¿Feta charinguichu?

Jehová Diosta cushichingapajca fetami charina canchij. Pero Bibliapica “mana tucui gentecunachu feta charincuna” ninmi (2 Tesalonicenses 3:2). Apóstol Pablo caita quillcacushpaca paita llaquichij, millai runacunamantami parlacurca. ¿Pero paicunalla feta mana charishcatachu nicurca? Mana. Por ejemplo, huaquin gentecunaca tucui imalla tiyashcata ricushca jahuapish ‘Yaya Diosca chaicunataca mana rurashcangachu’ nishpami yuyancuna (Romanos 1:20). Cutin shujtajcunaca Yaya Dios tiyashcatami yachancuna. Pero feta charingapajca mana chaillachu minishtirin.

Diospaj ñaupajpi alli ricuringapajca ‘pai tiyashcata, paita tucui shunguhuan mashcajcunamanpish allicunata cuj cashcatami crina’ canchij (Hebreos 11:6). Feca Diospaj pꞌucuchishca granomantami shamun. Chaimantami espíritu santota charingapajca Yaya Diosta mañana canchij (Lucas 11:​9, 10, 13). Shinallataj Bibliatami liyina canchij, liyishcapipish yuyana canchij. Chai qꞌuipaca ima yachashcatami causaipi pajtachingapaj esforzarina canchij. Chaicunata rurashpallami espíritu santota chasquishun, Jehová Diospipish ashtahuan crishun.