Testigo de Jehovacunaca cullqui jahua yachachijcunataca mana charinchijchu. Congregación callarishca punllacunapica, ‘tandanacushca crijcunata ricuchunmi’ ñaupajman pushaj alli huauquicunata agllaj carca (Hechos 20:28). Cunan punllacunapipish chashnallatajmi can. Ancianocunaca Diosta alli servijcunami. Mana cullquita japingaraicullachu congregacionta cuidan, tucui shunguhuan, mana qꞌuillanayachishpa, cushicushpami cuidan. (1 Pedro 5:​1-3). ¿Ima shinataj ñucanchijta ayudan?

Ñucanchijta cuidashpa, michishpami ayudan. Ancianocunaca congregacionta ñaupajman pushashpami Diosmanta ama caruyachun cuidan. Diosmi paicunataca chaita rurachun mingashca, chaimantami paicunaca mana ñucanchijta mandashpa causan. Chaipaj randica cushilla, alli causachunmi ñucanchijta ayudan (2 Corintios 1:24). Ima shinami shuj michijca ovejacunata alli cuidan, shinallatajmi ancianocunaca Diosta servijcunataca tucuicunata alli rijsishpa cuidan (Proverbios 27:23).

Diospaj munaita ruranatami yachachin. Cada semanami ancianocunaca, ñucanchij feta sinchiyachingapaj tandanacuicunapi yachachin (Hechos 15:32). Ancianocunaca paicunaraj ñucanchijhuan huillanaman llujshishpami ima shina huillanata yachachin.

Cada unotami ayudan. Cada unota ayudangapajmi ancianocunaca Tandanacuna Huasipi o ñucanchij huasiman rishpa Bibliahuan ayudashpa cushichin (Santiago 5:​14, 15, NM).

Congregacionpi ayudana cashpapish, achca ancianocunaca familiata cuidana, trabajanami can. Sinchita ayudashcamantaca cai huauquicunata respetanami canchij (1 Tesalonicenses 5:​12, 13).

• ¿Congregacionpica ima shinataj ancianocunaca ayudan?

• ¿Ancianocunaca ima shinataj cada unota ayudan?

Bibliapica congregacioncunata picuna cuidacushcatami parlan. Testigo de Jehovacunaca paicunataca ‘superintendente, siervo ministerial’ nishpami rijsinchij (Filipenses 1:​1, NM). Chashna servij huauquicunaca cada congregacionpimi taucacuna tiyan. Siervo ministerialcunaca ¿ima shinataj ñucanchijta ayudan?

Congregacionpaj ancianocunatami ayudan. Siervo ministerialcunaca Diosta alli servijcunami can. Paicunaman mingashcataca tucuitami alli pajtachin. Huaquincunaca jovencunami, shujtajcunaca yuyajcunami can. Congregacionpica chꞌican chꞌican ruraicunahuanmi ayudan. Chashna ayudajpimi ancianocunaca yachachingapaj, huauquicunata michingapajpish tiempota charincuna.

Allimi ayudancuna. Huaquin siervo ministerialcunaca tandanacuicunaman shamujcunata chasquishpami ayudan. Shujtajcunaca equipo de sonidota, publicacioncunata, contabilidadta ricushpa, congregación maipi huillana cashcata ricushpami ayudancuna. Chashnallataj Tandanacuna Huasi alli cachun cuidashpami ayudan. Yuyaj huauqui panicunatapish ancianocuna mañashca shinami ayudan. Imata rurachun mañajpipish paicunaca tucui shunguhuanmi ruran. Chaimantami paicunataca tucuicuna respetanchij (1 Timoteo 3:13).

Diosta alli servijcunami can. Siervo ministerialcunaca Diosta alli servijcuna cashcamantami congregacionpi ayudachun agllashcacuna can. Tandanacuicunapi yachachishpaca ñucanchij fetami sinchiyachin. Paicuna cushicushpa huillajta ricushpaca, ñucanchijpish cushicushpami huillanchij. Paicuna ayudajta ricushpapish cushilla, tandallami Diosta servinchij (Efesios 4:16). Asha huatacuna qꞌuipaca paicunapish anciano shinami servi tucun.

