Llaquicunataca Jehová Dios ricushca shina ricushunchij

1, 2. a) ¿Nabot runataca ima shinataj llaquichircacuna? b) ¿Cai yachaipica ima shina canamantataj yachashun?

ISHQUI millai runacunaca shuj runataca yangamantami juchachirca. Chaimantami paitapish paipaj huahuacunatapish rumicunahuan shitashpa huañuchirca. Chaita ricushpaca, ¿allita ruraj gentecunaca ima shinashi sintirishcanga? Caica mana shuj parlollachu can. Diosta servij Nabot runatami chashna llaquichircacuna. Rey Acab causashca punllacunapimi Nabotca causarca (1 Reyes 21:11-13; 2 Reyes 9:26).

² Cai yachaipica Nabot runa ima tucushcatami yachashun. Shinallataj ñaupa punlla congregacionpi shuj anciano imapi pandarishcatami yachashun. Chashnallataj Jehová shina cashcata ruraj cangapajca humildes, perdonajcuna cana cashcatami yachashun.

NABOTTA LLAQUICHISHCAMANTA

3, 4. a) ¿Nabotca ima shina runataj carca? b) ¿Imamantataj allpataca Acabman mana cꞌatusha nirca?

³ Rey Acabpish paipaj huarmi Jezabelpish yanga dios Baaltami adorajcuna carca. Jehovapaj mandashcacunataca mana cazujcunachu carca. Casi tucui israelitacuna paicunapaj rurashcacunata catijpipish Nabotca Diosmanta mana caruyarcachu. Ashtahuanpish Nabot runapajca Diospaj ñaupajpi alli canami ashtahuan valishca carca.

⁴ (1 Reyes 21:1-3-ta leyipai). Acab runaca Nabot charishca allpatami charisha nirca. Chaimantami Nabottaca: ‘Cambaj uva chagrayuj allpata ñucaman cui. Chai allpamantaca ashtahuan alli uva chagrayuj allpatami cusha. Mana cashpaca mashna cullquita nishcatami cusha’ nircami. Pero Nabotca: “¡Ñuca yayapajta japishca allpata canman cunamantaca Mandaj Dios huaquichichun!” nircami. ¿Nabotca imamantataj paipaj allpataca mana cꞌatusha nirca? Israelitacunaman Dios cushca leycunapica herencia allpataca mana cꞌatunallachu carca (Levítico 25:23; Números 36:7). Nabotca Diostami cazurca.

5. ¿Allpata charingapajca Jezabelca imatataj rurarca?

⁵ Allpata mana cꞌatusha nijpica rey Acabpish paipaj huarmipish mana allicunatami rurarcacuna. Chaimantami Jezabelca ishqui cꞌaricunata cachashpa Nabotta yangamanta juchachirca. Chashna juchachishcamantami Nabottapish paipaj huahuacunatapish huañuchircacuna ¿Cai llaquita ricushpaca Jehová Diosca imatataj rurarca?

DIOSCA CASHCATA RURAJMI CAN

6, 7. a) ¿Nabot runata huañuchishcamantaca Diosca Acabtaca imatataj rurasha nirca? b) ¿Nabotpaj familiacunapish amigocunapish imamantataj alli sintirishcacuna canga?

⁶ Chai ratomi Jehová Diosca profeta Eliastaca Acabta cashna nichun cacharca: ‘Canca shuhua, huañunchij runami cangui. Chaimantami Nabot huañushca shinallataj canpish, cambaj huarmipish, cambaj huahuacunapish huañunguichij’ nircami (1 Reyes 21:17-25).

⁷ Acab chashna rurashcamantaca Nabotpaj familiacunapish amigocunapish achcatami llaquirircacuna. Pero Dios chai rato justiciata ruragrishcata yachashpaca paicunaca allimi sintirishcacuna canga. Shinapish qꞌuipa punllacunapica humildecuna cashcata, Diospi tucui shunguhuan crishcatami ricuchina carca.

8. a) ¿Jehová nishcata uyashpaca Acabca imatataj rurarca? b) ¿Acab arrepintirijpica Diosca imatataj rurarca?

