APOCALIPSIS

1 Kayqa Jesucristoq rikuchisqanmi, chaytan Diosqa payman encargasqa+ imakunachus yaqaña pasanqa chaykunata kamachinkunaman rikuchinanpaq.+ Jesustaq angelninta kachamuspa kamachin Juanman mosqoypi jina chaykunata rikuchirqan,+ 2 paymi willarqan Diospa imakunachus willasqanta, Jesucristoq imakunachus willasqantawan. Arí, payqa tukuy imachus rikusqantan willarqan. 3 Kusisqan pipas kay profeciata jujkunaman leeqqa, chayta uyarispa chaypi qelqasqa kaqkunata kasukuqkunapas.+ Señalasqa tiempoqa cercapiñan kashan.

4 Noqa Juanmi kaykunata qelqamushaykichis qankuna Asia provinciapi kaq qanchis iñiq t’aqakunaman:+

Qankunawan kachun “pichus karqan, pichus kashan, pichus jamunqa”+ chaypa, jinallataq trononpa ñaupanpi qanchis espiritukunaq+ ancha sumaq sonqo kaynin thaj kayninpas. 5 Chaymantapas qankunawan kachun Jesucristoq ancha sumaq sonqo kaynin thaj kayninpas, paymi “junt’aq testigoqa”,+ “wañusqakunamanta phiwi* kaqpas”,+ “kay pacha reykunaq kamachiqninpas”.+

Paymi munakuwaqninchisqa,+ juchanchiskunamanta yawarninwan librawaqninchispas.+ 6 Payllataqmi Taytan Diospaq reykunaman+ sacerdotekunamanwan+ tukuchiwaqninchispas. Chayrayku paypaq kachun wiñay-wiñaypaq qhapaq kaypas atiypas. Amén.*

7 ¡Qhawariychis! Paymi jamushan phuyukuna ukhupi,+ llapa runakunan rikunqaku, t’urpuqninkunapas rikunqakun. Payraykun kay pachapi llapa ayllukuna llakikuymanta sonqonkuta takakunqaku.+ Arí, chhaynapunin kanqa. Amén.

8 Jehová* Diosmi nin: “Noqan kani alfapas omegapas,*+ pichus karqan, pichus kashan, pichus jamunqa chay; noqan kani tukuy atiyniyoqqa”,+ nispa.

9 Jesuswan jujllachasqa kasqayrayku+ aguantaqmasiykichis,+ ñak’ariqmasiykichis,+ Diospa gobiernontapas chaskiqmasiykichis+ noqa wayqeykichis Juanmi Patmos islapi kasharqani Diosmanta rimasqayrayku Jesusmanta rimasqayrayku ima. 10 Jinan santo espirituq junt’aykusqan kaspa qonqaylla Señorpa p’unchayninpi rikurukuni, chaypin juj kunka trompetaq waqaynin jinaraq fuerteta qhepaymanta 11 nimushawasqa: “Imachus rikusqaykita k’uyupi qelqay, chay qelqa k’uyutataq apachiy qanchis iñiq t’aqakunaman: Efesoman,+ Esmirnaman,+ Pergamoman,+ Tiatiraman,+ Sardisman,+ Filadelfiaman,+ Laodiceaman ima”,+ nispa.

12 Jinan pichus rimapayamushawan chayta rikunaypaq kutiriqtiy qanchis qori candelerokuna* chaypi kashasqa,+ 13 chay candelerokuna ukhupitaq kashasqa runaq Churin jina juj runa,+ pampakama p’achawan churaykusqa, qhasqonpi* qori chumpiwan chumpiykusqa ima. 14 Umanpas chujchanpas yuraq willma jina rit’i jinan yuraqllaña kasqa, ñawinpas nina rauray jinan kasqa,+ 15 chakinpas hornopi k’ancharishaq cobre jinan kasqa,+ kunkantaq jatun phaqchaq rimarisqan jinaraq kasqa. 16 Paña makinpin qanchis ch’askakunata jap’ishasqa,+ siminmantataq iskay ladonman filoyoq jatun espada lloqsimushasqa,+ uyanpas chaupi p’unchaypi k’ancharishaq inti jinaraqmi kasqa.+ 17 Payta rikuspaymi noqaqa wañusqa jinaraq ñaupanman wijch’ukuni.

Jinan payqa paña makinwan llamiykuspa niwan: “Ama manchakuychu, noqan kani ñaupaq kaqpas+ qhepa kaqpas,+ 18 kausaqpas.+ Wañusqan kasharqani,+ kunanmi ichaqa kausashani, wiñay-wiñaypaqtaq kausasaqpas;+ noqan jap’ishani wañuypa llaventa Sepulturaq* llaventapas.+ 19 Chayrayku qelqay imakunatachus rikurqanki chayta, imakunachus kunan pasashan chayta, imakunachus chay qhepaman pasanqa chaytapas. 20 Paña makiypi rikusqayki ch’askakunapas, qanchis qori candelerokunapas Diospa pakasqa ch’uya yachayninkunan. Chay qanchis ch’askakunaqa qanchis iñiq t’aqapi kaq angelkunawanmi tupan, qanchis candelerokunataq qanchis iñiq t’aqakunawan tupan.+

2 ”Éfeso iñiq t’aqapi+ kaq angelman qelqay:+ Khaynatan nin pichus qanchis ch’askakunata paña makinpi jap’ishan chay, pichus qanchis qori candelerokuna* ukhupi purishan chay:+ 2 Yachanin imachus ruwasqaykita, imayna llank’asqaykita, imakuna aguantasqaykita, imaynas mana allin runakunatapas mana jinallatachu qhawanki chayta, imaynas apostolmi kayku niqkunatapas+ pruebaman churaspa llulla kasqankuta tarirqanki chaytapas. 3 Chaymantapas kusatan qanqa aguantashanki, imaymanakunatan sutiyraykupas aguantashanki,+ manataqmi sayk’unkipaschu.+ 4 Chhaynaña kaqtinpas, munakuyniykiqa manañan qallariypi jinañachu kashan, chaypin mana allinchu kashanki.

5 ”Reparakuy maymantachus urmaykamunki chayta, jinaspa pesapakuspa Diosman kutirikuy,+ ñaupaqpi jinataq imatapas ruway. Manachus chayta ruwanki chayqa, jamuspan candeleroykita maypichus kasqanmanta apapusaq,+ pesapakuqtiykiñan manaqa.+ 6 Ichaqa allintan ruwashanki Nicolaspa t’aqanmanta kaqkunaq+ ruwasqanta cheqnikuspaqa, noqapas cheqnikunin chaytaqa. 7 Pipas ninriyoqqa uyarichun imatachus santo espíritu* iñiq t’aqakunata nishan chayta.+ Pipas atipaqmanqa+ Diospa paraisonpi kaq kausay sach’aq ruruntan mijuchisaq,+ nispayki.

