JOSUÉ

1 Jehová Diospa kamachin Moisespa wañupusqan qhepamanmi, Jehová Diosqa Moisespa yanapaqnin+ Josuewan*+ rimarqan, payqa Nunpa churinmi karqan, nirqanmi: 2 “Kamachiy Moisesqa wañukapunñan.+ Kunanqa qan llapa kay Israel runakunata+ chimpachiy Jordán mayu chimpaman, jinaspa jaykuychis prometesqay jallp’aman. 3 Maymanchus chakiykichis saruykunqa chaytan qankunaman qopusaykichis, imaynan Moisesman prometerqani chhaynata.+ 4 Jallp’aykichismi kanqa ch’inneq pampamanta Libanokama, hasta Éufrates jatun mayukama, inti jaykuy ladomantaq kanqa Jatun lamar-qochakama.*+ Het runakunaq jallp’anqa+ llapanmi qankunaq kapunqa. 5 Kausasqayki tiempopiqa+ manan pipas qan contraqa jatarinqachu. Imaynan Moiseswan kasharqani chhaynatan qanwanpas kasaq.+ Manan saqesaykichu nitaq wijch’usaykipaschu.+ 6 Kallpachakuy, ama manchakuychu,+ qanmi kay llaqtataqa pusaykunki prometesqay jallp’aman, chay jallp’atan prometerqani+ ñaupa taytaykichiskunaman.

7 ”Kallpachakuy, ama manchakuychu; kamachiy Moisespa qosqasuyki llapa kamachikuykunata kasukuy. Amapunin chay kamachikuykunamantaqa t’aqakunkichu pañamanpas lloq’emanpas,+ chhaynapin maytaña rinki chaypas+ allin yuyaywan imatapas ruwanki. 8 Kay kamachikuy qelqamantaqa rimashallankipunin,+ tuta-p’unchaymi chaykunata leenki, chaykunapitaq piensashallanki.* Chhaynapin chay kamachikuykunaman jina+ kausanki, chhaynapitaqmi ima ruwasqaykipas allin kanqa, allin yuyaywantaqmi imatapas ruwanki.+ 9 Noqan kamachiyki: ¡Kallpachakuy, ama manchakuychu!, nispa. Aman khatatatankichu,* noqa Jehová Diosniykiqa qanwanmi kashasaq maytaña riqtiykipas”,+ nispa.

10 Jinan Josueqa Israel llaqtapi umallikunata kamachirqan: 11 “Riychis karpa-karpaman, jinaspa llapa runakunata kamachimuychis mijunata alistashanankupaq, kinsa p’unchayllamantan Jordán mayuta chimpasunchis, Jehová Diospa prometewasqanchis jallp’ata jap’ikapunanchispaq”,+ nispa.

12 Rubén runakunata, Gad runakunata, kuskan Manasés runakunatawantaq Josueqa nirqan: 13 “Yuyariychis Jehová Diospa kamachin Moisespa nisqasuykichista, paymi nirqasunkichis:+ Jehová Diosmi kay jallp’ata qoshasunkichis, chaypi thaj tiyanaykichispaq. 14 Jordán mayuq+ kay ladonpin* esposaykichispas, wawaykichispas, llapa uywaykichispas qhepakunqa, qankunaman qosqay jallp’api. Ichaqa llapa allin maqanakuq qharikunan+ chimpanaykichis, chhaynapi wayqeykichiskunata maqanakuypi yanapanaykichispaq.+ Qankunan paykunata yanapanaykichis 15 Jehová Diospa qosqan jallp’ata jap’ikapunankukama, chhaynapi thaj tiyanankupaq, imaynan qankunamanpas Jehová Dios qorqasunkichis jinata. Chaymantataq kay ladopi+ chaskisqaykichis jallp’aman kutimpunkichis, chaypi tiyanaykichispaq. Chay jallp’atan noqa Jehová Diospa kamachin qorqaykichis, nispa”.

16 Jinan paykunaqa Josueta nirqanku: “Tukuy nisqaykitan kasukusaqku, maymanña kachawankiku chaypas risaqkun.+ 17 Imaynan Moisesta kasukurqayku chhaynatan qantapas kasukusaykiku. Jehová Dios ichaqa qanllawan kashachun imaynan Moiseswanpas kasharqan jinata.+ 18 Pi runapas kamachisqaykita mana kasukunqachu, qan contra imaraq jatarinqa chayqa wañuchisqa kachun.+ Qan ichaqa kallpachakuy, ama manchakuychu”,+ nispa.

2 Jinan Nunpa churin Josueqa iskay qharikunata pakallapi kacharqan jap’ikapunanku jallp’ata qhawamunankupaq, Sitinmanta+ kachaspan paykunata nirqan: “Riychis chay suyuta qhawamuychis, astawanqa Jericó llaqtata allinta qhawamuychis”, nispa. Jericó llaqtaman chayaspataq jaykurqanku ramera warmi Rahabpa+ wasinman, chaypin qhepakurqanku. 2 Jericó llaqta reymantaq willarqanku: “Kunan tutan Israel qharikuna jamusqaku llaqtanchista qhawaq”, nispa. 3 Chayta uyarispan Jericó reyqa runakunata Rahabpa wasinman kacharqan “chay qharikunata wasiykimanta orqomuy, paykunaqa llaqtanchista qhawaqmi jamunku” nispa nimunankupaq.

4 Rahabmi ichaqa chay iskaynin qharikunata pakarqan. Jinaspan reypa kachamusqan runakunata nirqan: “Arí, jamusqakun chay runakunaqa, ichaqa manan yachanichu maymantachus kasqankutaqa. 5 Tutayaramushaqtinñan pasapunku manaraq llaqta punku wisq’akushaqtin, manan yachanichu mayman risqankutaqa. Usqhaylla phawaspaqa ayparunkichisraqmi”, nispa. 6 (Chay warmin ichaqa chay iskay qharikunata wasin pataman pusaspa tauqarayashaq lino chhalla ukhupi pakasqa). 7 Reypa kachamusqan runakunataq Jordán mayu ladoman phawaylla rirqanku, maypichus mayu chimpanakuna kashan chayman.+ Lloqsiqtinku jinataq llaqta punkuqa wisq’akurqan.

8 Rahabtaq wasin pataman seqarqan pakasqan runakuna manaraq puñushaqtin. 9 Jinaspa paykunata nirqan: “Noqaqa allintan yachani Jehová Dios kay llaqtata qopunasuykichista,+ chaymi noqaykuqa sinchi manchasqa kashayku.+ Llapa llaqtantinmi qankuna jawa khatatatashaykuraq.*+ 10 Yachaykun Egiptomanta lloqsimushaqtiykichis+ Puka lamar-qochata Jehová Dios ch’akichisqanta, Jordán mayuq inti lloqsimuy ladonpi amorreo runakunaq reynin Sehontapas+ Ogtapas+ wañuchisqaykichista. 11 Chaykunata uyarispan sinchi manchasqa kashayku, manan pipas qankunawan maqanakuyta munanñachu. Allintan yachayku Jehová Diosniykichisqa kay pachapipas janaq pachapipas+ ancha atiyniyoq Dios kasqanta. 12 Jinaqa Jehová Diospa sutinpi jurawaychis, imaynan noqapas khuyapayarqaykichis* chhaynatan qankunapas papaypa wasinpi kaqkunata khuyapayankichis. Juj señaltataq qowaychis jurawasqaykichispi confianaypaq. 13 Amayá wañuchinkichischu+ papaytapas, mamaytapas, turaykunatapas, ñañaykunatapas ni pi familiankutapas”, nispa.

14 Jinan Israel runakunaqa nirqanku: “Manachus pimanpas willankichis imamanchus jamusqaykuta chayqa, khuyapayasaykikun* kay jallp’ata Jehová Dios noqaykuman qopuwaqtinku. Manachus chhayna kanqa chayqa Dios wañuchipuwachunku”, nispa. 15 Chaymantataq Rahabqa wasi ventananta juj waskhapi chay runakunata uraykachirqan. Paypa wasinqa llaqta cantopin kasharqan, llaqta muyuriq perqa patapi.+ 16 Nirqantaq: “Orqo-orqoman riychis, chaypi kinsa p’unchay pakakamuychis maskhaqniykichis runakuna mana tarinasuykichispaq. Paykuna kutimuqtinña ripunkichis”, nispa.

17 Chay runakunataq nirqanku: “Kay jurachiwasqaykikuta+ junt’anaykupaqqa 18 kay llaqtaman chayamushaqtiykun kay puka waskhata ventanaykimanta warkuykamunki. Jinaspapas papaykita, mamaykita, turaykikunata, ñañaykikunata, papaykiq wasinpi llapa kaqkunata+ iman kay wasiman juñumunki. 19 Pipas wasiykimanta jawaman lloqsimuspa wañunqa chayqa, paymi wañusqanmanta juchayoq kanqa,* manan noqaykuchu. Ichaqa pipas wasi ukhupi kashaspa wañunqa chayqa noqaykun juchayoq kasaqku. 20 Imamanchus jamusqaykuta pimanpas willanki chayqa+ manañan jurasqaykutaqa junt’asaqkuñachu”, nispa. 21 Rahabtaq nirqan: “Nisqaykichisman jina kachun”, nispa.

Jinan chay runakunaqa ripurqanku. Chaymantataq Rahabqa chay puka waskhata wasi ventanaman wataspa warkuykamurqan. 22 Chay iskaynin runakunataq orqo-orqoman ripurqanku, chaypin kinsa p’unchay pakakamurqanku maskhaqnin runakuna kutimunankukama. Chay maskhaq runakunaqa lliutan maskhamurqanku, ichaqa manan tarimurqankuchu. 23 Chaymantataq chay iskaynin runakunaqa orqomanta uraykamuspa Jordán mayuta chimparqanku, jinaspa Nunpa churin Josueman rirqanku, paymanmi tukuy ima rikumusqankuta willarqanku. 24 Nirqankun: “Jehová Diosqa qowasunpunin chay jallp’ataqa.+ Chay runakunaqa llapankun noqanchis jawa sinchi manchasqa kashanku”,+ nispa.

3 Josuetaq tutallamanta jatarispa llapa Israel runakunawan kuska Sitinmanta+ Jordán mayuq ladonman rirqanku, chaypin karpakurqanku.

2 Kinsa p’unchaymantataq umallikunaqa+ karpan-karpanta purimurqanku, 3 jinaspa llapa runakunata kamachirqanku: “Jehová Diospa rimanakuynin arcata* Leví sacerdotekunaq+ apashasqanta rikuspa jinan paykunaq qhepanta rinkichis. 4 Manataq jayk’aqpas chaynintaqa purirqankichischu chayqa paykunan maynintachus purinaykichista pusasunkichis. Ichaqa isqon pachaj metros jina* karu qhepallantan rinkichis, aman nishutaqa qayllaykunkichischu”, nispa.

5 Josuetaq llaqtantin runakunata nirqan: “Alistakuychis,*+ paqarinmi Jehová Dios musphanapaq kaqkunata ruwanqa”,+ nispa.

6 Chaymantataq Josueqa sacerdotekunata nirqan: “Diospa rimanakuynin arcata+ oqariychis jinaspa llaqtaq ñaupanta riychis”, nispa. Jinan paykunaqa Diospa rimanakuynin arcata oqarispa runakunaq ñaupanta rirqanku.

7 Jehová Diostaq Josueta nirqan: “Kunan p’unchaymantapachan llapa Israel runakunaq ñaupanpi+ jatunchasayki. Chhaynapin paykunaqa yachanqaku imaynan Moiseswanpas kasharqani+ chhaynata qanwanpas kashasqayta.+ 8 Rimanakuyniy arcata apaq sacerdotekunatan kamachinki Jordán mayuman chayaspanku+ chayllapi sayanankupaq”, nispa.

9 Jinan Josueqa Israel runakunata nirqan: “Jamuychis Jehová Diospa nisqanta uyariychis”, nispa. 10 Jinan nirqan: “Diosmi rikushaqtiykichis chinkachinqa Canaán runakunata, Het runakunata, heveo runakunata, perizita runakunata, guirgaseo runakunata, amorreo runakunata, Jebús runakunatawan;+ chhaynapin yachankichis qankuna ukhupi+ payqa kausaq Dios kasqanta. 11 Kay pachaq Señorninpa rimanakuynin arcan ñaupaykichista Jordán mayuman jaykunqa. 12 Kunanqa chunka iskayniyoq runakunata ajllaychis, sapanka ayllumanta jujta.+ 13 Kay pachaq Señornin Jehová Diospa rimanakuynin arcata apaq sacerdotekuna unuman saruykuqtinku jinan Jordán mayuqa perqayoqpas kanman jina sayapunqa. Jinaspa wichaymanta jamuq unuqa chaypi qochachakunqa”,+ nispa.

14 Jinan sacerdotekunaqa ñaupaqta rirqanku Diospa rimanakuynin arcata+ apaspa, runakunataq maypichus karpakusqankumanta jatarispa paykunaq qhepanta rirqanku Jordán mayuta chimpanankupaq. 15 (Chay tiempoqa cosecha tiempon karqan, Jordán mayu unupas askhatan yapakamuq).+ Diospa rimanakuynin arcata apaq sacerdotekuna Jordán mayu unuta saruykuqtinku jinan 16 wichaymanta jaykumuq unuqa sayapurqan. Zaretán llaqta cercapi Adán llaqtapiraqmi unuqa qochachakurqan. Arabá qochaman, Kachi qochaman* jaykuq unutaq ch’akipurqan. Unu sayashanankaman Israel runakunaqa Jericó llaqta ladoman chimparqanku. 17 Jehová Diospa rimanakuynin arcata apaq sacerdotekunaqa Jordán mayu chaupipin, ch’aki pampapi sayarqanku,+ llapa Israel runakuna chay ch’aki pampanta+ chimpanankukama.

4 Llapa runakuna Jordán mayuta chimpaqtinku jinan Jehová Diosqa Josueta nirqan: 2 “Sapanka ayllumanta+ ajllasqaykichis chunka iskayniyoq runakunata wajamuy, 3 jinaspa paykunata kamachiy Jordán mayu chaupipi sacerdotekunaq sayasqanmanta+ chunka iskayniyoq rumikunata orqomunankupaq, jinaspa chay rumikunata maypichus kunan tuta qhepakunkichis chayman apaspa chaypi churanankupaq”,+ nispa.

4 Jinan Josueqa ajllasqanku chunka iskayniyoq Israel runakunata wajamurqan, sapanka ayllumantan juj runa karqan. 5 Paykunatan Josueqa nirqan: “Jordán mayu chaupiman jaykuychis Jehová Diospa rimanakuynin arcaq ñaupanman, jinaspa sapankaykichis rijraykichispi juj rumita apamuychis, Israelpi jayk’a aylluchus kasqanman jina, 6 chaymi qankunapaq juj señal kanqa. Wawaykichischus tapusunkichis: ¿Imapaqtaq kay rumikunari?,+ nispa chayqa, 7 paykunatan ninkichis: Jehová Diospa rimanakuynin arcata Jordán mayuta chimpachimushaqtinkun unuqa sayapurqan.+ Manañan urayman jaykurqanchu aswanmi kaqllapi sayapurqan. Chayta llapa Israel runakuna yuyarinanpaqmi kay rumikunaqa kashan,+ nispa”.

8 Jinan chay runakunaqa Josuepa kamachisqanman jina chunka iskayniyoq rumikunata Jordán mayu chaupimanta orqomurqanku. Jehová Dios Josueta kamachisqanman jinan sapanka ayllupaq jujta orqomurqanku. Chaytataq aparqanku maypichus chay tuta qhepakunanku karqan chayman.

9 Josuetaq Jordán mayu chaupiman, maypichus Diospa rimanakuynin arcata apaq sacerdotekuna sayasharqanku+ chayman chunka iskayniyoq rumikunata tauqarqan. Chay rumikunaqa kunan p’unchaykaman chaypi kashan.

10 Diospa rimanakuynin arcata apaq sacerdotekunaqa Jordán mayu chaupillapin sayasharqanku Josueman Jehová Diospa llapa kamachisqanta Israel runakuna ruwanankukama, Moisespa nisqantapas ruwanankukama. Chaykamataq runakunaqa usqhaylla chimparqanku. 11 Llapa runakuna chimpayta tukuqtin jinan Jehová Diospa rimanakuynin arcata apaq sacerdotekunapas runakunaq rikushasqan chimpallarqankutaq.+ 12 Rubén ayllu runakunapas, Gad ayllu runakunapas, kuskan Manasés ayllu runakunapas, Moisespa kamachisqanman jinan+ guerrapaq preparasqa jina+ Israel runakunaq ñaupanta chimparqanku. 13 Tawa chunka waranqa soldadokuna jinan guerrapaq preparasqa Jehová Diospa ñaupanta Jericó pampaman chimparqanku.

14 Chay p’unchaymi Jehová Diosqa llapa Israel runakunaq ñaupanpi+ Josueta jatuncharqan. Jinan paykunaqa Josueta respetarqanku wañupunan p’unchaykama, imaynan Moisestapas respetarqanku jinata.+

15 Chaymantataq Jehová Diosqa Josueta nirqan: 16 “Rimanakuyniy arcata+ apamuq sacerdotekunata kamachiy Jordán mayumanta lloqsimunankupaq”, nispa. 17 Jinan Josueqa sacerdotekunata kamachirqan mayumanta lloqsimunankupaq. 18 Jehová Diospa rimanakuynin arcata+ apaq sacerdotekuna Jordán mayumanta lloqsimuspa ch’aki pampata saruykuqtinku jinataq, Jordán mayuqa patantintaraq kaqta puriripurqan.+

19 Israel runakunaqa wata qallariy killapi chunka kaq p’unchaypin Jordán mayuta chimparqanku, jinaspa Guilgalpi+ karpakurqanku, Jericó llaqtaq qayllanpi, inti lloqsimuy ladopi.

20 Guilgalpin+ Josueqa Jordán mayumanta apasqanku chunka iskayniyoq rumikunata tauqarqan. 21 Jinaspan Israel runakunata nirqan: “Wawaykichischus tapusunkichis: ¿Imapaqtaq kay rumikunari?,+ nispa chayqa, 22 paykunatan ninkichis: Israel runakunan Jordán mayuta ch’aki pampanta chimpamurqanku.+ 23 Jehová Diosninchisqa imaynan Puka lamar-qochata ch’akichirqan chhaynatan Jordán mayutapas ch’akichirqan, Jehová Diosninchisqa llapa runakuna chimpamunankaman unuta sayachirqan.+ 24 Chaytan Jehová Diosqa ruwarqan ancha atiyniyoq kasqanta+ llapa runakuna yachananpaq, qankunapas Jehová Diosniykichista manchakunaykichispaq, nispa”.

