi runata huañuchishca carca, chai llajtamanmi cachana carcacuna. Chai llajtamanta ancianocunami paita juzgana carca (Números 35:24, 25-ta leyipai). Cai ancianocunaca mana munaimanta huañuchishcata alli yachashca qꞌuipaca miticuna llajtaman cutin tigrachunmi saquina carcacuna.
Jehová Diospi miticushunchij
13 Jehová Diosca, chai llajtacunaca ‘miticunapajmi cana can’ nircami (Josué 20:2, 3). Mana munaimanta huañuchij runaca chai llajtaman chayashpami quishpirishca carca. Shinallataj paitapish huañuchisha nicuj runaca miticuna llajtamanca mana yaicui pudircachu. Diospish chai juchallamantataj ama ishqui cutin juzgachun nishpami mandarca. Mana munaimanta huañuchij runa chai llajta ucupi causacushcamanta Dios cuidacujpimi imata mana manchana carca. Mana prezupi shinachu carca. Paica trabajashpa, shujtajcunata ayudashpa, Diostapish sirvishpami casilla chai llajtapica causai pudirca.
Bibliapi curita mashcaj shina mashcashunchij
w91 15/2 pág. 13 párr. 13
Shuj runallami tucuicunata quishpichirca
13 Adán y Evaca Jesús huañushcamantaca mana quishpiri tucunchu. Moisesman cushca leypica: “Maijanta huañuchijca paitapish huañuchishun nijpi, cullquita pagasha nijpica ama japinguichij. Huañuchina yuyaihuantaj huañuchishcamanta paitaca huañuchinguichijtaj” ninmi (Números 35:31). Adantaca pipish mana pandachircachu. Ashtahuanpish paipaj munaimantami Diosta mana cazurca (1 Timoteo 2:14). Chashnami paipaj huahua huahuacunamanca herenciata shina juchata, huañuita saquishpaca huañuchij runa shina tucurca. Adanca jucha illaj cashpapish paipaj munaimantami Diospaj mandashcacunata mana cazurca. Chaimantami huañunataj carca. Pero Jesuspaj causaimanta Adanta quishpichishca cajpica Jehová Diospaj mandashcacunapish yangallami canman carca. Chaimantami Jehová Diosca Adanpaj juchamanta pagaj shina Jesuspaj causaita cushpa Adanpaj huahua huahuacunataca huañuimanta quishpichirca (Romanos 5:16). Shinami Jehová Diosca jatun llaquiman apaj juchataca huiñaipaj cacharichirca. Cutin quishpichij Jesucristopish ‘tucui gentecunamantami huañuitaca rijsina carca’. Chashnami Adanpaj huahua huahuacunataca juchamanta quishpichirca (Hebreos 2:9; 2 Corintios 5:21; 1 Pedro 2:24).
31 DE MAYO A 6 DE JUNIO
BIBLIAPI TIYAJ VALISHCA YUYAICUNA | DEUTERONOMIO 1, 2
“Juzgana derechotaca Jehovami charin”
w96 15/3 pág. 23 párr. 1
Jehová Diosca tucui imatapish cashcatami ruran
Congregación ucupi jatun juchacuna ricurijpica pushaj huauquicunallami juzgana derechota charin (1 Corintios 5:12, 13). Paicunaca Jehová Dios shina cashcata rurashpa, llaquishpami juzgancuna. Pero huaquincunaca jatun juchata rurashpapish mana arrepintirincunachu. Chaimi paicunataca mana llaquishpa juzgancuna. Cutin shinallataj congregacionta pushajcunaca juchayujcunata llujshichishpaca mana venganzamantachu llujshichincuna. Ashtahuanpish juchata rurajcuna paicunapaj causaipi cambiachunmi chashna rurancuna (Ezequiel 18:23-huan chꞌimbapurai). Jesucristo mandacushcamantami congregacionta pushajcunaca cashcata rurangapaj esforzarincuna. Shinallataj ‘huairamanta paca tucuna shinapishmi’ cana can (Isaías 32:1, 2). Shinaca paicunaca mana ñahuita ricushpalla tucuicunamanmi cꞌuyaita ricuchina can (Deuteronomio 1:16, 17).
