“Cunanca cushillami predicani”

DIOSTA CUSHILLA SIRVINATAMI SAQUIRCANI

13 huatacunata charishpaca Jehovahuan alli apanacunatami saquircani. Escuelapica ñuca compañerocunaca imatapish rurajcunallami carca. Chaimi ñucapish paicuna shina causanata yuyarcani. Ñuca yayitu mamita yachachishcacunata, Biblia yachachishcacunata cazunapish sinchi layami ricurirca. Jehová Dios tiyashcata crishpapish mana paipaj amiga carcanichu.

Huillanataca manataj saquircanichu. Pero shujtajcuna ricuchunllami ashallata huillaj carcani. Huillanapaj mana alli prepararishcamantami gentecunahuan parlangapajca sinchi carca. Chaimi Bibliamanta yachacujcunatapish o revisitacunatapish mana charircani. Chaimantami huillanapipish mana cushilla sintirircani. Ñucaca cashna nishpami tapurircani ¿imamantashi shujtajcunaca cada semana cushilla huillashpa catincuna?

17 huatacunata charishpaca ñuca munashca shinami causasha nircani. Chaimantami Australia llajtapi causanaman rircani. Ñuca yaya mamaca preocuparishca cashpapish Jehová Diosta ñuca sirvishpa catinatami confiarcacuna.

Australia llajtapica Yayitu Diosmantaca ashtahuanmi caruyarcani. Tandanacuicunamanca maillapimi rij carcani. Congregacionpica ñuca layallataj huaquinllapi tandanacuicunaman rij jovencunahuanmi amigarircani. Paicunahuanca bailanaman, tragota ubyanamanmi llujshij carcanchij. Ñucaca Diospaj ruraicunata, mundopaj ruraicunata ruracushcatami cuentata curcani. Chaimantami ni maijanpipish mana cushilla sintirircani.

JEHOVÁ DIOSTA CUSHILLA SIRVI TUCUSHCATAMI INTINDIRCANI

Ishqui huata qꞌuipaca 5 soltera ñañacunahuanmi causacurcanchij. Ñucanchij congregaciontami superintendente turica paipaj huarmi Tamarahuan visitanaman shamurcacuna. Chaimi ñucanchij huasipi saquirichun invitarcanchij. Cai turi, congregacionpaj ruraicunapi ayudangacamami ñaña Tamaraca ñucanchijhuan pasangapaj tiempota surcurca. Paica asijlla ñahui, cushillami ñucanchijhuan pasarca. Chaita ricushpami mancharishca saquirircani.

Tamaraca Jehová Diostaca achcatami cꞌuyaj carca. Paica siempremi cushijlla, asijlla ñahui Diosta sirvij carca. Ñucaca pai shina Diosta sirvisha nishpapish shungumanta Diosta mana sirvishcamantami llaquilla sintirircani. Pero paipaj alli ejemplomi ñucatapish cushijlla, shungumanta sirvichun ayudarca. Jehová Diosca paita cushilla sirvichunmi munan (Salmo 100:2).

CUTIN SHUNGUMANTAMI PREDICAI CALLARIRCANI

Tamara shinami Yayitu Diostaca cushilla sirvisha nircani. Pero chaipajca huaquin cambiocunatami rurana carcani. Casi 3 huatacuna qꞌuipami chai cambiocunataca rurai callarircani. Predicangapajmi alli allichiri callarircani. Huaquin quillacunapica precursorado auxiliartapishmi japircani. Shinallataj Bibliahuanmi yallitaj predicaj carcani. Chaimantami manchaita misharcani y cushilla sintirircani. Qꞌuipacarin tucui quillacunami precursorado auxiliarta japircani.

Congregacionpica chꞌican chꞌican edadta charij turi ñañacunahuanmi amigarircani. Paicuna Diosta cushilla sirvijta ricushpami ñucapish Jehová Diosta sirvinataca punta lugarpi churarcani. Shinallataj Bibliatapish cada punllami estudiai callarircani. Chashnami predicacushpapish cushilla sintirircani. Qꞌuipacarin precursora regularmi tucurcani. Chashna sirvi callarishcamantami congregacionpipish ñucallataj contenta sintirircani.

PREDICANGAPAJMI SHUJ COMPAÑEROTA RIJSIRCANI

Shuj huata qꞌuipaca Alextami rijsircani. Paica Jehová Diostaca achcatami cꞌuyarca. Predicanatapishmi munarca. Paica siervo ministerialmi carca. 6 huatacunatami ña precursor cashcarca. Malaui llajtapi huillangapajmi publicadorcuna minishtirishcarca. Chaipimi huaquin quillacunata huillanaman rishcarca. Chaipica misionero turicunahuanmi pasaj cashcarca. Paicunaca alli ejemplotami cushcarca. Shinallataj Jehová Diostapish punta lugarpi churachunmi paitaca animashcarcacuna.

