Achcacunami iglesiapi mana alli yachachijpi, llaquilla cajpi mana ayudajpi iglesiacunaman rinata saquishca. Shinaca, ¿imamantataj testigo de Jehovacunapaj tandanacuicunaman rina cangui? ¿Imatataj chaipica taringui?

Cꞌuyaita ricuchij, ayudasha nij gentecunatami taringui. Punta siglopica Jesusta catijcunaca Diosta adorangapaj, Diospaj Shimita yachangapaj, caishuj chaishuj cushichinacungapajmi congregacioncunapi tandanacuj carca (Hebreos 10:​24, 25). Huauqui panicunapura tandanacushpami cꞌuyaita ricuchishpa alli amigocuna shina causarcacuna (2 Tesalonicenses 1:3; 3 Juan 14). Ñucanchijpish paicuna shina tandanacushpami achcata cushicunchij.

Biblia mandashcata alli pajtachinatami yachangui. Bibliapi ricuchishca shinami cꞌaricuna, huarmicuna, huahuacunapish tandanacunchij. Chaipica alli yachachij huauquicunata uyashpami, Biblia mandashcata tucui causaipi ima shina pajtachina cashcata entendinchij (Deuteronomio 31:12; Nehemías 8:​8). Tucuicunami tapuicunata rurajpica cutichi tucunchij, cantocunatapish cantai tucunchij. Chashnami cada uno Jehová Diosta alabacushcata ricuchinchij (Salmo 35:18).

Cambaj fetami sinchiyachingui. Shuj congregacionman quillcashpaca apóstol Pabloca nircami: ‘Cancunata ricunamanmi shamusha nini. Cancunapish ñucapish chaillatataj crij cashcamanta, caishuj chaishuj yuyachinacushpa cushicungapaj’ nircami (Romanos 1:​11, 12). Huauqui panicunahuan tandanacunami ñucanchij feta sinchiyachin. Jesús mandashca shina causachunpish ayudan.

¿Manachu tandanacuiman rishpa ima shina cashcata ricusha ningui? Cushicushpami chasquishun. Tandanacuicunapica cullquita mana mañanchijchu, gratismi can.

• ¿Picuna shinataj ñucanchij tandanacuicunata ruranchij?

• ¿Tandanacuicunaca ima shinataj ayudan?

Caruta purina cashpapish, tamyapi rina cashpapish testigo de Jehovacunaca tandanacunata mana saquinchijchu. Llaquicunata charishpapish, trabajo qꞌuipa shaicushca cashpapish ¿imamantataj ñucanchij huauqui panicunahuan tandanacusha ninchij?

Cushilla causachunmi ayudan. Tandanacuicunaman rina cashcata ricuchingapajmi apóstol Pabloca nirca: ‘Caishuj chaishuj yuyachinacushunchij’ nishpa (Hebreos 10:24). Yuyachinacushun nishpaca apóstol Pabloca caishuj chaishuj rijsinacushpa, preocuparishpa causana cashcatami ricuchirca. Congregacionpi huaquin huauqui panicunaca ñucanchij apacushca llaquicunatami ña mishashca. Paicunaca ñaupajman catingapajmi ayudai tucun.

Alli amigocunata charichunmi ayudan. Tandanacuicunapica alli rijsishca amigocunatami charinchij. Shinallataj shujtaj punllacunapish cushicushpami tandanacunchij. ¿Chashna tandanacunaca ima shinataj ayudan? Cada uno ima shina cashcata alli entendishpami ashtahuan cꞌuyanacunchij. Ñucanchij huauqui panicuna llaquicunata chꞌimbapuracujpipish alli amigocuna cashcamantami utca paicunata ayudanchij (Proverbios 17:17). Congregacionpi tucuicunahuan alli apanacushpaca ‘caishujmanta chaishujmanta’ preocuparishcatami ricuchinchij (1 Corintios 12:​25, 26).