w02 1/8 pág. 9 párr. 4
Jehová Dios agllashcacunata cazuichij
4 Juezcunaca alli juezcuna cangapajmi Jehová Dios Moisesman cushca leyllataca mana rijsina carca. Ashtahuancarin juchayujcuna cashcamanta, ña edad runacuna cashcamanta ama paicunallapi yuyangapaj, ñahuitalla ama ricungapaj, cullquipilla ama yuyangapajmi cuidarina carca. Chaimi Moisesca paicunataca cashna mandarca: “Ima shina cashcata ricuchicushpaca, ama ñahuita ricushpalla llaquichinguichij. Jatun nishcacuna yangallacuna huillajpipish ishquindijtataj chai shinallataj alli uyanguichij. Cancunaca maijanta ama manchanguichijchu. Taita Dios mandashcata ruracushcamantaca chai rurashcaca Taita Diospajmi”. Shinaca tucui israelitacunata Jehová Dios juzganapaj randica juezcunami juzgana carca. Chai privilegioca sumajmi carca (Deuteronomio 1:16, 17).
Bibliapi curita mashcaj shina mashcashunchij
w13 15/9 pág. 9 párr. 9
Jehová Diospaj nishcacunaca mana llullachu
9 Israelitacunaca 40 huatacunatami manchanai shitashca pambata purircacuna. Shinapish Jehová Diosca israelitacunata Egipto llajtamanta llujshichicushpaca ima shina cuidanata, maita pushanataca mana tucuita nircachu. Pero Jehová Diosca huaquin rurashcacunahuanmi paipi, paipaj mandashcacunapi confiana cashcataca cutin cutin ricuchirca. Por ejemplo punllaca pꞌuyuhuan, tutaca ninahuanmi chai shitashca jiru pambataca pusharca. Chashnami israelitacunaca mana paicuna sololla cashcata cuentata curcacuna (Deuteronomio 1:19; Éxodo 40:36-38). Shinallataj punllanta ima minishtishcacunatami curca. “Paicunapaj churanacunapish mana maucayarcachu. Chaquicunapish mana pꞌunguircachu”. Ima illajta mana charircachu (Nehemías 9:19-21).
7-13 DE JUNIO
BIBLIAPI TIYAJ VALISHCA YUYAICUNA | DEUTERONOMIO 3, 4
“Diospaj mandashcacunata cazunaca allimi can”
it-1 pág. 821 párr. 6
Alli yuyaiyuj
Diospaj mandashcacunaca alli yachaita, alli yuyaitami charin. Chaimantami Diospaj Shimipi tiyaj mandashcacunata alli estudiaj pajtachij runaca paita yachachijta yalli intindin. Edadlla runacunatapish yallimi alli yuyaita charij runa tucun (Salmo 119:99, 100, 130; Lucas 2:46, 47 versocunahuan chꞌimbapurai). Shinaca israelitacunaca Diospaj mandashcacunata catishpa, cazushpami causana carca. Chashnami paicunapaj cꞌuchullapi causaj llajtacunaca “yachaisapa, yuyaisapa jatun llajta gentecunamari” ni tucurcacuna (Deuteronomio 4:5-8; Salmo 111:7, 8, 10; 1 Reyes 2:3-huan chꞌimbapurai). Alli yachaita charijcunaca Diospaj Shimipi nishcacunata mana pꞌaquina cashcatami yachancuna. Chaimantami chai nishcacunata paicunapaj causaipi pajtachingapajca Jehová Diospaj ayudata mañancuna (Salmo 119:169). Shinallatajmi Diospaj mandashcacuna shungu ucuman chayachun saquin (Mateo 13:19-23). Qꞌuipataca chaipi quillcashca shinami churan (Proverbios 3:3-6; 7:1-4). Chashna rurashpami “tucui llulla ñantaca pꞌiñan” (Salmo 119:104). Diospaj Churi cai Allpapi cashpaca alli yuyaita charishcatami ricuchirca. Chaimantami quillcashcapi tiyaj profeciacuna pajtarichun jatun caspipi huañunamantapish mana jarcarirca (Mateo 26:51-54).
