2 Reyes

15 Amasiaspa+ churin Azariasqa*+ Judá ayllupin rey kapurqan+ Jehoaspa churin Jeroboán iskay chunka qanchisniyoq wataña Israelpi kamachikushaqtin. 2 Azariasqa chunka soqtayoq watanpi kashaspan Judá ayllupi kamachikuyta qallarirqan, pisqa chunka iskayniyoq watataqmi Jerusalenmanta kamachikurqan. Paypa mamanmi karqan Jerusalén llaqtayoq Jecolías. 3 Payqa papan Amasías jinan Jehová Diospa munasqanman jina ruwarqan.+ 4 Yupaychana patakunatan* ichaqa mana chinkachirqanchu,+ chaykunapin runakunaqa sacrificiokunata q’osñichishallarqanku.+ 5 Judá rey Azariastan Jehová Diosqa lepra onqoywan jap’ichirqan, payqa wañupunan p’unchaykaman lepra onqoyniyoq karqan.+ Chaymi payqa juj wasipi t’aqasqa tiyarqan,+ chaykaman ichaqa churin Jotán+ reypa palacionmanta encargakurqan, llapa Judá ayllu runakunatapas juzgarqan.+ 6 Azariaspa+ wakin ruwasqankunaqa lliumi Judá ayllu reykunamanta willaq libropi qelqasqa kashan. 7 Chaymantataq Azariasqa ñaupa taytankuna jina wañukapurqan,+ jinaspa ñaupa taytankunatawan kuskata Davidpa Llaqtan nisqapi p’ampapurqanku. Chay qhepamantaq churin Jotán rey kapurqan.

8 Rey Azarías+ kinsa chunka pusaqniyoq wataña Judá ayllupi kamachikushaqtinmi Jeroboanpa churin Zacariasqa+ Israelpi rey kapurqan, soqta killataq Samariamanta Israelta kamachirqan. 9 Zacariasqa ñaupa taytankuna jinan Jehová Diospa cheqnisqan ruwaykunata ruwarqan. Payqa imaynatachus Nebajpa churin Jeroboán Israel runakunata juchallichirqan chay juchakunatan ruwallarqantaq.+ 10 Chaymantataq Jabespa churin Salumqa rey Zacarías contra sayarirqan, jinaspa Iblean+ llaqtapi wañuchipurqan.+ Chay qhepamantaq Salum Israelpi rey kapurqan. 11 Zacariaspa wakin ruwasqankunaqa Israel reykunamanta willaq libropin qelqasqa kashan. 12 Chhaynapin junt’akurqan Jehuman Jehová Diospa nisqan, paymi Jehuta nirqan: “Nietoykiq nietonkaman+ Israelpiqa kamachikunqa”,+ nispa. Chayqa llapallanmi junt’akurqan.

13 Rey Uzías+ kinsa chunka isqonniyoq wataña Judá ayllupi kamachikushaqtinmi Jabespa churin Salumqa Israelpi rey kapurqan, payqa juj killallan Samariamanta Israelta kamachirqan. 14 Chaymantataq Gadipa churin Menahemqa Tirzá+ llaqtamanta Samaria llaqtaman rirqan, jinaspa chay llaqtapi Jabespa churin Salumta wañuchipurqan.+ Chay qhepamantaq pay Israelpi rey kapurqan. 15 Salumpa wakin ruwasqankunapas rey contra jatarisqanpas Israel reykunamanta willaq libropin qelqasqa kashan. 16 Chaymantataq Menahemqa Tirzá llaqtamanta Tifsá llaqtata rirqan, punkuta mana kichamuqtinkutaq chay llaqtata lliuta thunirqan, chay llaqtapi tiyaq runakunatawan muyuriqninpi tiyaq runakunatawantaq lliuta wañuchirqan, onqoq warmikunatapas wijsantaraqmi khallarqan.

17 Rey Azarías kinsa chunka isqonniyoq wataña Judá ayllupi kamachikushaqtinmi Gadipa churin Menahemqa Israelpi rey kapurqan, chunka watataq Samariamanta Israelta kamachirqan. 18 Menahemqa Jehová Diospa cheqnisqan ruwaykunatan ruwarqan. Payqa imaynatachus Nebajpa churin Jeroboán Israel runakunata juchallichirqan chay juchakunatan tukuy kausasqan tiempopi ruwallarqantaq.+ 19 Asiria rey Pulmi+ Israel contra jamurqan, jinan Menahemqa waranqa talento* pesaq qolqeta qorqan. Chay qolqetan Menahemqa qorqan rey Pul payta yanapananpaq, chhaynapi kamachikuynin allin tajyasqa Israelpi kananpaq.+ 20 Chay qolqetan Menahemqa juñurqan Israelpi kaq qhapaq runakunamanta mañaspa,+ sapanka qhapaq runamantan mañarqan pisqa chunka siclo* pesaq qolqeta. Llapanta juñuspataq Asiria reyman qorqan, jinan Asiria reyqa jallp’anman kutipurqan. 21 Menahempa+ wakin ruwasqankunaqa lliumi Israel reykunamanta willaq libropi qelqasqa kashan. 22 Chaymantataq Menahemqa ñaupa taytankuna jina wañukapurqan. Chay qhepamantaq churin Pecaías Israelpi rey kapurqan.