8 ”Esmirna iñiq t’aqapi kaq angelmanpas qelqallaytaq: Khaynatan nin pichus ñaupaq kaqpas qhepa kaqpas+ chay, pichus wañusqa kashaspa kausarimpurqan chay:+ 9 Yachanin ñak’arisqaykita wajcha kasqaykitapas, ichaqa qhapaqmi kanki.+ Yachallanitaqmi mana judío kashaspa judion kani niqkuna millayta k’amisqasuykitapas, paykunaqa Satanaspa sinagoganmi* kanku.+ 10 Imaymanakunapin ñak’arinayki kanqa, aman chaytaqa manchakunkichu.+ Saqraqa wisq’achishallanqan carcelman qankunamanta wakinniykichista, chhaynapi allin probasqa kanaykichispaq, chunka p’unchayta ñak’arinaykichispaqwan. Ichaqa wañunaykikama junt’aq sonqo kay; chayta ruwanki chayqa, kausay coronatan qosayki.+ 11 Pipas ninriyoqqa uyarichun+ imatachus santo espíritu iñiq t’aqakunata nishan chayta. Pipas atipaqtaqa+ manapunin iskay kaq wañuyqa imananqapaschu,+ nispayki.

12 ”Pérgamo iñiq t’aqapi kaq angelmanpas qelqallaytaq: Khaynatan nin pichus iskay ladonman filoyoq filollaña jatun espadata jap’ishan chay:+ 13 Yachanin maypichus Satanaspa tronon kashan chaypi tiyasqaykita, chaywanpas kusatan qanqa sutiyman k’askakushanki;+ chaymantapas yachanin junt’aq sonqo testigoy Antipaspa tiemponpipas+ noqapi iñisqaykita mana negasqaykita,+ paytaqa llaqtaykipin wañuchirqanku,+ arí, maypichus Satanás tiyan chaypi.

14 ”Chaywanpas kashanmi contraykipi imachus ninay: ¿Imaynapitaq qanqa Balaampa+ yachachikuyninman k’askakuqkunata jinata qhawashanki? Chay Balaammi Balacta+ yachachirqan Israel runakuna urmananpaq ima trampatachus churanman chayta, arí, idolokunaman sacrificio jaywasqakunata mijuchinanpaq, qhelli jucha* ruwayman urmachinanpaq iman yachachirqan.+ 15 ¿Imaynapitaq Nicolaspa t’aqanmanta kaqkunaq+ yachachisqanman k’askakuqkunatapas jinallata qhawashanki? 16 Chaykunamanta pesapakuspa Diosman kutirikuy, manachus chayta ruwanki chayqa, apuraymi qanman jamusaq, jinaspa simiymanta lloqsimuq jatun espadawan+ paykuna contra guerrata ruwasaq.

17 ”Pipas ninriyoqqa uyarichun imatachus santo espíritu iñiq t’aqakunata nishan chayta.+ Pipas atipaqmanqa+ pakasqa kaq maná nisqatan wakinta qosaq,+ qollasaqtaqmi juj yuraq rumichatapas, chay rumichapin mana piqpa yachasqan juj mosoq suti qelqasqa kanqa, pichus chaskiqllan chaytaqa yachanqa, nispayki.

18 ”Tiatira iñiq t’aqapi kaq angelmanpas qelqallaytaq:+ Khaynatan nin Diospa Churin, pichus nina rauray jina ñawiyoq,+ pichus k’ancharishaq cobre jina chakiyoq+ chay: 19 Yachanin imachus ruwasqaykita, imayna munakuqchus kasqaykita, imayna iñiqchus kasqaykita, Diospaq llank’ayniykipas imaynachus kasqanta, imayna aguantaqchus kasqaykitapas. Chaymantapas kunankuna imapas ruwasqaykiqa ñaupaqpi ruwasqaykimantapas aswan allinraqmi kashan.

20 ”Chaywanpas kashanmi qan contra imachus ninay: ¿Imaynapitaq qanqa profetisaman tukuq chay Jezabel warmita jinallata qhawashanki?+ Paymi yachachikuyninkunawan kamachiykunata pantachishan qhelli jucha ruwayman jaykunankupaq,+ idolokunaman jaywasqa sacrificiokunata mijunankupaqwan. 21 Tiempotapas qonin chay juchanmanta pesapakuspa Diosman kutirikunanpaq, ichaqa manan munanchu chay qhelli jucha ruwaynin saqeyta. 22 Chaymi kunallan mana jatariy atinankama paytaqa onqochisaq; pikunachus paywan pantarqanku chaykunatapas allintan ñak’arichisaq manachus chay warmiq ruwasqan jina ruwasqankuta saqepunqaku* chayqa. 23 Wawankunatapas wañuyman apaq onqoywanmi wañuchisaq, chhaynapin llapa iñiq t’aqakuna yachanqa noqaqa runaq sonqonpi imachus kasqanta, sonqon ukhupipuni imachus piensasqanta allin-allinta t’aqwiq kasqayta; sapankamanmi qosaykichis imachus ruwasqaykichisman jina.+

24 ”Tiatirapi kaq wakinniykichistan ichaqa niykichis, arí, qankuna chay warmiq yachachikuyninta mana kasukuqkunata, “Satanaspa pakasqa yachachikuynin”+ nisqatapas mana reqsiqkunata: Manan ima waj ruwanatachu qankunamanqa yapashaykichis. 25 Chaywanpas jamunaykama imatachus jap’ishankichis chayman allinta k’askakuychis.+ 26 Pipas atipaqmanqa kamachisqaytapas tukukuykama kasukuqmanqa atiytan qosaq nacionkunata kamachinanpaq,+ 27 imaynan Taytaymantapas chaskirqani chhayna atiyta; jinan payqa fierro varawan runakunata michinqa,+ jinaspa t’uru p’uyñuta jina lliuta ñut’unqa. 28 Chaymantapas pacha paqariy ch’askatan qollasaqtaq.+ 29 Pipas ninriyoqqa uyarichun imatachus santo espíritu iñiq t’aqakunata nishan chayta, nispayki.

3 ”Sardis iñiq t’aqapi kaq angelmanpas qelqallaytaq: Khaynatan nin pichus Diospa qanchis espiritunkunata jap’ishan chay,+ arí, pichus qanchis ch’askakunata jap’ishan chay:+ Yachanin imachus ruwasqaykita. Jujkunaq rikunanpaqqa kausashankipaschá, ichaqa wañusqan qanqa kashanki.+ 2 Chayrayku rijch’asqalla kay,+ jinaspa pikunachus wañuy patapiña kasharqanku chaykunata kallpachay; manan qanqa allintachu junt’ashanki Diosniypa munayninta. 3 Chayrayku yuyariy imatachus chaskirqanki imatachus uyarirqanki chayta, jinaspa chayman k’askakuy, pesapakuytaq mana allin ruwasqaykimantapas.+ Manachus rijch’arinki chayqa, suwa jinan qonqaylla jamusaq,+ manataqmi yachankichu imay horastachus jamusayki chaytapas.+

4 ”Chaykunaña kashan chaypas, qankuna ukhupiqa kashanmi p’achankuta mana qhellichaq wakin runakuna,*+ paykunan yuraq p’achawan churaykusqakama noqawan kuska purinqaku,+ chaypaq jina kasqankurayku. 5 Pipas atipaqqa+ chhayna yuraq p’achawan p’achachisqan kanqa,+ sutintapas manan jayk’aqpas kausay libromanta borrasaqchu,+ aswanmi paytaqa reqsikapusaq Taytaypa ñaupanpi angelkunaq ñaupanpipas.+ 6 Pipas ninriyoqqa uyarichun imatachus santo espíritu iñiq t’aqakunata nishan chayta, nispayki.

