¿Ñucanchij crishcacunata apoyachunchu Bibliataca cambiashcanchij?
Mana chaitaca rurashcanchijchu. Ashtahuanpish ñucanchij crishcacuna panda cashcata cuentata cushpaca, Bibliapi yachachishcata cazungapajmi, ñucanchij panda crishcacunata cambiashcanchij.
Ñucanchij crishcacunaca Diospaj Shimimantami japishca can. 1950 huatapimi Traducción del Nuevo Mundo Bibliataca recién llujshichi callarircanchij. Pero ñucanchijca ashtahuan ñaupa huatacunamantami Bibliataca alli estudiaj carcanchij. Chaimantami chai punllacunapi tiyashca Bibliacunata utilizaj carcanchij. ¿Traducción del Nuevo Mundo Bibliata manaraj charishpaca imapitaj crircanchij? Chaitaca canllatajmi yachai tucungui.
Ñucanchij crishcacuna: Diosca mana shuj Trinidadchu can. 1882 huata julio quillapi Zion’s Watch Tower nishca revistaca (cunan punllacunapi quichua shimipica cai revistaca Huillaj nishcami can): “Ñucanchijca Jehová Diospi, Jesuspi, espíritu santopimi crinchij. Chaita crishpapish Jehovapish Jesuspish espíritu santopish quimsapi shujlla Dios cashcataca mana crinchijchu. Bibliapica chaitaca mana yachachinchu” nircami.
Bibliaca cashnami nin: “Mandaj Dios ñucanchij Taita Diosca shujlla Diosmari” (Deuteronomio 6:4, Biblia en Quichua Chimborazo, 2010 [QCH, 2010]). “Shujlla Diosmi tiyan. Paica Yaya Diosmi, Paica tucui ima tiyajtapish rurajmi. Ñucanchijpish Paipajmi canchij. Shinallataj shujlla Mandajmari tiyan, Paica Jesucristomi” (1 Corintios 8:6, El Nuevo Testamento Quichua, Nueva Versión Interlineal, 1999, [NVI]). Jesusllatajmi “ñuca Yayaca ñucata yallimari” nirca (Juan 14:28, QCH, 2010).
Ñucanchij crishcacuna: Millaicunaca mana huiñaita ninapi llaquichishcachu canga. 1882 huata junio quillapi Zion’s Watch Tower nishca revistaca “Juchaca huañuitami cun” nishca tematami charirca. Chaitaca Romanos 6:23 mantami japishca carca. Chai revistapica: “Bibliaca juchaca huañuitami cun nishpaca allimi intindichin. Pero achca gentecunaca Biblia Diospaj Shimi cashcata crishpapish, Romanos 6:23 ima nishcataca mana crincunachu. Paicunaca Bibliapica huiñaita ninapi rupachinatami yachachin nincunami” nircami.
Bibliaca cashnami nin: “Juchata rurajcunallami huañunga” (Ezequiel 18:4, 20, QCH, 2010). Jehová Diosca paipaj contracunataca mana huiñaipaj ninapi llaquichingachu. Ashtahuanpish huiñaipajmi chingachinga (2 Tesalonicenses 1:9, NVI).
Ñucanchij crishcacuna: Diospaj Reinoca shuj gobiernomi can, chaitaca mana ñucanchij shungupichu charinchij. 1881 huata diciembre quillapi Zion’s Watch Tower nishca revistaca: “Diospaj Reino cai Allpata mandai callarijpica cai Allpata mandaj gobiernocunaca tucui chingachishcami canga” nircami.
Bibliaca cashnami nin: “Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu” (Daniel 2:44, QCH, 2010).
¿Traducción del Nuevo Mundo Bibliallachu testigo de Jehovacunapaj crishcacunata apoyan?
Mana. Testigo de Jehovacunaca ñucanchij crishcacunata yachachingapajmi chꞌican Bibliacunata utilizanchij. Cierto huaquinpica gentecunaman Bibliamanta yachachicushpaca Traducción del Nuevo Mundo Bibliataca gratismi convidanchij. Pero huaquin gentecuna paicunapaj Bibliacunallahuantaj yachanata munajpica yachachinchijllami.