5 Jehová Dios Jordán mayuta ch’akichispa Israel runakunata chimpachisqanta uyarispan, Jordán mayuq inti jaykuy ladonpi amorreo reykuna,+ lamar-qochaq qayllanpi Canaán reykunapas+ anchata mancharikurqanku.+ Israel runakuna jawan khatatatarqankuraq.*+

2 Chay p’unchaykunapin Jehová Diosqa Josueta nirqan: “Rumimanta cuchillokunata ruwakuy, jinaspa llapa Israel qharikunaq qhari kaynin qarachata kuchuy”,*+ nispa. 3 Jinan Josueqa Guibeaj-Aralojpi*+ rumimanta cuchillokunata ruwakuspa Israel qharikunaq qhari kaynin qarachata kuchurqan. 4 Josueqa chayta ruwarqan Egiptomanta lloqsimuq llapa maqanakuq qharikuna ch’inneqpi wañupusqankuraykun.+ 5 Egiptomanta lloqsimuq qharikunaqa qhari kaynin señalasqan karqanku, Egiptomanta lloqsimusqanku qhepaman ch’inneqpi naceqkunan ichaqa mana. 6 Israel runakunaqa tawa chunka watan ch’inneqpi purirqanku.+ Chaypin Egiptomanta lloqsimuq llapa maqanakuq qharikunaqa wañupurqanku Jehová Diospa kamachisqanta mana kasukusqankurayku.+ Paykunatan Jehová Diosqa juraspa nirqan lechepas mielpas+ askha kasqan jallp’aman+ mana jayk’aqpas jaykunankupaq, chay jallp’atan Jehová Diosqa ñaupa taytankuman prometerqan.+ 7 Chay runakunaq wawantan+ Diosqa paykunaq rantinpi churarqan, chay wawankuq qhari kaynintan Josueqa señalarqan mana señalasqa kasqankurayku.

8 Qhari kayninku qarachata señalayta tukusqanku qhepamanqa, maypichus karpakusharqanku chayllapin Israel runakunaqa qhepakurqanku llapa qharikuna qhaliyanankukama.

9 Jehová Diostaq Josueta nirqan: “Kunanmantaqa manañan Egipto runakunaqa qankunamanta millayta rimanqakuñachu”, nispa. Chayraykun chay cheqastaqa kunan p’unchaykama sutichakun Guilgal*+ nispa.

10 Jericó llaqta qayllapi kashaspan, Guilgal pampapi Israel runakunaqa Pascua Fiestata ruwarqanku. Chay fiestataqa ruwarqanku ñaupaq kaq killapin chunka tawayoq p’unchay tardepi.+ 11 Pascua p’unchay qhepatataq paykunaqa chay jallp’api wiñaq mijuykunata mijurqanku; mana levadurayoq t’antata,+ jank’ata ima. 12 Chay p’unchaymantapachan manaña karqanñachu Diospa qosqan maná nisqa mijunaqa.+ Chhaynapin Israel runakunaqa Canaán llaqtapi kaq mijuykunata mijuyta qallarirqanku.+

13 Jericó llaqta qayllapi kashaspan Josueqa juj runata+ rikurqan espada jap’iykusqata.+ Jinan Josueqa payman asuykuspa nirqan: “¿Noqayku partemantachu kashanki icha enemigoyku partemantachu?”, nispa. 14 Chay runataq nirqan: “Noqaqa Jehová Diospa ejercitonpa umallinmi kani”,+ nispa. Chayta uyarispan Josueqa pampakama k’umuykuspa nirqan: “Señorníy, ¿ima willakuymi kay kamachiykipaq kashan?”, nispa. 15 Jinan Jehová Diospa ejercitonpa umallinqa Josueta nirqan: “Usut’aykita ch’utikuy, kay pampaqa ch’uya pampan”, nispa. Josuetaq usut’anta ch’utikurqan.+

6 Jericó llaqta runakunaqa Israel runakunata manchakuspan llaqta punkuta allinta wisq’akamurqanku, manan pipas lloqsimuqchu ni jaykuqpaschu.+

2 Jehová Diosmi Josueta nirqan: “Llapa Jericó llaqtata, reyninta, soldadonkunata+ iman makiykipi entregayki. 3 Llapa maqanakuq qharikunan soqta p’unchay Jericó llaqtata muyunkichis, chaytan ruwankichis p’unchaypi juj kutita. 4 Rimanakuyniy arcata apaqkunaq ñaupantan rinqaku qanchis sacerdotekuna, sapankataq juj oveja waqrata apanqaku. Qanchis kaq p’unchaytaq qanchis kutita chay llaqtata muyunkichis, jinan sacerdotekunaqa apasqanku waqrata+ tocanqaku. 5 Oveja waqrata aysarisqata tocaqta uyarispaykichis jinan llapaykichis kunkayoqta qaparinkichis, chhaynapin llaqta perqakunaqa urmaykapunqa,+ jinan llapaykichis llaqtaman jaykunkichis”, nispa.

6 Jinan Nunpa churin Josueqa llapa sacerdotekunata juñurqan, jinaspa paykunata nirqan: “Jehová Diospa rimanakuynin arcata+ apaychis, qanchis sacerdotekunataq Diospa rimanakuynin arcaq ñaupanta richunku oveja waqra apaykusqakama”, nispa. 7 Soldadokunatataq nirqan: “Riychis, Jericó llaqtata muyumuychis, allin armasqa soldadokunaqa+ Jehová Diospa rimanakuynin arcaq ñaupanta richunku”, nispa. 8 Josuepa nisqanman jinan qanchis sacerdotekunaqa Jehová Diospa ñaupanta rirqanku oveja waqrata tocaykuspa. Paykunaq qhepantataq aparqanku Jehová Diospa rimanakuynin arcata. 9 Allin armasqa soldadokunaqa oveja waqrata tocaq sacerdotekunaq ñaupantan rirqanku, wakin soldadokunataq Diospa rimanakuynin arcaq qhepanta. Waqrata tocaq sacerdotekunaqa mana samaspan tocarqanku.

10 Josuetaq soldadokunata kamachirqan: “Aman qaparinkichischu aman imallatapas rimankichischu. Maypachachus: ¡Qapariychis!, nisaykichis chayñan fuerteta qaparinkichis”, nispa. 11 Jinan Jehová Diospa rimanakuynin arcataqa juj kutita Jericó llaqtata muyuchirqanku. Chaymantataq maypichus karpakusqankuman kutipurqanku, chaypin chay tutaqa qhepakurqanku.

12 Qhepa p’unchaypas Josueqa tutallamantan jatarirqan. Sacerdotekunapas Jehová Diospa rimanakuynin arcata+ oqarispan puririrqanku. 13 Qanchis sacerdotekunataq oveja waqrata tocaykuspa Jehová Diospa rimanakuynin arcaq ñaupanta rirqanku. Allin armasqa soldadokunapas Jehová Diospa rimanakuynin arcaq ñaupantan rirqanku, wakin soldadokunataq qhepanta. Waqrata tocaq sacerdotekunaqa mana samaspan tocarqanku. 14 Chhaynatan paykunaqa iskay kaq p’unchaypas muyurqanku Jericó llaqtata, chaymantataq maypichus karpakusqankuman kutipurqanku. Soqtantin p’unchaymi chhaynata ruwarqanku.+

15 Qanchis kaq p’unchaypas tutallamanta jatarispan Jericó llaqtata muyullarqankutaq, imaynan ñaupaq p’unchaykunapas muyurqanku jinata. Chay p’unchaymi ichaqa qanchis kutita muyurqanku.+ 16 Qanchis kaq kutita muyumushaqtinkun qanchis sacerdotekunaqa oveja waqrata tocarqanku. Jinan Josueqa soldadokunata nirqan: “¡Qapariychis,+ Jehová Diosmi kay llaqtata qopusunkichis! 17 Kay llaqtapi tukuy imatapas llapantan chinkachinkichis,+ Jehová Diospan chaykunaqa. Ramera warmi Rahabtawan+ wasinpi kaqkunatawanmi ichaqa ama imanankichispaschu, paymi kay llaqtata qhawananpaq kachamusqanchis runakunata pakarqan.+ 18 Llapa imapas chinkachinapaq kaqtaqa+ amapunin munapayankichischu ni oqarinkichispaschu.+ Manachus kay nisqayta kasukunkichis chayqa Israel llaqtapas chinkachisqan kallanqataq.+ 19 Llapa qolqeta, qorita, cobremanta fierromanta ruwasqa cosaskunatan ichaqa Jehová Diospa wasinpaq apamunkichis,+ valorniyoq cosaskuna waqaychanaman. Chaykunaqa ch’uyan Jehová Diospaqqa”,+ nispa.

20 Jinan soldadokunaqa oveja waqrata tocaqta uyarispa jina fuerteta qaparirqanku,+ qapariqtinku jinataq llaqta muyuriq perqakunaqa thunikapurqan.+ Soldadokunataq llaqta ukhuman phawaykurqanku, jinaspa chay llaqtata jap’ikapurqanku. 21 Lliutan espadawan wañuchirqanku; qharitapas warmitapas, kuraqtapas waynatapas, wakakunatapas, ovejakunatapas, asnokunatapas.+

22 Jericó llaqta qhawaqta kachasqan iskaynin runakunatataq Josueqa nirqan: “Ramera warmi Rahabpa wasinman jaykuychis, jurasqaykichisman jina+ paytapas llapa wasinpi kaqkunatapas orqomuychis”, nispa. 23 Jinan chay iskaynin runakunaqa Rahabpa wasinman jaykuspa papanta, mamanta, turankunata, llapa familianta ima orqomurqanku.+ Jinaspa Israel runakunaq karpakusqan qayllaman pusarqanku.

24 Chaymantataq llapa llaqtata kanaykurqanku. Qolqeta, qorita, cobremanta fierromanta cosaskunatataq Jehová Diospa wasinpaq aparqanku, valorniyoq cosaskuna waqaychanaman.+ 25 Ramera warmi Rahabta, papanta, familianta imallan+ Josueqa mana wañuchirqanchu, Jericó llaqtaman kachasqa runakunata pakasqanrayku.+ Rahabqa kunan p’unchaykaman*+ Israel llaqtapi tiyashan.

26 Chay kutipin Josueqa jurarqan:* “Jehová Diospa ñaupanpi ñakasqa kachun pipas kay llaqtata wajmanta jatarichiqqa. Cimentacionta churaqtinmi phiwi* churin wañunqa, punkuta churaqtintaq sullk’a churin wañunqa”,+ nispa.

27 Jehová Diosqa Josuewanmi kasharqan,+ chhaynapin Josueqa* lliu llaqtakunapi allin reqsisqa kapurqan.+

7 Judá ayllumantan karqan Aján sutiyoq runa,+ paypa taytanmi karqan Carmí, Carmipa taytantaq karqan Zafdí, Zafdipa taytantaq karqan Zéra. Ajanmi chinkachinapaq kaqkunamanta wakin cosaskunata oqarikurqan.+ Chaymi Jehová Diosqa sinchita phiñakurqan llapa Israel runakunapaq.+

2 Jericó llaqtapi kashaspan Josueqa runakunata kacharqan Hai llaqtata+ qhawamunankupaq. Hai llaqtaqa Bej-Aven llaqta qayllapin kasharqan, Betel llaqtaq+ inti lloqsimuy ladonpi. Paykunatan nirqan: “Wichaychis, Hai llaqtata qhawaramuychis”, nispa. Jinan paykunaqa rirqanku chay llaqta qhawaq. 3 Kutimuspankutaq Josueta nirqanku: “Ama llapa soldadokunachu richunku, Hai runakunaqa pisillan kasqaku, iskay waranqa otaq kinsa waranqa soldadokunallapaqmi kashanku, ama yanqa sayk’uchiychu llapa soldadokunata”, nispa.

4 Chaymi kinsa waranqa jina soldadokuna wicharqanku, ichaqa Hai runakunata mancharikuspan kutirimpurqanku.+ 5 Hai runakunaqa llaqtanku punkumantapachan Sebarinkama* Israel soldadokunata qatiyamurqanku, kinsa chunka soqtayoq soldadokunatan wañuchirqankupas. Chaywanmi Israel runakunaqa sinchita mancharikurqanku, manañan maqanakuytapas munarqankuchu.

6 Chayta rikuspan Josueqa Jehová Diospa rimanakuynin arcaman asuykuspa p’achanta llik’ikurqan jinaspa pampakama k’umuykurqan. Chaytan ruwallarqankutaq Israelpi umalliqkunapas.* Tardekaman chaypi karqanku jallp’awan umankuman jach’ikuspa. 7 Josuetaq nirqan: “¡Tukuy munayniyoq Señorníy Jehová! ¡Yanqapunin kay ladomanqa chimpachimuwarqankiku! ¡Amorreo runakunachá kunanqa wañuchipuwanqaku! ¡Jordán mayu chimpallapi qhepakamuykuman karqan! 8 ¡Ay Diosníy Jehová, perdonaykuway! ¿Imanisaqtaq kunanri? Kay Israel runakunan enemigonkumanta ayqekapunku. 9 Llapa Canaán runakuna kayta yacharunqaku chayqa, jamuspachá kay pachamanta chinkachipuwanqaku. ¿Imatan ruwanki ancha jatun sutiykirayku?”,+ nispa.

10 Jinan Jehová Diosqa Josueta nirqan: “¡Sayariy! ¿Imatan chaypi k’umurayashanki? 11 Israel runakunan juchallikunku. Kamachisqay simitan mana kasukunkuchu.+ Chinkachinapaq kaqkunamanta+ wakin cosaskunata suwakuspan+ cosasninkunawan kuskata pakashanku.+ 12 Chaymi Israel runakunaqa mana atinqakuchu enemigonkuna atipayta, aswanmi enemigonkumanta ayqekunqaku. Paykuna kikinkun kunanqa chinkachinapaq nisqa kapunku. Manachus qankuna ukhumanta chinkachinkichis chay ruwaqta chayqa,+ manan yanapasaykichischu. 13 ¡Sayariy, llaqtata ch’uyanchay!+ Paykunata nimuy, Jehová Diosmi nin: Paqarinpaqmi ch’uyanchakunkichis, qankuna ukhupin kashan mana allin ruwaq runa. Manachus payta qankunamanta chinkachinkichis chayqa, manan jayk’aqpas enemigoykichiskunata atipankichischu. 14 Paqarin tutamantanmi llapa ayllukuna jamunkichis, ajllasqay ayllun noqa Jehová Diosniykichisman asuykamuwanqa,+ chaymantataq chay ayllumanta ajllasqay familia noqa Jehová Diosniykichisman asuykamuwanqa, chaymantataq chay familiamanta ajllasqay wasi noqa Jehová Diosniykichisman asuykamuwanqa, jinamantaq chay wasipi kaqkunamanta ajllasqay runa asuykamuwanqa. 15 Chay runan llapa familiantin ninapi ruphachisqa kanqa+ noqa Jehová Diospa kamachisqayta mana kasukusqanrayku,+ Israel llaqtatapas p’enqayman churasqanrayku, nispa”.

16 Jinan Josueqa tutallamanta jatarispa Israelpi llapa ayllukunata juñumurqan. Chaypin Judá ayllu ajllasqa karqan. 17 Chaymantataq Josueqa Judá ayllupi llapa familiakunata Diosman asuykachirqan, chaypin Zéra familia+ ajllasqa karqan. Chaymantataq Zéra familiata asuykachirqan, chaypin Zafdí ajllasqa karqan. 18 Chaymantataq Zafdipa wasinpi kaqkunata asuykachirqan, chaypin Aján ajllasqa karqan. Ajanpa taytanmi karqan Carmí, Carmipa taytantaq karqan Zafdí, Zafdipa taytantaq karqan Zéra, payqa Judá ayllumantan karqan.+ 19 Chaymantan Josueqa Ajanta nirqan: “Wawalláy, Israelpa Diosnin Jehová Diosta jatunchay, paypa ñaupanpi juchaykita willakuy. ¿Imatan ruwarqanki? Llapanta willaway, ama imatapas pakawaychu”, nispa.

20 Jinan Ajanqa Josueta nirqan: “Arí, noqan Jehová Dios contra juchallikuq runaqa kashani. 21 Jericó llaqtaman jaykushaqtiykun chaypi kashasqa Sinar+ ladomanta juj munay p’acha, iskay pachaj siclota* pesaq qolqe, pisqa chunka siclota pesaq qori ima, chaykunata rikuspaymi sonqoy munapayarqan, jinan aparikurqani. Chaykunaqa karpay ukhupin p’ampasqa kashan, qolqepas qoripas p’achaq pachanpin kashan”, nispa.

22 Chayta uyarispa jinan Josueqa Ajanpa karpanman runakunata kacharqan. Chaypin tarirqanku p’achata qolqetawan pakasqata. 23 Chaykunata orqospan Josueman Israel runakunamanwan apamurqanku jinaspa Jehová Diospa ñaupanman churarqanku. 24 Jinan Josueqa llapa Israel runakunapiwan Zeraq churin Ajanta Acor wayq’oman+ aparqanku;+ apallarqankutaqmi jap’isqan munay p’achata, qolqeta, qorita,+ qhari wawankunata, warmi wawankunata, toronkunata, asnonkunata, ovejankunata, llapa kaqninkunatapas. 25 Josuetaq Ajanta nirqan: “¿Imaraykun khayna llakiman churawankiku?+ Jehová Diosmi kunan chinkachisunki”, nispa. Jinan llapa Israel runakunaqa rumiwan ch’aqespa wañuchirqanku,+ chaymantataq kanaykurqanku.+ Chhaynatan llapankuta wañuchirqanku. 26 Kanasqanku patamantaq askhata rumita montorqanku, chay rumikunaqa kunan p’unchaykaman chaypi montorayashan. Chhaynapin Jehová Diospa phiñakuyninqa thanipurqan.+ Chaykuna pasasqanwanmi chay wayq’ota kunankama sutichakun Acor* wayq’o nispa.

