2 Crónicas

1 Davidpaj churi Salomonpaj mandanaca cada punllami ashtahuan sinchiyashpa catirca. Paipaj Jehová Diosca paihuanmi carca. Diosca Salomontaca tucuicunamanta yallimi jatunyachirca.

2 Salomonca tucui Israelpi causajcunata, 1.000 gentecunata pushajcunata, 100 gentecunata pushajcunata, juezcunata, tucui Israelpi tiyaj familiacunata pushajcunatapishmi tandachirca. 3 Chashna tandachishpami Salomonca tucui chaipi cajcunataca Gabaonpi adorana lugarman* pusharca. Diospaj tandanacuna carpa huasica chaipimi carca. Chai tandanacuna carpa huasitaca Jehová Diosta sirvij Moisesmi chaquishca pambapi rurashca carca. 4 Shinapish Davidca Diospaj Arcatami Quiryat-Jearimmanta huichiyachishpa pai allichishca lugarman apashca carca. Davidca Diospaj Arcapajmi shuj carpa huasita Jerusalenpi shayachishca carca. 5 Bezalel rurashca cobre altartaca Jehová Diospaj carpa huasi ñaupajpimi churarcacuna. Bezalelca Uripaj churi, Urica Hurpaj churimi carca. Salomonpish, tandanacushca gentecunapish chai altar ñaupajpimi Diosta mañajcuna carca.* 6 Chaipimi Salomonca Jehová Diospaj ñaupajpi ofrendacunata curca. Tandanacuna carpa huasipi tiyaj cobrehuan rurashca altar jahuapimi rupachishca 1.000 ofrendacunata curca.

7 Diosca chai tuta Salomonpaj ñaupajpi ricurishpami: “Can ima munashcata mañailla” nirca. 8 Dios chashna nijpimi Salomonca cashna cutichirca: “Canta sirvij ñuca yaya Davidmanca achcata cꞌuyashcatami* ricuchishcangui. Paipaj randipish ñucatami rey cachun churashcangui. 9 Cunanca Jehová Dioslla, ñuca yaya Davidman ari nishcata pajtachipai. Canmi ñucataca rey cachun churashcangui. Cai pueblopica yallitaj achca gentecunamari can. Paicunaca allpapi tiyaj ñutu allpa shina achcacunamari can. 10 Cambaj llajta gentecunaca yallitaj achcacunami, ¿pitaj paicunataca juzgai tucungari? Chaimanta cai llajtapi causaj gentecunata pushangapaj* alli yachaitapish, tucuita yachanatapish cuhuayari” nircami.

11 Chashna nijpimi Diosca Salomonmanca cashna nirca: “Chaitaca shungumantami mañashcangui. Chaimantami canca charij canatapish, cosascunatapish, shujtajcunapaj ñaupajpi alli ricurinatapish, achca huatacunata causanatapish,* canta pꞌiñajcunata huañuchinatapish mana mañashcangui. Ashtahuanpish can ñuca pueblota juzgangapajmi alli yachaitapish, tucuita yachanatapish mañashcangui. Chaipajmi cantaca cai llajtapi rey cachun churashcani. 12 Chashna cashcamantami alli yachaitapish, tucuita yachanatapish canca chasquingui. Ashtahuanpish canmanca achca charinacunata, cosascunata, alli nishca canatapishmi cusha. Caicunataca cambaj ñaupa mandaj reycunaca mana charishcachu, cambaj qꞌuipa mandaj reycunapish mana charingachu” nircami.

13 Gabaonpica tandanacuna carpa huasimi tiyarca. Chaipi tiyaj adorana lugarmantami Salomonca Jerusalenman tigrarca. Chashna tigrashpami israelitacunata mandashpa catirca. 14 Salomonca carretacunata, caballocunatami ashtahuan mirachishpa catirca. Paica 1.400 carretacunata, 12.000 caballocunatami charirca. Chaicunataca carretacunata shayachina llajtacunapimi churarca. Shinallataj reypaj cꞌuchullapi, Jerusalenpimi churarca. 15 Rey Salomonca Jerusalenpica rumicunata shinami yallitaj achca orota, yallitaj achca cullquita tandachirca. Shinallataj Sefelapi tiyaj sicómoro* yuracunata shinami yallitaj cedro caspicunata tandachirca. 16 Salomón charishca caballocunaca Egiptomanta apamushcami carca. Reypaj cꞌatushpa randishpa purijcunami achca caballocunataca* shuj preciollapi randijcuna carca. 17 Egiptomanta apamushca cada carretaca 600 siclo cullquimi valirca. Caballocunapish cada unomi 150 siclo cullqui valirca. Chaicunatami hititacunapaj tucui reycunamanpish, Siria llajtamanta reycunamanpish cꞌatujcuna carca.