23 Rey Azarías pisqa chunka wataña Judá ayllupi kamachikushaqtinmi Menahempa churin Pecaiasqa Israelpi rey kapurqan, iskay watataq Samariamanta Israelta kamachirqan. 24 Pecaiasqa Jehová Diospa cheqnisqan ruwaykunatan ruwarqan. Payqa imaynatachus Nebajpa churin Jeroboán Israel runakunata juchallichirqan chay juchakunatan mana saqespa ruwashallarqan.+ 25 Jinan rey Pecaías+ contra jatarirqan kikin oficialnin Péca, jinaspa Samaria llaqtapi wañuchipurqan. Pecaqa Remaliaspa churinmi karqan, paymi rey Pecaiastaqa reypa wasinpi* kaq allin perqasqa wasipi wañuchipurqan Argoftawan Arietawan kuskata. Pecaqa Galaad jallp’amanta pisqa chunka yanapaq runankunantinmi kasharqan. Chay qhepamantaq Péca Israelpi rey kapurqan. 26 Pecaiaspa wakin ruwasqankunaqa lliumi Israel reykunamanta willaq libropi qelqasqa kashan.

27 Rey Azarías pisqa chunka iskayniyoq wataña Judá ayllupi kamachikushaqtinmi Remaliaspa churin Pecaqa+ Israelpi rey kapurqan, iskay chunka watataqmi Samariamanta Israelta kamachirqan. 28 Pecaqa Jehová Diospa cheqnisqan ruwaykunatan ruwarqan. Payqa imaynatachus Nebajpa churin Jeroboán Israel runakunata juchallichirqan chay juchakunatan mana saqespa ruwashallarqan.+ 29 Rey Péca Israelpi kamachikushaqtinmi Asiria rey Tiglaj-Pileserqa+ Israel contra jamurqan, jinaspa jap’ikapurqan Ijón llaqtata, Abel-Bej-Macá+ llaqtata, Janóa llaqtata, Quedes+ llaqtata, Azor llaqtata, Galilea jallp’ata, lliu Neftalí+ aylluq jallp’anta, jinallataq Galaad+ jallp’atapas. Chaypi tiyaq runakunatataq presota Asiriaman apapurqan.+ 30 Chaymantataq Elapa churin Hoseaqa+ Remaliaspa churin Péca contra jatarirqan, jinaspa wañuchipurqan. Chay qhepamantaq Hoseaqa Israelpi rey kapurqan Uziaspa churin Jotán+ iskay chunka wataña Judá ayllupi kamachikushaqtin. 31 Pecaq wakin ruwasqankunaqa lliumi Israel reykunamanta willaq libropi qelqasqa kashan.

32 Remaliaspa churin Péca iskay wataña Israelpi kamachikushaqtinmi Uziaspa+ churin Jotanqa+ Judá ayllupi rey kapurqan. 33 Jotanqa iskay chunka pisqayoq watanpi kashaspan rey kapurqan, chunka soqtayoq watataq Jerusalenmanta kamachirqan. Paypa mamanmi karqan Sadocpa ususin Jerusá.+ 34 Jotanqa papan Uzías jinan Jehová Diospa munasqanman jina ruwarqan.+ 35 Yupaychana patakunatan ichaqa mana chinkachirqanchu, chaykunapin runakunaqa sacrificiokunata jaywaspa diosninkuman q’osñichishallarqanku.+ Paymi ruwachirqan Jehová Diospa wasinpi kaq Pata Punku nisqata.+ 36 Jotanpa kausayninmanta wakin willakuykunapas imachus ruwasqankunapas Judá ayllu reykunamanta willaq libropin qelqasqa kashan. 37 Chay p’unchaykunapin Jehová Diosqa Judá ayllu contra kachamurqan+ Siria rey Rezinta Israel rey Pecatawan.+ 38 Chaymantataq Jotanqa ñaupa taytankuna jina wañukapurqan, jinaspa ñaupa taytankunatawan kuskata Davidpa Llaqtan nisqapi p’ampapurqanku, Davidqa Jotanpa ñaupa taytanmi karqan. Chay qhepamantaq Jotanpa churin Ajaz Judá ayllupi rey kapurqan.