7 ”Filadelfia iñiq t’aqapi kaq angelmanpas qelqallaytaq: Khaynatan nin pichus ch’uya,+ pichus cheqaq kaq,+ pichus Davidpa llaventa jap’ishan chay,+ arí, pichus mana wisq’ay atiyta kichan, mana kichay atiytataq wisq’anpas chay: 8 Yachanin imachus ruwasqaykita, chaymi ñaupaykiman punkuta kicharparini,+ chaytaqa manan pipas wisq’ayta atinmanchu. Qanqa pisi kallpaña kashaspapas kasuwarqankin simiytaqa, sutiytapas manapunin negarqankichu. 9 Mana judío kashaspa llullakuspa judion kani niqkunaqa+ Satanaspa sinagoganmi kanku, paykunatan ñaupaykiman qonqorichisaq, chhaynapin rikuchisaq noqaqa qanta munakusqayta. 10 Imayna aguantasqaymanta willasqa simita kasukusqaykiraykun+ waqaychasayki pruebapi tarikuqtiyki,+ chay pruebaqa llapa kay pachamanmi jamunqa, chhaynapi llapa runakuna pruebaman churasqa kananpaq. 11 Noqaqa yaqañan jamusaq,+ chayrayku allinta jap’ishay imatachus jap’ishanki chayta; chayta ruwanki chayqa, manan pipas qechusunkichu coronaykita.+

12 ”Pipas atipaqtaqa Diosniypa adorana wasinpi columna kananpaqmi churasaq, manan jayk’aqpas chaymantaqa lloqsinqachu, paypin qelqasaq Diosniypa sutinta, Diosniypa llaqtanpa sutinta,+ arí, Diosniymantapacha janaq pachamanta uraykamuq Mosoq Jerusalenpa sutinta,+ mosoq sutiyta ima.+ 13 Pipas ninriyoqqa uyarichun imatachus santo espíritu iñiq t’aqakunata nishan chayta, nispayki.

14 ”Laodicea iñiq t’aqapi kaq angelmanpas qelqallaytaq:+ Khaynatan nin pitachus Amén nikun chay;+ pichus cheqaq, junt’aq testigo chay;+ pitachus ñaupaqta Dios kamarqan chay:+ 15 Yachanin imachus ruwasqaykita, yachanin mana ruphachu ni chirichu kasqaykitapas. Maytan munayman ruphapas chiripas kanaykita. 16 Tibiollataq kanki chayqa, manataq ruphapaschu+ ni chiripaschu kanki chayqa,+ simiymantan aqturparisayki. 17 Qanqa “qhapaqmi kani,+ askhan imaykunapas, manan imatapas munaniñachu” nispan nishanki. Ichaqa manan reparakunkichu mana imayoq, khuyapayana, wajcha, ñausa, mana ima p’achayoq q’alalla kasqaykita. 18 Chayraykun niyki: Noqamanta rantikuway ninawan ch’uyayasqa qorita, chhaynapi qhapaq kanaykipaq; rantikuway yuraq p’achakunatapas, chhaynapi amaña p’enqaychu q’alalla purishanaykipaq,+ aswanpas p’achasqa kanaykipaq; rantikuway ñawi jampitapas,+ chhaynapi chayta ñawiykiman llusikuspa rikunaykipaq.+

19 ”Noqaqa pitachus munakuni chaytan anyani, chaytan wanachinipas.*+ Chayrayku juchaykimanta pesapakuspa Diosman kutirikuy,+ jinaspa tukuy sonqoykiwan Diosta serviy. 20 ¡Qhawariy! Noqaqa wasi punkupin kashani punkuta takaspa, pipas uyarimuwaspa punkunta kichamuwanqa chayqa, noqan chay wasiman jaykusaq, paywan kuskataq cenasaq, paytaq noqawan kuska cenanqa. 21 Pipas atipaqtaqa+ tronoypin noqawan kuskata tiyachisaq,+ imaynan Taytaypas atipasqayrayku trononpi paywan kuskata tiyachiwarqan+ chhaynata. 22 Pipas ninriyoqqa uyarichun imatachus santo espíritu iñiq t’aqakunata nishan chayta, nispa”.

4 Chaykuna qhepatan rikurullanitaq janaq pachapi juj punku kicharayashaqta, ñaupaqtaqa chaymanta juj kunka trompeta jinaraq rimapayamushawaqtan uyarini, chay kunkan nimushawasqa: “Kayman wichamuy, jinan rikuchisayki imakunachus qhepaman pasanqa chayta”, nispa. 2 Chaymantataq chay ratupacha santo espirituq atiyninpi kaspa rikuruni janaq pachapi juj tronota, chay tronopin pichá tiyashasqapas.+ 3 Chaypi tiyaqqa jujninpin jaspe rumi jina kasqa,+ jujninpitaq sardio rumi jina kasqa. Chay tronotataq esmeralda rumiman rijch’akuq k’uychi* muyuykushasqa.+

4 Chay tronoq muyuriqninpin kallasqataq iskay chunka tawayoq tronokuna, chay tronokunapitaq tiyashasqa iskay chunka tawayoq kuraq runakuna,+ yuraq p’achawan p’achasqakama, umankupi qori coronayoqkama. 5 Chay tronomantataq rayo lliphipipimushasqa+ t’ojamushasqa ima,+ kunkakunapas rimamushasqa. Chay tronoq ñaupanpin kashallasqataq qanchis raurashaq jatun mecherokuna,* chaykunaqa Diospa qanchis espiritunwanmi tupan.+ 6 Chay tronoq ñaupanpin kallasqataq imachá kanpas vidrio jina qochaman rijch’akuq,+ cristal rumiman rijch’akuq.

Chay tronoq kasqan chaupipi muyuriqninpipas kallasqataqmi tawa kausashaqkunapas,+ paykunaqa kasqaku ñaupankupipas qhepankupipas askha ñawikunayoqmi. 7 Ñaupaq kaq kausashaqqa león jinan kasqa,+ iskay kaq kausashaqtaq malta toro jina kasqa,+ kinsa kaq kausashaqtaq+ runaq uyan jina uyayoq kasqa, tawa kaq kausashaqtaq+ phalashaq anka jina kasqa.+ 8 Chaymantapas chay tawa kausashaqkunaqa sapankan soqta rafrayoqkama kasqaku, llapa muyuriqninkupi urankupi ima ñawiyoqtaqmi kasqakupas.+ Paykunan mana sayk’uspa tuta-p’unchay nishanku: “Ch’uya, ch’uya, ch’uyapunin tukuy atiyniyoq Jehová* Diosqa,+ paymi ñaupaq kaqpas, kunan kaqpas, jamuq kaqpas”,+ nispa.

9 Chay kausashaqkuna tronopi tiyaqta, wiñay-wiñaypaq kausaqta+ sapa alabaqtinku, jatunchaqtinku, graciastapas qoqtinkun, 10 chay iskay chunka tawayoq kuraq runakunaqa+ chay tronopi tiyaqpa ñaupanman k’umuykuspa chay wiñay-wiñaypaq kausaqta adoraq kasqaku, tronoq ñaupanman coronankuta wijch’urparispataq niq kasqaku: 11 “Qanqa, Jehová* Diosniyku, alabaytapas,+ jatunchaytapas,+ atiytapas+ chaskinaykipaq jinapunin kanki, tukuy imatapas qan kamasqaykirayku,+ arí, qanpa munayniykipin tukuy imapas kashan, munayniykipin kamasqapas karqanku”, nispa.

