¿Shujtajcunata cꞌuyashcataca ima shinataj ricuchishun?

Tucuicuna Adanpaj huahuacuna cashcamantami shuj familia shina canchij. Familiapica tucuicunami cꞌuyaita ricuchishpa, respetanacushpa causana canchij. Pero la mayoría gentecunaca mana chashna causancunachu. Yaya Diosca chaitaca mana munanchu.

¿DIOSPAJ SHIMIPICA IMATATAJ CꞌUYAIMANTA YACHACHIN?

“Can quiquinta shinallataj shujtajcunatapish cꞌuyangui” (LEVÍTICO 19:18).

“Cancunata pꞌiñajcunatapish cꞌuyanguichij” (MATEO 5:44).

¿SHUJTAJCUNATA CꞌUYASHCATACA IMA SHINATAJ RICUCHINCHIJ?

1 Corintios 13:4 al 7 versocunapimi Diosca cꞌuyai ima shina cashcata ricuchin.

Cꞌuyajca ‘pacienciata charij, alli shunguyujmi’.

Caipi yuyai: ¿Shujtajcuna pacienciata charijpi, cꞌuyaj cajpi, can pandarijpi mana rato pꞌiñarijpica ima shinataj sintiringui?

Cꞌuyajca “mana shujtajpajta munanchu”.

Caipi yuyai: ¿Shujtajcuna canpi mana confiajpi o canta envidiajpica ima shinataj sintiringui?

Cꞌuyajca “mana paipajlla mashcanchu”.

Caipi yuyai: ¿Shujtajcuna pai munashcallata mana rurajpi, ashtahuanpish cambaj yuyaicunata valichijpica ima shinataj sintiringui?

Cꞌuyajca “llaquichijpipish mana yuyaipi charicunllachu”.

Caipi yuyai: Juchacunamanta arrepintirijcunata perdonangapajca Diosca listomi can. “Paica mana ñucanchijtaca rimacujllachu. Pꞌiñarishcataca mana huiñaipaj charicunllachu” (Salmo 103:9). Shujtajcunata llaquichishcamanta paicuna ñucanchijta perdonajpica achcatami valoranchij. Chaimantami shujtajcuna ñucanchijta llaquichijpipish perdonana canchij (Salmo 86:5).

Cꞌuyajca “cashcata mana rurajpica mana cushicunchu”.

Caipi yuyai: Ñucanchij llaquita apacujpi shujtajcuna cushicuchunca mana munanchijchu. Chaimantami shujtajcuna ñucanchijta llaquichishca cajpipish, paicuna llaquita apacujpica mana cushicunchij.

Dios ñucanchijta bendiciachunca shujtajcuna ima edadta charijpi, maimanta cajpi o ima religionta charijpipish cꞌuyanami canchij. Chashna cꞌuyaita ricuchingapajca minishticujcunatami ayudana canchij.