3. Mana desanimarij cana

¿IMATAJ CAN?

Mana desanimarij cashpami ima llaquicuna o jarcaicuna ricurijpipish ñaupajman catishun. Por ejemplo, shuj uchilla huahua alli purinata yachangapajca maipica urmanga imangachari. Chai shinallatajmi cambaj huahuaca alli experienciata charingapajca maipica imapi pandarinata pudin.

¿IMAMANTATAJ IMPORTANTE CAN?

Huaquin huahuacunaca ima mana alli llujshijpi, imata mana rurai tucushpa, o shujtajcuna corregijpica ratomi desanimarincuna. Shujtajcunacarin ña imapaj mana valishcatami yuyancuna. Shinapish cai catij yuyaicunatami alli intindina can:

• Tucuita alli ruranataca mana pudinchijchu (Santiago 3:2).

• Tucuicunami sinchi problemacunata charinchij (Eclesiastés 9:11).

• Tucuicunami consejachun minishtinchij. Chashnami alli yachaj tucushun (Proverbios 9:9).

Huahuacuna mana desanimarinata yachashpaca ima problema ricurijpipish jahuallami chꞌimbapurangacuna.

¿HUAHUACUNA MANA DESANIMARIJ CACHUNCA IMA SHINATAJ YACHACHISHUN?

Huahuacuna pandarijpi

BIBLIAMANTA SHUJ YUYAI: “Cashcata ruraj runaca, canchis cutin urmachijpipish, cutin jataringallami” (Proverbios 24:16).

Cambaj huahua ama desanimarichun ayudai. Por ejemplo, ¿shuj examenta mana alli cushpaca cambaj huahuaca imatataj ruranga? ¿“Imapaj mana valinichu” nishpachu desanimaringa?

Cambaj huahua ama desanimarichunca cutinpi imata rurai pudishcatami yachachina cangui. Chashnami huahuaca ima problemacunamanta llaquirinapaj randica chaicunata chꞌimbapuranata yachanga.

Shinallataj ima problemata charijpica mana allichishpa cunachu cangui. Paillataj problemata allichichunmi ayudana cangui. Por ejemplo, examenta mana alli cushca cajpica: “Cutinpi examenta alli cungapajca, ¿imatataj rurai tucungui?” nishpami tapuna cangui.

Llaquicuna japijpi

BIBLIAMANTA SHUJ YUYAI: “Cancunaca caya punlla ima tucuna cashcataca manamari yachanguichijchu” (Santiago 4:14).

Ima punlla llaqui japinataca mana yachanchijchu. Cullquitapish, saludtapish rato pirdi tucunchijllami. Biblia nishca shinaca: “Mishanacuipica mana alli callpajcunallachu mishancuna. Macanacuipipish mana cꞌari cꞌaricunallachu mishancuna”. Ima punlla llaqui japina cashpaca, llaqui japinllami (Eclesiastés 9:11).

Huahuacunata ima llaquicuna ama japichun cuidanaca allimi can. Pero, ¿cambaj huahuacunataca tucui problemacunamanta librai tucunguichu?

Cambaj huahuaca cullqui illaj tucungapaj, trabajo illaj saquiringapajca uchillarijchari can. Pero, shuj familia huañujpi, shuj amigo caruyajpi o shujtaj llaquicunatachari chꞌimbapurana tucunga.a

Imapi mejorachun consejajpi

BIBLIAMANTA SHUJ YUYAI: “Cunashcatapish uyangui, alli tucuchun rimashcatapish chasquingui. Chashnami ña yuyaj cashpaca, yachaisapa cangui” (Proverbios 19:20).

Consejanaca mana llaquichingapajchu can. Ashtahuanpish mana allita rurashcata, mana alli comportarishcata corregingapajmi can.

Cambaj huahuacunataca consejocunata chasquichun yachachi. Chashnami canpish, cambaj huahuacunapish mana sufringuichij. Juanca: “Cambaj huahua ima problemata charijpi chaicunata allichishpaca huahuataca mana ayudanguichu. Ashtahuanpish huahuaca ashtahuan ashtahuan problemacunapimi urmanga. Cutin canca tucui paipaj problemacunatami allichishpa causangui. Chaimi ishquindij llaquilla causanguichij” ninmi.

¿Cambaj huahua consejocunata chasquichunca ima shinataj ayudai tucungui? Escuelapi o shujtaj ladopi cambaj huahuata consejajpica, “deganami canta chashna nishca” ninapaj randica cashna tapui:

• “¿Imamantataj chashna consejarca?”.

• “¿Chai consejota chasquingapajca imatataj rurana cangui?”.

• “¿Cutinpi canta chashnallataj consejajpica imatataj rurangui?”.

Cambaj huahua consejocunata chasquishpaca allimi causanga.