5 Chayllamanmi rikurullanitaq chay tronopi tiyaqpa+ paña makinpi juj qelqa k’uyuta iskay ladonpi qelqasqata, qanchis sellokunawan allin jap’ichisqata. 2 Chaymantataq rikuruni juj kallpasapa angelta, alto kunkawan: “¿Pin kay qelqa k’uyuta kichananpaq jina kanman, chaypi sellokunatapas p’akinanpaq jina kanman?”, nispa nishaqta. 3 Ichaqa manan pipas karqanchu ni janaq pachapipas, ni jallp’a pachapipas, ni jallp’a pacha ukhupipas chay qelqa k’uyuta kichaspa leeq. 4 Mana pipas chay qelqa k’uyuta kichaspa leenanpaq jina kaqtinmi noqaqa khuyayta waqayta qallarisharqani; 5 chayllamanmi jujnin kuraq runa niwan: “Amaña waqaychu. ¡Qhawariy! Davidpa+ saphin+ Judá ayllumanta leonmi+ atipan,+ chaymi payqa chay qelqa k’uyuta qanchis sellonkunatawan kichananpaq jina kashan”, nispa.

6 Jinan chayllaman rikuruni tronoq kasqan chaupipi, tawantin kausashaqkunaq chaupinpi, chay kuraq runakunaq chaupinpi+ ima juj corderota+ ñak’asqapas kanman karqan jinata,+ chay corderon kasqa qanchis waqrayoq qanchis ñawiyoq ima. Chay ñawikunan tupan jinantin jallp’a pachaman Diospa kachasqan qanchis espiritukunawan.+ 7 Jinan payqa chay tronopi tiyaqpa+ ñaupanman qayllaykuspa paña makinmanta chay qelqa k’uyuta chaskirqan. 8 Chay qelqa k’uyuta chaskiqtinmi chay tawa kausashaqkunaqa chay iskay chunka tawayoq kuraq runakunapiwan+ chay corderoq ñaupanman k’umuykurqanku; chay kuraq runakunaqa sapankankun arpayoqkama, qori pocillopi junt’a inciensoyoqkama kasqaku. (Chay inciensoqa ch’uya runakunaq mañakusqanwanmi tupan).+ 9 Paykunan juj mosoq takita takispa+ ninku: “Qanqa chay qelqa k’uyuta chaskinaykipaq sellonkunatapas kichanaykipaq jinapunin kanki, qan ñak’asqa kaspa yawarniykiwan llapa ayllukunamanta, llapa rimaykunamanta, llapa llaqtakunamanta, llapa nacionkunamantawan+ Diospaq runakunata rantipusqaykirayku,+ 10 paypaq reykunaman+ sacerdotekunaman tukuchisqaykirayku ima;+ paykunan lliu jallp’a pachata reykuna jina gobiernanqaku”,+ nispa.

11 Chayllamanmi rikuruni chunkay-chunka waranqa, waranqa-waranqa ancha askha angelkunata,+ paykunan kashasqaku tronoq muyuriqninpi, chay kausashaqkunaq, kuraq runakunaq muyuriqninpi ima, uyarillanitaqmi paykunaq kunkantapas, 12 paykunan nishasqaku: “Ñak’asqa karqan chay corderoqa+ atiytapas, qhapaq kaytapas, yachaytapas, kallpatapas, jatunchaytapas, alabaytapas, bendiciontapas chaskinanpaq jinapunin”,+ nispa.

13 Chayllamanmi uyarillanitaq janaq pachapi, jallp’a pachapi, jallp’a pacha ukhupi,+ lamar-qochapipas llapa kamasqakunaq kunkanta, arí, lliupa kunkanta, paykunan nishasqaku: “Chay tronopi tiyaqpaq+ corderopaqwan+ wiñay-wiñaypaq kachun+ bendicionpas, jatunchaypas,+ alabaypas, atiypas”, nispa. 14 Jinan chay tawa kausashaqkunaqa “amén” nirqanku, chay kuraq runakunataq qonqorikuspa Diosta adorarqanku.

6 Rikushaqtiymi corderoqa+ chay qanchis sellokunamanta jujnin sellota kicharun,+ jinallamanmi chay tawa kausashaqkunamanta jujninta uyarini+ rayo t’ojay kunkawan jinaraq “¡jamuy!” nimuqta. 2 Chayllamanmi juj yuraq caballo rijuriramun,+ chay caballopi sillakuqqa juj arcotan jap’isqa; paymanmi juj coronata qorqanku,+ jinan payqa atipaspa lloqsirqan jujpaqkama atipananpaq.+

3 Iskay kaq sellota kichaqtintaq iskay kaq kausashaqta uyarillanitaq+ “¡jamuy!” nimuqta. 4 Jinan lloqsimullantaq sansa color jina puka caballo, chay caballopi sillakuqmi kamachisqa karqan kay pachamanta thaj kayta qechunanpaq, chhaynapi runakuna paykunapura mana khuyapayanakuspa wañuchinakunankupaq; juj jatun espadatan paymanqa qollarqankutaq.+

5 Kinsa kaq sellota kichaqtintaq+ kinsa kaq kausashaqta+ uyarillanitaq “¡jamuy!” nimuqta; chayllamanmi juj yana caballoñataq rijuriramun, chay caballopi sillakuqqa juj balanzatan jap’isqa. 6 Jinan chayllaman uyarini tawa kausashaqkuna ukhumanta juj kunkata: “Juj kilo* trigon juj denario qolqepaq* kanqa, kinsa kilo cebadapas juj denario qolqepaqmi kanqa;+ aman usuchinkichu aceituna aceitetaqa* ni vinotapas”,+ nispa nimuqta.

7 Tawa kaq sellota kichaqtintaq tawa kaq kausashaqtañataq uyarini+ “¡jamuy!” nimuqta. 8 Chayllamanmi juj q’elluyasqa caballoñataq rijuriramun, chay caballopi sillakuqpa sutinmi kasqa Wañuy nisqa, Sepulturataq* qhepallanta jamushasqa. Paykunamanmi atiyta qokurqan kay pachaq tawa kaq partenta jatun espadawan, yarqaywan,+ wañuyman apaq onqoywan, phiña animalkunawan+ ima wañuchinankupaq.

9 Pisqa kaq sellota kichaqtintaq, altarpa uranpi rikuruni+ Diospa siminrayku, paymanta willasqankurayku ima+ ñak’asqa kaqkunaq yawarninta.*+ 10 Paykunan fuerteta wajakushasqaku: “Tukuy munayniyoq Señor, ch’uya, cheqaq Dios,+ ¿jayk’aqkaman mana juzgankichu jallp’a pachapi tiyaq wañuchiwaqniyku runakunata? ¿Jayk’aqkaman mana vengakunkipaschu?”,+ nispa. 11 Señortaq sapankaman qorqan pampakama chayaq yuraq p’achata,+ jinaspa paykunata nirqan: “Juj chhikantawan samaychis kamachimasiykichiskuna, wayqeykichiskuna junt’asqa kanankukama; paykunapas yaqañan qankuna jina wañuchisqa kanqaku”,+ nispa.