w99 1/11 pág. 20 párrs. 6, 7
Jehová Diosman shungumanta cushunchij
Saba llajtata mandaj huarmica Salomón imallata rurashcata ricushpa uyashpaca mancharishcami saquirirca. Chaimantami cashna nirca: “Canhuan caj runacunapish, cambajta ruraj cai runacunapish, yachaisapa shimicunata rimajta punllanta uyashpaca cushijllami cangacuna” nircami (1 Reyes 10:4-8). Cai huarmica Salomonpaj sirvijcunataca achcata charishpa, allita causacushcamantami cushilla canguichij mana nircachu. Ashtahuanpish Jehová Dios Salomonman alli yachaita cushcata punllanta uyacushcamantami chashna nirca. Cunan punllacunapi Diosta sirvijcunaca Jehová Diosmanta, paipaj Churi Jesucristomantami alli yachaita chasquinchij. Chaimantami Saba llajtata mandaj huarmipaj alli ejemplota catina canchij.
Saba llajtata mandaj huarmica Salomontaca: “Canta Mandaj Jehová Diosca, alli nishca cachun” nircami (1 Reyes 10:9, La Biblia, Traducción del Nuevo Mundo, NWT ). Shinaca chai huarmica Salomonpaj alli yachaipi, achca charishcacunapimi Jehová Dios paihuan cashcata cuentata curca. Chashnami Jehová Dios ñaupa punllacunapi israelitacunaman nishcata pajtachirca. Paica: “Chai yachachishcacunataca huaquichishpa, chai yuyailla tucushpa pajtachinguichij. Chaicunami shujtajcunapaj ñaupajpica cancuna yachaisapa cashcata, yuyaisapa cashcata ricuchinga. Cai mandashcacunamanta yachachishcata uyashpaca: ‘Cai runacunatajca yachaisapa, yuyaisapa jatun llajta gentecunamari ningacunami’” nircami (Deuteronomio 4:5-7).
w07 1/8 pág. 29 párr. 13
Diospaj mandashcacunata cazushpaca charijcuna shinami canchij
13 Jehová Diosca tucui paita sirvijcunamanca allicunata cushpami bendician (Santiago 1:17). Por ejemplo, Jehová Dios israelitacunaman cushca allpapica “lechepish, sacha chuspipaj mishquipish yacu shinami” llujshicurca. Pero huaquin israelitacunaca Egipto llajtapish Dios cusha nishca Allpa shinallataj alli allpami can nircacunami. Shinapish Dios cusha nishca Allpaca chꞌicanmi carca. ¿Imamanta? Moisesca: “Chai llajtaca Mandaj Dios cancunapaj Taita Dios cuidacun llajtami” nircami. Shinaca Jehová Dios cuidashcallamantami israelitacunaca alli causana carca. Paicunaca Jehová Diospaj mandashcacunata cazushcamantami cꞌuchulla llajtacunamanta yalli ashtahuan alli, cushilla causarcacuna. Shinaca Jehová Dios cushca bendicioncunami charijyachin (Números 16:13; Deuteronomio 4:5-8; 11:8-15).