• ¿Siervo ministerialcunaca ima shina huauquicunataj can?

• ¿Congregación ñaupajman catichunca ima shinataj siervo ministerialcunaca ayudan?

Bibliapica Bernabé apóstol Pablohuan igual purishcatami huillan. Paicunaca superintendentecuna cashcamantami, huauquicunata ayudana munaihuan chai punlla congregacioncunata visitarca. Pabloca huauquicuna ima shina cashcata ricusha nishpami cutin visitasha nirca. Caru llajtacunaman rina cashpapish huauquicunata sinchiyachingapajmi rirca (Hechos 15:36). Cunan punlla superintendentecunapish huauquicunata cꞌuyashcamantami visitan.

Animangapajmi shamun. Superintendente de circuito huauquicunaca casi 20 congregacioncunatami huatapi ishqui cutin visitan. Visitacushpaca shuj semanatami cada congregacionpi saquirin. Superintendentecunamanta, cazado cajpica paicunapaj huarmicunamantapish achcatami yachai tucunchij. Cai huauquicunaca huahuacunata, jatuncunata rijsinatami munan. Shinallataj, ñucanchijhuan huillanaman llujshishpami, Bibliata yachacujcunata rijsinaman rin. Ancianocunahuanpish shujtaj huauquicunatami visitan. Congregacionpaj tandanacuicunapipish, jatun tandanacuicunapipish ayudangapajmi cushilla yachachin (Hechos 15:35).

Tucuicunamantami preocuparin. Superintendente de circuitocunaca congregacioncuna Diosta servishpa catichunmi ayudan. Ancianocunahuan, siervo ministerialcunahuan tandanacushpami congregación ima shina ñaupajman caticushcata ricun. Shinallataj paicunaman mingashcata alli pajtachichunmi cunashpa saquin. Precursorcunatapish alli huillachun, yachachishpa shunguman chayachunmi ayudan. Mushujcunapish tandanacuiman shamushpa ñaupajman caticushcata ricushpaca achcatami cushicuncuna. Superintendentecunaca tucui shunguhuan ñucanchijpaj ‘allita rurajcunami’ can (2 Corintios 8:23). Paicuna shinami tucui shunguhuan Diosta servina canchij, ñuchanchij fetapish sinchiyachina canchij (Hebreos 13:​7).

• ¿Superintendente de circuitocunaca imapajtaj congregacioncunata visitan?

• ¿Ima shinataj superintendentecunapaj ayudata chasqui tucungui?

Shuj jatun llaqui tiyajpica, testigo de Jehovacunaca utcami ñucanchij huauquicunata ayudanchij. Chashna ayudashpaca tucui shunguhuan cꞌuyashcatami ricuchinchij (Juan 13:​34, 35; 1 Juan 3:​17, 18). ¿Imallatataj ruranchij?

Cullquihuanmi ayudanchij. Antioquía llajtapi causaj Jesusta catijcunaca, Judea llajtapi causaj huauquicunata shuj jatun yaricai llaquichicujta yachashpaca, cullquita cachashpami ayudarcacuna (Hechos 11:​27-30). Cunan punllacunapipish maijan llajtapi huauquicuna llaquicunata apacujta yachashpaca, utcami congregacionpi cullquita tandachishpa paicunata ayudangapaj cachanchij (2 Corintios 8:​13-15).

Ima minishtishcata cushpami ayudanchij. Ima llaqui tiyajpica chaipi causaj ancianocunaca, utcami cada huauqui panicunata mashcan. Chashnami tucuicuna alli cachun ayudan. Comité de socorro nishcapi ayudaj huauquicunaca llaquita charijcuna micunata, yacuta, churanata, maipi dorminata charichunmi ricun. Shinallataj chugririshcacunata utca jambichunmi ricun. Achca testigocunaca paicuna munashcamantami, llaquicuna tiyashca llajtacunaman rishpa huauquicunapaj huasicunata, Tandanacuna Huasicunatapish allichishpa ayudan. Tandalla, utca, alli trabajanata yachashcamantami llaquicuna tiyajpica utca ayudanchij. Ñucanchij huauquicunata ayudacushpaca, shujtaj gentecuna ima religionta catijpipish ayudanchijmi (Gálatas 6:10).