8 Chaymantataq Jehová Diosqa Josueta nirqan: “Ama manchakuychu ni khatatataychu.*+ Llapa soldadokunantin riy Hai llaqta contra maqanakuq. Hai llaqta reytan entregayki llaqtanta llapa jallp’ankunatawan.+ 2 Imaynan Jericó llaqtatapas reynintapas ruwarqanki chhaynata ruwamuy Hai llaqtatapas reynintapas.+ Kunanqa qankunapaqmi kanqa uywankunapas tukuy ima kaqninkunapas. Soldadokunataq Hai llaqta qhepapi pakakuchunku qonqaylla phawaykunankupaq”, nispa.

3 Chaymi Josueqa llapa soldadokunantin Hai llaqtata maqanakuq rirqan. Chaypaqmi Josueqa kinsa chunka waranqa allin soldadokunata ajllarqan, paykunatan tutapi kacharqan. 4 Kamachirqantaq: “Llaqta qhepapi pakakamuychis. Aman nishu karumanqa rinkichischu. Liston kashanaykichis pakallapi llaqtaman phawaykunaykichispaq. 5 Noqataq runakunantin llaqtaman qayllaykamusaqku. Noqaykuwan maqanakuq jamuqtinkutaq ñaupaq kutipi jina+ ayqerikusaqku. 6 Ayqerikusqaykuta rikuspaqa qhepaykutapunin phawamunqaku: ¡Qayninpa jinan ayqekushanku!,+ nispanku. Chhaynapin llaqtankumanta karuman pusasaqku. 7 Jinan qankunaqa pakakusqaykichismanta lloqsimuspa llaqtaman phawaykunkichis. Chhaynapin Jehová Diosqa chay llaqtata qankunaman qopusunkichis. 8 Llaqta ukhuman jaykuspaykichis jinataq ninawan kanaykunkichis.+ Jehová Diospa nisqanman jinan lliutapas ruwankichis. Chaytan kamachishaykichis”, nispa.

9 Jinan Josueqa paykunata kacharqan Hai llaqtaq inti jaykuy ladonpi pakakamunankupaq, Betel llaqtawan Hai llaqtawan tupaypi. Josuetaq wakin soldadokunawan* chay tuta qhepakurqan.

10 Qhepantin p’unchaytaq Josueqa tutallamanta jatarispa llapa soldadokunata juñurqan, jinaspa Israelpi umalliqkunapiwan* chay soldadokunata Hai llaqtaman pusarqanku. 11 Hai llaqtaq chimpanman chayaspataq chaypi sayaykurqanku, chaypitaq karpakurqanku. Paykunatawan+ Hai llaqtatawanqa juj wayq’ollan t’aqasharqan. 12 Llaqtaman pakallapi phawaykunankupaq pakakuq soldadokunaqa pisqa waranqan karqanku.+ Paykunaqa Hai llaqtaq inti jaykuy ladonpin pakakurqanku, Betel+ llaqtawan Hai llaqtawan tupaypi. 13 Chhaynatan Israel soldadokunaqa Hai llaqtaq wichay ladonpi+ karpakurqanku, wakintaq Hai llaqtaq inti jaykuy ladonpi+ pakakurqanku. Chay tutan Josueqa paywan kashaq soldadokunapiwan wayq’okama jaykurqanku.

14 Chayta rikuspan Hai llaqta reyqa soldadokunantin tutallamanta lloqsimurqan Israel runakunawan maqanakuq. Ichaqa manan yacharqanchu llaqtaq qhepanpi wakin Israel soldadokuna pakakushasqanta. 15 Hai soldadokuna phawaykamuqtintaq Josueqa llapa soldadokunantin ch’inneq ladoman riq ñanninta+ ayqekurqanku. 16 Chaymi llapa qharikunata wajarqanku Israel soldadokunata qatipanankupaq. Jinan Hai runakunaqa Josuepa qhepanta phawaspa llaqtankumanta karunchakurqanku. 17 Manan ni juj qharipas Hai llaqtapipas ni Betel llaqtapipas qhepakurqanchu, llapankun Israel runakunaq qhepanta phawarqanku, llaqta punkukunatataq kicharayashaqta saqerparirqanku.

18 Chaymantataq Jehová Diosqa Josueta nirqan: “Jap’isqayki lanzata Hai llaqta ladoman jaywariy,+ makiykimanmi chay llaqtata qopusayki”,+ nispa. Jinan Josueqa jap’isqan lanzata Hai llaqta ladoman jaywarirqan. 19 Makinta jaywariqtin jinataq llaqta qhepapi pakakuq soldadokunaqa Hai llaqtaman phawaykurqanku, jinaspa llaqtata kanaykurqanku.+

20 Hai soldadokuna llaqtankuta qhawariqtinkutaq, llaqtankumanta cielokamaraq q’osñi lloqsishasqa, chayta rikuspan paykunaqa mana maymanpas ayqekuyta atirqankuchu. Jinan ayqekuq Israel soldadokunaqa paykuna ladomanñataq kutirimurqanku. 21 Hai llaqtamanta q’osñi lloqsimuqta rikuspan Josueqa soldadokunantin Hai runakunawan maqanakuq kutirimurqanku. 22 Llaqtata kanaykuq soldadokunataq chay llaqtamanta lloqsimurqanku Hai soldadokunawan maqanakuq. Jinan Hai soldadokunaqa Israel soldadokuna chaupipi rikukurqanku. Llapankutan chaypi wañuchirqanku, manan jujllapas ayqekurqanchu.+ 23 Hai llaqta reytan ichaqa mana wañuchirqankuchu,+ kausashaqllatan Josueman aparqanku.

24 Llapa Hai soldadokunata wañuchispataq Israel soldadokunaqa llaqtaman kutirqanku, chaypin wañuchillarqankutaq llapa qhepakuqkunata. 25 Israel soldadokunaqa chay p’unchayllan llapa Hai runakunata wañuchirqanku warmitapas qharitapas. Llapankupiqa chunka iskayniyoq waranqa runakunan wañurqanku. 26 Josueqa llapa Hai runakunata wañuchinankukaman+ jap’isqan lanzata+ llaqta ladoman jaywashallarqan. 27 Llapa uywakunata cosaskunata iman ichaqa Israel runakuna jap’ikapurqanku Jehová Diospa kamachisqanman jina.+

28 Chaymantataq Josueqa Hai llaqtata kanapurqan, chaymi kunankama rumi montonllaña+ kapushan. 29 Hai reypa cuerpontataq k’aspipi* warkurqan. Inti chinkaykushaqtintaq Josueqa kamachirqan chay cuerpota k’aspimanta+ uraykachinankupaq. Chaymantataq llaqta punkuman wijch’urqanku, chay patamantaq askha rumita montorqanku. Chaykunaqa kunan p’unchaykaman chaypi kashan.

30 Chay qhepatan Josueqa Israelpa Diosnin Jehová Diospaq juj altarta perqapurqan Ebal+ orqopi. 31 Chaytan ruwarqan Jehová Diospa kamachin Moisespa chaskisqan kamachikuyman jina,+ chaypin nirqan: “Altarta perqaspaqa entero rumikunawanmi perqanki aman fierrowan thupasqa rumikunawanchu”,+ nispa. Chay patapin Jehová Diosman jaywarqanku ruphachina ofrendata; jaywallarqankutaqmi sumaq kausay sacrificiokunatapas.+

32 Chaymantataq Josueqa Moisespa chaskisqan kamachikuykunata rumikunapi copiarqan,+ chay kamachikuykunatan Moisesqa qelqarqan Israel runakunaq ñaupanpi.+ 33 Llapa Israel runakunapas, waj llaqtayoqkunapas,+ umalliqkunapas, oficialkunapas, juezkunapas llapallankun Jehová Diospa rimanakuynin arcaq ñaupanpi sayasharqanku, Diospa rimanakuynin arca apaq Leví sacerdotekunataq chaupinkupi kasharqanku. Israel runakunaqa iskayman t’aqasqan karqanku bendecisqa kanankupaq. Juj t’aqan Guerizin orqo ladopi kasharqan, juj t’aqataq Ebal+ orqo ladopi, Jehová Diospa kamachin Moisespa kamachisqanman jina.+ 34 Chaypin Josueqa alto kunkawan llapa kamachikuy simikunata+ leerqan. Llapantan leerqan bendeciy simikunatapas+ ñakay simikunatapas.+ 35 Llapantapunin Josueqa Moisespa chaskisqan kamachikuy simita leerqan Israelpi llapa qharikunaman,+ warmikunaman, wawakunaman, paykunawan tiyaq* waj llaqtayoqkunamanpas.+

9 Israel runakunaq imachus ruwasqantan yacharqanku Jordán mayuq inti jaykuy ladon+ orqo-orqokunapi tiyaqkuna, Sefelá ladopi tiyaqkuna, Jatun lamar-qocha* ladopi tiyaqkuna,+ Líbano orqokunapi tiyaqkuna. Jinan Het runakunaq, amorreo runakunaq, Canaán runakunaq, perizita runakunaq, heveo runakunaq, Jebús runakunaq+ reyninkunaqa 2 rimanakurqanku llapallanku juj nisqalla Josuewan Israel runakunapiwan maqanakunankupaq.+

3 Gabaón+ runakunapas yachallarqankutaqmi Jericó+ llaqtata Hai+ llaqtatapas Josuepa imachus ruwasqanta. 4 Jinan paykunaqa Israel runakunata engañanankupaq thanta sacokunaman mijunankuta churarqanku, chaytataq asnonkuman cargarqanku, vinotapas thanta qara p’uyñukunamanmi* churarqanku. 5 Chaymantapas thanta p’achakunawan, thanta usut’akunawan iman churakurqanku. Mijunankupaqpas ch’aki t’antakunatan apakurqanku. 6 Guilgalpi+ Israel runakunaq karpakusqankuman chayaspataq, Josueta Israelpi umalli runakunatawan nirqanku: “Karu llaqtamantan jamushayku qankunawan rimanakuq”, nispa. 7 Jinan Israelpi umalli runakunaqa chay heveo runakunata*+ nirqanku: “Kay cercallapipaschá qankunaqa tiyashankichis, ¿imaynapitaq qankunawanri rimanakuykuman?”,+ nispa. 8 Chay runakunataq Josueta nirqanku: “Noqaykuqa kamachiykikunan kayku”, nispa.

Chayta uyarispan Josueqa nirqan: “¿Pikunataq qankunari kankichis? ¿Maymantataq jamushankichisri?”, nispa. 9 Jinan paykunaqa nirqanku: “Kay kamachiykikunaqa karu llaqtamantaraqmi jamushayku+ Jehová Diosniykichis tukuy imachus ruwasqanta uyarispayku. Allintan yachayku Egipto llaqtapi imatachus ruwasqanta.+ 10 Yachallaykutaqmi Jordán mayu chimpapi amorreo runakunaq iskaynin reyninkunata wañuchisqantapas; imaynata Esbón llaqtapi Sehón reyta+ wañuchisqanta, Astarojpi tiyaq Basán runakunaq reynin Ogta+ wañuchisqantapas. 11 Chaymi llaqtaykupi umalliqkuna* llapa llaqtamasiyku ima kachamushawanku: Qoqawata aparikuspa riychis, paykunaq kamachinkuna+ kananchispaq rimanakamuychis,+ nispa. 12 Kay t’antaykuqa llaqtaykumanta lloqsimushaqtiykuqa q’oñillaraqmi kasharqan. Qhawariychis, kunantaq ch’akillaña kashan, khakurikapushanña.+ 13 Vino qara p’uyñuykupas mosoqllan karqan, kunantaq ichaqa t’oqo-t’oqollaña kashan.+ P’achaykupas usut’aykupas khaynaniraq karuta purimusqaykuwanmi thantallaña kashan”, nispa.

14 Jinan Israel runakunaqa chay runakunaq apamusqankuta qhawarqanku, ichaqa manan Jehová Diosta tapurqankuchu.+ 15 Jinan Josueqa paykunawan rimanakurqan+ paykunata ama wañuchinankupaq. Chay rimanakusqankuta junt’anankupaqtaq Israelpi umallikunaqa juramentota ruwarqanku.+

16 Rimanakusqankumanta kinsa p’unchay qhepallamantaq Israel runakunaqa yacharqanku chay runakunaqa paykuna cercallapi tiyasqankuta. 17 Chayta yacharuspan Israel runakunaqa chay runakunaq llaqtanta rirqanku, kinsa p’unchayllapin chayarqanku. Chay runakunaq llaqtanqa kasqa Gabaón,+ Kefirá, Beroj, Quiryaj-Jearin+ iman. 18 Israel runakunan ichaqa mana paykunawan maqanakurqankuchu, Israelpi umallikuna Jehová Diospa sutinpi Gabaón runakunawan rimanakusqankurayku.+ Jinan llapa Israel runakunaqa umallikuna contra rimayta qallarirqanku. 19 Chaymi umallikunaqa paykunata nirqanku: “Jehová Diospa sutinpin jurarqayku paykunata ama wañuchinanchispaq, chayraykun paykunataqa mana imanaytapas atisunmanchu. 20 Jinalla kausachunku, mana chayqa Diosninchismi noqanchis contra phiñakunman jurasqanchista mana junt’asqanchisrayku”,+ nispa. 21 Umallikunaqa nillarqankutaqmi: “Jinalla kausachunku, ama wañuchisunchu. Paykuna kachunku Israel llaqtapaq unu orqoqkuna llant’a pallaqkuna”, nispa. Chaytan umallikunaqa prometerqanku llapa Israel runakunaman.

22 Josuetaq chay runakunata wajamuspa nirqan: “¿Imaraykun niwarqankiku: Karu llaqtamantaraqmi kayku, nispa, kay cercallapi tiyashaspaykichis?+ 23 Kunanmantaqa ñakasqan kankichis,+ wiñaypaqtaqmi kamachilla kankichis. Diosniypa wasinpaqmi llant’ata pallamunkichis unutapas apamunkichis”, nispa. 24 Chay runakunataq Josueta nirqanku: “Kay kamachiykikunaqa allintan yachayku Jehová Diosniyki imatachus Moisesman nisqanta, paymi nisqa: Chay llaqtakunata jap’ikapunaykichispaqqa chaypi tiyaq runakunatan llapanta wañuchinkichis,+ nispa. Chaymi noqaykuqa wañuchiwanaykikuta manchakuspa+ qankunawan rimanakuq jamurqayku.+ 25 Kunanqa makiykipin kashayku, imachus munasqaykita noqaykuwan ruway”, nispa. 26 Paykunaq mañakusqankuman jinan Josueqa ruwarqan, manan dejarqanchu Israel runakuna paykunata wañuchinanta. 27 Chay p’unchaymi Josueqa paykunata churarqan llant’a pallaqta unu apamuqtawan.+ Chaytan ruwananku karqan Jehová Diospa llaqtanpaq altarninpaqwan.+ Kunan p’unchaykaman paykunaqa chayta ruwashanku.+

10 Jerusalén llaqtaq reynin Adoni-Zedecmi yacharusqa Josueqa Jericó llaqta runakunata reyninta+ jina Hai runakunatapas reynintapas+ wañuchisqanta, Gabaón runakunapas ama wañuchisqa kanankupaq Israel runakunawan rimanakusqantawan.+ 2 Chaywanmi chay reyqa sinchita mancharikurqan.+ Astawanqa mancharikurqan Gabaón llaqta jatun llaqta kashaspa Israel runakunawan rimanakusqanta yachaspan. Gabaón llaqtaqa Hai llaqtamantapas aswan jatunmi karqan,+ runankunapas llapankun allin maqanakuqkuna karqanku. 3 Chaymi Jerusalén llaqtaq reynin Adoni-Zedecqa Hebrón+ llaqta rey Ojanman, Jarmuj llaqta rey Piranman, Lakís llaqta rey Jafiaman, Eglón llaqta rey+ Debirmanwan willakuyta apachirqan: 4 “Jamuychis Gabaón llaqtawan maqanakusun, paykunan rimanakusqaku Josuewan Israel runakunapiwan”,+ nispa. 5 Jinan chay pisqantin amorreo reykunaqa+ juñukurqanku. Chay reykunan karqanku Jerusalén llaqtamanta, Hebrón llaqtamanta, Jarmuj llaqtamanta, Lakís llaqtamanta, Eglón llaqtamantawan. Sapankankun juñukurqanku soldadontinkama, jinaspa Gabaón llaqta qayllapi karpakurqanku paykunawan maqanakunankupaq.

6 Chayta rikuspan Gabaón runakunaqa Josueman willachimurqanku, Josueqa Guilgal+ karpa-karpapin kasharqan, khaynatan nirqanku: “Amorreo reykunan noqayku contra jatarishanku. ¡Jamuy yanapariwayku! ¡Librawayku kay runakunamanta! Amayá qonqawankikuchu kay kamachiykikunataqa”,+ nispa. 7 Jinan Josueqa Guilgalmanta llapa soldadokunantin allin maqanakuq soldadokunantin+ ima rirqanku.

8 Jehová Diostaq Josueta nirqan: “Ama manchakuychu+ qanmanmi llapankuta entregayki,+ manan mayqenpas qanwan maqanakuyta atinqachu”,+ nispa. 9 Guilgalmantapacha tutantin purispan Josueqa qonqaylla amorreo runakunata jap’irqan. 10 Jehová Diosmi amorreo runakunata Israel runakunaq ñaupanpi sinchita mancharichirqan.+ Jinan Israel runakunaqa llapankuta wañuchiyta qallarirqanku. Ayqekuqkunatapas Bej-Oronman wichaq ñankunapi imaraqmi wañuchirqanku. Wakintaqa Azecá llaqtakama Maquedá llaqtakama imaraqmi qatiykurqanku. 11 Bej-Oronmanta uraykuq ñanta amorreo runakuna ayqekushaqtinkun Jehová Diosqa rumi sayaykunataraq chijchita chijchichimurqan, Azecá llaqtakamaraqmi chijchichimurqan. Israel runakunaq wañuchisqanmantapas aswan askhataraqmi chijchiqa amorreo runakunata wañuchirqan.

12 Chhaynatan Jehová Diosqa Israel runakunaq rikushasqan amorreo runakunata wañuchirqan. Chay p’unchaymi Josueqa Jehová Diosta rimapayarqan, jinaspa Israel runakunaq ñaupanpi nirqan:

“¡Inti, Gabaón+ llaqtallapi sayay!+

¡Killa, Ayalón wayq’ollapi sayay!”, nispa.

