Ezequiel
26 Chunka jujniyoq watapin, killa qallariy p’unchaypi jujmanta Jehová Diosqa rimapayamuwarqan, paymi niwarqan: 2 “Runaq churin, Tiron Jerusalenta asipayarqan:+ ¡Kusa! ¡Kunanqa llaqtakunaman jaykuna punkun p’akisqa kapun!+ Payqa ñut’usqan kapun, kunanqa llapa imapas noqaqmi kapunqa. Qhapaqmi kasaq, nispa. 3 Payta niy, tukuy munayniyoq Señor Jehová Diosmi nin: Yau Tiro, kaypin qan contra kashani, askha nacionkunan qan contra jatarimunqa, lamar-qocha jinaraqmi jatarimunqaku. 4 Paykunan Tiro llaqta perqakunata llapa torrekunatawan thuninqaku.+ Noqa kikiymi llapa jallp’ankuta q’arayachisaq, llusk’a rumita jinaraqmi k’anchashaqta saqesaq. 5 Lamar-qocha ukhupi challwana llikata ch’akichina jinan kapunqa,+ nispa.
”Tukuy munayniyoq Señor Jehová Diosmi nin: Noqan kaytaqa rimashani, paytaqa waj nacionkunan apakapunqaku. 6 Juch’uy llaqtankunapi runakunapas* espadawan wañuchisqan kanqaku, chhaynapin runakuna yachanqaku noqa Jehová Dios kasqayta, nispa.
7 ”Tukuy munayniyoq Señor Jehová Diosmi nillantaq: Wichay ladomantan Babilonia rey Nabucodonosorta* Tiro contra pusamusaq,+ paymi jamunqa caballokunantin,+ carretakunantin,+ caballopi soldadokunantin, chakipi askha soldadokunantin ima. Payqa reykunaq reyninmi.+ 8 Paymi espadanwan llapa runakunata mast’a pampata saqepunqa. Llaqta muyuriqtan cercanqa, llaqta perqamanmi jallp’ata montonqa, jark’apakuna jatun escudontinmi phawaykamunqa. 9 Llaqta perqaykikunatan perqa thunina carretakunawan thuninqa. Jatun torrekunatan espadanwan kumpanqa. 10 Caballonkunaqa polvotaraqmi jatarichinqaku, caballokunaq phawasqanmi, carretakunaq raqhaqasqanmi llaqta perqaykitaraq chhafchirinqa. Perqan thunisqa llaqtaman jaykuq runakuna jina punkuykita pasashaqtinmi perqaykikunaraq kuyurinqa. 11 Caballonkunaq phapatunkunan llapa calleykikunata sarurparinqa,+ llapa runaykikunatan espadawan wañuchinqa. Jatun columnakunapas perqakunapas pampamanmi kumpakamunqa. 12 Llapa kaqniykikunatan apakapunqaku, qhatunayki cosaskunatan suwasunkiku.+ Llapa perqaykikunatan thunipunqaku, munay wasiykikunatan ñut’upunqaku. Chaymantataq rumiykikunata, maderaykikunata, jallp’aykikunatapas unuman wijch’uykunqaku, nispa.
13 ”Qan ukhupiqa manañan bulla ruwaypas takiypas kanqañachu, manañan arpa tocaypas uyarikunqañachu.+ 14 K’anchashaq llusk’a rumita jinan saqesayki, challwa jap’ina llikata ch’akichina jinan kapunki.+ Manan jayk’aqpas perqasqañachu kanki, noqa Jehová Diosmi chayta nini, ninmi tukuy munayniyoq Señor Jehová Diosqa.
15 ”Tukuy munayniyoq Señor Jehová Diosmi Tiro llaqtata nin: Qan urmaqtiykiqa llapa islakunan chhafchirikunqa. Wañunayaq kaqkuna waqaqtinmi, qan ukhupi wañuchinakuy kaqtinmi islakuna khatatatanqa.*+ 16 Lamar-qochapi kaq llapa umallikunan trononkumanta uraykamunqaku, jinaspan p’achankuta ch’utikuspa, munay bordasqa p’achankuta orqokuspa manchakuymanta khatatatanqaku. Sinchi manchasqan pampapi tiyaykunqaku, jinaspan admirasqa qhawasunkiku.+ 17 Chaymantataq juj llaki takita+ takipusunkiku:
¡Yau llaqta, imay sonqon thunisqa kapunki,+
lamar-qocha runakunaq tiyananmi karqanki,
qanqa runakunaq jatunchasqanmi karqanki!
¡Qanpas qanpi tiyaqkunapas lamar-qochapiqa manchanan karqankichis,+
qanpi tiyaq runakunaqa llapa runakunatan sinchita manchachiqku!
18 Urmasqaykiwanmi islakuna khatatatashanku,
chinkachisqa kasqaykiwanmi llapa islakuna mancharisqa kashanku,+ nispa.
19 ”Tukuy munayniyoq Señor Jehová Diosmi nin: Ch’in llaqtakunata jina saqeqtiymi, unuwan lliuta junt’achimuqtiymi, unu qanman junt’aykuqtinmi,+ 20 aya p’ampanaman jaykuqkunatawan kuskata jaykuchisayki, maypichus ñaupa tiempo runakuna kashanku chaymanmi jaykuchisayki. Mana aypay ukhumanmi winasayki, aya p’ampanaman jaykuqkunatawan kuskatan winasayki,+ ñaupa tiempopi thunisqa llaqtakunaman jinan tukuchisayki. Manañan qanpiqa pipas tiyanqañachu; chhaynapin maypichus kausashaqkuna tiyashanku chayta munayman tukuchisaq, nispa.
21 ”Qonqay-qonqaymi mancharikuy, khatatatay chayamusunki. Ch’usaqman tukuchisqan kanki.+ Maskhasunkikun ichaqa manan jayk’aqpas tarisunkikuchu, ninmi tukuy munayniyoq Señor Jehová Dios”, nispa.