⁸ Jehová Dios imata ruragrishcata uyashpaca ‘Acabca pai churarishca churanata lliquishpa, cañamazuta churarishpa, ayunashpa, cañamazullapitaj dormishpami llaquilla purirca’. Chashnami arrepintirishcata ricuchirca. Acab arrepintirijpica Diosca Eliastaca: “Chashna ñuca ñaupajpi cutirishcamanta pai causacujpirajca mana llaquichishachu. Paipaj churi mandacui punllapimi paipaj huasi familiataca llaquichisha” nircami (1 Reyes 21:27-29; 2 Reyes 10:10, 11, 17). Jehová Diosca runacunapaj shunguta ricuj Diosmi can. Chaimantami Acabta perdonarca (Proverbios 17:3).

HUMILDES CASHUNCHIJ

9. ¿Nabotpaj familiapish paipaj amigocunapish humildecuna cashpaca imatataj rurashcacuna canga?

⁹ Acab huañushca qꞌuipami Jehová Diosca Acabpaj familiata llaquichisha nirca. Chaita yachashpaca Nabotpaj familiacunapish amigocunapish Diosta cꞌuyashcata o mana cꞌuyashcatami ricuchina carca. Paicuna humildes cashca cashpaca Diosmanta mana caruyashcacunachu canga. Ashtahuanpish Dios siempre allita ruraj cashcata crishpa, paipi tucui shunguta churashpami catishcacuna canga (Deuteronomio 32:3, 4-ta leyipai). Nabottapish paipaj huahuacunatapish Dios causachijpica paipaj familiapish amigocunapish achcatami cushicungacuna. Paicunaca Jehová Dios siempre allita ruraj cashcatami ricungacuna (Job 14:14, 15; Juan 5:28, 29). Diosca gentecuna tucui imallata rurashcatami ricuchinga. Allita rurashca cajpipish, millaita rurashca cajpipish, pacallapi imata rurashcatapish ricuchingami. Humildes cashpaca chaitaca tucui shunguhuanmi crishun (Eclesiastés 12:14). Jehová Diosca ñucanchij mana yachashcatapishmi yachan. Chaimantami humildes cashpaca Diosmanta mana caruyashun.

10, 11. a) ¿Imata ricushpataj Diosmanta caruyanata yuyanchijman? b) ¿Imamantataj humildes cana canchij?

¹⁰ Ancianocuna ima decisionta japijpi ñucanchijpaj mana alli ricurijpica ¿imatataj rurashun? Por ejemplo, ñucanchij familiata o rijsishcacunata o ñucanchijllatataj Diospaj pueblopi huaquin asignacioncunata ña ama rurachun nijpica ¿imatataj rurashun? Shinallataj ñucanchij huarmita o ñucanchij cusata, churita, ushushita o shuj amigota congregacionmanta ancianocuna llujshichijpi, yangamantami llujshichishca nishpa yuyacushpaca ¿imatataj rurashun? Pi juchata rurashca cajpi arrepintirishcata ricushpa ancianocuna congregacionpi catichun saquijpica ¿ancianocunaca pandarishcami nishpa yuyashunchu? Chai ruraicunata congregacionpi ricushpaca, ¿Jehová Diospi confiashpa catishunchu? Chashnallataj ¿Diosca paipaj pueblota alli pushacushcata crishpa catishunchu? ¿Chashna ruraicuna tiyajpica imamantataj humildes cana canchij? Ishqui yuyaicunata ricushun.

¹¹ Puntapica humildes cashpaca tucuita yachashcata mana yuyashunchu. Tucuita yachashcata yuyashpapish, Jehová Dioslla gentecunapaj shunguta ricuj cashcatami yuyarina canchij (1 Samuel 16:7). Caita alli yuyarishpaca mana jatun tucushpami ñucanchij panda yuyaicunata cambiashun. Qꞌuipaca pi llaquichijta ricushpa o ñucanchijta llaquichijpica Diosta cazushpa paillataj chai llaquita allichichunmi shuyana canchij. Chashnami humildes cashcata ricuchishun. Bibliapica: ‘Diospaj ñaupajpi cazushpa causajcunaca allimi causanga. Pero Diosta mana manchajcunaca llaqui tucushpami chingaringacuna’ ninmi (Eclesiastés 8:12, 13). Caipi ricushca shinaca ñucanchijta o shujtajcunata llaquichijpipish humildesmi cana canchij (1 Pedro 5:5-ta leyipai).

