Caitami tapushcacuna

Diabloca Evataca allita mana allita yachaj chayachij yuramanta micushpaca mana huañunguichu nircami. ¿Chaita nishpaca almaca mana huañuna cashcatachu nicurca?

Mana chaita nicurcachu. Diabloca Evataca Dios ama micuchun nishca yuramanta micushpaca cambaj cuerpollami huañunga. Shinapish cambaj almaca causashpami catinga nishpaca mana nircachu. Chaipaj randica Diabloca Evataca canca nunca mana huañunguichu nircami. Chashnami Diabloca Evamanca Diosta mana cazushpaca canca huiñai huiñaitami cai Allpapi causangui nishpa intindichirca (Génesis 2:17; 3:3-5).

Ñucanchij huañushpaca almaca causashpami catin nishca yuyaica Edén huertapi mana callarishcachu. ¿Ima horashi callarishcanga? Mana alli yachanchijchu. Pero ñaupa punllapi Diosta mana sirvij gentecunataca Diosca yacu juilluta cachashpami tucuchirca. Shinapish Noeca paipaj familiallahuan Diosta sirvishcamantami quishpirirca. Tucui panda religioncunaca chai punllapimi tucurirca.

Gentecuna huañushpaca almaca causashpami catin nishca yuyaica yacu juilluta Dios cachashca qꞌuipami callarishcanga. Pero ¿cai panda yuyaica ima shinataj cai Allpapica mirarirca? Babel pueblopi causaj gentecunapaj rimaita chꞌicanyachishpami Jehová Diosca tucui cai pachata cacharca. Chashnami paicunaca almaca causashpami catin nishca panda yuyaihuan rircacuna (Génesis 11:8, 9). Cai panda yuyai ima hora callarishcataca mana yachanchijchu. Pero ñucanchijca Diablo llullapaj yaya cashcatami yachanchij. Chaimantami Diabloca cai panda yuyaita callarichishcamanta, mirachishcamantapish cushilla sintinga (Juan 8:44).