13 Jinan intiqa mana kuyurispa kaqllapi sayarqan, killapas manan kuyurirqanchu Israel runakuna enemigonkuta atipanankukama. Intiqa juj p’unchay jinan mana kuyurispa cielo chaupipi kaqllapi sayarqan. ¿Manachu chaykunaqa Jasar libropi+ qelqasqa kashan? 14 Manan chay p’unchay jinaqa jayk’aqpas karqanchu, manan ni ñaupaqpas ni qhepamanpas Jehová Diosqa juj runaq kunkanta chhaynata uyarirqanchu.+ Jehová Diosqa llaqtanraykun maqanakusharqan.+

15 Chaykuna qhepamanmi Josueqa llapa soldadokunantin Guilgalpi karpakusqankuman kutipurqan.+

16 Pisqantin reykunan ichaqa Maquedá+ llaqtapi juj t’oqopi pakakurqanku. 17 Jinan Josueman willarqanku: “Pisqantin reykunan Maquedá+ llaqtapi juj t’oqopi pakakushanku”, nispa. 18 Josuetaq paykunata nirqan: “Jatun rumikunawan chay t’oqoq punkunta wisq’aychis, chaymantaq churaychis cuidaqkunata. 19 Wakinniykichis ichaqa qatipashallaychis enemigoykichista, jap’ispataq wañuchiychis.+ Aman dejankichischu llaqtanku ukhuman jaykunankutaqa. Jehová Diosniykichismi paykunataqa makiykichisman entregashasunkichis”, nispa.

20 Josuewan Israel runakunapiwanqa llapa amorreo runakunatan wañuchirqanku, allin perqasqa llaqtakuna ukhuman ayqekuqkunallatan manaqa wañuchirqankuchu. 21 Chaymantan ichaqa llapa Israel runakuna allillan Josuepa kasqanman kutimpurqanku, Maquedapi karpakusqankuman. Manan mayqen amorreo runapas Israel runakunaq contranpiqa rimarqanchu. 22 Chaymantataq Josueqa nirqan: “Chay t’oqota kichaspa apamuwaychis chay pisqantin reykunata”, nispa. 23 Jinan chay pisqantin reykunata orqomuspa Josueman apamurqanku; Jerusalén llaqta reyta, Hebrón llaqta reyta, Jarmuj llaqta reyta, Lakís llaqta reyta, Eglón llaqta reytawan.+ 24 Chay reykunata apamuqtinkutaq Josueqa llapa Israel runakunata juñurqan, jinaspa paywan riq umalli soldadokunata nirqan: “¡Jamuychis, kay reykunata much’unpi saruychis!”, nispa. Jinan chay soldadokunaqa asuykuspa chay reykunata much’unpi sarurqanku.+ 25 Paykunatan Josueqa nirqan: “Khaynatan Jehová Diosniykichisqa llapa enemigoykichiskunata ruwanqa,+ chayrayku ama manchakuychischu nitaq khatatataychischu.*+ Kallpachakuychis, ama manchakuychischu”, nispa.

26 Chaymantataq Josueqa chay runakunata wañuchirqan, jinaspa sapankata juj k’aspipi* warkurqan inti jaykuy horaskama. 27 Inti jaykuy horastataq Josueqa runakunata kamachirqan chay reykunaq cuerponta k’aspimanta+ uraykachimuspa pakakusqanku t’oqoman wijch’uykunankupaq. Chaymantataq chay t’oqota jatun rumikunawan wisq’arqanku. Chhaynan kunan p’unchaykama kashan.

28 Chay p’unchayllataqmi Josueqa Maquedá+ llaqtamanpas jaykurqan jinaspa llapa runakunata wañuchirqan. Reyninkutapas wañuchirqanmi, manan jujpas ayqerqanchu.+ Maquedá llaqta reytaqa+ Jericó llaqta reyta jinan ruwarqan.

29 Chaymantataq Josueqa llapa soldadokunantin Maquedá llaqtamanta Lifná+ llaqtaman rirqan paykunawan maqanakuq. 30 Chay llaqtatapas reynintintan+ Jehová Diosqa Israel runakunaq makinman entregarqan. Jinan Israel runakunaqa llapankuta wañuchirqanku, manan jujpas kausarqanchu. Lifná llaqta reytapas Jericó llaqta reyta+ jinan ruwarqanku.

31 Chaymantataq Josueqa llapa soldadokunantin Lifná llaqtamanta Lakís llaqtaman+ rirqan. Chaypi karpakuspataq paykunawan maqanakurqanku. 32 Jehová Diosqa Lakís llaqtatapas Israel runakunaq makinmanmi entregarqan. Jinan Israel runakunaqa iskay kaq p’unchaypi chay llaqtaman jaykurqanku, jinaspa llapa runakunata espadawan wañuchirqanku.+ Lifná llaqtata jinan ruwarqanku.

33 Guézer llaqtaq reynin+ Oranmi Lakís llaqtata yanapaq jamurqan. Paytapas llapa llaqtantintan Josueqa chinkachipurqan, manan jujllapas kausarqanchu.

34 Chaymantataq Josueqa llapa soldadokunantin Lakís llaqtamanta Eglón+ llaqtaman rirqan. Chaypi karpakuspataq paykunawan maqanakurqanku. 35 Chay p’unchaymi paykunaqa Eglón llaqtaman jaykurqanku, jinaspa llapa runakunata wañuchirqanku; lliutan ch’usaqman tukuchirqanku. Lakís+ llaqtata jinan ruwarqanku.

36 Chaymantataq Josueqa llapa soldadokunantin Eglón llaqtamanta Hebrón+ llaqtaman wicharqan paykunawan maqanakuq. 37 Chay llaqtaman jaykuspataq llapa runakunata reyninkuta ima wañuchirqanku. Juch’uy llaqtakunapi tiyaqkunatapas lliutan wañuchirqanku, manan jujpas kausarqanchu. Eglón llaqtata jinan chay llaqtatapas ruwarqanku.

38 Chaymantataq Josueqa llapa soldadokunantin Debir+ llaqtaman rirqan paykunawan maqanakuq. 39 Chay llaqtaman jaykuspataq llapa runakunata reyninkuta ima wañuchirqanku.+ Juch’uy llaqtakunapi tiyaqkunatapas espadawanmi lliuta wañuchirqanku, manan jujpas kausarqanchu.+ Imaynan Hebrón llaqtatapas Lifná llaqtatapas reynintapas ruwarqanku, chhaynatan Debir llaqtatapas reynintapas ruwarqanku.

40 Chhaynatan Josueqa lliu orqo-orqokunata, Négueb ladota, Sefelá ladota,+ qhatakunata ima lliuta jap’ikapurqan. Chay ladokunapi reykunataqa llapa llaqtakunantintan wañuchipurqan, manan jujpas kausarqanchu.+ Israelpa Diosnin Jehová Diospa kamachisqanman jinan+ Josueqa lliuta wañuchirqan. 41 Josueqa lliutan jap’ikapurqan Cadés-Barnea+ ladomanta Gaza+ ladokama, Gosén+ ladokunatapas lliutan jap’ikapurqan Gabaón+ llaqtakama. 42 Josueqa chay ladokunapi llapa reykunatan wañuchirqan jallp’ankutapas jap’ikapurqan. Israel runakunaq Diosnin Jehová Diospa yanapayninwanmi chaykunata ruwarqan.+ 43 Chaymantataq Josueqa llapa soldadokunantin Guilgalpi+ karpakusqankuman kutimpurqan.

11 Chaykunata uyarispan Azor llaqta rey Jabinqa willakuyta apachirqan Madón+ llaqta rey Jobafman, Acsaf+ llaqta reyman, Sinrón llaqta reyman, 2 jinallataq wichay lado orqo-orqokunapi reykunaman, Kineretpa uran pampakunapi* reykunaman, Sefelá ladopi reykunaman, Dor+ qhatakunapi inti jaykuy ladopi reykunaman, 3 llapa Canaán runakunaman,+ amorreo runakunaman,+ Het runakunaman, perizita runakunaman, orqo-orqopi tiyaq Jebús runakunaman, Hermón+ orqoq uran Mizpá pampapi tiyaq heveo runakunamanwan.+ 4 Jinan chay reykunaqa llapa ejercitontin lloqsimurqanku, paykunaqa askhallañan karqanku, lamar-qocha patapi aqo jinaraq. Caballonkupas carretankupas askhapunin karqan. 5 Llapa chay reykunan rimanakurqanku juñunakunankupaq, jinan juñukurqanku Meron pujyu-pujyupi, chhaynapi Israel runakunawan maqanakunankupaq.

6 Jehová Diosmi Josueta nirqan: “Ama paykunataqa manchakuychu,+ paqarinmi kay horasta jina llapa chay runakunata wañusqata Israel runakunaman entregasaq. Caballonkunaq jank’unkunatan kuchunki,+ carretankunatapas ninawanmi kanapunki”, nispa. 7 Jinan Josueqa llapa soldadokunantin qonqaylla phawaykurqanku Meron pujyu-pujyupi kashaq runakunaman. 8 Jehová Diosqa llapankutan Israel runakunaq makinman entregarqan.+ Jinan Israel runakunaqa wañuchiyta qallarirqanku, wakintaqa Sidonkaman+ qatiykurqanku, wakintataq Misrefoj-Main+ pampakama, jujkunatataq inti lloqsimuy ladopi Mizpé wayq’okama. Chhaynapin llapankuta wañuchirqanku, manan jujpas kausarqanchu.+ 9 Josueqa Jehová Diospa kamachisqanman jinan ruwarqan. Caballonkunaq jank’unkunatan kuchurqan carretankutapas lliutan ninawan kanaykurqan.+

10 Chaymantataq Josueqa kutimuspa Azor llaqtaman jaykurqan, chaypin Azor llaqta reyta wañuchirqan.+ Azor llaqtaqa llapa chay llaqtakunamanta aswan jatunmi karqan. 11 Chay llaqtapi runakunatapas llapantan espadawan wañuchirqan,+ manan jujpas kausarqanñachu.+ Chaymantataq chay llaqtata ninawan kanaykurqan. 12 Josueqa llapa chay llaqtakunapi runakunatan espadawan wañuchirqan,+ reyninkutapas llapantan wañuchirqan.+ Jehová Diospa kamachin Moisespa nisqanman jinan lliuta wañuchirqan. 13 Ichaqa manan moqo patakunapi kaq mayqen llaqtatapas ninawanqa kanarqanchu, Azor llaqtallatan kanarqan. 14 Israel runakunaqa chay llaqtakunapi llapa runakunatan wañuchirqanku,+ manan jujllatapas kausashaqtaqa saqerqankuchu.+ Uywankunata kaqninkunata iman ichaqa llapanta jap’ikapurqanku.+ 15 Jehová Diospa llapa kamachisqantan Moisesqa Josueman kamachirqan,+ Josuetaq Moisespa kamachisqanman jinapuni ruwarqan. Josueqa imatachus Jehová Dios Moisesman kamachirqan chayman jinapunin llapanta ruwarqan.+

16 Chhaynatan Josueqa llapa jallp’akunata jap’ikapurqan. Orqo-orqo wichaykunata, Négueb+ ladokunata, Gosén ladokunata, Sefelá+ ladokunata, Arabá+ wayq’okunata, llapa Israel orqo-orqokunata moqokunantinta. 17 Seír cercapi kaq Alac orqomanta Hermón+ orqoq uranpi Líbano wayq’opi Baal-Gad+ llaqtakama. Chay jallp’akunapi tiyaq reykunataqa lliutan jap’ispa wañuchipurqanku. 18 Josueqa unaymi chay reykunawan guerrapi karqan. 19 Manan mayqen llaqtapas Israel runakunawanqa rimanakurqanchu thajpi kausanankupaqqa, Gabaón+ llaqtapi tiyaq heveo runakunallan rimanakurqanku. Wakin llaqta runakunatan ichaqa lliuta wañuchipurqanku.+ 20 Jehová Diosmi chay runakunaq sonqontaqa rumiyachirqan+ Israel runakunawan maqanakunankupaq, chhaynapi chinkachisqa kanankupaq. Chaymi Israel runakunaqa Jehová Dios Moisesta kamachisqanman jina+ mana khuyapayaspa+ paykunata wañuchirqanku.

21 Chay tiempopin Josueqa llapa Anac runakunata+ wañuchirqan; paykunan tiyarqanku Hebrón llaqtapi, Debir llaqtapi, Anaf llaqtapi, Judá orqo-orqokunapi, Israel orqo-orqokunapi ima. Llapantan chay runakunataqa chinkachirqan, jinallataq llaqtankutapas.+ 22 Manan Israel llaqtapiqa jujpas qheparqanchu Anac runakunaqa; Gaza+ llaqtapi, Gaj+ llaqtapi, Asdoj+ llaqtapi imallan qheparqanku.+ 23 Chhaynatan Josueqa llapa chay jallp’akunata jap’ikapurqan Jehová Diospa prometesqanman jina.+ Chaymantataq Josueqa Israel runakunaman rakirqan jayk’a aylluchus kasqankuman jina.+ Chay qhepamanqa samarqankun guerrakunamanta.+

12 Israel runakunan Jordán mayu inti lloqsimuy ladopi kaq llapa jallp’akunata jap’ikapurqanku, Arnón wayq’omanta+ Hermón orqokama,+ llapa Arabá wayq’okunantinta.+ Chay jallp’akunatan qechurqanku amorreo runakunaq reyninkunamanta. 2 Juj kaq reymi karqan Sehón,+ payqa Esbón llaqtapin tiyarqan. Paymi gobiernarqan Aroer+ llaqta qayllapi Arnón wayq’omanta,+ Anmón runakunaq jallp’ankuwan tupaypi Jaboc wayq’okama, chayqa karqan Galaad jallp’aq kuskanninmi. 3 Jordán mayuq inti lloqsimuy ladonpi Arabá wayq’otapas paymi gobiernarqan, Kinéret qochamanta*+ Arabá qochakama, Kachi qochakama.* Llapa Bej-Jesimoj pampakunata Pisgá+ orqoq urankunakama.

4 Juj kaq reytaq karqan Basán ladota gobiernaq Og.+ Paymi karqan refaín runakunamanta puchuq,+ tiyarqantaq Astaroj llaqtapi Edréi llaqtapi ima. 5 Paymi gobiernarqan Hermón orqomanta Salecá llaqtakama, llapa Basán+ jallp’atawan Guesur runakunaq Macaj runakunaq+ jallp’ankuwan tupaykama. Chaymantapas kuskan Galaadtawanmi gobiernarqan Esbonmanta+ Sehón reypa gobiernasqanwan tupaykama.

6 Chay reykunataqa Jehová Diospa kamachin Moiseswan Israel runakunapiwanmi chinkachirqanku.+ Chaymantataq Jehová Diospa kamachin Moisesqa chay jallp’akunata rakipurqan Rubén aylluman, Gad aylluman, kuskan Manasés ayllumanwan.+

7 Jordán mayuq inti jaykuy ladonpi kaq reykunatataq Josuewan Israel runakunapiwan chinkachirqanku, jinaspa jallp’ankuta qechupurqanku Líbano+ wayq’opi Baal-Gad+ llaqtamanta Seír+ cercapi kaq Alac orqokama.+ Chaymantataq Josueqa chay jallp’akunata rakipurqan Israelpi llapa ayllukunaman.+ 8 Chaykunan kashan orqo-orqo wichaykuna, Sefelá ladokuna, Arabá wayq’okuna, qhatakuna, ch’in pampakuna, Négueb+ uraykuna ima. Chaykunaqa karqan Het runakunaq, amorreo runakunaq,+ Canaán runakunaq, perizita runakunaq, heveo runakunaq, Jebús runakunaq+ jallp’ankunan. Chay runakunaq reyninkunan karqan:

13 Josueqa sinchi kuraqñan kasharqan,+ jinan Jehová Diosqa nirqan: “Sinchi kuraqñan kapunki. Askharaqmi jallp’aqa kashan qankuna jap’ikapunaykichispaq. 2 Chay jallp’akunan kashan+ Filistea runakunaq jallp’ankuna, Guesur runakunaq jallp’ankuna,+ 3 Egiptoq inti lloqsimuy ladonpi Sior mayumanta Canaán runakunaq tiyasqan+ Ecrón llaqtawan tupaykama. Pisqantin Filistea reykunaq llaqtankuna:+ Gaza, Asdoj,+ Asquelón,+ Gaj,+ Ecronpiwan.+ Uray ladoman avin runakunaq+ llaqtankuna, 4 Canaán runakunaq llaqtankuna, Sidón runakunaq+ tiyasqan Meará llaqtamanta amorreo runakunaq llaqtanwan tupaypi Afec llaqtakama. 5 Guebal runakunaq+ jallp’ankuna, llapa Líbano wichaypiwan, Hermón orqoq uranpi kaq Baal-Gad llaqtamanta Lebó-Amajkama.*+ 6 Líbano+ orqo-orqo wichaymanta Misrefoj-Main+ llaqtakama, llapa Sidón runakunaq+ jallp’ankunapiwan. Paykunatan noqaqa Israel runakunaq ñaupanmanta chinkachisaq.+ Qan ichaqa kamachisqayman jina chay jallp’akunata llapa Israel runakunaman rakiy.+ 7 Llapantan rakinki isqonnintin ayllukunaman kuskan Manasés ayllumanwan, chaymi paykunaq herencianku kanqa”,+ nispa.

8 Rubén aylluwan, Gad aylluwan, kuskan Manasés aylluwanqa Jordán mayu inti lloqsimuy ladopin herenciankuta chaskirqanku. Jehová Diospa kamachin Moisesmi paykunamanqa chay herenciata qorqan.+ 9 Chaymi karqan Arnón wayq’opi+ llaqtamanta, llapa Aroer+ llaqtakunantin, Medebá pampakunantin, Dibón llaqtakunantin. 10 Esbón llaqtapi gobiernaq amorreo runakunaq reynin Sehonpa llapa gobiernasqan llaqtakuna, Anmón runakunaq jallp’anwan tupaykama.+ 11 Galaad jallp’akuna, Guesur runakunaq Macaj runakunaq jallp’ankuna,+ llapa Basán jallp’akuna,+ Hermón orqomanta Salecá llaqtakama;+ 12 Basanpi gobiernaq Og reypa llapa gobiernasqan jallp’akunapiwan. Paymi refaín runakunamanta puchuq karqan,+ tiyarqantaq Astaroj llaqtapi Edréi llaqtapiwan. Llapa chay llaqtakunapi tiyaqkunatan Moisesqa chinkachirqan.+ 13 Guesur runakunatawan Macaj runakunatawanmi ichaqa mana chinkachirqankuchu,+ paykunaqa kunan p’unchaykaman Israel runakuna ukhupi tiyashanku.

