Ima alli cashcata yachachina

Canadá llajtapica huaquin estudiantecunami shuj paseoman rishcacuna carca. Chai paseopimi huaquin jovencunaca shuj compañerota violashca carca. Tucui chai estudiantecunaca pagado colegiopimi estudiajcuna carca. Cai noticiata ricushca qꞌuipami Leonard Stern runaca shuj periodicopica: “Achcata yachashpapish pagado colegiopi estudiaj cashpapish jovencunaca mana alli cosascunatami rurashpa catincuna” nishpa escribirca.

Leonard runaca: “Yaya mamacunami paicunapaj huahuacunamanca allita rurachun yachachina can. Pero huaquincunaca paicunapaj huahuacuna colegiopi alli notacunata llujshichun, alli trabajota agllachunllami ashtahuan preocuparincuna” ninmi.

Estudianaca allimi can. Pero colegiopi, universidadpi estudiashpapish gentecunapaj mana alli yuyashcata o mana alli rurashcataca mana cambiai tucushcacunachu. ¿Maipitaj ima alli cashcata, ima mana alli cashcataca yachai tucunchij?

BIBLIAPIMI IMA ALLI CASHCATA YACHACHIN

Bibliaca shuj espejo shinami can. Bibliata liyishpami imapi mejorana cashcata cuentata cunchij (Santiago 1:23-25). Shinallataj Bibliata yachashpami cꞌuyaj canata, mana utca pꞌiñarij canata, alli shungu canata, imapipish jarcarij canata yachanchij. Tucui caita yachashpami tandalla, tranquilo causai tucunchij. Bibliapica: ‘Cꞌuyaimi tucuicunata shujllata ruran’ ninmi (Colosenses 3:14). ¿Shujtajcunata cꞌuyanaca imamantataj importante can? Biblia ima nishcata yachashun.

• ‘Cꞌuyaita charijca llaquita apajmi, alli shunguyujmi, mana shujtajpajta munanchu, mana jatun tucunchu. Maipish cachun mana imata ruranchu, mana paipajlla mashcanchu, mana yallitaj pꞌiñarijchu, llaquichijpipish mana yuyaipi charicunllachu. Cashcata mana rurajpica mana cushicunchu, chaipaj randica imapish mana llulla cajpimi cushicun. Tucui llaquita apanllami, tucuita ahuantanllami. Cꞌuyaica manataj tucuringachu’ (1 Corintios 13:4-8).

• “Cꞌuyajca, shujtajtaca ima millaita mana ruranchu” (Romanos 13:10).

• “Tucuimanta yallica, cancunapurapi tucui shunguhuan cꞌuyaj caichij. Cꞌuyaica, achca juchacunatapish perdonachijmi” (1 Pedro 4:8).

Ñucanchij familiacunahuan, amigocunahuan cashpaca cushilla, tranquilomi sintirinchij. ¿Imamantataj chashna sintirinchij? Paicuna ñucanchijpaj allita munashcamanta, mana ñucanchijta llaquichisha nishcamantami alli sintirinchij.

Cꞌuyaimantami tucuita saquishpa ñucanchij causaita cambiai tucunchij. Por ejemplo, Jorge shuti runaca recienlla huacharishca nietotami ricusha nirca. Pero paica achcatami fumaj carca. Chaimantami paipaj yernoca: “Huahuapaj ladopica mana fumanachu cangui” nirca. ¿Jorgeca imatataj rurarca? Paica 50 huatacunata fumashpami causaj carca. Shinapish paipaj nietota cꞌuyashcamantami paihuan pasangapaj fumanata saquirca.

Shujtajcunata cꞌuyachunca yaya mamacunami huahuacunataca yachachina can. Alli yaya mamacunaca huahuacunamanca caranmi, ungujpipish jambinmi, pi dañota rurachunpish mana saquincunachu. Shinallataj huahuacunahuanpish pasangapajmi tiempota surcuncuna, mana allita rurajpipish allita rurachunmi yachachincuna. Huahuacunallataj ima alli cashcata cuentata cuchunmi yachachincuna. Ashtahuancarin yaya mamacunami huahuacunaman alli ejemplota cuncuna.

Cutin shujtaj yaya mamacunaca mana chaita rurancunachu. Shinapish huaquin huahuacunaca familia ucupi problemacunahuan huiñashpapish qꞌuipamanca paicunapaj causaipi cambiashcacunami. Cunancarin cꞌuyaj, alli gentecunami can. Achcacunaca: “Huaquin gentecunaca paicunapaj causaita manataj cambiangachu” nincunami. Pero chashna yuyashca gentecunapish causaipi cambiashcacunami. Catij yachaipimi caimanta ashtahuan yachashun.