Diospaj munaita rurajcunahuan amigocuna tucuchunmi munanchij. Chashna amigocunataca testigo de Jehovacunapurallapimi taringui. Ñucanchijhuan tandanacuchun imapish jarcachunca ama saquingui.

• ¿Congregacionpi huauqui panicunahuan tandanacunaca ima shinataj ayudan?

• ¿Ima horataj ñucanchij congregacionta rijsisha ningui?

Jesusta punta catijcunaca cantangapaj, Diosta mañangapaj, Diospaj Shimita rezangapaj, alli entendingapajmi tandanacuj carca (1 Corintios 14:26). Ñucanchij tandanacuicunaman shamushpaca chashnallataj cashcatami ricungui.

Bibliamanta alli yuyaicunatami yachachin. Sábado o domingoca cada congregacionmi shuj conferencia biblicata 30 minutocunapi uyangapaj tandanacunchij. Chaipica Diospaj Shimi ñucanchij causaipi ima shina ayudashcata, tucuri punllacunapi causacushcatami yachachin. Tucuicunami quiquin Bibliapi versocunata mashcai tucun. Chai qꞌuipaca Atalayamanta yachangapaj Tandanacuipimi La Atalaya revistata shuj horaspi yachanchij. Chaipica tucuicunami tapuicunata cutichi tucunchij. Yachacushpaca Bibliapaj consejocunata ñucanchij causaipi ima shina pajtachinatami yachanchij. Muyundij Allpapimi 110 mil yalli congregacioncunapi chai temallatataj yachanchij.

Alli yachachij tucuchunmi ayudan. Semanapica shujtaj punllapishmi tandanacunchij. Cai tandanacuica Jesús shina causashunchij huillashunchij shutimi can. Quimsapimi chaupinchij. Jesús shina causashunchij huillashunchij tandanacuipi imalla ruranata ricuchij pꞌangamantami yachanchij. “Bibliapi tiyaj valishca yuyaicuna” nishcahuanmi callarinchij. Caipica Bibliamanta ña rezashca huaquin capitulocunamantami yachanchij. Qꞌuipaca “Alli yachachijcuna cashunchij” nishcapimi ashalla minutocunapi ima shina shujtacunaman Bibliamanta parlanata ricuchishpa yachachincuna. Chaipica shuj huauquimi alli rezangapaj, alli parlangapaj huaquin yuyaicunata cun (1 Timoteo 4:13). Tucuripica, “Jesús shina causashunchij” nishcapimi Bibliapi yachachishcacunata ñucanchij causaipi ima shina pajtachinata yachanchij. Bibliata ashtahuan alli entendigapajmi tapujpi cutichishpa yachanchij.

Ñucanchij tandanacuicunaman shamushpa Bibliamanta alli yachachijta uyashpaca cushicunguimi (Isaías 54:13).

• ¿Testigo de Jehovacunapaj tandanacuicunaman rishpaca imatataj ricungui?

• ¿Maijan tandanacuimantaj puntaca risha ningui?

¿Testigo de Jehovacuna alli churarishca tandanacuicunaman rijta cai folletopi ricunguichu? ¿Imamantataj ñucanchij cuerpotapish, churanatapish alli cuidanchij?

Ñucanchij Diosta respetashcamanta. Diosca shungu ima shina cashcatami ricun (1 Samuel 16:​7). Shinapish Jehová Diosta, huauquicunatapish respetashcamantami tandanacuicunamanca alli churarishca rinchij. Shuj juezpajman rina cashpaca, paita respetashcamantaca mana maipish cachun churarishca rinchijchu. Chashnallataj tandanacuicunaman alli churarishca rishpaca, ‘cai pachapi causajcunapaj Juez’ Jehová Diosta, Tandanacuna Huasitapish respetashcatami ricuchinchij (Génesis 18:25).