14 Leví ayllumanqa manan ima herenciatapas Moisesqa qorqanchu.+ Paykunaq herenciankuqa Jehová Diosman jaywasqa ofrendakunan karqan,+ chaytan Dios kikin paykunaman prometerqan.+

15 Chaymantataq Moisesqa jayk’a familiachus kasqankuman jina Rubén aylluman herenciata qorqan. 16 Paykunaq jallp’ankun karqan Aroer llaqta qayllapi Arnón wayq’omanta, chay wayq’opi llaqtantin llapa Medebá pampakunantin. 17 Chaymantapas Esbón llaqta, chay qayllapi llapa juch’uy llaqtakuna,+ Dibón llaqta, Bamoj-Baal llaqta, Bej-Baal-Meón+ llaqta, 18 Jáz+ llaqta, Quedemoj+ llaqta, Mefaj+ llaqta, 19 Quiryatain llaqta, Sifmá+ llaqta, wayq’o moqo patapi kaq Zérej-Sájar llaqta, 20 Bej-Peor llaqta, Pisgá orqo qhatakuna,+ Bej-Jesimoj+ llaqta ima. 21 Llapa chay pampakunapi llaqtakunatan chaskirqanku, Esbón+ llaqtapi gobiernaq rey Sehonpa gobiernasqan llaqtakunatawan. Moisesmi atiparqan Sehón reyta,+ kamachinpi kaq llapa Madián reykunatawan, chay reykunan karqanku: Eví, Réquen, Zur, Hur, Reba ima.+ 22 Chaypin Israel runakunaqa espadawan wañuchirqanku Beorpa churin watuq Balaamtapas.+ 23 Rubén aylluq chaskisqan herenciaqa karqan Jordán mayumantapachan, llapa jatun llaqtakunantin juch’uy llaqtakunantin ima. Chay jallp’akunatan paykunaqa chaskirqanku jayk’a familiachus kasqankuman jina.

24 Chaymantapas Moisesqa Gad ayllumanwanmi herenciata qorqan jayk’a familiachus kasqankuman jina. 25 Paykunaq jallp’ankun karqan llapa Galaad jallp’a, chaypi kaq llaqtakunantin, Jazer+ llaqtantin, Anmón runakunaq+ kuskan jallp’an ima. Jallp’ankuqa karqan Rabá+ llaqtaq chimpanpi Aroer llaqtakaman. 26 Esbón+ llaqtamanta Ramaj-Mizpé llaqtakama, Betonin llaqtantin; Manain+ llaqtamanta Debir llaqtakama. 27 Wayq’opi kaq llapa llaqtakunantin; Bej-Haram llaqta, Bej-Ninrá+ llaqta, Sucoj+ llaqta, Zafón llaqta, Esbón+ llaqtapi kamachikuq Sehón reypa gobiernasqan llapa jallp’antin. Jallp’ankuqa karqan Jordán mayuq inti lloqsimuy ladonmanmi Kinéret qochakama.*+ 28 Llapa chay llaqtakunan karqan Gad aylluq herencianqa, paykunan chaskirqanku jayk’a familiachus kasqankuman jina.

29 Chaymantapas kuskan Manasés ayllumanmi Moisesqa herenciankuta qorqan jayk’a familiachus kasqankuman jina.+ 30 Paykunaq jallp’ankun karqan Manain+ llaqtamanta, Og reypa gobiernasqan llapa Basán jallp’akunantin, Basanpi tiyaq Jaír runakunaq+ karpakunantin, soqta chunka llaqtakuna ima. 31 Paykunan jap’ikapurqanku kuskan Galaad jallp’ata, Og reypa gobiernasqan Astaroj llaqtata, Edréi+ llaqtata ima. Tukuy chay jallp’akunatan chaskirqanku Makirpa kuskan churinkuna+ jayk’achus kasqankuman jina. Makirqa karqan Manasespa wawanmi.

32 Chay llaqtakunatan Moisesqa rakirqan Jordán mayuq chimpanpi Moab pampapi kashaspa, chayqa karqan Jericó llaqtaq inti lloqsimuy ladonmi.+

33 Ichaqa manan Moisesqa ima herenciatapas qorqanchu Leví ayllumanqa,+ paykunaq herencianqa Jehová Diosmi karqan. Diosmi paykunaman chayta prometerqan.+

14 Nunpa churin Josuewan, sacerdote Eleazarwan, Israelpi umallikunapiwan iman llapa Canaán jallp’ata Israel runakunaman rakirqanku. Chay jallp’akunan paykunaq herencianku karqan.+ 2 Chay jallp’akunataqa Jehová Dios Moisesta kamachisqanman jinan sorteopi rakirqanku+ isqon ayllu kuskanpaq.+ 3 Iskay ayllu kuskanpaqqa ñan Moisesqa qorqanña herenciankuta Jordán mayuq inti lloqsimuy ladonpi.+ Leví ayllupaqmi ichaqa mana ima herenciatapas qorqanchu.+ 4 Josepa wawankunaqa iskay ayllu jina yupasqan karqanku,+ paykunan karqanku Manaseswan Efrainpiwan.+ Leví ayllumanmi ichaqa mana ima jallp’atapas qorqankuchu, paykunamanqa qorqanku tiyanankupaq llaqtakunata+ uywanku michinankupaq pasto pampakunata imallan.+ 5 Israel runakunaqa Moisesta Jehová Diospa kamachisqanman jinan jallp’akunata rakirqanku.

6 Judá ayllumanta wakin runakunan Guilgalpi+ kashaspa Josueman asuykurqanku. Jinan Quenaz familiamanta Jefunepa churin Calebqa+ Josueta nirqan: “Qanqa allintan yachanki Cadés-Barneapi+ kashaqtinchis imatachus Jehová Dios noqanchismanta kamachin Moisesman+ nirqan chayta.+ 7 Cadés-Barneamanta kay jallp’a qhawaqta Jehová Diospa kamachin Moisés kachamushawaqtinqa tawa chunka wataypin noqaqa kasharqani,+ kutispaqa imachus kaqllatan noqaqa willakurqani.+ 8 Noqawan riq wakin runakunaña mana allinta willakusqankuwan llaqtamasinchiskunata mancharichirqanku chaypas, noqaqa Jehová Diostan tukuy sonqo kasukurqani.+ 9 Chay p’unchaymi Moisesqa jurawarqan: Jehová Diosniyta tukuy sonqowan kasukusqaykiraykun llapa purimusqayki jallp’akunata qanwan wawaykikunapiwan jap’ikapunkichis,+ nispa. 10 Chaytan Jehová Diosqa Moisesman prometerqan+ ch’in pampakunallapiraq purishaqtinchis.+ Chaymantapachaqa tawa chunka pisqayoq watañan pasarun, Jehová Diospa promesanman jinataqmi noqaqa kausashallaniraq.+ Kunanqa pusaq chunka pisqayoq wataypiñan kashani. 11 Chaywanpas Moisespa kachamuwasqanchis p’unchaypi jinan kallpayqa kaqlla kashan. Guerrapaqpas imapaqpas kallpayqa kashallanmi, manan pisiyanchu. 12 Chhaynaqa chay p’unchaypi Jehová Diospa prometewasqan orqo-orqo jallp’ata qopuway. Chay kutipi uyarisqaykiman jina, Anac runakunaña+ chay jatun llaqtakunapi kashan chaypas,+ Jehová Diospa yanapayninwanqa+ atillasaqmi chay runakunata chinkachiyta, Jehová Diospa prometesqanman jina”,+ nispa.

13 Jinan Josueqa Diosmanta mañakurqan Jefunepa churin Calebta bendecinanpaq, jinaspan Hebrón llaqtata qopurqan, chaymi herencian karqan.+ 14 Chay p’unchaymantapachan Hebrón llaqtaqa Quenaz familiamanta Jefunepa churin Calebpa kapurqan, kunan p’unchaykaman chaypi tiyashan. Paymi chayta chaskirqan Israel runakunaq Diosnin Jehová Diosta tukuy sonqo kasukusqanrayku.+ 15 Ñaupaqqa Quiryaj-Arbá+ nispan Hebrón llaqtataqa suticharqanku. Arbaqa llapa Anac runakunamanta allin reqsisqa runan karqan. Chay qhepamanqa samarqankun guerrakunamanta.+

15 Judá aylluwan familiankunapiwan sorteopi chaskisqanku jallp’aqa+ llapa Zin ch’inneqkuna, Négueb uray pampakuna iman karqan Edom+ pampakunawan tupaykama. 2 Uray ladoman linderonkun* qallarirqan Kachi qochaq* cantonmantapacha.+ 3 Chaymantan uraykurqan Acrabin qhatanta+ Zin ch’in pampakama. Chaymantataq wichamurqan Cadés-Barneaq uranmanta+ Ezronkama. Chayarqantaq Adar llaqtakama, jinaspa muyuykurqan Carcá ladoman. 4 Chaymantataq rirqan Azmón+ ladoman hasta Egipto wayq’okama,+ tukurqantaq lamar-qochapi.* Chaymi karqan uray ladoman linderonku.

5 Inti lloqsimuy ladoman linderonkuqa Kachi qochan karqan hasta Jordán mayuq tukuyninkama.+ Wichay ladoman linderonkutaq qallarirqan Jordán mayuwan Kachi qochawan tupaymanta. 6 Chaytaq pasarqan Bej-Oglá+ llaqtanta, Bej-Arabá+ pampanta hasta Boán rumikama.+ Boanqa Rubenpa churinmi karqan. 7 Chaymantataq wicharqan Acor wayq’opi+ Debir llaqtakama, muyumurqantaq Guilgalpa+ uranta. Chayqa kashan Adumin qhataq chimpanpin, mayu wayq’oq uray ladonpi. Chay linderoqa pasarqan En-Semes pujyu-pujyuntan+ hasta En-Roguelkama.+ 8 Chaymantataq Jebús runakunaq+ tiyasqan Jerusalén+ llaqtaq uran Hinón* wayq’onta+ seqarqan hasta Hinón wayq’oq inti jaykuy ladonpi orqo patakama, Refaín wayq’o wichaykama. 9 Chay orqo patamantataq Neftóa pujyu-pujyunta+ jaykurqan hasta Efrón moqo-moqopi llaqtakunakama. Chaymantataq chayarqan Balá llaqtakama, chaytan nikullantaq Quiryaj-Jearin+ nispa. 10 Balá llaqtamantataq rirqan inti jaykuy ladoman Seír orqoman, chayninta pasaspataq Jearin orqoq wichay ladonta pasarqan Bej-Semes+ uraykama, Jearintaqa Kesalón nikullantaqmi. Chaymantataq wicharqan Timnakama.+ 11 Timnamantataq Ecrón+ qhatanta, Sikerón llaqtanta, Balá orqonta hasta Jafnel llaqtakama chayarqan, chay linderoqa Jatun lamar-qochapin tukupurqan.

12 Inti jaykuy ladoman linderonkutaq karqan Jatun lamar-qocha.*+ Llapa chaykunan karqan Judá aylluq linderon jayk’a familiachus kasqankuman jina.

13 Josueqa Jehová Diospa kamachisqanman jinan Judá ayllumanta Jefunepa churin Calebman+ Quiryaj-Arbá llaqtata qorqan, chayqa Hebrón llaqtan karqan. Arbá runaqa Anacpa taytanmi karqan.+ 14 Chay llaqtamantan Calebqa Anacpa kinsantin churinkunata+ qarqorqan, paykunan karqan: Sesái, Aimán, Talmaipiwan.+ 15 Chaymantataq Debir+ llaqta runakunawan maqanakuq rirqan. (Ñaupaqqa Quiryaj-Séfer nispan Debir llaqtataqa suticharqanku). 16 Chaypin Calebqa nirqan: “Pipas Quiryaj-Séfer llaqtata jaykuspa chay llaqtata atipaqmanmi ususiy Acsata qopusaq esposan kananpaq”, nispa. 17 Jinan Quenazpa+ churin Ojnielqa+ chay llaqta runakunata atipamurqan, chaymi Calebqa ususin Acsata+ Ojnielman qopurqan esposan kananpaq, Quenazqa Calebpa wayqenmi karqan. 18 Wasinkuman ripushaqtinkun Acsaqa Ojnielta rogarqan papanmanta jallp’ata mañakunanpaq. Jinan Acsaqa asnonmanta uraykurqan,* Calebtaq nirqan: “¿Imatan munashanki?”,+ nispa. 19 Acsataq nirqan: “Papáy, ama jinachu kay, juj regalotawan qoykuway. Uray ladopi* ch’aki jallp’allatan qowarqanki, manachu Guloj-Main* pampakunatawan qowankiman”, nispa. Jinan Calebqa Wichay Gulojta Uray Gulojtawan qorqan.

20 Kay llaqtakunatan Judá aylluqa chaskirqan jayk’a familiachus kasqankuman jina.

21 Uray ladoman Edom+ pampakunaq qayllanpi kaq llaqtakunan karqan: Cafzel, Éder, Jagur, 22 Quiná, Dimoná, Adadá, 23 Quedes, Azor, Ijnán, 24 Zif, Télen, Bealoj, 25 Azor-Adatá, Queriyoj-Ezrón, chay llaqtatan nikullantaq Azor nispa, 26 Aman, Sema, Moladá,+ 27 Azar-Gadá, Jesmón, Bej-Pélej,+ 28 Azar-Sual, Ber-Seba,+ Biziotías, 29 Balá, Iyin, Ézen, 30 Eltolaj, Kesil, Ormá,+ 31 Ziclag,+ Majmaná, Sansaná, 32 Lebaoj, Silin, Ain, Rimón.+ Llapanpiqa iskay chunka isqonniyoq llaqtakunan karqan, juch’uy llaqtakunantin.

33 Sefelá ladopi+ llaqtakunataq karqan: Estaol, Zorá,+ Asná, 34 Zanóa, En-Ganin, Tapúa, Enan, 35 Jarmuj, Adulan,+ Socó, Azecá,+ 36 Sarain,+ Aditain, Guederá, Guederotain. Chunka tawayoq llaqtakuna juch’uy llaqtakunantin.

37 Jinallataq Zenán, Adasá, Migdal-Gad, 38 Dileán, Mizpé, Joctel, 39 Lakís,+ Bozcaj, Eglón, 40 Cabón, Laman, Kitlís, 41 Guederoj, Bej-Dagón, Namá, Maquedá.+ Chunka soqtayoq llaqtakuna juch’uy llaqtakunantin.

42 Jinallataq Lifná,+ Éter, Asán,+ 43 Iftá, Asná, Nezif, 44 Queilá, Aczif, Maresá. Isqon llaqtakuna juch’uy llaqtakunantin.

45 Kaqllataq Ecrón llaqtapas chay cercapi llaqtakunapas juch’uy llaqtakunantin. 46 Ecronmanta inti jaykuy ladoman hasta Asdoj llaqtakama, juch’uy llaqtakunantin.

47 Asdoj+ llaqtapas chay cercapi llaqtakunapas juch’uy llaqtakunantin. Gaza+ llaqtapas chay cercapi llaqtakunapas juch’uy llaqtakunantin hasta Egipto wayq’okama Jatun lamar-qochakama,* chay lamar-qochaq chimpankunapi llaqtakunapiwan.+

48 Orqo-orqo wichaypi llaqtakunataq karqan: Samir, Jatir,+ Socó, 49 Daná, Quiryaj-Saná, chay llaqtatan nikullantaq Debir nispa, 50 Anaf, Estemó,+ Anin, 51 Gosén,+ Olón, Guiló.+ Chunka jujniyoq llaqtakuna juch’uy llaqtakunantin.

52 Jinallataq Arab, Dumá, Esán, 53 Janin, Bej-Tapúa, Afecá, 54 Untá, Zior, Quiryaj-Arbá, chay llaqtatan nikullantaq Hebrón+ nispa. Isqon llaqtakuna juch’uy llaqtakunantin.

55 Kaqllataq Maón,+ Carmelo, Zif,+ Jutá, 56 Jezrel, Jocdean, Zanóa, 57 Cayín, Guibeá, Timná.+ Chunka llaqtakuna juch’uy llaqtakunantin.

58 Kaqllataq Jalul, Bej-Zur, Guedor, 59 Maraj, Bej-Anoj, Eltecón. Soqta llaqtakuna juch’uy llaqtakunantin.

60 Jinallataq Rabá, Quiryaj-Baal, chay llaqtatan nikullantaq Quiryaj-Jearin+ nispa. Iskay llaqtakuna juch’uy llaqtakunantin.

61 Ch’inneqpi llaqtakunataq karqan: Bej-Arabá,+ Midín, Secacá, 62 Nifsán, Kachi Llaqta, En-Guedí.+ Soqta llaqtakuna juch’uy llaqtakunantin.

63 Jerusalén+ llaqtapi tiyaq Jebús runakunataqa+ manan Judá ayllu runakunaqa qarqoyta atirqankuchu,+ jinan chay runakunaqa kaqllapi tiyashanku Judá ayllu chaupipi kunan p’unchaykama.

16 Josepa+ wawankunaq sorteopi+ chaskisqanku jallp’aq linderonmi qallarirqan Jericó llaqta cercapi Jordán mayumanta, chaymi pasarqan Jericó llaqtaq inti lloqsimuy ladonpi pujyu-pujyunta hasta Betel+ orqo-orqo wichaykama. 2 Luz llaqta cercapi kaq Betelmantataq arkita runakunaq tiyasqan Ataroj llaqtakama chayarqan. 3 Chaymantataq inti jaykuy ladoman Jaflej runakunaq llaqtanta pasaspa Uray Bej-Oronkama+ jaykurqan, chayninta pasaspataq Guézer+ llaqtaman chayarqan, tukupurqantaq Jatun lamar-qochapi.