APÓSTOL PEDRO PANDARISHCAMANTA

12. ¿Imamantataj Antioquiapi causaj huauquicunamanta yachagrinchij?

¹² Ñaupa punllapica Antioquía llajtapi causaj huauquicuna panicunaca shuj llaquitami charircacuna. Paicunaca humildes cashcata, perdonaj cashcatami ricuchina carca. Paicunamanta yachashpaca ñucanchijpish perdonajcuna o mana perdonajcuna cashcatami ricushun. Shinallataj Jehová Diosca cashcata ruraj cashpapish paipaj munaita pajtachingapaj juchayuj gentecunata utilizaj cashcatami ricushun.

13, 14. a) ¿Jesusca Pedrotaca imata rurachuntaj cacharca? b) ¿Pedroca ima shinataj mana manchashcata ricuchirca?

¹³ Apóstol Pedroca tucuicunapaj rijsishca shuj ancianomi carca. Paica Jesuspaj amigopishmi carca. Shinallataj sumaj ruraicunatami Jesusmanta chasquirca (Mateo 16:19). Por ejemplo, huata 36-pica Cornelioman paipaj familiamanpish Diosmanta huillagri nishpami Jesusca Pedrota cacharca. Cornelioca mana judiochu carca, circuncisiontapish mana rurashcachu carca. Chaimantami Cornelioman huillagrinaca sumaj carca. Corneliopish paipaj familiapish espíritu santotami chasquircacuna. Caita ricushpami Pedroca, Cornelio paipaj familiandij bautizarishpa Jesusta cati pudishcata entendirca. Chaimantami Pedroca: ‘Paicunapish ñucanchij shinallatajmari jucha illaj espirituta chasquincuna. Paicuna yacupi ama bautizarichunca ¿pitaj jarcangari?’ nirca (Hechos 10:47).

¹⁴ Huata 49-pica apostolcunapish ancianocunapishmi Jerusalenpi tandanacurcacuna. Chaipica mana judío crijcuna circuncisionta rurana cashcata o mana rurana cashcata decidingapajmi tandanacurcacuna. Pedropishmi chaipi carca. Pedroca ‘mana judiocuna circuncisionta mana rurashca cashpapish espíritu santotami chasquircacuna’ nishpami parlarca. Pedro mana manchashpa caita parlajpica Jerusalenpi apostolcunapish ancianocunapish imata decidinatami alli yacharcacuna (Hechos 15:6-11, 13, 14, 28, 29). Pedro chashna parlashcamantaca judiocunapish mana judiocunapish achcatachari agradicircacuna. Shinallataj Pedropi ashtahuanmi shunguta churashcacuna canga (Hebreos 13:7).

15. ¿Antioquiapi cashpaca Pedroca ima shinataj pandarirca? (Página 21-pi tiyaj dibujota ricui).

¹⁵ Jerusalenpi tandanacushca qꞌuipaca Pedroca Antioquía crijcunata visitanamanmi rirca. Chaipi cashpaca mana judío huauquicunahuan panicunahuanmi pasarca. Chai huauquicuna panicunaca Pedromantaca achcatami yachashcanga. Pero shuj punllaca paicunahuan ña mana micusha nircachu. Pedro chashna rurajpica achcatami llaquirishcacuna canga. Shinallataj Pedro chashna rurajpica Bernabepish shujtaj huauquicunapishmi chashnallataj rurai callarirca. Pedro chaita rurashpaca huauquicunatapish panicunatapish chꞌicanyachinmanmi carca. ¿Shuj alli anciano cashpapish imamantataj Pedroca chashna pandarirca? Congregacionpi shuj anciano mana allita rimashpa o imatapish rurashpa llaquichijpica ¿imamantataj Pedro pandarishcata yuyarina canchij?

16. a) ¿Pabloca ima shinataj Pedrota cunarca? b) ¿Imatataj tapurina canchij?