Biblia yachachishcata cazushcamanta. ‘Diosta yuyarijcunataca’ Bibliapica ‘ama pinganayajta’ ‘ama munanayajta o alli yuyashpa’ churarichij ninmi (1 Timoteo 2:​9, 10). ‘Ama pinganayajta’ churarichij nishpaca, mana allita yuyachij, tucuita ricuchij ropata ama churarichunmi nin. ‘Ama munanayajta o alli yuyashpa’ churarichij nishpaca limpio, alhaja, ama maipishcachun ropata churarichunmi nin. Biblia yachachishcata cazushpapish cada unomi ima shina churarinata agllai tucunchij. Ropata alli agllashpa churarijpica, shujtaj gentecunaca ‘ñucanchijta Quishpichij Diosmanta yachana sumaj cashcatami’ ricungacuna ( Tito 2:10; 1 Pedro 2:12). Tandanacuicunaman alli churarishca rijta ricushpaca, shujtaj gentecunapish Jehová Diosta servijcunamanta allimi parlanga.

Alli churarishca, limpio cangapajca achca valij ropata charinaca mana minishtirinchu. Alli ropata mana charini nishpa, Tandanacuna Huasiman rinataca mana saquinachu cangui.

• ¿Diosta adoranaman rishpaca, imamantataj ñucanchij churanacunata alli ricuna canchij?

• ¿Imata churarina cashtaca yachangapajca, Bibliapaj maijan consejocunataj ayudan?

Shuj testigo de Jehovahuan Bibliamanta yachacushpaca, paihuan yachagrina tematami prepararingui ¿nachu? Tandanacuicunapipish alli entendingapajca chashnallatajmi prepararina cangui. Shuj horariota charishpaca allimi prepararingui.

Ima hora, maipi prepararinata mashcai. ¿Ima hora prepararinataj alli canman? ¿Trabajoman manaraj rishpa tutamanta lado? ¿Tutapi huahuacunata dormichishca qꞌuipa? Achca tiempota mana charishpapish preparingapajmi tiempota llujshichina cangui. Radiota, televisionta, telefonota huañuchishpa chulunlla ucuta mashcai. Shinallataj punllapi ima tucushcata ama yuyaricungapaj, Diospaj Shimitapish alli entendingapajca Diosta mañashpami callarina cangui (Filipenses 4:​6, 7).

Tapuicunata cutichij yuyaicunata señalashpa cutichingapaj listo cai. Shuj temapi imata yachagrishcata ricui. 1) Titulopi ima nicushcata ricui. 2) Subtitulocuna ima shina titulota achijyachijta ricui. 3) Dibujocunata ricui. 4) Yuyaringapaj rurashca tapuicunata ricui. 5) Cada parrafota rezashca qꞌuipa tapuicunata cutichi. 6) Mana copiashca versocunata Bibliapi mashcashpa, yachacushca temata ima shina achijyachijta ricui (Hechos 17:11). Tapuicunata cutichishpaca, tapuita cutichij yuyaicunata señalai. Chashna rurashpami tandanacuipi cutichisha nishpaca maquita jatarichishpa cambaj shimicunallapitaj cutichingui.

Cada semana yachagrishca temacunata prepararishpaca Bibliamantami ashtahuan yachangui (Mateo 13:​51, 52).

• ¿Tandanacuicunapaj prepararingapajca ima shinataj shuj horariota rurai tucungui?

• ¿Tandanacuicunapi cutichingapajca ima shinataj prepararina cangui?

Ñaupa punllacunamantami Jehová Diosca familiacuna shujlla shina causachun, paitapish alli rijsichun munashca (Deuteronomio 6:​6, 7). Chaimantami testigo de Jehovacunaca familiapi ima minishtishca yuyaicunata Bibliamanta cushilla yachangapaj, cada semana asha tiempota agllanchij. Shujlla causajcunapish paicuna agllashca yuyaicunata Bibliamanta yachangapajmi chai tiempota llujshichina can.