4 Josepa wawankunan+ karqan Manaseswan Efrainpiwan, paykunan chaskikurqanku chay jallp’akunata.+ 5 Efraín ayllu familiakunaq chaskisqanku jallp’aq inti lloqsimuy ladoman linderonkun karqan Ataroj-Adar+ llaqtamanta Wichay Bej-Oronkama.+ 6 Chayqa Jatun lamar-qochakaman chayarqan. Wichay ladoman linderonkun qallarirqan Micmetajmanta,+ chaytaq muyuykurqan inti lloqsimuy ladoman Tanaj-Siloman hasta Janoakama. 7 Janoamantataq uraykurqan Ataroj llaqtanta pasaspa Nará llaqtakama, chaytaq pasarqan Jericó+ llaqtanta hasta Jordán mayukama. 8 Inti jaykuy ladomantaq linderonkuqa rirqan Tapúa+ llaqtamanta Caná wayq’okama, tukurqantaq Jatun lamar-qochapi.+ Chaymi karqan Efraín ayllu familiakunaq chaskisqan jallp’a. 9 Manasés aylluq chaskisqan jallp’a ukhupipas kallarqantaqmi Efraín ayllu runakunapaq t’aqasqa llaqtakunaqa,+ juch’uy llaqtakunantin.

10 Efraín ayllu runakunaqa manan Guézer+ llaqtamanta Canaán runakunata qarqorqankuchu, aswanmi kunan p’unchaykama paykuna ukhullapi tiyashanku+ esclavo jina llank’aspa.+

17 Chaymantataq Josepa phiwi* churin+ Manasés+ aylluman sorteopi+ jallp’ata qorqanku. Manasespa phiwi wawan Makirqa+ allin maqanakuqmi karqan chaymi chaskirqan Galaad pampakunata Basán pampakunatawan.+ Makirqa Galaadpa taytanmi karqan. 2 Wakin Manasés ayllu familiakunapas jayk’achus kasqankuman jinan jallp’ata chaskirqanku. Paykunan karqanku Abí-Ezerpa+ wawankuna, Elecpa wawankuna, Asrielpa wawankuna, Shejenpa wawankuna, Heferpa wawankuna, Semidapa wawankuna ima. Chaykunan karqan Josepa wawan Manasesmanta jamuq familiakuna.+ 3 Juj runan karqan Zelofead+ sutiyoq, paypa papanmi karqan Héfer, Heferpa papantaq karqan Galaad, Galaadpa papantaq karqan Makir, Makirpa papantaq karqan Manasés. Zelofeadpaqa manan karqanchu qhari wawankunaqa aswanmi warmi wawankunalla karqan. Paykunan karqanku: Malá, Noá, Oglá, Milcá, Tirzá ima. 4 Paykunan rirqanku sacerdote Eleazarman,+ Nunpa churin Josueman, Israelpi umallikunamanwan; jinaspa nirqanku: “Jehová Diosmi Moisesta kamachirqan familiaykuwan kuska herenciata chaskinaykupaq”,+ nispa. Jinan paykunapas Jehová Diospa kamachisqanman jina familiankuwan kuska herenciata chaskirqanku.+

5 Manasés aylluqa Jordán mayuq inti lloqsimuy ladonpi Galaad pampakunata Basán pampakunatapas chaskisqanmantaqa, chaskillarqantaqmi Jordán mayuq inti jaykuy ladonpi chunka jallp’akunatapas.+ 6 Manasés ayllumanta warmikunapas chaskirqankun herenciankuta. Galaad pampakunataqa wakin Manasés ayllumanmi qorqanku.

7 Manasés aylluq linderonqa Aser ayllumanta hasta Shejen+ llaqtaq chimpanpi Micmetaj+ llaqtakaman karqan, paña lado uraymantaq En-Tapuakama jaykurqan. 8 Tapúa+ llaqta jallp’akunaqa Manasés aylluqmi karqan, Manasés ayllu linderopi Tapúa llaqtataq Efraín aylluq karqan. 9 Chay linderoqa Caná wayq’oq urankaman jaykurqan, chaymantataq mayuq wichay ladon patanta pasarqan Jatun lamar-qochakama.+ Manasés aylluq chaskisqan jallp’akunapiqa kallarqantaqmi Efraín ayllu llaqtakunapas.+ 10 Uray ladomanmi karqan Efraín ayllu, wichay ladomantaq Manasés ayllu. Manasés aylluq linderonqa Jatun lamar-qochapin tukurqan,+ wichay ladoman linderonmi karqan Aser ayllu, inti lloqsimuy ladomantaq Isacar ayllu.

11 Isacar aylluq Aser aylluq chaskisqanku jallp’akunapin Manasés aylluqa chaskillarqantaq Bej-Seán llaqtata chay cercapi llaqtakunantinta, Iblean+ llaqtata chay cercapi llaqtakunantinta, Dor+ llaqtata chay cercapi llaqtakunantinta, En-Dor+ llaqtata chay cercapi llaqtakunantinta, Tanac+ llaqtata chay cercapi llaqtakunantinta, Meguidó llaqtata chay cercapi llaqtakunantinta. Kinsa llaqtakunaqa orqo wichaypin karqan.

12 Manasés ayllu runakunan ichaqa mana atirqankuchu chay llaqtakunaman jaykuyta. Canaán runakunan chaypiqa tiyasharqanku, manataqmi kuyuriyta munarqankuchu.+ 13 Qhepamanñan Israel runakunaqa kallpayoq llaqtaman tukupuspanku Canaán llaqta runakunata esclavota jina llank’achirqanku,+ manataqmi llapankutachu qarqorqanku.+

14 Josepa wawankunan Josueta nirqanku: “Imaraykun juch’uy jallp’allata qowankiku,+ noqaykuqa Jehová Diospa bendicionninwanmi askhayapushayku”,+ nispa. 15 Jinan Josueqa nirqan: “Askhataq kankichis chayqa perizita+ runakunaq refaín+ runakunaq jallp’anku sach’a-sach’a wichayman riychis, jinaspa chayta wit’umuychis chaypi tiyanaykichispaq. Efraín orqo-orqoqa+ nishu juch’uyllan kapun”, nispa. 16 Josepa wawankunataq nirqanku: “Efraín orqo-orqokunaqa manan aypawankumanchu; chaymantapas chay wayq’okunapi tiyaq Canaán runakunapas, Bej-Seán+ llaqtapi tiyaqkunapas, Jezrel+ wayq’okunapi tiyaqkunapas guerrapaq askha fierro carretakunayoqmi kanku,+ llantankunapi cuchillokunayoqtaqmi chay carretakunaqa kanpas”, nispa. 17 Jinan Josueqa Josepa wawankunata, Efraín aylluta Manasés ayllutawan nirqan: “Qankunaqa askhan kankichis, kallpasapa llaqtataqmi kankichispas. Manan kayllatachu jallp’ataqa chaskinkichis.+ 18 Chay orqo-orqo wichaykunapas qankunamanmi tupasunkichis,+ sach’a-sach’aña kashan chaypas wit’unkichismi, chaymantapachan linderoykichis kanqa. Canaán runakunaq fierro carretankunaq llantankunaña cuchilloyoq chaypas qarqonkichismi”,+ nispa.

18 Chaymantaqa Siló+ llaqtamanmi Israel runakunaqa rirqanku, chaypin Dios yupaychana karpata churarqanku,+ chay jallp’akunaqa paykunaq makinpiñan kasharqan.+ 2 Ichaqa qanchis ayllukunaraqmi mana herenciayoq kasharqanku. 3 Jinan Josueqa Israel runakunata nirqan: “¿Jayk’aqkaman suyankichis ñaupa taytaykichiskunaq Diosnin Jehová Diospa qosqasuykichis jallp’ata jap’ikapunaykichispaq?+ 4 Sapanka ayllumanta kinsa runakunata pusamuwaychis. Paykunatan kachasaq llapa jallp’ata qhawamunankupaq sapanka ayllupaq mapakunata ruwamunankupaqwan. Chaymantataq noqaman kutimuwanqaku. 5 Qanchismanmi jallp’ataqa t’aqanqaku.+ Judá aylluqa maypichus jallp’ata chaskirqan chay uray ladollapin kanqa.+ Josepa wawankunapas chaskisqanku wichay ladollapin kanqaku.+ 6 Riychis jallp’ata qhawamuychis jinaspa chay jallp’ata qanchis parteman t’aqamuychis. Chay mapatataq apamuwankichis jinaspa Jehová Diosninchispa ñaupanpi sorteaspa chay jallp’ata rakisaykichis.+ 7 Leví aylluqa manan ima herenciatapas chaskinqachu,+ paykunaq herenciankuqa Jehová Diosta sacerdote jina serviymi.+ Gad ayllupas, Rubén ayllupas, kuskan Manasés ayllupas+ ñan herenciayoqña kanku, paykunaq jallp’ankuqa Jordán mayuq inti lloqsimuy ladonpin kashan. Chaytan paykunaman qorqan Jehová Diospa kamachin Moisés”, nispa.

8 Jinan jallp’a qhawaq riq runakunaqa preparakurqanku, paykunatan Josueqa nirqan: “Riychis llapa jallp’ata qhawamuychis, mapakunata ruwaspataq kayman apamuwankichis. Jehová Diospa ñaupanpin chay jallp’ata sorteapusaykichis”,+ nispa. 9 Jinan chay runakunaqa rirqanku jinaspa llapa jallp’ata purimurqanku mapakunatapas ruwarqanku; chay jallp’akunatan qanchis parteman t’aqarqanku llaqtakunantinta, llapa chaykunatataq juj libropi qelqarqanku. Chaymantataq Siló llaqtapi karpakusqankuman kutimuspa Josuepa kasqanman rirqanku. 10 Jinan Josueqa Jehová Diospa ñaupanpi jallp’ata sortearqan.+ Chhaynatan Josueqa sorteoman jina lliu jallp’ata rakirqan.+

11 Sorteopin ñaupaqta Benjamín ayllu lloqsimurqan, paykunaq jallp’anmi karqan Judá aylluq+ jallp’an Josepa wawankunaq+ jallp’an chaupipi. 12 Wichay ladoman linderonkun qallarirqan Jordán mayumanta, chaytaq seqarqan Jericó+ qhatanta inti jaykuy lado orqo-orqoman hasta Bej-Aven+ ch’inneqkama. 13 Chaymantataq chay linderoqa rirqan Luz llaqtaman, chay llaqtatan nikullantaq Betel+ nispa, chayninta pasaspataq Uray Bej-Oronpa+ uranpi kaq orqo-orqonta jaykurqan Ataroj-Adar+ llaqtakama. 14 Chaymantataq inti jaykuy ladoman riq linderoqa Bej-Oronpa uranpi kaq orqomanta uray ladoman muyurqan Judá aylluq jallp’anpi Quiryaj-Baalkama, chay llaqtatan nikullantaq Quiryaj-Jearin+ nispa. Chaymi karqan inti jaykuy ladoman linderonku.

15 Uray ladoman linderonkutaq rirqan Quiryaj-Jearin llaqtamanta inti jaykuy ladoman. Chaymantataq rirqan Neftóa pujyu-pujyuman.+ 16 Uraykurqantaq Hinón* wayq’owan+ Refaín+ wayq’owan tupaypi orqoq uran pampaman, chaymantataq jaykurqan Hinón wayq’oman, jinaspa pasarqan Jebús+ runakunaq tiyasqan uray qhatanta hasta En-Roguelkama.+ 17 Chaymantataq wichay ladoman rirqan En-Semes pujyu-pujyunta pasaspa Aduminpa chimpanpi+ Guelilojkama, chaymantataq uraykurqan Boán+ rumikama,+ Boanqa Rubenpa churinmi karqan. 18 Arabá wayq’o wichay lado qhatanta uraykuspataq Arabá wayq’oman chayarqan. 19 Chay linderoqa Bej-Oglá+ llaqtaq wichay lado qhatantan jaykurqan, tukurqantaq Jordán mayuwan Kachi qochawan*+ tupaypi. Chaymi karqan uray ladoman linderonku. 20 Inti lloqsimuy ladoman lideronkutaq karqan Jordán mayu. Llapa chaykunan karqan Benjamín aylluq linderon. Paykunaqa jayk’a familiachus kasqankuman jinan chay herenciata chaskirqanku.

21 Benjamín ayllu familiakunaq chaskisqan llaqtakunan karqan: Jericó, Bej-Oglá, Émec-Queziz, 22 Bej-Arabá,+ Zemarain, Betel,+ 23 Avin, Pará, Ofrá, 24 Kefar-Amoní, Ofní, Gueba.+ Chunka iskayniyoq llaqtakuna juch’uy llaqtakunantin.

25 Jinallataq Gabaón,+ Ramá, Beroj, 26 Mizpé, Kefirá, Mozá, 27 Réquen, Irpel, Taralá, 28 Zelá,+ Ja-Élef, Guibeá,+ Quiryaj, Jebús runakunaq llaqtan. Jebús runakunaq llaqtantan nikullantaq Jerusalén+ nispa. Chunka tawayoq llaqtakuna juch’uy llaqtakunantin.

Chaykunan karqan Benjamín aylluq herencian jayk’a familiachus kasqankuman jina.

19 Iskay kaq sorteopiqa+ Simeón+ ayllun lloqsimurqan, paykunaqa Judá ayllu ukhupin herenciata chaskirqanku+ jayk’a familiachus kasqankuman jina. 2 Paykunaq chaskisqanku llaqtakunan karqan: Ber-Seba+ Sebapiwan, Moladá,+ 3 Azar-Sual,+ Balá, Ézen,+ 4 Eltolaj,+ Betul, Ormá, 5 Ziclag,+ Bej-Marcaboj, Azar-Susá, 6 Bej-Lebaoj,+ Saruén. Chunka kinsayoq llaqtakuna juch’uy llaqtakunantin. 7 Jinallataq Ain, Rimón, Éter, Asán.+ Tawa llaqtakuna juch’uy llaqtakunantin. 8 Chay llaqtakunaq muyuriqninpi kaq llaqtakunapiwan hasta Balaj-Ber llaqtakama, chaytan uray ladopi kaq Ramá nikullantaq. Chaymi karqan Simeón aylluq herencian jayk’a familiachus kasqankuman jina. 9 Judá aylluq chaskisqan herenciaqa jatunmi karqan, chaymi Simeón ayllumanpas chayllapitaq herenciata qorqanku.+

10 Kinsa kaq sorteopitaq+ Zabulón+ ayllu lloqsimurqan, paykunaq linderonkuqa Sarij llaqtakaman chayarqan. 11 Chaymantan rirqan inti jaykuy ladoman Marealkama, chayninta pasaspataq rirqan Dabésej llaqtanta hasta Jocnean llaqtaq chimpanpi wayq’okama. 12 Sarij llaqtamantataq inti lloqsimuy ladoman rirqan Kisloj-Taborkama, Daberaj+ llaqtanta pasaspataq Jafiakama wicharqan. 13 Inti lloqsimuy ladomantaq Gaj-Éfer+ llaqtanta pasaspa Ej-Cazinman rirqan, chaymantataq Rimón llaqtanta pasarqan hasta Neá llaqtakama. 14 Wichay ladomantaq Neá llaqtamanta Anatón llaqtakama muyumurqan, chaymantataq Iftá-El wayq’oman jaykurqan, chaypin tukurqan. 15 Kallarqantaqmi Cataj, Najalal, Sinrón,+ Idalá, Belén+ llaqtakunapas. Chunka iskayniyoq llaqtakuna juch’uy llaqtakunantin. 16 Chay llaqtakunan juch’uy llaqtakunantin Zabulón aylluq herencian karqan jayk’a familiachus+ kasqankuman jina.

17 Tawa kaq sorteopitaq+ Isacar+ ayllu lloqsimurqan, paykunapas jayk’a familiachus kasqankuman jinan jallp’ata chaskirqanku. 18 Paykunaq linderonkupin kasharqan Jezrel,+ Kesuloj, Sunem,+ 19 Afarain, Shion, Anaraj, 20 Rabij, Quisión, Ébez, 21 Rémej, En-Ganin,+ En-Adá, Bej-Pazez. 22 Linderonkun pasarqan Tabor+ orqonta Sazumakama, chaymantataq rirqan Bej-Semes llaqtanta Jordán mayukama. Chunka soqtayoq llaqtakunan karqan juch’uy llaqtakunantin. 23 Chay llaqtakunan juch’uy llaqtakunantin Isacar aylluq herencian karqan jayk’a familiachus+ kasqankuman jina.

24 Pisqa kaq sorteopitaq+ Aser+ ayllu lloqsimurqan, paykunapas jayk’a familiachus kasqankuman jinan jallp’ata chaskirqanku. 25 Paykunaq linderonkupin kasharqan Elcaj,+ Alí, Beten, Acsaf, 26 Alamélec, Amaj, Misal. Inti jaykuy ladomantaq chayarqan Carmelo orqokama,+ Sior-Lifnajkama. 27 Inti lloqsimuy ladomantaq rirqan Bej-Dagón llaqtakama. Chaymantataq wicharqan Zabulón aylluq linderon wichayman, jinaspa pasarqan Iftá-El wayq’onta, Bej-Émec llaqtanta, Neiel llaqtanta hasta Cabul llaqtakama. 28 Chaymantataq pasarqan Ebrón llaqtanta, Reof llaqtanta, Amón llaqtanta, Caná llaqtanta hasta jatun Sidón+ llaqtakama. 29 Chaymantataq linderoqa kutiykamurqan Ramá llaqtanta hasta muyuriqnintin perqasqa jatun Tiro+ llaqtakama. Josá llaqtanta pasaspataq Jatun lamar-qochapi tukurqan; chaypin kasharqan Aczif, 30 Umá, Afec,+ Reof+ llaqtakuna. Iskay chunka iskayniyoq llaqtakuna juch’uy llaqtakunantin. 31 Chay llaqtakunan juch’uy llaqtakunantin Aser aylluq herencian karqan jayk’a familiachus+ kasqankuman jina.

32 Soqta kaq sorteopitaq+ Neftalí ayllu lloqsimurqan, paykunapas jayk’a familiachus kasqankuman jinan jallp’ata chaskirqanku. 33 Paykunaq linderonkun qallarirqan Élef llaqtamanta, Zananinpi kaq jatun sach’amanta,+ chaytaq rirqan Adamí-Nequefkama, chaymantataq rirqan Jafneelman, Jafnelmantataq Lacunman, tukurqantaq Jordán mayupi. 34 Inti jaykuy ladomantaq rirqan Aznoj-Tabor llaqtakama, chaymantapachan rirqan Jucoc llaqtakama. Uray ladoman linderonkun chayarqan Zabulón ayllukama, inti jaykuy ladomantaq Aser ayllukama, inti lloqsimuy ladomantaq Jordán mayu cercapi Judakama.* 35 Muyuriqnintin perqayoq jatun llaqtakunataq karqan: Zidin, Zer, Amaj,+ Ragaj, Kinéret, 36 Adamá, Ramá, Azor,+ 37 Quedes,+ Edréi, En-Azor, 38 Yirón, Migdal-El, Joren, Bej-Anaj, Bej-Semes.+ Chunka isqonniyoq llaqtakuna juch’uy llaqtakunantin. 39 Chay llaqtakunan juch’uy llaqtakunantin Neftalí aylluq herencian karqan jayk’a familiachus+ kasqankuman jina.

