3 | Bibliapi tiyaj experienciacuna

BIBLIAPICA: Ñaupa tiempopi causaj alli gentecunapish ‘ñucanchij shinallataj sintirij cashcatami’ parlan (SANTIAGO 5:17).

¿Caica imatataj nisha nin?

Bibliapica huaquin cꞌaricuna, huarmicuna ima shina sintirij cashcatami parlan. Paicunapaj experienciacunata liyishpami paicunapish ñucanchij shina sintirishcata yachashun.

¿Bibliapaj consejocunaca ima shinataj ayudan?

Yallitaj sustarishca o llaquilla sintirishpaca shujtajcunapish ñucanchij ima shina sintirishcata intindichunmi munanchij. Ñaupa tiempopi Diosta sirvijcuna ima shina yuyashcata, ima shina sintirishcata liyishpaca ñucanchijpish paicuna shina sintirishcatami cuentata cushun. Chashnami ñucanchijlla cai laya llaquicunata mana apacushcata intindishun.

Bibliapica huaquin runacuna yallitaj sustarishca cashcamanta, fuerza illaj saquirishcamanta imata nishcatami parlan. ¿Tal vez quiquinca: “Ña mana ahuantanichu, ña mana causashpa catisha ninichu” nishcanguichu? Moisespish, Eliaspish, Davidpish can shinallatajmi sintirircacuna (Números 11:14; 1 Reyes 19:4; Salmo 55:4).
Bibliapica Ana huarmimantami parlan. Paica huahuacunataca mana chari tucurcachu. Paita pꞌiñaj huarmipish paimantami burlarij carca. Chaimantami Anaca yallitaj llaquirishpa purirca (1 Samuel 1:6, 10).
Quiquinpish Job shinachari sintiringui. Paica sinchi feta charishpapish yallitaj sustarishcamantami: ‘Ñuca causaita pꞌiñanayanmi, ña huañuchun saquihuailla’ nirca (Job 7:16).

Cai runacunaca desanimachij yuyaicunatami saqui tucurcacuna. Ñucanchijpish paicunapaj ejemplomanta estudiashpami chai llaquichij yuyaicunata saqui tucunchij.

¿Kevintaca Bibliaca ima shinataj ayudan?

Trastorno bipolar nishca ungüimi ñucata llaquichin

“Ñuca casi 50 huatacunata charijpimi trastorno bipolar nishca ungüihuan cashcata huillarcacuna. Cai ungüihuan cashcamantami maipica tucui problemacunata allichi tucushcata yuyani. Shinapish maipica ñuca causai mana valishca shina cashcatami sintini”.

Bibliami ñucata ayudan

“Ñucaca apóstol Pedro shinami huaquinpica sintirini. Maipica Pedroca pandarishcamantami imapaj mana valishca shina sintirirca. Pero chaillapitaj chaillapitaj yuyanapaj randica paimanta preocuparij amigocunapaj ayudatami mashcarca. Trastorno bipolar nishca ungüita charishcamantami maipica dimastij llaquilla sintirini. Ñuca pandarishcacunallapi yuyashpami imapaj mana valishca shina sintirini. Pero chashna sintirishpaca Pedro shinami ñuca amigocunapaj ayudata mashcani. Paicunami ama shaicurichun, ñaupajman catichun ayudan.

Shinallataj rey Davidpimi yuyani. Huaquinpica paica llaquicunata charishcamanta, pandarishcamantapishmi llaquilla sintirirca. Ñucapishmi mana allita rurashcamanta, mana alli yuyashpa rimashcamanta llaquilla sintirini. Chashna sintirishpaca Salmo 51-pi David imata escribishcatami yuyarini. Verso 3-pica Davidca: ‘Quiquinta ñuca cꞌariyashcacunataca rijsirinimi. Ñuca juchallishcaca ñuca ñaupajpi ricuricunllamari’ nircami. Maipica imapaj mana valij shinami sintirini. Chashna sintirishpapish verso 10-pimi yuyarini. Chaipica Davidca: ‘¡Taita Dioslla, ñucapica chuya shunguta callarichihuai. Ñuca ucupica ima pandata mana ruraj espirituta cutin churahuai!’ nircami. Chashnallataj ñucapish Yaya Diostaca alli sintiringapaj ñucata ayudachunmi mañani. Verso 17-pi nishcacunapishmi ñucataca achcata cushichin. Chaipica: ‘Taita Dioslla, shungu llaquirishca, mana jatun tucushca quiquinpajman cꞌuchuyajpica mana yanganchinguichu’ ninmi. Caita liyishpaca Jehová Dios ñucata achcata cꞌuyashcatami yuyarini.

Bibliapi Diosta sirvijcuna ima shina sintirishcata yachashpa, Jehová Dios ñucata ima shina ayudashcata yuyarishpami ñuca feta sinchiyachi tucushcani. Jehová Dios shamuj punllacunapi cusha nishcacunataca pajtachingatajmi. Chaita tucui shunguhuan crishpami ñaupajman catingapaj fuerzasta japini”.