12 Soqta kaq sellota kichaqtintaq sinchi jatun terremoto karqan, intipas yana pelomanta* ruwasqa bayeta jinaraqmi yanayapurqan, killapas yawar jina pukamanraqmi tukurqan,+ 13 ch’askakunapas jallp’a pachamanmi urmaykapurqan, imaynan higos sach’amantapas sinchi wayra kaqtin mana poqosqa higoskunaraq urmaykun chhaynata. 14 Cielopas juj qelqa k’uyu jinaraqmi k’uyurukuspa chinkaripurqan,+ orqokunapas islakunapas llapallankun maypichus kasqankumanta wijch’usqa karqanku.+ 15 Jinan jallp’a pacha reykunapas, autoridadkunapas, ejercitopi comandantekunapas, qhapaqkunapas, atiyniyoqkunapas, kamachikunapas, libre kaqkunapas llapallanku pakakurqanku t’oqokunapi, orqo qaqa k’ajtukunapi ima.+ 16 Chay orqokunata qaqakunatawantaq nirqanku: “Urmaykamuwayku,+ jinaspa pakaykuwayku tronopi tiyaqmanta,+ corderoq phiñakuyninmantawan;+ 17 paykunaq sinchi phiñakuyninku p’unchaymi chayaramunña,+ ¿pitaq chaytari aguantanman?”,+ nispanku.

7 Chay qhepatan rikurullanitaq tawa angelkunata jallp’a pachaq tawantin esquinanpi sayashaqta, jallp’a pachaq tawantin ladonmanta jamuq wayrata jark’ashaqta, chhaynapi ama jallp’a pachamanpas, ni lamar-qochamanpas, ni sach’akunamanpas ima wayrapas phukunanpaq. 2 Chaymantan rikurullanitaq inti lloqsimuy ladomanta juj ángel wichamushaqta, payqa kausaq Diospa sellon apaykusqan wichamushasqa, jinaspa jallp’a pachata lamar-qochatawan ñak’arichinankupaq churasqa angelkunata alto kunkawan nirqan: 3 “Aman imanankichispaschu jallp’a pachatapas, ni lamar-qochatapas, ni sach’akunatapas, Diosninchispa kamachinkunata+ mat’inkupi sellanaykukama”,+ nispa.

4 Chayllamanmi uyarini jayk’achus sellasqa karqanku chayta; Israelpa llapa ayllunkunamantan+ 144.000 runakuna+ sellasqa kasqaku:

9 Chay qhepatataq rikuruni mana piqpa yupay atinan ancha askha runakunata; paykunan kasqaku lliu nacionkunamanta, lliu ayllukunamanta, lliu llaqtakunamanta, lliu rimaykunamantawan;+ paykunan tronoq ñaupanpi corderoq ñaupanpiwan pampakama yuraq p’achayoqkama,+ palmera k’allma jap’iykusqakama sayashasqaku.+ 10 Paykunan fuertetapuni nishasqaku: “Salvacionninchisqa tronopi tiyaq Diosmanta+ corderomantawanmi+ jamun”, nispanku.

11 Llapa angelkunan kasharqanku tronoq muyuriqninpi, kuraq runakunaq muyuriqninpi,+ tawa kausashaqkunaq muyuriqninpiwan; paykunan tronoq ñaupanpi pampakama k’umuykuspa Diosta adorarqanku: 12 “¡Amén! Alabaypas, qhapaq kaypas, yachaypas, graciasta qoypas, jatunchaypas, atiypas, kallpapas Diosninchispaq wiñay-wiñaypaq kachun.+ Amén”, nispanku.

13 Jinan jujnin kuraq runaqa tapuwan: “¿Pikunataq kanku kay pampakama yuraq p’achawan churasqakunari?+ ¿Maymantataq jamunkupasri?”, nispa. 14 Jinan noqaqa kaq ratu nini: “Señorníy, qanchá chaytaqa yachanki”, nispay. Jinan payqa niwan: “Paykunaqa manchay ñak’ariymanta lloqsimuqkunan kanku,+ paykunan pampakama p’achankuta corderoq yawarninwan t’aqsaspa yuraqyachirqanku.+ 15 Chayraykun paykunaqa Diospa trononpa ñaupanpi kashanku, Diosta adorana wasipitaqmi tuta-p’unchay payta servishankupas; chay tronopi tiyaqmi+ juj karpata paykunapaq ruwapunqa chaypi paykunata pakaykunanpaq.+ 16 Paykunaqa manañan yarqachikunqakuchu ni ch’akichikunqakupaschu, manañan intipas ni ima ruphaypas paykunataqa imananqapasñachu.+ 17 Tronoq ladonpi* kaq corderon+ paykunataqa michinqa,+ jinaspa kausay unu pujyukunaman pusanqa.+ Diostaq paykunaq ñawinkumanta tukuy weqeta pichanqa”,+ nispa.

8 Qanchis kaq sellota cordero+ kichaqtintaq janaq pachapi media hora jina ch’in karqan.+ 2 Chayllamanmi rikuruni Diospa ñaupanpi sayashaq qanchis angelkunata,+ paykunamanmi qosqa karqan qanchis trompetakuna.

3 Chayllamanmi chayaramun juj ángel incienso ruphachina qori p’uku apaykusqa, paymi sayaykurqan altarpa ladonpi;+ paymanmi askha incienso qosqa karqan+ ch’uya runakunaq mañakuyninta uyarikushanankama tronoq ñaupanpi kaq qori altarpi+ chayta ruphachinanpaq. 4 Chay angelpa ruphachisqan incienso q’osñitaq ch’uya runakunaq mañakuyninwan+ kuska Diospa ñaupanman chayarqan. 5 Chayllamanmi chay angelqa incienso ruphachina p’ukuta altarpi kaq sansawan* junt’achirqan, chaytataq jallp’a pachaman jich’aykurqan. Jinan rayokuna t’ojarqan,+ kunkakunapas uyarikurqan, rayokunapas lliphipipirqan, terremotopas karqan. 6 Chaymantataq qanchisnintin angelkunaqa alistakurqanku trompetankuta+ tocanankupaq.

7 Ñaupaq kaq ángel trompetanta tocaqtinmi yawarwan chhaqrusqa chijchi, nina ima jallp’a pachaman wijch’uykusqa karqan,+ jinan jallp’a pachaq kinsa kaq parten ruphasqa kapurqan, llapa sach’akunamantapas kinsa kaq parten ruphasqa kapurqan, q’achukunapas llapanmi ruphasqa kapurqan.+

8 Iskay kaq ángel trompetanta tocaqtintaq, imachá kanpas lamar-qochaman wijch’uykusqa karqan,+ chayqa jatunkaray orqo jinan kasqa, raurashasqataqmi kanpas. Jinan lamar-qochaq kinsa kaq partenqa yawarman tukupurqan,+ 9 chaywanmi lamar-qochapi llapa kausaqkunamanta kinsa kaq parte wañupurqan,+ llapa barcokunamantapas kinsa kaq parten ñut’usqa kapurqan.

10 Kinsa kaq ángel trompetanta tocaqtintaq cielomanta juj jatun ch’aska urmaykurqan mechero* jina raurashaq. Chay ch’askan urmaykurqan mayukunaq kinsa kaq partenman, llapa pujyukunamanwan.+ 11 Chay ch’askaq sutinmi kasqa Ajenjo. Jinan unukunaq kinsa kaq parten ajenjo jina jayallaña kapurqan, chaywanmi askha runakuna wañurqanku chay unu jaya kasqanrayku.+

12 Tawa kaq ángel trompetanta tocaqtintaq, intiq kinsa kaq parten,+ killaq kinsa kaq parten, ch’askakunaq kinsa kaq parten ima k’irisqa karqan, chhaynapi llapa chaykunaq kinsa kaq parten tutayananpaq,+ p’unchaypa kinsa kaq partenpas, tutaq kinsa kaq partenpas mana k’anchayniyoq kananpaqwan.