40 Qanchis kaq sorteopitaq+ Dan+ ayllu lloqsimurqan, paykunapas jayk’a familiachus kasqankuman jinan jallp’ata chaskirqanku. 41 Paykunaq linderonkupin kasharqan: Zorá,+ Estaol, Ir-Semes, 42 Salabín,+ Ayalón,+ Itlá, 43 Elón, Timná,+ Ecrón,+ 44 Eltequé, Guibetón,+ Balaj, 45 Jeúj, Bene-Berac, Gaj-Rimón,+ 46 Me-Jarcón, Racón. Chaymantataq linderonkuqa pasarqan Jope+ llaqtaq cercanta. 47 Chay jallp’aqa juch’uyllan karqan+ Dan ayllupaq, chaymi paykunaqa rirqanku Lésen+ llaqtata paykunawan maqanakuq. Wañuchirqankun chaypi tiyaq runakunata, jinaspa chay llaqtata paykuna jap’ikapurqanku. Sutintapas cambiarqankun ñaupa taytankuq sutinwan. Jinan chay llaqtaqa Dan sutiyoq kapurqan.+ 48 Chay llaqtakunan juch’uy llaqtakunantin Dan aylluq herencianqa karqan jayk’a familiachus kasqankuman jina.

49 Chhaynapin chay jallp’akunata t’aqayta tukurqanku. Israel runakunaqa Nunpa churin Josuemanpas qorqankun herenciata. 50 Jehová Diospa kamachisqanman jinan Josuepa mañakusqan jallp’ata payman qorqanku, chaymi karqan Efraín orqo-orqopi Timnaj-Séra+ llaqta. Chay llaqtata jujmanta sayarichispan Josueqa chaypi tiyapurqan.

51 Chay jallp’akunan karqan sacerdote Eleazarwan, Nunpa churin Josuewan, Israelpi umallikunapiwan rakisqanku jallp’akuna.+ Chaytan rakirqanku Siló+ llaqtapi, Jehová Diosta yupaychana karpaq ñaupanpi.+ Chhaynatan tukurqanku jallp’akuna rakiyta.

20 Jinan Jehová Diosqa Josueta nirqan: 2 “Israel runakunata niy: Moisesta kamachisqayman jina, qankunapaq ajllakuychis pakakunapaq llaqtakunata.+ 3 Pipas mana yuyaypichu runamasinta wañuchinqa chayqa, chay llaqtakunamanmi ayqekunqa. Chay llaqtakunan kanqa vengakuq* runamanta+ pakakunapaq. 4 Runamasinta mana yuyaypichu wañuchiq runaqa chay llaqtamanmi rinqa,+ llaqta punkuman+ chayaspataq chay llaqtapi umalliqkunaman* willakunqa imachus ruwasqanta. Umalliqkunataq sumaqta chaskinqaku wasitapas qonqaku chaypi qhepakunanpaq, chaypin paykunawan tiyanqa. 5 Vengakuq runa qhepanta riqtinqa manan wañuchiq runataqa entreganankuchu, manataq yuyaypichu ni cheqnikuspapaschu wañuchirqan chayqa manan entreganankuchu.+ 6 Wañuchiq runaqa chay llaqtapin tiyanqa llapa runaq* ñaupanpi juzgasqa kanankama.+ Manan chay llaqtamanta lloqsinanchu chay tiempopi uma sacerdote wañupunankama.+ Uma sacerdote wañupuqtinñan llaqtanmanqa kutipunqa,+ nispa”.

7 Jinan paykunaqa ajllarqanku Neftalí ayllu orqo-orqopi Quedes+ llaqtata, chay llaqtaqa Galileapin kasharqan; Efraín ayllu orqo-orqopi Shejen+ llaqtata; Judá ayllu orqo-orqopi Quiryaj-Arbá+ llaqtata, chay llaqtatan nikullantaq Hebrón nispa. 8 Rubén ayllu pampapi Bézer+ llaqtata, chay llaqtaqa Jericó llaqtaq inti lloqsimuy ladonpin kasharqan Jordán mayuq chimpanpi; Gad ayllupi Ramoj+ llaqtata, chayqa Galaadpin kasharqan; Manasés ayllupi Golán+ llaqtata, chayqa Basanpin kasharqan.+

9 Chay llaqtakunan ajllasqa karqan Israel runakuna pakakunanpaq, paykuna ukhupi tiyaq waj llaqtayoq runakunapas pakakunanpaq. Pi runapas mana yuyaypichu runamasinta wañuchiqqa chay llaqtakunamanmi ayqekuyta atiq,+ chhaynapin payta manaraq juzgasqa kashaqtin vengakuq runa mana wañuchinanchu karqan. Llapa runaq* ñaupanpi juzgasqanku qhepamanñan yachakurqan wañuchisqachus kanan karqan icha manachus chayta.+

21 Leví ayllu umallikunan asuykurqanku sacerdote Eleazarman,+ Nunpa churin Josueman, Israel llaqta umallikunamanwan. 2 Chay kutipiqa Canaán jallp’api Siló+ llaqtapin kasharqanku, jinan nirqanku: “Jehová Dios Moisesta kamachisqanman jina, tiyanaykupaq llaqtakunata uywa michinaykupaq pastoyoq campokunantinta qowayku”,+ nispa. 3 Jinan Israel runakunaqa Jehová Diospa kamachisqanman jina, herencia chaskisqankumanta llaqtakunata+ pastoyoq campokunantinta Leví ayllu runakunaman qorqanku.+

4 Sorteopin ñaupaqta lloqsimurqan Leví ayllumanta Cohat familia.+ Jinan sacerdote Aaronpa wawankunaman qorqanku chunka kinsayoq llaqtakunata. Chay llaqtakunan kasharqan Judá ayllupi,+ Simeón ayllupi,+ Benjamín ayllupi ima.+

5 Wakin Cohat familiakunamantaq qorqanku chunka llaqtakunata. Chay llaqtakunan kasharqan Efraín ayllupi,+ Dan ayllupi, kuskan Manasés ayllupi ima.+

6 Guersón familiakunamantaq+ qorqanku chunka kinsayoq llaqtakunata. Chay llaqtakunan kasharqan Isacar ayllupi, Aser ayllupi, Neftalí ayllupi, Basán ladopi kaq kuskan Manasés ayllupi ima.+

7 Merarí familiamantaq+ qorqanku chunka iskayniyoq llaqtakunata. Chay llaqtakunan kasharqan Rubén ayllupi, Gad ayllupi, Zabulón ayllupi ima.+

8 Chhaynatan Israel runakunaqa Leví ayllu runakunaman llaqtankuta qorqanku Moisesta Jehová Dios kamachisqanman jina. Paykunamanmi sorteopi qorqanku chay llaqtakunata pastoyoq campokunantinta.+

9 Chay qosqanku llaqtakunan kasharqan Judá ayllupi Simeón ayllupi ima. Chay llaqtakunaq sutinqa kaypin qelqasqa kashan.+ 10 Sorteoqa Leví ayllupi Cohat familiamanta Aaronpa wawankunapaqmi ñaupaqta lloqsimurqan. 11 Paykunan chaskirqanku Judá orqo-orqopi Quiryaj-Arbá+ llaqtata pastoyoq campokunantinta, chay llaqtatan nikullantaq Hebrón+ nispa. (Arbá runaqa Anacpa taytanmi karqan). 12 Ichaqa Hebrón llaqta jawapi kaq camponkunatapas llaqtachankunatapas Jefunepa churin Calebmanmi qopurqanku.+

13 Sacerdote Aaronpa churinkunamanmi qorqanku Hebrón+ llaqtata pastoyoq campokunantinta, chay llaqtaqa pakakunapaq llaqtan karqan.+ Qollarqankutaqmi Lifná+ llaqtata pastoyoq campokunantinta, 14 Jatir+ llaqtata pastoyoq campokunantinta, Estemoa+ llaqtata pastoyoq campokunantinta, 15 Olón+ llaqtata pastoyoq campokunantinta, Debir+ llaqtata pastoyoq campokunantinta, 16 Ain+ llaqtata pastoyoq campokunantinta, Jutá+ llaqtata pastoyoq campokunantinta, Bej-Semes llaqtata pastoyoq campokunantintawan. Chay isqon llaqtakunan kasharqan Judá ayllupi Simeón ayllupi ima.

17 Benjamín ayllupitaq qorqanku Gabaón+ llaqtata pastoyoq campokunantinta, Gueba+ llaqtata pastoyoq campokunantinta, 18 Anatoj+ llaqtata pastoyoq campokunantinta, Almón llaqtata pastoyoq campokunantintawan. Chay tawa llaqtakunatan qorqanku.

19 Llapanpiqa chunka kinsayoq llaqtakunatan Aaronpa wawan sacerdotekunaqa chaskirqanku, pastoyoq campokunantinta.+

20 Leví ayllumanta wakin Cohat familiakunamantaq sorteopi lloqsimusqanman jina Efraín ayllupi llaqtakunata qorqanku. 21 Paykunamanmi qorqanku kay llaqtakunata: Efraín orqo-orqopi Shejen+ llaqtata pastoyoq campokunantinta, chay llaqtaqa pakakunapaq llaqtan karqan,+ Guézer+ llaqtata pastoyoq campokunantinta, 22 Quijzain llaqtata pastoyoq campokunantinta, Bej-Orón+ llaqtata pastoyoq campokunantinta. Chay tawa llaqtakunatan qorqanku.

23 Qollarqankutaqmi Dan ayllupi Eltequé llaqtata pastoyoq campokunantinta, Guibetón llaqtata pastoyoq campokunantinta, 24 Ayalón+ llaqtata pastoyoq campokunantinta, Gaj-Rimón llaqtata pastoyoq campokunantintawan. Chay tawa llaqtakunatan qorqanku.

25 Qollarqankutaqmi kuskan Manasés ayllupi Tanac+ llaqtata pastoyoq campokunantinta, Gaj-Rimón llaqtata pastoyoq campokunantintawan. Chay iskay llaqtakunatan qorqanku.

26 Llapanpiqa chunka llaqtakunatan wakin Cohat familiakunaqa chaskirqanku, pastoyoq campokunantinta.

27 Leví ayllumanta Guersón familiakunataq+ chaskirqanku kuskan Manasés ayllupi Besterá llaqtata pastoyoq campokunantinta, Basán ladopi kaq Golán+ llaqtata pastoyoq campokunantintawan, chay llaqtaqa pakakunapaq llaqtan karqan. Chay iskay llaqtakunatan chaskirqanku.

28 Isacar ayllupitaq+ chaskirqanku Quisión llaqtata pastoyoq campokunantinta, Daberaj+ llaqtata pastoyoq campokunantinta, 29 Jarmuj llaqtata pastoyoq campokunantinta, En-Ganin llaqtata pastoyoq campokunantintawan. Chay tawa llaqtakunatan chaskirqanku.

30 Aser ayllupitaq+ chaskirqanku Misal llaqtata pastoyoq campokunantinta, Afdón llaqtata pastoyoq campokunantinta, 31 Elcaj+ llaqtata pastoyoq campokunantinta, Reof+ llaqtata pastoyoq campokunantintawan. Chay tawa llaqtakunatan chaskirqanku.

32 Neftalí ayllupitaq chaskirqanku Galileapi Quedes+ llaqtata pastoyoq campokunantinta, chay llaqtaqa pakakunapaq llaqtan karqan,+ Amoj-Dor llaqtata pastoyoq campokunantinta, Cartán llaqtata pastoyoq campokunantintawan. Chay kinsa llaqtakunatan chaskirqanku.

33 Llapanpiqa chunka kinsayoq llaqtakunatan Guersón familiakunaqa chaskirqanku, pastoyoq campokunantinta.

34 Merarí familiakunataq+ chaskirqanku Zabulón ayllupi+ Jocnean+ llaqtata pastoyoq campokunantinta, Cartá llaqtata pastoyoq campokunantinta, 35 Dimná llaqtata pastoyoq campokunantinta, Najalal+ llaqtata pastoyoq campokunantintawan. Chay tawa llaqtakunatan chaskirqanku.

36 Rubén ayllupitaq chaskirqanku Bézer+ llaqtata pastoyoq campokunantinta, Jáz+ llaqtata pastoyoq campokunantinta, 37 Quedemoj llaqtata pastoyoq campokunantinta, Mefaj llaqtata pastoyoq campokunantintawan. Chay tawa llaqtakunatan chaskirqanku.

38 Gad ayllupitaq+ chaskirqanku Galaadpi Ramoj+ llaqtata pastoyoq campokunantinta, chay llaqtaqa pakakunapaq llaqtan karqan, Manain+ llaqtata pastoyoq campokunantinta, 39 Esbón+ llaqtata pastoyoq campokunantinta, Jazer+ llaqtata pastoyoq campokunantintawan. Chay tawa llaqtakunatan chaskirqanku.

40 Llapanpiqa chunka iskayniyoq llaqtakunatan Merarí familiakunaqa chaskirqanku.

41 Leví ayllu runakunaqa tawa chunka pusaqniyoq llaqtakunatan chaskirqanku Israel runakunamanta, pastoyoq campokunantinta.+ 42 Llapa chay llaqtakunaqa muyuriqninpi pasto pampakunayoqmi karqan.

43 Ñaupa taytankuman prometesqanman jinan Jehová Diosqa llapa chay jallp’akunata Israel runakunaman qopurqan,+ jinan paykunaqa chaypi tiyapurqanku.+ 44 Chaymantapas ñaupa taytankuman prometesqanman jinan Jehová Diosqa thaj kayta Israel runakunaman qorqan.+ Manan pipas paykuna contra jatariyta atirqanchu,+ Jehová Diosqa llapa enemigonkutan paykunaq makinman entregarqan.+ 45 Israel runakunaman prometesqantaqa llapallantan Jehová Diosqa junt’arqan, manan jujpas mana junt’asqaqa karqanchu.+

22 Chaymantataq Josueqa Rubén ayllu runakunata, Gad ayllu runakunata, kuskan Manasés ayllu runakunatawan juñuspa 2 nirqan: “Qankunaqa Jehová Diospa kamachin Moisespa nisqanman jinan tukuy imatapas ruwarqankichis,+ noqatapas tukuypin kasukuwarqankichis.+ 3 Kunankaman+ wayqeykichiskunataqa manapuni saqerqankichischu, Jehová Diospa kamachisqankunatapas llapantan kasukurqankichis.+ 4 Kunanqa Jehová Diosniykichispa prometesqanman jinan wayqeykichiskunaqa thaj tiyashanku.+ Chhaynaqa kutipuychis Jordán mayu chimpapi* Jehová Diospa kamachin Moisespa qosqasuykichis jallp’aman.+ 5 Ichaqa amapunin qonqankichischu Jehová Diospa kamachin Moisespa qosqasuykichis kamachikuykunataqa.+ Jehová Diosniykichistapas tukuy sonqon munakunkichis,+ amapunin saqenkichischu ñanninkunatapas+ kamachikuyninkunatapas.+ Payman jujllachasqan kausankichis,+ tukuy sonqowantaqmi tukuy almawantaqmi*+ servinkichispas”,+ nispa.

6 Chaymantataq Josueqa paykunata bendecispa kachapurqan, jinan paykunaqa wasinkuman ripurqanku. 7 Kuskan Manasés ayllumanqa Moisesmi herenciata qorqan Basán ladopi,+ kuskan Manasés ayllumantaq Josué herenciata qorqan Jordán mayuq inti jaykuy ladonpi,+ chaytan chaskirqanku wakin Israel runakunawan kuska. Chaskisqanku jallp’aman kachapushaspan Josueqa paykunata bendecirqan, 8 jinaspa nirqan: “Enemigoykichiskunamanta qechusqaykichis uywakunata, qolqeta, qorita, cobreta, fierrota, p’achata ima askhata apakuychis.+ Jayk’achus tupasunkichis chayta llapanta apakuychis+ wayqeykichiskunapaqwan”, nispa.

9 Chaymantataq Rubén ayllu runakunaqa, Gad ayllu runakunapas, kuskan Manasés ayllu runakunapiwan Canaanpi Siló llaqtamanta kutipurqanku Galaad jallp’aman,+ chaypin paykunaqa jallp’ata chaskirqanku Jehová Dios Moisesta kamachisqanman jina.+ 10 Canaán ladollapiraq kashaspan Jordán mayu cercaman chayaspa Rubén ayllu runakunaqa, Gad ayllu runakunawan, kuskan Manasés ayllu runakunapiwan juj jatunkaray altarta chaypi ruwarqanku. 11 Wakin Israel runakunataq uyarirqanku:+ “Rubén ayllu, Gad ayllu, kuskan Manasés ayllu runakunan Jordán mayu cercapi jallp’anchis ladopi jatun altarta ruwarusqaku”, nisqata. 12 Chayta yacharuspan llapa Israel runakunaqa Siló+ llaqtapi juñukurqanku chay kinsantin ayllu runakunawan maqanakunankupaq.

13 Jinan Israel runakunaqa Eleazarpa churin sacerdote Finehasta+ Galaad jallp’aman kacharqanku Rubén ayllu runakunaq, Gad ayllu runakunaq, kuskan Manasés ayllu runakunaq kasqanman. 14 Paywan kuskan rirqanku chunka umallikuna, sapanka ayllumantan juj karqan. Paykunaqa sapankankun karqanku familiankupi waranqanpi runakunata umalliq.+ 15 Galaad jallp’aman chayaspataq Rubén ayllu runakunata, Gad ayllu runakunata, kuskan Manasés ayllu runakunatawan nirqanku:

16 “Jehová Diospa llaqtanpa sutinpin niykiku: ¿Imaraykun khaynata Dios contra juchallikunkichis?+ Chay altarta ruwaspaqa Jehová Diostan saqeshankichis, Jehová Dios contran sayarishankichis.+ 17 ¿Manachu yuyankichis Peor cercapi juchallikusqanchista? Jehová Diosña llaqtanta castigarqan chaypas, ¿manachu chay jawa kunankama sufrishanchis?+ 18 ¡Chaychu qankuna Jehová Diosta saqeyta munashankichis! Jehová Dios contrachus jatarinkichis chayqa paqarinmi payqa llapa Israel runakuna contra phiñakunqa.+ 19 Chaskisqaykichis jallp’a qhelli kananpaqchus piensankichis chayqa, jampuychis Jehová Diospa jallp’anman,+ Jehová Diospa karpan ladoman,+ chaypitaq noqaykuwan kuska tiyaychis. Ichaqa amapuni Jehová Dios contraqa jatariychischu, amataq Jehová Diospa altarninmanta juj altarta ruwaspaqa mana kasukuqta jinaqa qhawachiwaykuchu.+ 20 Zeraq wawan Aján+ chinkachinapaq kaqta oqarikuqtinpas, ¿manachu llapa Israel runakunapaq Diosqa phiñakurqan?+ Manan payllachu wañurqan juchallikusqanmantaqa”,+ nispa.