Huata 2003-pimi Alexhuan cazararcani. Chai punllamanta huichimanmi ishquindij Diostaca tiempo completota sirvishpa caticunchij. Diosta sirvinamantaca achcatami yachashcanchij. Jehovapish ñucanchijtaca achcatami bendiciashca.

ACHCA BENDICIONCUNATAMI CHASQUIRCANCHIJ

Huata 2009-pimi ñucanchijtaca Timor Oriental llajtapi misionerocuna cachun invitarcacuna. Chai llajtaca Indonesia cꞌuchullapimi saquirin. Chaipi sirvinaman invitashcamantami cushilla sintirircanchij. Shinapish asha manchaitami charircanchij. 5 quillacuna qꞌuipaca Timor Orientalpi saquirij Dili llajtamanmi chayarcanchij.

Chai llajtaman chayashpaca chaipi tiyaj culturata, shimitami yachana carcanchij. Shinallataj chai llajtapi tiyaj micunacunatami micuna carcanchij. Chai llajtapica pobrecunaman, mana estudiashca gentecunaman predicaj carcanchij. Guerra tiyashcamantami huaquin gentecunaca achcata sufrishcarcacuna.a

Timor Oriental llajtapi predicanaca alajami carca. Shuj cutinca chaipi predicacushpami 13 huatacunata charij Mariahuan tuparcanchij.b Paipaj mamaca huaquin huatacuna huashamanmi huañushca carca. Shinallataj paipaj yayataca mana tanto ricushcachu carca. Chai llajtapi causaj huahuacuna shinallatajmi paipaj causaipi imata ruranata mana yachashca carca. Shuj cutinca paica ima shina sintirishcatami huacashpa ñucamanca tucuita parlarca. Pero chai shimita mana tanto intindishpapish paita animangapajmi Jehová Diostaca ayudahuai nishpa mañarcani. Chai huashaca animaj versocunatami paimanca liyircani. Asha huata qꞌuipaca Mariaca Jehová Diosta rijsishpami cushilla sintirirca. Qꞌuipacarin Diosman mingarishpami bautizarirca. Cunancarin shujtajcunamanpishmi Bibliamanta yachachin. Paica turi ñañacuna paita cꞌuyashcamantami cushilla sintirin.

Timor Orientalpimi Jehová Diosca achca gentecunaman Bibliamanta yachachingapaj bendiciashca. Cai último 10 huatacunapica achcacunami bautizarishcacuna. Paicunamantaca maijancunaca precursorcuna, siervo ministerialcuna, congregacionta pushajcunami can. Cutin shujtajcunaca chai llajtapi tiyaj shimicunapimi publicacioncunata traducishpa ayudancuna. Tandanacuicunapi paicuna cushilla cantajta ricushpa, Jehová Diospaj amigo cangapaj esforzarijta ricushpami cushilla sintirircani.

YAYITU DIOSTA SIRVISHPAMI ASHTAHUAN CUSHILLA CAUSACUSHCANI

Timor Orientalpi causaica mana Australiapi shinachu carca. Pero chaipi Diosta sirvishcamantami cushilla sintirircani. Huillanaman buspi rishpaca pescadocunata randinaman shamuj gentecunahuan o verduracunata randij gentecunahuanmi rij carcanchij. Shinallataj Bibliamanta estudiota cungapajpish uchilla huasicunapimi yachachij carcanchij. Chaipica achca cunujmi carca. Huasi ucu pambapish allpallamantami carca. Chai muyundijtaca achca atillpacunami tiyarca. Chashna jarcaicuna tiyajpipish Jehová Diosta sirvishpaca cushillami sintirircanchij.

Ñuca yayitu mamita Jehová Diosmanta yachachishcamantami achcata agradicini. Paicunaca ñuca fe mana sinchi cajpipish Yayitu Diosta sirvishpa catichunmi apoyarcacuna. Chashna apoyashcamanta, yachachishcamantami Diosmantaca manataj caruyashcani. Ñuca papito, ñuca mamitaca ñuca cusahuan Jehová Diosta sirvijta ricushpaca cushillami sintirincuna. 2016 huatamantami ñuca cusataca Australasiapi superintendente de circuito cachun agllarcacuna. Chai punllamantami chaipi saquirij congregacioncunata visitashpa ayudacunchij.

Cunan punllacunapica Jehová Diosta sirvinataca achcatami munani. Pero ñaupa punllacunapi huillanata imamanta mana munashcataca mana intindinichu. Ima problemacunata charishpapish Jehová Diosta shungumanta sirvishpaca cushilla causai tucushcatami yachashcani. 18 huatacunatami ñuca cusa Alexhuanca Jehová Diosta cushilla sirvishpa pasashcanchij. Cunanmi rey David nishcacunaca ciertotaj cashcata cuentata cuni. Paica: “Canpi shunguta churajcunaca tucuicuna cushicuchun. Cambaj shutita cꞌuyajcunaca canpi cushicuchun” nircami (Salmo 5:11).