¿Testigo de Jehovacunaca imamantataj guerracunaman mana rincuna?
Testigo de Jehovacunaca catij yuyaicunata pajtachishcamantami guerracunaman mana rinchij:
Diosca guerraman richunca mana munanchu. Diosta sirvijcunamanta parlashpaca Bibliapica: ‘Paicunapaj espadacunaca yapuna rejami tucunga. Macanacunataca ña mana yachangacunachu’ ninmi (Isaías 2:4).
Jesuspish guerraman richunca mana munanchu. Chaimantami apóstol Pedromanca caita mandarca: “Cambaj espadata huaquichinapi huaquichi. Espadahuan macanacujcunataca, espadallahuantaj huañuchishcami canga” (Mateo 26:52). Jesusca cai shimicunata nishpami paita catijcuna mana macanacuna cashcata yachachirca.
Shinallataj Jesusca: ‘Ñuca discipulocunaca mana cai pachapajchu can’ nircami. Chaimantami politicacunapica mana chagrurinchij (Juan 17:16). Ashtahuancarin soldadocuna macanacugrijpi, o shujtaj gentecuna ejercitohuan chagrurijpipish mana jarcanchijchu.
Jesusta catijcunaca tucui gentecunatami cꞌuyanchij. Jesusca paita catijcunataca caitami mandarca: “Cancunaca caishuj chaishuj cꞌuyanacuichij” (Juan 13:34, 35). Testigo de Jehovacunaca chꞌican chꞌican llajtacunamanta cashpapish tandalla shuj familia shinami Diosta sirvinchij. Chaimantami guerracunapica mana participanchij (1 Juan 3:10-12).
Jesusta punta catijcunapish guerramanca mana rircacunachu. Shuj libropica: “Jesusca paita catijcunataca caishuj chaishuj cꞌuyanacuchun, paicunata pꞌiñajcunatapish cꞌuyachunmi mandarca. Chaimantami Jesusta punta catijcunaca guerracunatapish mana apoyarcacuna. Cuartelmanpish mana rircacuna” ninmi (Encyclopedia of Religion and War). Shinallataj Edward Gibbon shuti runaca: “Jesusta punta catijcunaca Diosta cazushcamantami manataj soldado tucurcacuna” nircami (Historia de la decadencia y caída del Imperio romano).
Tucuicuna tandalla causangapajmi ayudanchij
Testigo de Jehovacunaca ñucanchij causacun llajtacunapica tucuicunatami ayudanchij. Ima mana allicunataca mana ruranchijchu. Ashtahuanpish gobiernocuna churashca leycunatami pajtachinchij. Chashna rurashpami Diospaj mandashcacunata cazunchij:
Romanos 13:1-pica: “Jatun mandajcunataca tucuicuna cazuchun” ninmi.
Mateo 22:21-pica: “Cesarpajtaca paiman cuichij, Diospajtaca Diosman cuichij” ninmi.
Chaimantami tucuicuna alli causangapaj gobiernocuna nishcacunatapish pajtachinchij. Impuestocunatapish paganchij.