Bibliapi curita mashcaj shina mashcashunchij
w04 15/9 pág. 25 párr. 3
Deuteronomiomanta valishca yuyaicuna
4:15-20, 23, 24. Jehová Diosca israelitacunataca: “Imapi labrashpa imaman rijchajtapish ama ruranguichij” nircami. ¿Shinaca imapi labrashca alaja adornocunataca manachu rurai tucunchij? Ari rurai tucunchijmi. Bibliapica imapi labrashpa, pintashpa sumaj adornocunata rurana mana alli cashcataca mana ninchu. Ashtahuanpish shuj imagenta rurashpa chaicunapaj ñaupajpi cungurishpa sirvinami mana alli can. Chaicunatami Jehová Diosca ama rurachun nishpa mandarca (1 Reyes 7:18, 25).
14-20 DE JUNIO
BIBLIAPI TIYAJ VALISHCA YUYAICUNA | DEUTERONOMIO 5, 6
“Yaya mamacuna, cancunapaj huahuacunata Jehová Diosta cꞌuyachun yachachichij”
w05 15/6 pág. 20 párr. 11
Yaya mamacuna huahuacuna ima minishtishcata cuichij
11 Yaya mamacuna paicunapaj huahuacunaman Jehová Diosmanta yachachinamanta parlacushpaca casi siempremi Deuteronomio 6:5-manta 7-cama utilizanchij. Cai versocunata liyingapaj cancunapaj Bibliacunata pascaichij. Shinaca yaya mamacunarajmi Jehová Diosta cꞌuyashpa, paipaj mandashcacunata cazushpa paihuan alli amigos cana can. Chaipajca yaya mamacunaca tucui punllacunami Diospaj Shimimanta alli estudiashpa, chai yachacushcapipish cutin cutin yuyana can. Chashnami Diospaj yuyaita, paipaj mandashcacunatapish alli intindishpa ashtahuan cꞌuyangacuna. Shinami paicunapaj shungupi Diospaj yuyaicuna junda cajpica paicunapaj huahuacunamanpish yachachi tucungacuna (Lucas 6:45).
w07 15/5 pág. 15 párr. 5
¿Huahuacunata alli huiñachingapajca imatataj rurana canchij?
Yaya mamacunaca paicunapaj shimihuan, ruraicunahuanmi ima laya causanata, ima shina canataca ricuchincuna (Romanos 2:21, 22). Huahuacunaca uchillamantapachami yaya mamacuna imata rurajta ricushpa paicunamanta yachancuna. Yaya mamacuna paicunapaj causaipi imatami ashtahuan valichin chaitami huahuacunapish ricushpa chai cosascunallatataj valichincuna. Por ejemplo, yaya mamacuna Bibliata punllandij punllandij estudiajpi, Diospaj Reinota punta lugarpi churajpimi Jehová Diosta tucui shunguhuan cꞌuyashcataca cancunapaj huahuacunapish cuentata cunga (Mateo 6:33). Shinallataj tandanacuicunaman mana faltajpi, predicanaman siempre llujshijpimi cambaj causaipi Jehová Diosta sirvina ashtahuan valishca cashcata intindingacuna (Mateo 28:19, 20; Hebreos 10:24, 25).
w05 15/6 pág. 21 párr. 14
Yaya mamacuna huahuacuna ima minishtishcata cuichij
14 Deuteronomio 6:7-pi nishca shinami yaya mamacuna paicunapaj huahuacunamanca maipi cashpapish Diosmantaca yachachina can. Por ejemplo viajacushpa, huasipi cashpa, samaricushpami Diosmanta yachachina oportunidadtaca charincuna. Pero yaya mamacunaca huahuacunamanca Diosmanta yachachicushpaca mana pꞌiñarishpachu yachachina can. Ashtahuanpish alajata parlanacushpami yachachina can. Por ejemplo Rijchari revistapica chꞌican temacunamantami yachachin. Chaimi yaya mamacunaca cai revistata liyicushpaca Jehová rurashca animalcunamanta, cai Allpamanta, gentecunapaj chꞌican chꞌican costumbrecunamanta huahuacunahuan sumajta parlashpa catichun ayudan. Chashnami huahuacunaca alli cazuj alli yuyayuj cushca publicacioncunata liyingapaj munangacuna (Mateo 24:45-47).