21 Chayta uyarispan Rubén ayllu runakunaqa, Gad ayllu runakunawan, kuskan Manasés ayllu runakunapiwan Israel umallikunata*+ nirqanku: 22 “Dioskunaq Diosnin Jehová Diosqa,+ atiyniyoq* Jehová Diosqa allintan yachan imaraykuchus chay ruwasqaykuta, Israelpas yachallanqataqmi. Jehová Dios contrachus ruwarqayku chayqa ama kay p’unchay librawaykuchu. 23 Jehová Diosta saqenaykupaqchus chay altarta ruwarqayku chayqa, ruphachina ofrendata, jak’u ofrendata,* sumaq kausay sacrificiota jaywanaykupaqchus chay altarta ruwarqayku chayqa Jehová Dios kikinmi cuentata mañawanqaku.+ 24 Ichaqa noqaykuqa manan chay yuyaywanchu chay altartaqa ruwarqayku, aswanmi nisharqayku: Yaqapaschá jamuq tiempopi paykunaq wawanku wawanchiskunata ninqaku: Israelpa Diosnin Jehová Dioswanqa manan imapas qankunaqa ruwanaykichis kanchu. 25 Jehová Diosqa Jordán mayutan churarqan t’aqawananchispaq, chhaynaqa manan qankunaqa Jehová Dioswan imapas ruwanaykichis kanchu, nispa. Chhaynatan wawanchiskunata jark’ankuman Jehová Dios adoranankuta, nispa.

26 ”Chaymi nirqayku: Chay ama pasananpaq juj altarta ruwasun, ichaqa ama ruphachina ofrenda jaywanapaqchu ni sacrificio jaywanapaqchu. 27 Aswanpas chay altar testigo kachun noqanchispas wawanchiskunapas paykunawan kuska+ Jehová Diosman ruphachina ofrendakunata, sumaq kausay sacrificiokunata, juj sacrificiokunatapas jaywananchispaq,+ chhaynapi paykunaq wawanku ama wawanchiskunata: Qankunaqa manan imapas Jehová Dioswan ruwanaykichis kanchu, nispa ninankupaq, nispa. 28 Jinan nirqayku: Paykunachus noqanchistapas wawanchiskunatapas chhaynata ninqaku chayqa, paykunatan nisunchis: Qhawariychis ñaupa taytaykuq ruwasqan altarta, chay altarqa Jehová Diospa altarninwan igual-llan kashan. Ichaqa manan chayqa ruphachina ofrenda jaywanapaqchu ni sacrificiokuna jaywanapaqchu, aswanpas chay altarqa qankunawan noqaykuwan wayqentin kasqanchismanta testigo kananpaqmi, nispa. 29 ¡Noqaykuqa manan jayk’aqpas Jehová Dios contraqa jatariykumanchu,+ manataqmi jayk’aqpas juj altartaqa ruwaykumanchu Jehová Diosman sacrificiokunata jaywanaykupaqqa! Noqaykuqa Jehová Diospa ñaupanpi kaq altarllapin ruphachina ofrendakunatapas, jak’u ofrendakunatapas, ima sacrificiotapas jaywasaqku”,+ nispa.

30 Rubén ayllu runakuna, Gad ayllu runakuna, kuskan Manasés ayllu runakunapas chayta nisqanwanmi sacerdote Finehaspas Israel umallikunapas thaj kapurqanku.+ 31 Chaymi Eleazarpa churin sacerdote Finehasqa Rubén ayllu runakunata, Gad ayllu runakunata, Manasés ayllu runakunatawan nirqan: “Manataq Jehová Dios contra juchallikurqankichischu chayqa, kunanqa allintan yachayku Jehová Diosqa noqanchiswan kashasqanta. Qankunan Jehová Diospa phiñakuyninmanta llapa Israel llaqtata librashankichis”, nispa.

32 Jinan Eleazarpa churin sacerdote Finehasqa Israel umallikunapiwan Rubén ayllu runakunaq Gad ayllu runakunaq ñaupanmanta kutipurqanku Canaán jallp’aman. Jinaspan llapa rimasqankuta Israel runakunaman willarqanku. 33 Chay willakuyta uyarispan Israel runakunaqa thaj kapurqanku, Diostapas alabarqanku. Manañan rimarqankuchu Rubén ayllu runakunawan Gad ayllu runakunawan maqanakuymantapas.

34 Rubén ayllu runakuna Gad ayllu runakunan chay altarman sutita churarqanku,* paykunan nirqanku: “Chay altarmi testigonchis Jehová Dios cheqaq Dios kasqanmanta”, nispa.

23 Jehová Diosqa askha watakunañan Israel runakunata thajpi tiyachisharqan,+ manan guerrakuna karqanñachu; Josuepas kuraqñan kapurqan, sinchitañan machuyaykapusharqan.+ 2 Jinan Josueqa llapa Israel runakunata, umalliqkunata,* jefekunata, juezkunata, oficialkunatawan+ wajamuspa+ nirqan: “Rikusqaykichis jina kuraqñan kapuni, sinchitaña machuyaykapushanipas. 3 Qankunaq yachasqaykichis jina, ñawiykichispas rikusqan jina, Jehová Diosmi llapa kay nacionkunataqa chinkachirqan, Jehová Diosmi qankunarayku maqanakurqan.+ 4 Qankunamanmi herenciata qorqaykichis+ Jordán mayumanta inti jaykuy ladopi Jatun lamar-qochakama* chinkachisqay runakunaq jallp’ankunata,+ wakin nacionkuna manaraq atipasqachu kashan chaypas qankunaqmi chay jallp’akunapas.+ 5 Jehová Diosmi chay runakunataqa qankunarayku ñaupaykichismanta qarqorqan,+ chaymi qankunaqa Jehová Diospa prometesqanman jina paykunaq jallp’anpi tiyashankichis.+

6 ”Kunanqa kallpachakuychis kasukuq kanaykichispaq, Moisespa qelqasqan llapa kamachikuykunata+ kasukunaykichispaqpas. Aman jayk’aqpas chaymantaqa t’aqakunkichischu ni paña ladomanpas ni lloq’e ladomanpas.+ 7 Aman jayk’aqpas kay nacionkunamanta runakunawanqa juñukunkichischu,+ aman diosninkunaq sutintaqa rimarillankichispaschu+ ni chay dioskunaq sutinpiqa jurankichispaschu; aman jayk’aqpas chay yanqa dioskunamanqa qonqorikunkichischu ni servinkichispaschu.+ 8 Aswanmi imaynan ruwashankichis jina Jehová Diosnillaykichisman k’askakunkichis.+ 9 Chayta ruwankichis chayqa Jehová Diosniykichismi ñaupaykichismanta jatun nacionkunata chinkachinqa.+ Yachasqaykichis jina manan kunankama juj runapas qankuna contra jatariyta atinchu.+ 10 Diosniykichis Jehová Diosmi prometesqanman jina+ qankunarayku maqanakushan.+ Jujnillaykichismi waranqa runakunata qatirinqa.+ 11 Qankuna kikiykichista tukuy tiempo allinta cuidakuychis,+ chaypaqqa Diosniykichis Jehová Diostan munakunaykichis.+

12 ”Ichaqa sichus mana kasukunkichischu, jinaspa kay nacionkunamanta+ runakunawan casarakunkichis,+ paykunawan kuskataq tiyankichispas chayqa, 13 manan Jehová Diosniykichisqa chay nacionkunata qankunaq ñaupaykichismanta qarqonqachu.+ Chhaynapin paykunaqa qankunapaq trampa jina castigo jina kanqa,+ ñawiykichispi kiska jina kanqa, chhaynan kanqaku Jehová Diospa qosqasuykichis jallp’amanta chinkanaykichiskama.

14 ”Rikusqaykichis jina, noqaqa wañupunaypaqñan kashani. Qankunaqa allintan yachankichis* Jehová Diospa rimasqanqa llapallanpuni junt’akusqanta, qankunaq allinniykichispaqmi payqa llapa prometesqanta junt’arqan, manan jujpas mana junt’asqaqa karqanchu.+ 15 Ichaqa, imaynan Jehová Diosqa llapa allin promesankunata junt’arqan,+ chhaynatan Jehová Diosqa imaymana llakikunapi tarikunaykichispaq rimasqantapas junt’allanqataq. Kay qosqasuykichis jallp’amantapas Jehová Diosqa chinkachisunkichismi.+ 16 Manachus Jehová Diospa kamachisqankunata kasukunchichis, yanqa dioskunatachus adorankichis paykunamanchus qonqorikunkichispas chayqa Jehová Diosniykichismi qankunapaq phiñakunqa,+ jinaspan kay qosqasuykichis jallp’amanta ñawi ch’illmiyllapi chinkachipusunkichis”,+ nispa.

24 Chaymantataq Josueqa Shejen llaqtapi llapa Israel ayllukunata juñurqan, jinaspa wajarqan Israelpi umalliqkunata,* jefekunata, juezkunata, oficialkunatawan.+ Jinan paykunaqa Diospa ñaupanpi juñukurqanku. 2 Chaypin Josueqa Israel runakunata nirqan: “Israelpa Diosnin Jehová Diosmi nin: Éufrates mayuq jaqay ladonpin ñaupa taytaykichiskunaqa+ tiyarqanku,+ Abrahanpa Nacorpa taytan Tarepas chay ladopin tiyarqan. Paykunaqa yanqa dioskunatan adoraqku.+

3 ”Chay Éufrates mayuq chimpanmantan ñaupa taytaykichis Abrahantaqa+ pusamurqani, jinaspa llapa Canaán jallp’api purichirqani, chaypin wawankunatapas askhayachirqani.+ Paymanmi qorqani Isaacta,+ 4 Isaacmantaq qorqani Jacobta Esautawan.+ Esaumanmi qorqani Seír orqota,+ Jacobtaq wawakunantin Egiptoman jaykurqan.+ 5 Tiempowantaq Moisesta Aarontawan kachamurqani+ Egiptomanta orqomunasuykichispaq, chaypaqmi imaymanakunawan Egipto runakunata ñak’arichirqani.+ Chhaynatan chaymanta qankunata orqomurqaykichis. 6 Egiptomanta ñaupa taytaykichiskunata orqomuqtiyqa+ Egipto soldadokunan qhepankuta phawamurqanku carretakunantin caballokunantin Puka lamar-qochakama.+ 7 Chayta rikuspan paykunaqa noqa Jehová Diosta wajakamuwarqanku,+ chaymi noqaqa paykunata cuidanaypaq Egipto runakunaq ñaupanpi yana phuyuta sayarichirqani, chaymantataq chay Egipto runakunata lamar-qochawan millp’uchirqani.+ Ñaupa taytaykichiskunaqa ñawinkuwanpunin rikurqanku Egipto runakunata imachus ruwasqayta.+ Chaymantataq qankunaqa unay watakuna ch’inneqpi purirqankichis.+

8 ”Chaymantataq pusamurqaykichis Jordán mayuq inti lloqsimuy ladonpi amorreo runakunaq tiyasqanman. Chaypin paykunaqa qankunawan maqanakuq lloqsimurqanku,+ jinan noqaqa jallp’ankuta jap’ikapunaykichispaq qankunaq makiykichisman paykunata entregarqaykichis, chhaynapin chay amorreo runakunata chinkachirqani.+ 9 Chaypin Moab runakunaq reynin Ziporpa churin Balacpas sayarimurqan qankunawan maqanakuq. Paymi wajachimurqan Beorpa churin Balaamta qankunata ñakanasuykichispaq.+ 10 Noqan ichaqa mana kasurqanichu Balaamta,+ aswanmi payqa askha kutipi bendecirqasunkichis,+ chhaynapin paypa makinmanta librarqaykichis.+

11 ”Chaymantataq Jordán mayuta chimpachispa+ Jericó llaqtaman chayachimurqaykichis.+ Chaypin qankunawan maqanakuq lloqsimurqan Jericó llaqta umallikuna, amorreo runakuna, perizita runakuna, Canaán runakuna, Het runakuna, guirgaseo runakuna, heveo runakuna, Jebús runakunapiwan. Noqan ichaqa paykunata qankunaq makiykichisman entregarqaykichis.+ 12 Noqan amorreo runakunaq iskaynin reyninkunata qankunaq ñaupaykichispi mancharichirqani, jinaspa paykunata chinkachirqani.+ Manan qankunaq espadaykichiswanchu ni flechaykichiswanchu paykunaqa wañuchisqa karqanku.+ 13 Chhaynapin qankunaman qorqaykichis jallp’akunata mana perqasqaykichis llaqtakunatawan+ chaypi tiyanaykichispaq. Chaymantapas qankunaqa mana plantasqaykichis uvaskunata aceitunakunatawanmi+ mijushankichis, nispa.

14 ”Chhaynaqa Jehová Diosta manchakuychis, payllata serviychis tukuy sonqowan tukuy yuyaywan.+ Qankuna ukhumanta chinkachiychis Éufrates mayu chimpapi ñaupa taytaykichiskunaq servisqan dioskunata, Egiptopi servisqanku dioskunatapas,+ jinaspa Jehová Diosllata serviychis. 15 Manachus Jehová Diosta serviyta munankichis chayqa kunanpacha ajllakuychis mayqen diostachus serviyta munankichis chayta:+ Éufrates mayu chimpapi ñaupa taytaykichiskunaq servisqan yanqa dioskunatachu+ icha kay tiyasqaykichis llaqtapi amorreo runakunaq diosninkunatachu.+ Noqawan wasiypi kaqkunapiwanmi ichaqa Jehová Diosllata servisaqku”, nispa.

16 Chaykunata uyarispan Israel runakunaqa nirqanku: “Manan jayk’aqpas Jehová Diostaqa saqeykumanchu, manan juj dioskunatapas serviykumanchu. 17 Jehová Diosmi noqanchistapas ñaupa taytanchistapas Egiptomanta orqomuwarqanchis,+ paymi esclavo kasqanchismanta libramuwarqanchis,+ paymi rikushaqtinchis+ jatun milagrokunata ruwaspa pusamuwarqanchis llaqtakunaq chaupintapas pasachimuwarqanchis.+ 18 Jehová Diosmi kay tiyasqanchis llaqtakunamanta llapa runakunata amorreo runakunatapas qarqorqan. Chaymi noqaykupas Jehová Diosllata servisaqku, paymi Diosninchisqa”, nispa.

19 Jinan Josueqa paykunata nirqan: “Jehová Diosqa ch’uya Diosmi,+ payqa tukuy sonqowan servinanchistan munan,+ ¿atiwaqchischu pay serviyta? Pay contrachus jatarinkichis juchallikunkichispas chayqa, manan payqa perdonasunkichischu.+ 20 Sichus Jehová Diosta saqespa yanqa dioskunata servinkichis chayqa paymi qankuna contra jatarispa ch’usaqman tukuchisunkichis. Ñaupaqpi allinkunataña qankunarayku ruwarqan chaypas chinkachisunkichismi”,+ nispa.

21 Israel runakunataq Josueta nirqanku: “¡Noqaykuqa Jehová Diosllatan servisaqku!”,+ nispa. 22 Jinan Josueqa paykunata nirqan: “Qankuna kikiykichismi ajllakushankichis Jehová Dios serviyta, qankunallataqmi testigo kankichis chay nisqaykichismanta”,+ nispa. Paykunataq nirqanku: “¡Arí, testigon kayku!”, nispa.

23 Josuetaq nirqan: “Chhaynaqa qankuna ukhumanta chinkachiychis yanqa dioskunata, jinaspa Israelpa Diosnin Jehová Diosta tukuy sonqowan serviychis”, nispa. 24 Israel runakunataq Josueta nirqanku: “¡Noqaykuqa Jehová Diosnillanchistan servisaqku, payllatan kasukusaqkupas!”, nispa.

25 Chay p’unchaymi Josueqa Shejen llaqtapi Israel runakunawan rimanakurqan, jinaspa paykunaman qorqan kamachikuykunata. 26 Chay kamachikuykunatan Josueqa qelqarqan Diospa kamachikuynin libropi.+ Chaymantataq Jehová Diospa ch’uyanchasqan cercapi kaq jatun sach’a chakipi jatun rumita churarqan.+

27 Chaymantataq Josueqa Israel runakunata nirqan: “Kay rumin uyarishan Jehová Diospa llapa niwasqanchista, kay rumin qankunapaq testigo kanqa,+ chhaynapi ama jayk’aqpas Diosta neganaykichispaq”, nispa. 28 Chayta nispan Josueqa llapa runakunata wasinkuman kachapurqan.+

29 Chaykuna qhepatan Jehová Diospa kamachin Nunpa churin Josueqa pachaj chunkayoq watanpi kashaspa wañukapurqan.+ 30 Jinaspa herencia chaskisqan Timnaj-Séra+ llaqtapi p’ampapurqanku, chayqa Efraín orqo-orqopin kashan, Gas orqoq wichay ladonpi. 31 Josuepa tiemponpipas, wañupusqan qhepaman umalliqkunaq tiemponpipas Jehová Diospa tukuy imapas ruwasqanta rikuq Israel runakunaqa Jehová Diosllatan servirqanku.+

32 Egiptomanta apamusqanku Josepa tullunkunataqa+ Shejen llaqtapin Israel runakunaqa p’ampapurqanku. Chaypin Jacobqa pachaj qolqewan+ jallp’ata rantirqan Jamor runaq wawankunamanta,+ payqa Shejenpa taytanmi karqan. Chay jallp’ataqa Josepa wawankunan herenciapi chaskirqanku.+

33 Aaronpa churin Eleazarpas wañukapullarqantaqmi.+ Paytaqa churin Finehaspa+ chaskisqan moqopin p’ampapurqanku Efraín orqo-orqopi.