Bibliamanta parlashpa cushichishpami ayudanchij. Llaquicuna tiyajpica gentecunaca cushichichunmi minishtin. ‘Tucui imapipish cushichij Diosmi’ llaquicuna tiyajpica ñaupajman catichun ayudan (2 Corintios 1:​3, 4). Chaimantami llaquipi cajcunataca, Diospaj Mandanapica tucui llaquicunami tucuringa nishpa Bibliahuan yachachinchij (Apocalipsis 21:​4).

• ¿Testigocunaca imamantataj llaquicuna tiyajpica utca ayudanchij?

• ¿Llaquicunata charijcunataca ima shinataj Bibliahuan cushichinchij?

Huañungapaj ashalla punllacuna illajpimi, Jesusca Pedro, Jacobo [o Santiago], Juan, Andreshuan paicunapuralla parlanacurca. Tucuri punllacunapi pai ricurina señalmanta parlashpaca, shuj tapuitami rurarca: ‘¿Maijantaj alli cazuj alli yuyaiyuj servij runaca canga? Paipaj amo mandashcata cazushpami, servijcunaman micuna horas caranga’ nircami (Mateo 24:​3, 45, Biblia en Quichua Cañar; Marcos 13:​3, 4). Chashna nishpaca Jesusca amo shina, huaquin huauquicunata agllanatami ricuchirca. Paicunaca tucuri punllacunapi Jesusta catijcunamanmi micunata caraj shina Diosmanta yachachina carca. Chai huauquicunaca ¿picunataj can?

Diospaj espirituhuan agllashca Jesusta alli catij ungidocunami can. ‘Servij runaca’ testigo de Jehovacunapaj Cuerpo Gobernante nishcami can. Paicunami Jehová Diosta servij tucui huauquicuna panicunaman Bibliamanta yachachin. Chashnami ‘micuna horaspi’ caraj shina Bibliamanta yachachishpa ñucanchijta ayudan (Lucas 12:42).

Amo mingashcatami cuidan (Lucas 12:44). Jehová Diospaj llajtata cai Allpapi cuidachunmi, Jesusca chai huauquicunaman mingashca. Paicunaca Diospaj llajta ima charishcacunatami cuidan. Huillanatami ñaupajman pushan. Tandanacuicunapipish yachachichunmi ricucun. Minishtishca horaspimi ‘servij runaca’ huillangapaj publicacioncunata cushpa, congregacioncunapi, jatun tandanacuicunapi yachachishpa ñucanchijta ayudan.

‘Servij runaca’ Biblia yachachishca shina yachachishcamanta, alli huillaicunata huillashcamantami alli cazuj can. Shinallataj cai Allpapi Jesús mingashcata tucuita alli yuyashpa cuidashcamantami alli yuyaiyuj can (Hechos 10:42). Jehová Diosca servij runata bendiciashcami: 1) Testigocunata achcata mirachishpa, 2) Bibliata entendingapaj achca ayudacunata surcuchun ayudashpa (Isaías 60:22; 65:13).

• ¿Bibliamanta paita catijcunaman yachachichunca pitataj Jesusca agllarca?

• ¿‘Servij runaca’ ima shinataj alli cazuj, alli yuyaiyuj can?

Jesús huañushca qꞌuipaca ñaupajman pushaj huauquicunaca Jerusalenpimi carca. Paicunaca apostolcuna, ancianocunami carca. Ñaupajman pushaj huauquicunaca tucui ungidocunapaj shutipimi minishtirishca yuyaicunata agllajcuna carca (Hechos 15:​2). Shuj yuyaita agllagricushpaca Biblia ima nishcata, Diospaj espiritupaj ayudatami mashcajcuna carca (Hechos 15:25). Cunan punllapish tucuicunata ñaupajman pushaj huauquicuna o Cuerpo Gobernanteca chashnallatajmi ruran.