13 Chayllamanmi rikuruni juj ankata sinchi altonta phalashaqta, chay ankan fuerteta nishasqa: “¡Imaraqmi, imaraqmi, imaraqmi kanqa+ jallp’a pachapi tiyaqkunamanta! Kinsa angelkunaraqmi trompetankuta tocananku kashan, ñataqmi tocanqakuña kanpas”,+ nispa.

9 Pisqa kaq ángel trompetanta tocaqtintaq+ juj ch’askata rikuruni cielomanta jallp’a pachaman urmaykushaqta, chay ch’askamanmi qosqa karqan chinkay-chinkay ukhu t’oqoq llaven.+ 2 Jinan payqa chay chinkay-chinkay ukhu t’oqota kicharqan, chay t’oqomantan q’osñi lloqsimurqan jatun hornomantapas lloqsimushanman jinaraq, chay q’osñiqa intitawan wayratawanraqmi tutayachipurqan.+ 3 Chay q’osñimantan jallp’a pachaman lloqsimurqan langostakuna,*+ paykunamanmi Dios atiyta qorqan, chay atiyqa jallp’a pachapi alacrán kurukunaq atiynin jinapunin karqan. 4 Paykunan kamachisqa karqanku jallp’a pachapi ama ima qoratapas, ni ima q’omer plantatapas, ni ima sach’atapas dañota ruwanankupaq, aswanmi paykunaqa pikunachus Diospa sellonta mana mat’inkupi apankuchu chay runakunallata k’irinanku karqan.+

5 Ichaqa manan wañuchinankupaqchu chay langostakunamanqa atiyta qokurqan, aswanpas pisqa killata ñak’arichinankupaqmi. Chay runakunaq ñak’ariyninqa karqan alacrán kuruq picasqan runaq ñak’ariynin jinan.+ 6 Chay p’unchaykunan runakunaqa wañuyta maskhanqaku, ichaqa manan tarinqakuchu; maytapunin wañuyta munanqaku, wañuymi ichaqa paykunamanta ayqerikunqa.

7 Chay langostakunaqa guerrapaq preparasqa caballokuna jinan kasqaku,+ chaymantapas umankupi qori coronayoq jinan kasqaku, uyankutaq runaq uyan jina kasqa, 8 chujchankupas warmiq chujchan jinan kasqa, kirunkutaq leonpa kirunkuna jina kasqa,+ 9 qhasqo* jark’anankutaq fierromanta ruwasqa qhasqo jark’ana jina kasqa. Rafrankuq rimarisqanpas guerraman phawashaq carretakunaq* rimarisqan jinaraqmi kasqa.+ 10 Chaymantapas paykunaq chupankuqa alacrán kurukunaq chupan jinan kasqa, chay chupankupin atiyninkuqa kasqa runakunata pisqa killa k’irinankupaq.+ 11 Paykunaq reyninqa kasqa chinkay-chinkay ukhumanta encargakuq angelmi,+ paypa sutinmi hebreo rimaypi kasqa Abadón,* griego rimaypitaq Apolión.*

12 Chhaynapin ñaupaq kaq “¡imaraqmi!” niyqa pasarqan. Kunanqa iskay “¡imaraqmi!” niykunaraqmi jamunqa.+

13 Soqta kaq ángel+ trompetanta tocaqtinmi+ Diospa ñaupanpi kaq qori altarpa esquinankunapi waqrakunamanta juj kunkata uyarini.+ 14 Chay kunkan chay soqta kaq angelta nimushasqa: “Éufrates mayuq ladonpi watasqa tawantin angelkunata paskamuy”,+ nispa. 15 Jinan chay angelkunaqa kacharisqa karqanku llapa runakunamanta kinsa kaq parteta wañuchinankupaq. Paykunan preparasqa kasqaku chay horapaq, chay p’unchaypaq, chay killapaq, chay watapaqwan.

16 Chaymantataq uyarini caballopi sillakuq soldadokuna jayk’achus karqanku chayta, paykunan kasqaku chunka waranqa kuti iskay chunka waranqa.* 17 Rikusqay caballokunapas, chay caballopi sillakuqkunapas khaynan kasqaku: Caballopi sillakuqkunaq qhasqo jark’anankun kasqa sansa jina puka colorniyoq, jacinto qespi rumi jina azul colorniyoq, azufre jina q’ellu colorniyoq ima. Caballokunan kasqaku leonpa uman jina umayoq,+ siminkumantataq lloqsimusqa nina, q’osñi, azufre ima. 18 Llapa runakunamanta kinsa kaq partenmi wañuchisqa karqan chay caballokunaq siminmanta lloqsimuq kinsa castigokunawan: ninawan, q’osñiwan, azufrewan ima. 19 Chay caballokunaq atiyninqa kasqa siminkupi chupankupi iman. Chupankun kasqa mach’aqwaykuna jina, umayoqkamataqmi kasqakupas, chay chupankuwanmi runakunataqa k’irinku.

20 Chay castigokunata mana chaskiq runakunan ichaqa mana pesapakurqankuchu makinkuwan imachus ruwasqankumanta; manan saqerqankuchu supaykuna adorayninkuta, ni qorimanta, qolqemanta, cobremanta, rumimanta, k’ullumantawan ruwasqa idolokuna adorayninkutapas; chay idolokunaqa manan rikunkuchu, ni uyarinkuchu, ni purinkupaschu.+ 21 Manataqmi pesapakurqankuchu runakuna wañuchisqankumantapas, ni layqa ruwaykuna ruwasqankumantapas, ni qhelli juchapi* purisqankumantapas, ni suwakusqankumantapas.

10 Chayllamanmi rikuruni juj kallpasapa angelta phuyuwan p’achasqa* janaq pachamanta uraykamushaqta, umanpin kasqa juj k’uychi,* uyanpas inti jinaraqmi kasqa,+ chakinkunataq raurashaq columnakuna jina kasqa, 2 makinpitaq paskasqa juch’uy qelqa k’uyuchata jap’isqa. Paña chakintan saruykurqan lamar-qochaman, lloq’e chakintataq jallp’aman. 3 Chaymantataq fuerteta qaparirqan, leonpas qaparishanman jinaraq,+ chhaynata qapariqtinmi qanchis rayo t’ojaykuna+ rimarimurqan.

4 Chay qanchis rayo t’ojaykuna rimamuqtinmi qelqanayña kasharqan chayta, chayllamanmi janaq pachamanta juj kunka+ nimuwan: “Chay qanchis rayo t’ojaykunaq imachus rimamusqantaqa ama qelqaychu, aswanpas sellowan wisq’ay”, nispa. 5 Lamar-qochaman jallp’amanwan saruykuqta rikusqay angeltaq janaq pachaman paña makinta oqarirqan, 6 jinaspa wiñay-wiñaypaq kausaqpa sutinpi jurarqan.+ Arí, janaq pachata llapa chaypi kaqkunatawan, jallp’a pachata llapa chaypi kaqkunatawan, lamar-qochata llapa chaypi kaqkunatawan+ kamaqpa sutinpin jurarqan: “Manan unayñachu suyakuna kanqa. 7 Qanchis kaq ángel+ trompetanta tocananña kashaqtinmi,+ kamachin profetakunaman+ allin willakuykunata jina Diospa willasqan pakasqa ch’uya yachayqa junt’akapunqa”,+ nispa.