Jehová Diospajman ashtahuan cꞌuchuyangapajmi ayudan. “Diospajman cꞌuchuyaichij, paipish cancunapajman cꞌuchuyamungallami.” (Santiago 4:​8.) Jehová ima shina cashcata, imallata rurashcata Bibliapi yachashpaca paitami ashtahuan rijsishun. Familiahuan Diosmanta yachai callaringapajca, tucuicuna uyachun Bibliata rezanami ayudanga. Jesús shina causashunchij huillashunchij pꞌangapi cada semana rezachun cachashca capitulocunata rezanami alli can. Cada uno huaquin versocunata rezashca qꞌuipaca tucuicunami imata yachashcata parlai tucun.

Familiahuan shujlla shina causangapajmi ayudan. Cusa huarmipish, yaya mamapish, churicunapish tandanacushpa Bibliamanta yachashpaca paicunapurami shujlla shina causan. Chai tiempo cushilla, alli cajpica tucuicunami cushilla shuyanga. Yaya mamacunaca huahuacuna minishtishca yuyaicunata Atalaya, ¡Despertad! revistacunapi o Internetpi jw.org paginapi mashcashpami yachachina can. Escuelapi o colegiopi ima llaquicuna ricurijpi imata ruranatami huahuacunaman yachachina can. JW Broadcasting (tv.jw.org) nishca programatapishmi ricui tucunguichij. Tandanacuicunapi cantana cantocunata yachana, yachashca qꞌuipa asha micunata micunapish allimi canman.

Cada semana Familiahuan Diosta adorangapaj tiempota llujshichishpaca, Bibliamanta yachana sumaj cashcatami ricunguichij, achca bendicioncunatapishmi charinguichij (Salmo 1:​1-3).

• ¿Familiahuan Diosta adorangapajca imamantataj tiempota surcunchij?

• ¿Tucui familia cushilla yachachunca imatataj yaya mamacunaca rurana can?

¿Cushilla ñahuicunata caipi ricunguichu? Ñucanchij jatun tantanacuicunaman shamujcunami can. Ñaupa punllapi Diosta servijcunaca, huatapi quimsa cutinmi tandanacuj carca. Ñucanchijpish achcacunapura tandanacushpaca achcatami cushicunchij (Deuteronomio 16:16). Huatapica quimsa jatun tandanacuicunatami charinchij: ishqui cutinmi shuj punlla jatun tandanacuita charinchij, shuj cutinca quimsa punlla jatun tandanacuitami charinchij. ¿Ima shinataj chai jatun tandanacuicunaca ayudan?

Huauquicunata ashtahuan cꞌuyachunmi ayudan. Ñaupa israelitacunaca ‘tandanacushcacunapaj ñaupajpi’ Jehová Diosta alabashpami cushilla sintirirca. Jatun tandanacuicunapi ñucanchij huauquicunahuan Diosta adorashpaca achcatami cushicunchij (Salmo 26:12; 111:​1). Chai jatun tandanacuicunaca shujtaj congregacionmanta, caru llajtamanta huauqui panicunata rijsingapajmi ayudan. Cada familia o cada uno asha micunata apashpami chaupi punllapica shujtajcunahuan chaipi micunchij. Chashnami mushuj amigocunata rijsinchij (Hechos 2:​42, El Nuevo Testamento Quichua, Nueva Versión Internacional). Chai jatun tandanacuicunaca tucui ‘huauquicunata cꞌuyachunmi’ ayudan (1 Pedro 2:​17, QCH, 2010).

Diosmanta yachashpa catichunmi ayudan. Israelitacunaca “Dios mandashcacunata yachachijpi alli entendishcamantami” cushilla sintirircacuna. (Nehemías 8:​8, 12). Jatun tandanacuicunapi yachachishcacunataca ñucanchijpish cushicushpami chasquinchij. Tucui temacunatami Bibliamanta yachachin. Conferenciacunahuan, demostracioncunahuanmi Diospaj munaita ima shina pajtachinata yachachin. Llaqui punllacunapi causacushpapish shujtaj huauquicuna Diosta servishpa catishcata parlajpica achcatami cushicunchij. Quimsa punlla jatun tandanacuicunapica, ñaupa punlla churanacunata churarishpami shuj dramata rurashpa Bibliamanta alli yuyaicunata yachachin. Diosman mingarishcata ricuchisha nijcunapajca, tucui jatun tandanacuicunapimi bautismo tiyan.