Diosca cai huauquicunahuanmi paipaj munaita pajtachin. Cuerpo Gobernantepi caj ungido huauquicunaca, Diospaj Shimita cazunatami munan. Diospaj llajtata ñaupajman pushanata, Bibliamanta yachachinatapish allimi yachancuna. Muyundij Allpapi huauqui panicuna imata minishtishcata ricungapajca cada semanami tandanacuncuna. Jesús huañushca qꞌuipa ñaupajman pushaj huauquicunaca cartacunata, superintendecunata o shujtaj huauquicunata cachashpami Bibliamanta yachachij carca, cunan punllapipish Cuerpo Gobernanteca chashnallatajmi ruran. Chashna rurashcamantami Diospaj llajtaca shujlla yuyaihuan Diospaj munaita pajtachin (Hechos 16:​4, 5). Cuerpo Gobernanteca Bibliamanta imata yachachinatami ricucun, Diospaj Mandanamanta huillanatami ñaupajman pushacun. Congregacionpi pushaj huauquicuna tiyachunpishmi agllacun.

Diospaj espiritupaj ayudatami chasquincuna. Cuerpo Gobernanteca Tucuita Mandaj Jehová Diospaj ayudata, congregacionta Uma shina mandaj Jesuspaj ayudatami mashcancuna (1 Corintios 11:3; Efesios 5:23). Cuerpo Gobernanteca Diospaj llajtata mandajcuna cashcataca mana yuyanchu. Shujtaj ungidocuna shinami ‘Oveja [o Jesús] maita rishcata catincuna’ (Apocalipsis 14:​4, QCH, 2010). Paicunamanta Jehová Diosta ñucanchij mañajpica, Cuerpo Gobernanteca achcatami pagui nin.

• ¿Jesús huañushca qꞌuipaca picunataj ñaupajman pushajcuna carca?

• ¿Cunan punllapi Cuerpo Gobernanteca ima shinataj Diospaj ayudata mashcan?

Hebreo shimipi Betel nishpaca ‘Diospaj huasi’ nisha ninmi (Génesis 28:​17, 19, QCH, 2010). Testigo de Jehovacunaca muyundij Allpapimi Betel shuti huasicunata charin. Chai huasicunamantami alli huillaicuna ñaupajman catichun ayudan. Cuerpo Gobernanteca Estados Unidos, Nueva Yorkpi caj Betelpimi servin. Chai Betelmantami achca llajtacunapi tiyaj Betelcunata ricucun.

Betelpica tucui shunguhuanmi trabajancuna. Chai huasicunapi trabajaj huauqui panicunataca familia Betel nishpami rijsinchij. Shuj familia shinami micucushpa, trabajacushpa, Bibliamanta yachacushpaca tandalla, shujlla shina causan (Salmo 133:​1). Familia Betelpica Diosta servij cꞌaricuna, huarmicunami achca horascunata tucui shunguhuan Diospaj munaita pajtachin. Shinallataj alli huillaicuna ñaupajman catichunmi ayudan (Mateo 6:33). Ni pi mana shuj sueldota chasquinchu. Tucuicunami maipi dorminata, micunata, shinallataj ima minishtishcata randingapaj ashalla cullquita chasquin. Cada unomi shuj trabajota charin: huaquincunaca oficinacunapi, cocinapi o micuna huasi ucupi, shujtajcunaca imprentapi o librocunata rurashpami trabajan. Cutin shujtajcunaca dormina ucucunata pꞌichashpa, tajshashpa, Betel huasicunata allichishpami trabajan.

Betelmantami alli huillaicuna ñaupajman catichun ayudan. Betelpi ayudajcunaca Diospaj Shimimanta alli huillaicuna tucui gentecunaman chayachunmi munan. Cai folleto ima shina ñucanchijman chayashcata ricushun. Cuerpo Gobernantemi quillcachirca. Computadoracunapi rurashpami muyundij Allpapi traducij grupocunapajman cacharca. Chai qꞌuipaca huaquin Betelcunapi tiyaj imprentacunapi utca rurashpami 110.000 yalli congregacioncunaman cacharca. Chai tucuita rurashpami Betelpi trabajaj huauqui panicunaca alli huillaicuna ñaupajman catichun ayudacun (Marcos 13:10).