8 Chayllamanmi janaq pachamanta uyarisqay kunkaqa+ wajmanta nimuwan: “Phaway, lamar-qochaman jallp’amanwan saruykuq angelmanta chaskimuy chay kichasqa qelqa k’uyuta”,+ nispa. 9 Jinan noqaqa chay angelpa kasqanman rispay chay qelqa k’uyuchata mañakurqani. Jinan payqa niwan: “Kayqa jap’iy, jinaspa chayta mijuy;+ wijsaykitan k’arachisunki, simiykipin ichaqa miel jina misk’illaña kanqa”, nispa. 10 Jinan noqaqa chay qelqa k’uyuchata chay angelmanta chaskispay mijurqani;+ cheqaqtan simiypiqa miel jina misk’illaña karqan,+ wijsaytan ichaqa k’arachiwarqan. 11 Jinan niwanku: “Wajmanta profetizay llaqtakunamanta, nacionkunamanta, rimaykunamanta, askha reykunamantawan”, nispa.

11 Chaymantataq varaman rijch’akuq juj carrizota* qowan,+ jinaspa niwan: “Sayariy, jinaspa Dios adorana wasita,* altarta, chaypi Diosta adoraqkunatawan medimuy. 2 Adorana wasi patiotan ichaqa ama medinkichu, jawallapin chaytaqa saqenki. Waj nación runakunamanmi chayqa qosqa kashan, chay runakunan ch’uya llaqtata+ tawa chunka iskayniyoq killata+ sarunchanqaku. 3 Iskay testigoykunatan kachamusaq 1260 p’unchayta qhasqa telawan p’achasqa profetizanankupaq”, nispa. 4 Paykunan kanku jallp’a pachapi Señorpa ñaupanpi sayashaq+ iskay aceituna sach’akunaqa,+ iskay candelerokunapas.*+

5 Pipas imanaytapas munaqtinqa siminkumantan nina lloqsimunqa, chaytaq enemigonkunata ruphapunqa. Arí, pipas imanaytapas munanman chayqa, chhaynatan wañunqa. 6 Paykunaqa atiyniyoqmi kanku cielota wisq’anankupaq,+ chhaynapi profetizasqanku p’unchaykunapi ama para chayamunanpaq.+ Chaymantapas atiyniyoqmi kanku unuta yawarman tukuchinankupaq,+ jallp’a pachata jayk’a kuti munasqankuta imaymana plagakunawan ñak’arichinankupaqpas.

7 Willayta tukuqtinkun chinkay-chinkay ukhumanta lloqsimuq manchay phiña animalqa paykunawan guerrata ruwanqa, jinaspa atipaspa wañuchinqa.+ 8 Ayankutaq jatun llaqtapi kaq jatun callepi wijch’urayanqa, chay llaqtaq sutintan tupanachiy simipi nikun “Sodoma, Egipto” nispa. Chay llaqtapin Señorninkutapas k’aspipi warkuspa wañuchirqanku. 9 Llapa llaqtakuna, ayllukuna, rimaykuna, nacionkuna iman chay ayakunata kinsa p’unchay kuskanta qhawanqaku,+ manan p’ampasqa kanankutapas munanqakuchu. 10 Chay iskay profetakunaqa jallp’a pachapi tiyaqkunatapas ñak’arichiqkun, chaymi paykunaqa chay profetakunaq wañusqankumanta kusikuspa fiestata ruwanqaku, regalokunata imaraq apachinakunqaku.

11 Chay kinsa p’unchay kuskan qhepatataq Diosmanta jamuq kausay espíritu paykunaman jaykurqan,+ jinan paykunaqa sayarimurqanku, lliu chayta rikuqkunataq sinchita mancharikurqanku. 12 Chaymantataq cielomanta juj kunka uyarikurqan “wichamuychis” nimuqta. Jinan chay iskay profetakunaqa phuyupi cieloman wicharqanku, enemigonkunataq chayta rikurqanku.* 13 Chay ratun karqan jatun terremoto, chaywanmi llaqtamanta chunka kaq parte thunikapurqan, qanchis waranqa runakunan wañurqanku, wakinkunataq sinchita mancharikuspa janaq pachapi kaq Diosta jatuncharqanku.

14 Chhaynapin chay iskay kaq “¡imaraqmi!”+ niyqa pasarqan. Kunanqa kinsa kaq “¡imaraqmi!” niymi jamunanpaqña kashan.

15 Qanchis kaq ángel trompetanta tocaqtintaq+ cielopi fuerte kunkakunata uyarini: “Señorninchispa jinallataq Cristonpa*+ gobiernonmi runakunata kamachishan,+ paymi wiñay-wiñaypaq rey kapunqa”,+ nispa nimuqta.

16 Jinan Diospa muyuriqninpi trononkupi tiyashaq iskay chunka tawayoq kuraq runakunaqa+ Diosman k’umuykuspa payta adorarqanku: 17 “Gracias niykikun, kunan kaqpas,+ ñaupaq kaqpas, tukuy atiyniyoq Jehová* Diosniyku, ancha jatun atiyniykiwan gobiernayta qallarisqaykimanta.+ 18 Nacionkunan ichaqa phiñakurqanku, chaymi qanpa sinchi phiñakuyniyki chayamun. Chayamullantaqmi señalasqa tiempopas, chhaynapi wañusqakuna juzgasqa kanankupaq; kamachiyki profetakunaman,+ ch’uya runakunaman, sutiykita manchakuqkunaman, juch’uyman jatunmanpas premiota qonaykipaqwan;+ jinallataq jallp’a pacha malograqkunatapas ch’usaqman tukuchinaykipaqwan”,+ nispanku.

19 Chayllamanmi janaq pachapi Diosta adorana wasi* kichasqa karqan, jinan rikurukun Diospa rimanakuynin arca.+ Jinan rayo lliphipipiykuna karqan, kunkakunapas rayo t’ojaykunapas uyarikurqan, kallarqantaqmi terremotopas, chijchipas manchaytaraqmi chayarqan.

12 Chaymantataq janaq pachapi juj jatun señal karqan: Chaypin juj warmi+ intiwan p’achasqa kashasqa, chakinpa uranpitaq killa kashasqa, umanpitaq chunka iskayniyoq ch’askakunayoq corona kashasqa, 2 chaymantapas onqoqmi payqa kasqa. Chaymi onqokunan patapiña kashaspa nanaywan ñak’arispa qaparirqan.

3 Kallarqantaqmi juj señalpas: Chaypin sansa jina puka color juj jatunkaray dragón rijurimushasqa,+ chay dragonqa qanchis umayoq chunka waqrakunayoq iman kasqa, sapanka umanpitaq juj corona kasqa. 4 Chupanwanmi chay dragonqa llapa ch’askakunamanta kinsa kaq parteta aysarqan,+ jallp’a pachamantaq wijch’uykurqan.+ Chay dragonqa onqokunan patapiña kashaq warmiq ñaupanpin sayaykurqan,+ chhaynapi chay warmi onqokuqtin wawanta mijupunanpaq.