• ¿Imamantataj jatun tandanacuicunapica achcata cushicunchij?

• ¿Jatun tandanacuicunaman rinaca ima shinataj ayudanga?

Jesús manaraj huañushpaca nircami: ‘Dios mandanamanta alli huillaica tucui cai pachapi causajcunamanmi huillashca canga. Chai qꞌuipami tucui tucuringa’ nishpa (Mateo 24:14). Alli huillaicunataca ¿ima shinataj muyundij Allpapi huillana carca? Cai Allpapi cashpa Jesús huillashca shina huillashpa (Lucas 8:​1).

Gentecunapaj huasimanmi rinchij. Paita catijcunataca alli huillaicunata huasin huasin huillachunmi Jesusca yachachirca (Mateo 10:​11-13; Hechos 5:​42, QCH, 2010; Hechos 20:20). Punta huillajcunamanca maijan llajtacunapi maicama huillana cashcatami nirca (Mateo 10:​5, 6). Cunan punllacunapipish cada congregacionmi allichirishca can, maicama huillana cashcatapish yachan. Chashnami Jesús mandashcata pajtachishpa “tucuicunaman alli huillaita” huillanchij (Hechos 10:42).

Gentecuna maipi cajpipish huillanchijmi. Mama cucha ladopi cashpa, pugyu ladopi cashpa, maipi cashpapish Jesusca huillarcami (Marcos 4:1; Juan 4:​5-15). Ñucanchijpish ñancunapi, negociocunapi, parquecunapi, telefonopi cayashpa, gentecuna maipi cajpipish Bibliamanta parlanchijmi. Shinallataj trabajo, escuela, colegio compañerocunaman, familiacunaman, vecinocunamanpishmi ñucanchij crishcacunata huillanchij. Chashna huillashcamantami muyundij Allpapi achca millones gentecuna ‘quishpirina alli huillaita’ uyacuncuna (Efesisos 1:13).

Cunanca Diospaj Mandanamanta alli huillaicunata piman huillanata, paicunapish ima bendicioncunata chasquinapi yuyai. Cai alli huillaicunataca mana canllachu yachashpa saquirina cangui, ¡utcami shujtajcunaman huillana cangui!

• ¿Ima ‘alli huillaitataj’ huillana canchij?

• ¿Ima shinataj testigo de Jehovacunaca Jesús huillashca shina huillanchij?

Huaquinpica precursor shimica shujtajcuna catichun ñanta pascaj, ñaupashpa purij cashcatami ricuchin. Yaya Dios cachajpimi Jesusca quishpirinamanta cushichij alli huillaicunata cai Allpapi huillarca. Chashnami Jesusca shuj precursor carca (Mateo 20:28). Cunanpish Jesús rurashca shinami, ñucanchijca shujtajcunaman yachachingapaj tiempota surcunchij (Mateo 28:​19, 20). Chaimantami huaquincunaca precursor shina servin.

Achca horascunatami huillan. Alli huillaicunataca tucui testigo de Jehovacunami huillanchij. Huaquincunaca cada quilla 70 horascunata huillangapajmi paicunapaj causaipi tiempota chꞌicanyachin. Paicunataca precursor regular nishpami rijsinchij. Chashna servingapajca achcacunami huaquin punllacunallata trabajan. Shujtajcunataca huillana minishtirishca llajtacunapi cada quilla 130 horascunata o ashtahuan huillachunmi agllan. Paicunataca precursor especial nishpami rijsinchij. Precursorcunaca minishtishcallahuan causashpami, Jehová Dios ayudanata tucui shunguhuan crin (Mateo 6:​31-33; 1 Timoteo 6:​6-8). Cutin 70 ó 130 horascunata mana huillai tucujcunaca 30 ó 50 horascunatami shuj quillapi huillai tucun. Paicunataca precursor auxiliar nishpami rijsinchij.

