¿COSASCUNA CARUYAJPICA IMATATAJ RURASHUN?
Generoso cai
Cosascuna caruyajpica shujtajcunahuan generoso canaca manachari fácil canga. Pero generoso cashpaca cullqui illai tiempopipish ñaupajmanmi cati tucungui. Chaimanta shujtajcunata ayudashpapish cullquita ima shina ahorrai tucushcata yachai.
¿CAICA IMAMANTATAJ IMPORTANTE CAN?
Shujtajcunata ayudangapaj ashallata cushpapish canllatajmi cushilla, alli sintiringui. Huaquin doctorcunaca: “Generosocunaca cuerpopipish, yuyaipipish alli saludtami charin” ninmi. Por ejemplo, generoso cashpaca ansiedad ungüita, estrés ungüita, presión arterial nishca ungüita, shujtaj nanaicunatapish mana tanto charincunachu. Shinallataj allimi dormincuna.
Shujtajcunata cullquisitohuan ayudashpa, ima minishtishcata cushpaca minishticui horas ayudata chasquinaca cambajca jahuallami canga. Inglaterramanta Howard shuti runaca: “Ñucapish, ñuca huarmipish generoso cangapaj, shujtajcunata ayudangapajmi pendientes canchij. Chashna rurashcamantami ñucanchij imata minishtishpaca mañai tucunchijlla” ninmi. Shungumanta ayudajcunaca chashnallataj ayudachunca mana shuyanchu. Ashtahuanpish alli amigocunatami charingacuna. Paicunami minishtishca tiempopica ayudangacuna.
¿IMATATAJ RURAI TUCUNGUI?
Imalla charishcata convidai. Ashallata charishpapish shujtajcunamanmi imallatapish cui tucungui. Uganda llajtapi causaj Duncan shuti runapish, paipaj familiapish pobrecunami can. Chashnapish generosocunami can. Duncanca: “Cachi calditollatapish yanushpami tucui domingocunaca ñucanchij huasiman maijancunata invitanchij. Paicunahuan tiempota pasashpaca cushillami sintirinchij” ninmi.
Shujtajcunahuan generoso cashpapish cambaj familiataca mana descuidanachu cangui (Job 17:5).
Caita rurai: Pobre micunitallatapish, mishqui yaquitullatapish shujtajcunaman carai. Shinallataj ima cosascunata ña mana ocupacushpaca shuj amigoman o shuj vecinoman cui.
Shujtaj ruraicunahuanpish generoso cai. Shujtajcunata ayudangapajca maipica cullquita mana minishtinguichu. Por ejemplo, shujtajcunahuan parlangapaj, paicunahuan pasangapajmi tiempota llujshichi tucungui. Alaja shimicunata nishpapishmi ayudai tucungui. Chaimanta shujtajcunata mashnata valorashcata, mashnata cꞌuyashcata siempre ricuchi.
Caita rurai: Shujtajcunataca huasipi ima ruraicunata rurashpa, huasita allichishpa, imata randinaman rishpa ayudai. Shinallataj shuj amigota agradicingapajca shuj notitata escribi. Cantaca yuyarinimi ningapajllapish shuj mensajeta cachai.
Generoso cangapaj esforzarishpaca cushillami causangui.