• ¿Picunataj Betelpi trabajan? ¿Imallatataj chasquincuna?

• ¿Betelpi rurashca trabajocunaca imapitaj ayudan?

Familia Betelca shuj llajtapi o tauca llajtacunapi alli huillaicuna ñaupajman catichunmi chꞌican chꞌican trabajocunata ruran. Traducishpa, imprentapi, librocunata rurashpa, librocunata huaquichishpa, grabacioncunata, videocunata rurashpami trabajan.

Comité de Sucursalmi ricuran. Cuerpo Gobernanteca cada Betelta ñaupajman pushachunmi, quimsa o ashtahuan alli yachaj ancianocunata agllan. Chai ancianocunatami Comité de Sucursal nishpa rijsinchij. Comité de Sucursalmi shuj llajtapi huillaicuna ñaupajman caticushcata, ima llaquicuna ricuricushcatapish Cuerpo Gobernanteman huillan. Chaita huillajpimi Cuerpo Gobernanteca congregación tandanacuicunapi, jatun tandanacuicunapi, shamuj publicacioncunapi ima yuyaicunata yachachinata ricun. Huaquinpi huaquinpica Cuerpo Gobernanteca paicunapaj shutipi Betelcunata visitachunmi shuj huauquita cachan. Chai huauquica Comité de Sucursalpi servij huauquicunatami ayudan (Proverbios 11:14). Shinallataj Betelta visitacushpaca, chai llajtapi causaj huauquicunata animangapajmi, shuj sumaj jatun tandanacuipi shuj conferenciata cun.

Congregacioncunatami ayudan. Betelmantami mushuj congregacioncuna tiyachun ricucun. Shinallataj chai llajtapi servij precursorcunata, misionerocunata, superintendente de circuitocunatami ayudan. Jatun tandanacuicuna tiyachun, Tandanacuna Huasicunata rurachun, congregacionman publicacioncunata cachachunpish ricucun. Betelca alli huillaicunata alli huillachunmi ayudan (1 Corintios 14:​33, 40, NM).

• ¿Comité de Sucursalcunaca ima shinataj Cuerpo Gobernante huauquicunata ayudan?

• ¿Betelpica imatataj rurancuna?

‘Alli huillaita cai pachapi chꞌican chꞌican rimaita rimajcunaman, pueblocunaman’ chayachingapajmi 750 yalli shimicunapi publicacioncunata ruranchij (Apocalipsis 14:​6). ¿Ima shinataj cai tucui trabajotaca ruranchij? Ñucanchijca chꞌican chꞌican llajtacunapimi quillcajcunata charinchij. Shinallataj tucui shunguhuan trabajaj achca traductorcunatami charinchij. Tucuicunami testigo de Jehovacuna can.

Publicacioncunataca inglespimi quillcan. Cuerpo Gobernanteca Estados Unidospi caj Departamento de Redacción imata rurajtami ricucun. Departamento de Redaccionca chaipi caj quillcajcunata, shujtaj Betelcunapi caj quillcajcunatapishmi ricucun. Tucui llajtacunamanta quillcajcunata charishcamantami, ñucanchij publicacioncunahuanca tucui laya gentecunata ayudanchij.

Quillcashcataca traductorcunapajmanmi cachan. Tucuita quillcashpa, alli cajta ricushca qꞌuipaca, muyundij Allpapi caj traductorcunapajmanmi publicacioncunataca cachan. Traductorcunaca inglesmanta yuyaicunata catishpami, alli shimicunata agllashpa chai yuyaicunallatataj shujtaj shimiman traducin (Eclesiastés 12:10).

Computadoracunaca utca trabajangapajmi ayudan. Computadoracunaca quillcajcunapaj, traductorcunapaj trabajotaca mana rurai tucunchu. Shinapish computadoracunapica utca trabajangapajmi diccionariocunata, shujtaj ayudacunatapish charinchij. Testigo de Jehovacunaca computadoracunapimi MEPS nishca programata rurashcanchij. Chai programapimi quillcashcataca dibujocunapaj ladopi churanchij. Chai programami publicacioncunata achca shimicunapi llujshichingapaj ayudan.

