¿Yacharcanguichu?

Ñaupa tiempopi quillcashcami Biblia ima nishcata ricuchin

JERUSALENPICA “Tierras de la Biblia” nishca Museopimi shuj japishca rumi tiyacun. Chai rumica 700 y 600 huatacuna Jesús manaraj huacharijpimi tiyarca. Chai rumitaca Hebrón llajta cꞌuchullapi, huañushcacunata maipimi pambana jutcupimi japircacuna. “Yahweh Sabaotmantami Hagavpaj churi Hagaf maldicishca cachun” churashcarcacuna. Chai rumipica Jehová Diospaj shutimi ricurin. Chai shutitaca ñaupa hebreo rimaipica YHWH nishpami quillcashcacuna carca. Chai punllacunapica Diospaj shutitaca gentecunaca siempremi parlajcuna carca. Shinallataj shujtaj jutcucunapipish Jehovapaj shutitami japishcacuna. Huaquin gentecunaca chai jutcucunapi tandanacushpa, miticushpami Diospaj shutitapish, Diospaj shutita ricuchij shuticunatapish pata quinricunapi quillcashcacuna carca.

Universidad de Georgiamanta idiomacunamanta yachaj Rachel Nabulsica: “Ñaupa quillcashcacunaca Israel, Judá llajtamanta causajcunapajca YHWH shutica importante cashcatami ricuchin” nircami. Chaimantami Bibliapica Diospaj shuti hebreo rimaipi YHWH huaranga huaranga cutincuna ricurishcata apoyan. Huaquin gentecunapaj shuticunapish Diospaj shutitami ricuchircacuna.

“Yahweh Sabaot” rumipi quillcashcaca “Tucuita Mandaj Jehová” nisha ninmi. ¿Caica imatataj ricuchin? Chai tiempopica gentecunaca Diostaca “Jehová”, “Tucuita Mandaj Jehová” nishpami nijcuna carca. Dios quillcachishcacunapi Ñaupa Testamentopica “Tucuita Mandaj Jehová” nishca shimicunaca 250 yallimi ricurin. Cai shimicunaca Isaías, Jeremías, Zacarías librocunapimi ashtahuantajca ricurin.