Bibliapi curita mashcaj shina mashcashunchij
Diosca cꞌuyashcata, cashcata rurashcatami ricuchishca
11 ¿Imatataj yachacunchij? Jehová Diosca ñucanchij shungupi ima yuyaicunata, ima munaicunata charishcataca allimi yachan (1 Samuel 16:7). Chaimantami paipaj ñaupajpica ni imata mana pacai tucunchij. Pero paica ñucanchijpica allitami ricunata munan. Chaimantami alli shungucuna cachun ayudan. Chashna jahuapish ñucanchij shungupi ima mana alli munaicuna tiyashcata o mana tiyashcata ricuchunmi Diosca munan. Tiyajpica millai cosascunapi ama urmangapajmi jarcarichun nin (2 Crónicas 16:9; Mateo 5:27-30).
21-27 DE JUNIO
BIBLIAPI TIYAJ VALISHCA YUYAICUNA | DEUTERONOMIO 7, 8
“Diosta mana sirvijcunahuanca mana cazaranachu canchij”
w12 1/7 pág. 29 párr. 2
¿Imamantataj Jehová Diosca israelitacunataca paicunapuralla cazarachun mandarca?
Jehová Diosca yacharcami Satanasca tucui israelitacunata yanga dioscunata adorachishpa pandachinata munashcata. Chaimantami Jehová Diosca israelitacunataca ñucata mana sirvijcunahuan cazarashpaca ñucamantami cꞌaruyanguichij, yanga dioscunatami adoranguichij nishpa advirtirca. Paicuna mana cazushpaca achca alli cosastami pirdi tucurcacuna. Por ejemplo, Jehová Diospaj cuidadota chingachi tucurcacuna, contracunapaj maquipipish jahualla urmai tucurcacuna. Chashna tucushpa chingarishca cajpica ¿ima shinataj Mesiasca Israel llajtamanta ricurinman carca? Satanasca chaita yachashpami israelitacunataca Diosta mana sirvij gentecunahuan cazarachun pandachisha nirca.
w15 15/3 pág. 30 párr. 5
¿Diosta sirvijcunapuralla cazarai nishpa mandashcata cazunaca jahuallachu can?
Jehová Diosca allimi yachan ñucanchijpaj ima alli cashcata. Chaimantami paita sirvijcunapuralla cazarachun mandan. Jehová Diosca paipaj sirvijcuna ama llaquita charichun ashtahuanpish cushilla causachunmi munan. Nehemiaspaj punllacunapica achca judiocunaca Diosta mana sirvij huarmicunahuanmi cazararca. ¿Nehemiasca imatataj rurarca? Jehová Dios Salomonta cꞌuyajpipish paica Diosta mana sirvij huarmicunahuan cazarashcamantami chai huarmicunaca juchapi urmachirca nircami. Chashnami Salomonpaj ejemplohuan judiocunapaj yuyaicunata cambiachun ayudarca (Nehemías 13:23-26). Shinaca ñucanchijcuna alli causachun nishpami Jehová Diosca paita sirvijcunapuralla cazarachun munan (Salmo 19:7-10; Isaías 48:17, 18). Jehová Diosca ñucanchijta cꞌuyashpa alli consejota cushcamantami agradicinchij. Shinallataj chai mandashcacunata cazushpami Jehová Dioslla allita o mana allita agllana derechota charishcata ricuchinchij (Proverbios 1:5).