¹⁶ (Gálatas 2:11-14-ta leyipai). Pedroca shujtajcunata manchashpami chashna rurarca (Proverbios 29:25). Mana judiocunata Jehová Dios chasquishcata Pedroca allimi yacharca. Shinapish Jerusalenmanta shamuj huauquicuna imata yuyanata manchashpami mana judío crijcunamanta caruyarca. Apóstol Pabloca huata 49-pi mana judiocunata Pedro ima shina difindijtami ricushca carca. Chaimantami Pedrotaca: ‘Jerusalenpica mana manchashpami mana judiocunata difindircangui, ¿imamantataj cunanca chashna puricungui?’ nishpami rimarca (Hechos 15:12; Gálatas 2:13). ¿Pedro mana judío crijcunamanta caruyajpica paicunaca imatataj rurarca? ¿Diosmantaca caruyarcacunachu? ¿Chashna pandarishpapish Pedroca Jesús mingashcata rurashpa catircachu?

PERDONAJCUNA CASHUNCHIJ

17. ¿Dios perdonajpica Pedroca imatataj rurashpa catirca?

¹⁷ Pablo cunashcataca Pedroca allimi chasquirca. Pedro chashna pandarishpapish Jesús mingashcacunata ruranata saquishcataca Bibliapica mana parlanchu. Ashtahuanpish Jehová Diosca ishqui cartacunata quillcachunmi mingarca. Chai cartacunaca Bibliapimi tiyacun. Shuj cartapicarin Pablotaca, “ñucanchij cꞌuyashca huauqui” nishpami Pedroca quillcarca (2 Pedro 3:15). Pedro chashna pandata rurajpica mana judío crijcunaca shungupi nanarishcachari sintirircacuna. Pero Pedro chashna pandarijpipish Jesusca shujtaj ruraicunatami paiman mingashpa catirca (Efesios 1:22). Jehovapaj, Jesuspaj ejemplota catishpami mana judío crijcunaca Pedrotaca perdonana carca. Shuj juchayuj runa pandarishcamanta mana judío crijcunapuramantaca shujllapish Diosmantaca manachari caruyarcacuna.

18. ¿Imallapitaj Jehová shina rurai tucunchij?

¹⁸ Bibliapica tucuicunami pandarinchij ninmi. Chaimantami Apóstol Pablo causashca punllacunapi shinallataj cunan punllapipish ancianocunaca huaquinpica pandarincunalla (Santiago 3:2). Pero ¿shuj huauqui ñucanchijta llaquichijpica imatataj rurashun? ¿Jehová Dios ricushca shinachu ñucanchijpish ricushun? Por ejemplo, shuj anciano shujtajcunamanta mana allita rimajpica ¿imatataj rurashun? Shuj anciano mana alli yuyashpa imatapish shujtajcunamanta rimajta ricushpaca ¿Diosmanta caruyanata yuyashunchu? ¿Chai huauquica mana ancianochu cana can nishpachu yuyashun? o ¿Jesús congregacioncunata pushacushcata crishpachu paipi shuyashun? ¿Chai huauqui pandarishcallatachu yuyarishpa catishun? o ¿chai huauqui achca huatacunata Diosta tucui shunguhuan servishcatachu yuyarishun? Shuj huauqui ñucanchijta imata rurashca cajpi ¿anciano cashpa catijpi o ashtahuan ruraicunata congregacionpi chasquijpica cushicushunchu? Paicunata perdonashpaca Jehová shinami allita rurajcuna cashun (Mateo 6:14, 15-ta leyipai).

19. ¿Imatataj tucui shunguhuan rurana canchij?

¹⁹ Diablomantami achca llaquicunata charinchij. Chaimantami Jehová Dios llaquicunata tucuchina punlla ña chayamuchun shuyanchij (Isaías 65:17). ¿Chai punlla chayamungacamaca imatataj rurana canchij? Ñucanchijta pi llaquichijpica imamanta chashna rurashcataca manachari tucuita yachashun. Pero tucui shunguhuanmi perdonana canchij. Chashna rurashpaca llaquicunata Jehová Dios ricushca shinami ricushun.