Ashalla huaranga gentecuna shuj shimita parlajpipish ¿imamantataj sinchita trabajanchij? Jehová Diosca “tucuicuna quishpirichun, paimanta mana llullashpa huillashcatapish yachachunmi munan” (1 Timoteo 2:​3, 4). Chaimantami sinchita trabajanchij.

• ¿Ñucanchij publicacioncunata quillcangapajca imallatataj ruranchij?

• ¿Imamantataj achca shimicunaman traducinchij?

Testigo de Jehovacunaca tucui huatacunami achca millones Bibliacunata, publicacioncunata rurashpa gentecunaman gratis cunchij. Shinallataj Tandanacuna Huasicunata, Betel Huasicunata ruranchij, allichinchij. Betelpi trabajajcunata, misionerocunata ayudanchij, llaqui tiyashca llajtacunamanpish ayudacunata cachanchij. ¿Chaicunata rurangapajca maimantataj cullquica llujshin?

Diezmota, ofrendata mana mañanchijchu. Bibliamanta yachachingapaj achca cullqui minishtirijpipish, mana gentecunata mañanchijchu. 100 yalli huatacuna huashamanca La Atalaya revistaca Jehovapaj ayudatami charinchij nishpami “Ñucanchij organizacionca mana imata mañangachu, gentecunapaj ayudatapish mana mashcangachu” nirca. Chaica pajtarishcami (Mateo 10:​8).

Shungumanta cushca cullquimi can. Muyundij Allpapi Diospaj munaita pajtachingapajmi testigo de Jehovacunaca, ñucanchij tiempohuan, fuerzahuan, cullquihuan ayudanchij. Chaita ricushpami shujtaj gentecunapish shungumanta cullquita cushpa ayudan (1 Crónicas 29:​9). Tandanacuna Huasicunapica uchilla cajacunami tiyan, chaipimi ayudasha nijcunaca cullquita churan. JW.ORG paginaman yaicushpapishmi cullquita cui tucunchij. Ayudacunaca Diospaj huasipi cullquita churaj huajcha viuda shina gentecunamantami shamun. Viuda huarmi ishqui ashalla valij cullquita churajpica, Jesusca allitami rurarca nircami (Lucas 21:​1-4). Maijapish ayudasha nishpaca, ‘shungupi yuyashca shina cunallami’ can (1 Corintios 16:2; 2 Corintios 9:​7).

Jehová Diosllatajmi paita adorasha nijcunataca paicuna imalla charishcacunahuan ayudachun yuyachinga. Chashnami alli huillaicunaca ñaupajman catinga (Proverbios 3:​9).

• ¿Testigocunaca imamantataj mana shujtaj religioncuna shina canchij?

• ¿Gentecuna cushca cullquihuanca imatataj ruranchij?

Ñucanchij Tandanacuna Huasicunapica Diospaj Mandanamantami yachanchij. Jesuspish Diospaj Mandanamantami huillashpa purirca (Lucas 8:​1).

Diosta adorangapaj huasicunami can. Chai huasicunamantami alli huillaicunata huillanaman llujshinchij (Mateo 24:14). Tandanacuna Huasicunaca mana yallitaj jatunchu can, shuj huasi shinami can. Huaquin Tandanacuna Huasicunapica tauca congregacioncunami tandanacun. Cai huatacunapica Diosta servijcunaca achcatami mirashca, chaimantami achca huaranga Tandanacuna Huasicunata rurashcanchij (cada punlla pichcata). ¿Ima shinataj chaita pajtachishcanchij? (Mateo 19:26.)

Gentecuna shungumanta cushca cullquihuanmi huasichinchij. Chai cullquitaca chai llajtapi tiyaj Betelmanmi cachanchij. Betelca Tandanacuna Huasicunata rurasha nij o allichisha nij congregacioncunamanmi chai cullquita mañachin.

