Joseca Jacobpaj churimi carca. Paipaj yayaca paitami ashtahuan cꞌuyaj carca. ¿Chaita ricushpaca paipaj huauquicunaca ima shinashi sintirishcangacuna? Paicunaca pꞌiñarishpami achcata envidiarcacuna. Shuj cutinca Joseca muscuicunatami charirca. Chaitami paipaj huauquicunaman huillarca. Imata muscushcata uyashpaca Josepaj ñaupajpi cumurina cashcatami intindircacuna. Chaimantami ashtahuan pꞌiñarcacuna.

Josepaj huauquicunaca Siquem llajta cꞌuchullapimi ovejacunata michicurcacuna. Jacobca Josetaca paipaj huauquicunata ricunamanmi cacharca. José caruta shamucujta ricushpaca paicunaca: ‘Chai muscujca chaitamari shamucun. Jacuchij, paita huañuchishun’ nircacunami. Chaimi Joseta japishpa jutcupi shitarcacuna. Pero Judaca: ‘Ama huañuchishunchijchu. Chaipaj randica ismaelitacunaman esclavo cachun cꞌatushunchij’ nircami. Chaimantami Egipto llajtaman ricuj madianitacunaman Josetaca 20 piezas cullquipi cꞌaturcacuna.

Chai qꞌuipa Josepaj huauquicunaca paipaj churanataca chivopaj yahuarhuanmi shutuchircacuna. Chai churanata apashpami Jacobtaca: ‘¿Cai churanaca manachu cambaj churipaj?’ nircacuna. Jacobca: ‘Sacha animalmi Josetaca huañuchishcanga’ nishpami yallitaj llaquirirca. Paitaca pi mana cushichi tucurcachu.

Egiptoman chayajpica Potifar runami Josetaca paipaj esclavo cachun randirca. Diosca Josehuanmi carca. José alli trabajaj, paipi confianalla cashcatapishmi Potifarca ricurca. Chaimantami asha tiempo qꞌuipaca tucui pai imalla charishcacunata Josepaj maquipi churarca.

José sumaj ñahui, munanalla cajta ricushpami Potifarpaj huarmica cutin cutin paihuan siririchun nij carca. Chaimi Joseca: ‘Chaita ruranaca mana allichu. Ñuca amoca tucuitami ñuca maquipi churashca. Canca paipaj huarmimi cangui. Canhuan siririshpaca Diospaj ñaupajpimi juchata rurasha’ nirca.

Shuj punllaca Potifarpaj huarmica paihuan siririchunmi Josetaca obligasha nirca. Churanapi charirijpipish Joseca callpashpami chaimanta llujshirca. Potifar chayajpica llullashpami paipaj huarmica: ‘Joseca ñucatami japirisha nirca’ nishpa huillarca. Potifarca pꞌiñarishpami Josetaca prezupi churarca. Pero Jehová Diosca Josetaca mana saquircachu.

José prezupi cajpimi Egiptota mandaj faraonca pi mana intindipaj muscuicunata muscurca. Chaimi faraonta sirvijca: ‘Josemi muscuicuna ima nisha nishcata huillai tucun’ nirca. Shina nijpimi faraonca Joseta utca pushamuchun cacharca.

Ña chayajpica faraonca: ‘Ñuca muscushcacuna imata nisha nishcata huillai’ nircami. Chaimi Joseca: ‘Egiptopica siete huatacunatami achca granocuna pꞌucunga. Chai qꞌuipaca siete huatacunatami jatun yaricai tiyanga. Gentecuna yaricaihuan ama huañuchunca granocunata huaquichichun yachaj runatami agllana cangui’ nirca. Chaimi faraonca: ‘Ñucapaj qꞌuipaca cantami tucui Egiptota mandachun churani’ nirca. ¿Joseca ima shinataj muscuicuna ima nisha nishcata yachai tucurca? Jehovami paitaca ayudarca.

Joseca siete huatacunatami granocunata huaquichirca. Qꞌuipaca pai nishca shinami tucui ladocunapi yaricai tiyarca. Chaimi gentecunaca tucui ladocunamanta granocunata randingapaj shamurcacuna. Josepaj yaya Jacobpish Egiptopi micuna tiyajta uyashpami paipaj diez churicunata randinaman cacharca.

Egiptoman chayajpica Joseca chai rato paipaj huauquicuna cashcatami cuentata curca. Pero paicunaca paimanta mana yuyarircacunachu. Huambraraj cashpa José muscushca shinami paipaj ñaupajpi cumurircacuna. Paita pꞌiñashpa catijta yachangapajmi Joseca: “¡Cancunaca pacalla ricunaman shamujcunami canguichij!” nirca. Chashna nijpimi paicunaca: ‘Mana ciertochu. Canaanmantami canchij. 12 huauquicunami carcanchij. Shujca ñami huañurca, último huauquica yayahuanmi saquirirca’ nircacuna. Chaipimi Joseca: ‘Cancunapaj qꞌuipa huauquita pushamujpimi cancunataca crisha’ nirca. Chaimi huasiman tigrarcacuna.

Jacobca micuna tucurijpimi paipaj churicunataca cutin Egiptoman cacharca. Chaimi paicunaca Benjaminta pushashpa rircacuna. Cutin Joseca paipaj huauquicuna cambiashcata yachangapajmi cullqui copata Benjaminpaj sacopi churarca. Qꞌuipaca Joseta sirvijcunaca Benjaminpaj sacopi chai copata japishpami: ‘Cancunami shuhuashcanguichij’ nishpa culparcacuna. Chaita ricushpami paipaj huauquicunaca achcata mancharircacuna. Chaimi Benjaminta castiganapaj randica paicunata castigachun Joseta rogarircacuna.

Joseca paipaj huauquicuna cambiashcata ricushpami mana ahuantashpa huacai callarirca. Paica: “Ñucaca Josemi cani. ¿Ñuca yayaca causacunrajchu?” nircami. Chaita uyashpami mancharircacuna. Chaimi Joseca: ‘Ñucata cꞌatushcamantaca ama llaquirichijchu. Cancunata quishpichingapajmi Diosca ñucata caiman cacharca. ¡Utca!, ñuca yayata pushamugrichij’ nirca.

Josepaj huauquicunaca huasiman tigrashpami ima tucushcata Jacobman huillarcacuna. Paita Egiptoman pushajpimi Joseca achca huatacuna qꞌuipa paipaj yayahuan tupanacurca.