w15 15/8 pág. 26 párr. 12
Tucuri punllacunapica alli amigocunata agllashunchij
12 Diosta sirvijcunaca alli amigocunatami agllana canchij. Pero cusa tucuna, huarmi tucunatacarin ashtahuan allita ricushpami agllana canchij. Diospaj Shimica cai consejotami cun: “Cancunaca mana crijcunahuanca, yugushca shinaca ama tandanacuichijchu. Cashcata ruranaca, mana cashcata ruranahuanca mana tandanacunchu. Luzca, amsahuanca mana chagrurinchu” (2 Corintios 6:14). Shinaca Bibliaca yachachinmi testigo de Jehovacunapuralla cazarana cashcata (1 Corintios 7:39). Cai consejota cazujcunaca paipaj cusata, paipaj huarmita shuj alli amigota shinami charincuna Jehová Diosta tandalla sirvishpa catingapaj.
Bibliapi curita mashcaj shina mashcashunchij
w04 1/2 pág. 13 párr. 4
Jehová Diosca punllandij minishtirishcacunatami cun
4 Jesús yachachishca shina Jehová Diosta punllanta micunata mañacushpaca espiritualmentepish punllanta yachanata minishtirishcatami yuyachin. Jesusca achca punllacunata mana micushca yaricaihuan cajpica Satanasca, ‘cai rumicunata tandata rurai’ nishpami pandachisha nirca. Pero Jesusca chai trampapi mana urmarcachu. Ashtahuancarin caitami nirca: “Quillcachishcapica: ‘Runaca mana tandallahuan causangachu. Ashtahuanpish Taita Diospaj shimimanta llujshishca shimicunahuanmi causanga’ ninmi” (Mateo 4:4). Caipica Moisés israelitacunaman nishca shimicunatami Jesuspish nirca. Moisesca israelitacunamanca: “Yaricaihuanmi llaquichirca. Qꞌuipataca cancunapish cancunapaj ñaupa yayacunapish mana rijsishca maná tandatami cararca. Chaitaca runaca mana tandallahuan causana cashcata, ashtahuanpish Mandaj Diospaj shimimanta llujshishca shimicunahuan causana cashcata yachachingapajmi chashna rurarca” nirca (Deuteronomio 8:3). Jehová Diosca israelitacunaman maná micunata cushpami punllanta ima minishtirishcata curca, tucuipi paita cazunatapish yachachirca. Por ejemplo, maná micunataca pajtallatami cada punlla japina carca. Yalli japijpica chai micunacunaca ashnajyashpami cꞌurucuna jundarca (Éxodo 16:4, 20). Shinapish sujta punllapica sábado punlla mana japina cashcamantami chai punllapandij japina carcacuna (Éxodo 16:5, 23, 24). Chashnami israelitacunaca causashpa catingapajca mana tandallata minishtircacuna ‘ashtahuanpish Diospaj shimimanta llujshishca shimicunatapish’ tucuipi cazuna cashcata cuentata curcacuna.
28 DE JUNIO A 4 JULIO
BIBLIAPI TIYAJ VALISHCA YUYAICUNA | DEUTERONOMIO 9, 10
“¿Jehová Diosca ñucanchijtaca imata rurachuntaj mañan?”
w09 1/10 pág. 10 párrs. 3, 4
¿Jehová Diosca ñucanchijmanta imata mañan?
¿Imataj ayudanga shungumanta cazuchunca? Moisesca: “Mandaj Taita Diosta manchachunmi” nirca (Deuteronomio 10:12). Pero Moisesca mana allicunata rurashpa llaquita apana manchaimantaca mana parlacurcachu. Ashtahuancarin Yaya Diosta, paipaj mandashcacunata respetanamanta, chai respetomanta paita mana llaquichinamantami parlacurca.