Achca huauqui panicunami mana cobrashpa ayudan. Achca llajtacunapica Grupos de Construcción nishcami tiyan. Chai grupocunaca shujtaj ayudajcunandijmi chꞌican chꞌican congregacioncunaman rin. Caruman rina cajpipish chaiman chayashpami Tandanacuna Huasita rurachun huauquicunata ayudan. Shujtaj llajtacunapica alli huasichinata yachaj huauquicunatami agllashcanchij Tandanacuna Huasicunata rurashpa o allichishpa chai llajtapi causaj huauquicunata ayudachun. Huaquin ayudajcuna achcata yachajpipish, congregacionmanta achca huauquicuna panicunallatajmi Tandanacuna Huasita shayachingapaj ayudan. Jehová Diospaj espíritu ayudajpi, huauquicunapish tucui shunguhuan ayudajpimi Tandanacuna Huasicunata rurashcanchij (Salmo 127:1; Colosenses 3:23).

• ¿Tandanacuna Huasicunata muyundij Allpapi rurangapajca ima ayudatataj charinchij?

Testigo de Jehovacunapaj tucui Tandanacuna Huasicunami Diospaj jucha illaj shutita charin. Chaimantami alli allichishpa, alli pꞌichashpa charinchij. Chashna ayudanaca shuj bendicionmi can. Tucuicunami ayudai tucunchij. Ayudashpaca Diosta tucui shunguhuan adorashcatami ricuchinchij.

Tandanacui qꞌuipa pꞌichashunchij. Cada tandanacui qꞌuipami huauqui panicunaca Tandanacuna Huasita pꞌichanchij. Semanapi shuj cutinca allimi pꞌichanchij. Pꞌichangapajca shuj listata catishpami pambata, bancacunata, ventanacunata, espejocunata pꞌichanchij, bañocunata maillanchij, basurata shitanchij, canllacunatapish pꞌichanchij. Shuj anciano o shuj siervo ministerialmi alli pꞌichachun ricucun, ayudacunpish. Huatapica tucuita alli pꞌichangapajmi shuj punllata agllanchij. Huahuacunatapish imapi ayudachun churashpaca Tandanacuna Huasita cuidachunmi yachachinchij (Eclesiastés 5:​1).

Allichingapaj ayudashunchij. Tucui huatacunami Tandanacuna Huasicunataca ucutapish canllatapish huauquicunaca alli alli ricun. Chashnami alli ricurichun imallata allichina cashcata yachanchij. Cashna ruranaca qꞌuipa punllacunapi ama yangamanta cullquita gastangapajmi ayudan (2 Crónicas 24:13; 34:10). Tandanacuna Huasita pꞌichashpa alli charinaca, Diosta adorangapaj alli huasimi canga. Allichingapaj ayudashpaca Tandanacuna Huasita cuidashcata, Jehová Diostapish achcata cꞌuyashcatami ricuchinchij (Salmo 122:​1). Tandanacuna Huasita alli cuidajpica chai llajtapi causajcunapish ¡allimari! ningacunami (2 Corintios 6:​3).

• ¿Tandanacuna Huasitaca imamantataj mana maipishcachun charina canchij?

• ¿Tandanacuna Huasita allichishpa charingapajca imallatataj ruranchij?

¿Bibliamanta ashtahuan yachasha ninguichu? ¿Shuj versomanta, ñaupa punllapi Diosta servijcunamanta, Bibliapi parlashca llajtacunamanta, ñaupa punllacunapi ima tucushcatapish yachasha ninguichu? ¿Llaquicunata chꞌimbapurangapaj Bibliaca ayudanchu? Cai tapuicunamanta yachasha nishpaca, Tandanacuna Huasipi tiyaj bibliotecamanmi rina cangui.

Bibliotecapica achca ayudacunami tiyan. Testigo de Jehovacuna llujshichishca publicacioncunataca manachari tucuita can rimashca shimipi charingui. Tandanacuna Huasipi tiyaj bibliotecapica cunanlla llujshishca publicacioncunami tiyan. Shinallataj chꞌican chꞌican Bibliacuna, shuj alli diccionario, shujtaj librocunapishchari tiyan. Tandanacui manaraj callarijpi o tucurishca qꞌuipapish ricunaman rinallami cangui. Shuj computadora tiyajpica Watchtower Library nishca programami tiyanga. Chai programapica Testigocunapaj achca publicacioncunami tiyan. Minishtishca temacunata, shimicunata, versocunatapish mashcangapajca shuj uchilla programatami charin.

