CAI MUNDOPICA ACHCA PROBLEMACUNAMI TIYAN

3 | Cambaj familiata, amigocunatapish alli cuidai

¿CAITA RURANACA IMAMANTATAJ MINISHTIRISHCA CAN?

Problemacunata charicushpaca achca gentecunami paicunapaj amigocunamanta, familiamanta caruyancuna.

Amigocunamantami caruyancuna.
Cusa huarmicunaca ashtahuanmi pꞌiñanacuncuna.
Yaya mamacunaca paicunapaj huahuacuna charishca problemacunapica mana yuyancunachu.

¿Caitaca yacharcanguichu?

Llaquicuna ricurijpica amigocunata charinaca minishtirishcami can. Paicunami sano, contento cachun ñucanchijta ayudan.
Problemacuna tiyan horaspi yallitaj estresarishpaca cambaj familiapica ashtahuan problemacunami ricuringa.
Cambaj huahuacunapish televisionpi mana alli noticiacunata ricushpaca achcatami sustari tucun.

¿Imatataj rurai tucungui?

Bibliapica: “Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin” ninmi (Proverbios 17:17).

Can ima shina sintirishcata intindishpa pi alli consejocunata cui tucushcata yuyai. Canta cꞌuyaj amigocunata charishcata ricushpaca llaquicunahuan chꞌimbapurangapajmi fuerzata japingui.

PROBLEMACUNAHUANCA CHꞌIMBAPURAI TUCUNCHIJMI: Huaquin consejocuna

Problemacuna tiyajpipish cambaj familiata, amigocunata cuidashpa catingapajca caita rurai

CUSANDIJ HUARMINDIJ ALLI APANACUICHIJ

Cusandij huarmindij alli apanacuichij

Bibliapica: ‘Shujlla causanapaj randica, ishqui causanami ashtahuan alli. Shuj urmajpipish, caishujca jatarichinmi’ ninmi (Eclesiastés 4:9, 10). Ima shinami shuj piloto copilotohuan tandalla avionta pushancuna, chashnallatajmi cusa huarmicunapish imatapish tandalla rurana can. Mana macanacuipi caj ishqui avionta pushaj pilotocuna shinachu cana can.

Problemacuna ricurijpipish ama cancunapura pꞌiñanacuichijchu. Ashtahuanpish pacienciata charingapaj esforzarichij.
Pudishpaca cada semana cancunapaj problemacunamanta parlanacuichij. Pero chai problemata allichingapaj parlanacuichij mana pꞌiñanacungapajca.
Imatapish ishquindij rurangapaj tiempota llujchichij.
Ishquindij imatapish cushicuihuan rurashcacunata yuyarichij. Por ejemplo, cancuna cazarashca punllamanta fotocunata o shujtaj alaja fotocunatami ricui tucunguichij.

“Tal vez cusa huarmicunaca mana tucuipi de acuerdochu canga. Shina cajpipish ishquindijmi imatapish tandalla rurai tucunguichij. Ima decisionta agllashpapish ishquindijmi tucui alli llujshichun esforzari tucunguichij” (David).

AMIGOCUNAMANTA AMA CARUYAI

Amigocunamanta ama caruyai

Cambaj amigocuna canta cushichichunllaca ama shuyaichu. Ashtahuanpish canmi paicunata cushichi tucungui. Chashna rurashpami canllataj animaringui.
Cada punlla cancunapaj amigocuna ima shina cashcata yachangapaj paicunahuan parlai.
Can shina charishca problemacunahuan cambaj amigocuna ima shina chꞌimbapurashcata tapui.

“Problemacunaca sinchi tamyahuan acapanacuna shinami can. Acapanacuna jatarijpica maita rinata, maipi cashcataca mana yachanchijchu. Pero alli amigocunami imata ruranata ricuchi tucun. Maipica ñucanchijcuna imata ña yachashcatami yuyachincuna. Cambaj amigocunaca randi randi cꞌuyanacushcataca allimi yachancuna” (Nicole).

CAMBAJ HUAHUACUNA IMA SHINA SINTIRISHCATA YUYAI

Cambaj huahuacuna ima shina sintirishcata yuyai

Bibliapica: ‘Tucuicunallataj alli uyajcuna, mana utca rimajcuna caichij’ ninmi (Santiago 1:19). Maipica cambaj huahuacunaca imamanta sustarishca cashcata o imamanta mancharishca cashcataca mana parlasha ningacunachu. Pero can pacienciahuan uyanata yachajpica, paicunaca ima shina sintirishcataca parlangacunallami.

Cambaj huahuacuna imata mana manchashpa parlachun ayudai. Cambaj huahuacunata tiyachishpa parlachun obliganapaj randica, paicunahuan purinaman llujshishpa o carropi ricushpami paicunaca mana manchashpa imatapish huillangacunalla.
Cambaj huahuacuna mana alli noticiacunata ricuchun ama saquichu.
Tucui familia alli cachun, alli sintirichun imata ruracushcata paicunaman huillai.
Llaquicuna ricurijpi imata ruranata cambaj huahuacunahuan practicai.

“Cambaj huahuacuna parlachun saqui. Chaipimi paicunaca imamanta mancharishca o sustarishca cashcata o imamanta pꞌiñarishca cashcata huillangacuna. Canpish chashnallataj sintirishpa cutin alli cangapaj imata rurashcata paicunaman huillai” (Bethany).