Pero mana chaillamantachu Jehová Diosta cazuna canchij. Moisés nishca shinami Jehová Diosca “tucui almahuan, tucui shunguhuan paita cꞌuyashpa pai mandashcata rurachun mañan” (Deuteronomio 10:12). Pero Diosta cꞌuyashpaca chai cꞌuyaitaca mana shungullapichu sintina canchij. Chaimantami shuj libropica, “hebreo shimipi sentimientocunamanta parlashpaca huaquinpica chai sentimientocunamanta imallata ruranatapish nin”. Chaimi Diosta cꞌuyajcunaca chai sentimientoca ruraicunahuan ricuchina can. Shinaca Jehová Diosta tucui shunguhuan cꞌuyashcamantaca pai munashca shina rurangapaj esforzarishunchij (Proverbios 27:11).
w09 1/10 pág. 10 párr. 6
¿Jehová Diosca ñucanchijtaca imata rurachuntaj mañan?
Moisesca: “Cancunapaj tucui causaipi alli canapaj Mandaj Dios mandashcacunata, pajtachingui” nirca (Deuteronomio 10:13). Jehová Diosta tucui shunguhuan cazunaca ñucanchijpajllatajmi alli. Jehová Diosca cꞌuyaj Diosmi can. Chaimantami tucui pai mañashcacunapish ñucanchij alli causachun ayudan (1 Juan 4:8). Diospaj mandashcacunaca cunan punllacunapi, shamuj punllacunapipish ñucanchijpajllatajmi alli can (Isaías 48:17). Tucui pai mandashcacunata rurashpaca achca llaquicunamantami jarcarishun. Shamuj punllapicarin Dios mandacujpica huiñai causaitami charishun.
cl pág. 16 párr. 2
¿Jehová Diospajman cꞌuchuyai tucunchijchu?
2 Ñaupa punllacunapica huaquin Diosta sirvijcunaca Dioshuan allimi apanacuj carca. Paicunapuramantaca Abrahammi can. Chaimantami Jehová Diosca paitaca: “Ñucahuan alli apanacuj [o ñuca amigo]” nirca (Isaías 41:8). Shinaca Abrahamca Jehová Diospi feta charishcamantami paipaj cꞌuyashca amigo tucurca (Santiago 2:23). Cunan punllacunapipish Jehová Diosca paita cꞌuyaihuan sirvijcunatami mashcacun paicunapajman cꞌuchuyangapaj (Deuteronomio 10:15). Chaimantami Bibliapica: “Diosman cꞌuchuyaichij, paipish cancunapajman cꞌuchuyangami” nin. Cai shimicunaca sumaj shimicunami can (Santiago 4:8).
Bibliapi curita mashcaj shina mashcashunchij
it-1 pág. 133
Anaceocuna
Anacpaj huahua huahuacunaca yallitaj jatuncunami carca. Paicunaca Canaán urcucunapi, ura ladopi, costa ladocunapimi causarcacuna. Shinallataj israelitacunapuramanta 12 cꞌaricunami Canaán allpata ricunaman ricushpa cai Anaceocunapaj huahua huahuacunataca Hebrón llajtapi punta cutin ricurcacuna. Chai runacunapurapica Ahimán, Sesái, Talmái cai quimsa runacunami ashtahuan rijsishca carca (Números 13:22). Moisés Canaán allpata ricunaman cachashcamanta 10 cꞌaricunaca cashna nishpami huillarcacuna, ‘chai llajtapica nefelinpaj huahua huahuacuna cashcamanta yallitaj jatun gentecunami can. Paicunapaj ñaupajpica langosta cꞌurucuna shinallami ñucanchijca canchij’ nircacunami. Chashna huillashpami israelitacunataca yallitaj manchachircacuna (Números 13:28-33; Deuteronomio 1:28). Emin llajtapi causaj gentecuna, Refaím llajtapi causaj gentecunaca yallitaj jatun gentecuna cajta ricushpami Anacpaj huahua huahuacunahuan chꞌimbapurarcacuna. Shinaca cai runacuna yallitaj fuerzayujcuna cajta ricushpami gentecunaca: “Anacpaj huahua huahuacunahuanca ¿pitaj shayari tucungari?” nijcuna carca (Deuteronomio 2:10, 11, 20, 21; 9:1-3).