Jesús shina causashunchij huillashunchij tandanacuipi participajcunatami ayudan. Cambaj asignacioncunata preparangapajmi bibliotecapica achca ayudacuna tiyan. Jesús shina causashunchij huillashunchij tandanacuita pushaj huauquimi, Biblioteca allichishca cachun, mushuj publicacioncunapish tiyachun ricun. Bibliotecapi imata mashcasha nishpaca, escuelata pushaj huauquita o canta yachachijta ayudachun mañanallami cangui. Bibliotecapi tiyaj publicacioncunata japishpaca cuidanami cangui, mana señalanachu cangui. Tandanacuna Huasimantapish ama apangui.

‘Diosmanta alli yachaita japisha’ nishpaca, ‘pacashca tiyacuj sumaj charinacunata mashcaj shina’ mashcachun nishpami Bibliapica yachachin (Proverbios 2:​1-5). Tandanacuna Huasipi tiyaj bibliotecami ashtahuan yachachun ayudanga.

• ¿Tandanacuna Huasipi tiyaj bibliotecapica ima ayudacunataj tiyan?

• ¿Picunataj bibliotecapi mashcachun ayudai tucun?

Jesusca nircami: ‘Cancunapish shujtajcunapaj ñaupajpi luz achijyachij shina alli causaichij. Chashna allita rurashpa causacujta shujtajcuna ricushpaca, jahua pachapi caj cancunapaj Yayata allimari cangui ningacunami’ nishpa (Mateo 5:16). Testigo de Jehovacunaca cai shimicunata pajtachingapajmi, Internetpi jw.org paginata charinchij. Chaipimi ñucanchij crishcacunata, ñucanchij ruraicunatapish huillanchij. ¿Imallataj chaipica tiyan?

Ima tapuitapish Bibliahuanmi cutichin. Ñucanchij paginapica gentecuna rurashca tapuicunatami cutichin. ¿Llaquilla causaica tucuringachu? ¿Huañushcacunaca causaringachu? nishca pꞌangacunatami internetpi, ñucanchij paginapi 600 yalli shimicunapi surcui tucungui. Shinallataj Traducción del Nuevo Mundo Bibliaca 130 yalli shimicunapimi tiyan. Bibliamanta yachangapajca, Dios cushca alli huillaicuna folleto, cunanlla llujshishca La Atalaya, ¡Despertad! revistacuna, shujtaj ayudacunapishmi tiyan. Shinallataj jw.org paginamantaca publicacioncunata uyangapaj grabacioncunata, rezangapajpish MP3, PDF o EPUB archivocunata surcunallami cangui, o Internetllapitaj uyanalla o rezanallami cangui. Munashpaca can rimashca shimipi tiyaj temacunataca, ashtahuan yachasha nijcunaman imprimishpa cunallami cangui. Videocunapish achca señas shimicunapimi tiyan. Shinallataj Bibliamanta rezashca audio dramacunata, dramacunata, sumaj musicacunatapish uyangapaj surcunallami cangui.

Testigo de Jehovacunamanta mana llullashpami parlan. Chai paginapica Testigocuna ima tucucushcata, llaquicuna tiyashca llajtacunapi ima shina ayudacushcatami huillan. Muyundij Allpapi huillacushcata ricuchij uchilla videocunami tiyan. Jatun tandanacuicuna maipi tiyana cashcata, Betelman ima shina quillcanatapishmi huillan.

Chai ayudacunahuanmi tucui muyundij Allpapi Diospaj Shimimanta yachachicunchij. Chashnami Antártida caru llajtapipish Diospaj Shimi achijyachichun ayudanchij. Jehová Diospaj Shimi tucui llajtacunaman utca chayachunmi paita mañanchij. Chashnami shujtajcunapish paita jatunyachinga (2 Tesalonicenses 3: 1, NM).

• ¿Gentecuna Diospaj Shimimanta alli yachachunca ima shinataj jw.org Internetpi paginaca ayudacun?

• ¿Imatataj ñucanchij paginapi mashcasha ningui?