Precursorca Diosta, shujtajcunatami cꞌuyan. Jesús ricushca shinami gentecuna Diosmanta yachanata minishtishcata ricunchij (Marcos 6:34). Shinapish, Bibliamanta gentecuna yachashpaca cunan punllacunapipish, shamuj punllacunapipish achca bendicioncunata chasquinatami entendinchij. Precursorcunaca shujtajcunata cꞌuyashcamantami paicunapaj tiempohuan, fuerzahuan Bibliamanta yachachin (Mateo 22:39; 1 Tesalonicenses 2:​8). Chashnami paicunapaj feta sinchiyachishpa, Diospaj alli amigocuna tucushpa cushilla causancuna (Hechos 20:35).

• ¿Precursorca imataj can?

• ¿Imamantataj huaquincunaca ashtahuan horascunata huillan?

Testigo de Jehovacunaca Bibliamanta yachanataca achcatami munashcacuna. Chaimantami achca horascunata huillajcunapajca chꞌican chꞌican escuelacunata charin. Cashnami alli huillachun ayudancuna (2 Timoteo 4:5).

Precursorcunapaj Escuela. Cꞌuchullapi tiyaj Tandanacuna Huasipimi precursor regularcunaca sujta punllacunapi shuj cursota charincuna. Chai escuelaman ringapajca shuj huatatami ña precursor shina huillacuna can. Cai escuelaca Jehová Diospajman ashtahuan cꞌuchuyachun, ashtahuan alli huillajcuna cachun, huillashpa catichunmi achcata ayudan.

Escuela para Evangelizadores del Reino. Cai escuelaca solterocunapaj, solteracunapaj, cazadocunapajpishmi can. Paicunaca ishqui quillapimi shuj cursota charincuna. Ringapajca 23 huatamanta 65 huatacamami charina can. Shinallataj precursor shinami achca tiempota servina can, huillajcuna minishtirishca llajtacunaman rina munaitapishmi charina can. Tucuicunamanta yalli alli huillaj Jesuspaj ejemplota catishpami: “Caipimi cani, ñucata cachahuai” nincuna (Isaías 6:8; Juan 7:29). Shujtaj ladopi huillanaman rishpaca chai llajtapi amañarina, minishtirishcallahuan causana, gentecuna ima shina cashcata yachana, shujtaj micuicunata micunatami yachana can. Shujtaj shimitapish yachanachari can. Cai escuelaca shujtaj ladocunapi huillanaman rishpaca cushilla causachunmi ayudan. Shinallataj Jehová Diosta, paipaj organizacionta ashtahuan alli servichunmi yachachin.

Escuela Bíblica de Galaad. Escuela de Galaadca 1943 huatamantami 8.000 yalli misionerocunata yachachishpa chꞌican chꞌican llajtacunapi huillachun cachashca . Paicuna huillashcamantaca achcatami mirashcanchij (Hechos 13:47). Por ejemplo, punta misionerocuna Perú llajtaman chayajpica ni shuj congregación mana tiyarcachu, cunanca 1.000 yallimi tiyan. Japón llajtaman misionerocuna chayajpica casi chunga Testigocunallami tiyarca, cunanca 200.000 yallimi tiyan. Chai escuelapica pichca quillacunatami tucui Bibliata yachancuna. Tucui muyundij Allpapi alli huillaicunata huillashpa ñaupajman catichunpishmi yachachincuna. Precursor especialcunata, misionerocunata, superintendente de circuitocunata, betelpi servijcunatapishmi invitancuna.

• ¿Precursorcunapaj escuelaca ima shinataj ayudan?

• ¿Picunataj escuela para Evangelizadoresman ri tucun?