5 Chay warmin juj qhari wawata onqokurqan,+ chay wawan llapa nacionkunata fierro varawan michinqa.+ Chay wawaqa usqhayllan apasqa karqan trononpi tiyashaq Diosman. 6 Chay warmitaq ch’inneqman ayqekurqan, maypichus Dios paypaq alistapurqan chayman, chaypi 1260 p’unchay mijuchisqa kananpaq.+

7 Janaq pachapitaq juj guerra qallarirqan, Miguelmi*+ angelninkunapiwan dragonwan maqanakurqan, dragontaq angelninkunapiwan paykunawan maqanakurqan, 8 ichaqa vencesqan karqanku,* chaymi janaq pachapi kanankupas manaña atikurqanñachu. 9 Jinan chay dragonqa urayman wijch’uykusqa karqan,+ paymi chay ñaupa mach’aqwayqa,+ “Saqra,+ Satanás”+ nisqaqa, jallp’a pacha runakunatapas pantachiqqa;+ arí, jallp’a pachamanmi payqa wijch’uykusqa kapun,+ angelninkunapas paywan kuskan wijch’uykusqa kapunku. 10 Chayllamanmi janaq pachamanta juj fuerte kunkata uyarini:

“¡Ñan qallarinña Diosninchispa salvacionninpas,+ atiyninpas, gobiernonpas,+ Cristonpa atiyninpas; ñan wayqenchiskunata Diospa ñaupanpi tuta-p’unchay tumpaqqa+ urayman wijch’uykusqaña kapun! 11 Paykunaqa corderoq yawarninwan,+ imachus willasqankuwan iman+ payta vencerqanku.+ Wañuy patapiña kashaspapas manan vidanku* chinkachiytapas paykunaqa manchakurqankuchu.+ 12 Chayrayku, ¡kusikuychis janaq pachapi kaqkuna! Ichaqa, ¡imaraqchá kanqa jallp’a pachamanta, lamar-qochamantapas!+ Saqran sinchi phiñasqa qankunaman uraykamushan, yachanmi payqa tiempon pisillaña kasqantapas”,+ nispa nimuqta.

13 Chay dragontaq jallp’a pachaman wijch’uykusqa kaspa,+ chay qhari wawata onqokuq warmita qatikachayta qallarirqan.+ 14 Chay warmimanmi ichaqa juj jatun ankaq iskaynin rafran qosqa karqan,+ chaywan ch’inneqman phalananpaq, maypichus paypaq alistasqa karqan chayman rinanpaq; chaypin payqa mach’aqwaymanta karupi mijuchisqa kanan karqan+ juj tiempo, iskay tiempo, kuskan tiempo ima.+

15 Chay mach’aqwaymi ichaqa chay warmiq qhepanman mayuta jinaraq unuta aqtumurqan, chhaynapi chay warmi unuwan jeq’epaspa wañunanpaq. 16 Jinan jallp’aqa warmita yanapaq jamuspa siminta kicharirqan, jinaspa chay dragonpa aqtusqan mayuta millp’upurqan. 17 Chay dragontaq sinchita phiñakurqan chay warmipaq, chaymi chay warmiq mirayninmanta qhepaqkunawan guerra ruwaq rirqan;+ paykunan Diospa kamachikuyninta kasukuspa kausanku, Jesusmanta willanankupaqtaqmi churasqapas karqanku.+

13 Chaymantataq chay dragonqa lamar-qocha aqo patapi sayaykurqan.

Chayllamanmi rikuruni juj manchay phiña animal+ lamar-qochamanta lloqsimushaqta,+ chay animalqa qanchis umayoq chunka waqrakunayoq iman kasqa, sapanka waqranpitaq juj corona kasqa, sapanka umanpin Diosta k’amiq sutikunapas kasqa. 2 Chay rikusqay manchay phiña animalqa leopardo* jinan kasqa, chakinkunan ichaqa osoq chakinkuna jina kasqa, simintaq leonpa simin jina kasqa. Chay dragontaq+ chay manchay animalman qorqan atiyninta, trononta, jatun autoridadtawan.+

3 Chay manchay phiña animalpa jujnin umanmi wañuqpaq k’irisqapas kanman karqan jina kasqa, ichaqa thanipusqañan chay k’irinqa,+ lliu kay pacha runakunataq admirasqa chay manchay animalta qatikurqanku. 4 Jinaspa chay dragonta adorarqanku chay manchay phiña animalman atiyta qosqanmanta, adorarqankun chay manchay animaltapas: “¿Pitaq kay manchay phiña animal jina kanman? ¿Pitaq paywan maqanakuytapas atinman?”, nispanku. 5 Chay manchay animalmanmi simi qosqa karqan jatunchakuspa rimananpaq, imaymana pisichaq simikunata rimananpaqwan; atiytapas chaskirqanmi tawa chunka iskayniyoq killa imaymanakunata ruwananpaq.+ 6 Jinan chay animalqa siminta kicharispa Dios contra rimayta qallarirqan;+ pisicharqanmi Diospa sutinta, maypichus tiyasqanta, janaq pachapi kaqkunatapas.+ 7 Paymanmi permiso qosqa karqan ch’uya runakunawan guerrata ruwananpaq paykunata vencenanpaqwan;+ chaymantapas atiytan chaskirqan llapa ayllukunata, llaqtakunata, rimaykunata, nacionkunatawan gobiernananpaq. 8 Jallp’a pachapi llapa tiyaqkunan adoranqaku paytaqa. Chay adoraqkunaq sutinqa runakunaq qallariyninmantapachan* mana qelqasqachu karqan ñak’asqa corderoq+ kausay qelqa k’uyunpi.+

9 Pipas ninriyoqqa uyarichun.+ 10 Pipas preso apanapaq kaqqa preso apasqapunin kanqa, pipas espadawan wañuchiqqa espadawan wañuchisqallataqmi kanqa.*+ Chayraykun ch’uya runakunaqa+ allinta aguantananku kanqa,+ iñiyninkupipas qaqata sayananku kanqa.+

11 Chayllamanmi rikurullanitaq waj manchay phiña animalta, chay animalqa jallp’amantan lloqsimushasqa, iskay waqrayoqtaqmi kasqapas, chay waqrankunaqa corderoq waqran jinan kasqa, ichaqa dragón jinan rimayta qallarirqan.+ 12 Chay manchay animalqa ñaupaq kaq manchay phiña animalpa lliu atiyninwanmi+ pay rikushaqtin tukuy imatapas ruwarqan. Chaymantapas chay ñaupaq kaq manchay animaltan, wañuqpaq k’irisqa kasqanmanta allinyasqa manchay phiña animaltan+ jallp’a pachawan, llapa chaypi tiyaqkunawan ima adorachirqan. 13 Chaymantapas jatun señalkunatan ruwarqan, ninataraqmi lliu runa rikushaqtin cielomanta jallp’a pachaman uraykachirqan.

14 Ñaupaq kaq manchay animalpa ñaupanpi chhayna señalkuna ruwasqanwantaq chay iskay kaq manchay animalqa jallp’a pachapi kausaqkunata pantachirqan, jinaspa paykunata kamachirqan espadawan k’irisqa kasqanmanta jatarimuq+ manchay phiña animalpa rijch’ayninta ruwanankupaq.+ 15 Chaymantapas chay iskay kaq manchay animalqa chay ñaupaq kaq manchay phiña animalpa rijch’ayninman kausayta phukuykunanpaqmi permiso qosqa karqan, jinan chay ñaupaq kaq manchay animalpa rijch’ayninqa rimayta qallarirqan, kamachikurqantaq pipas payta mana adoraqkuna llapanku wañuchisqa kanankupaq.

16 Chaymantapas chay ñaupaq kaq animalpa rijch’ayninqa llapa runatan obligarqan juch’uyta, jatunta, qhapaqta, wajchata, libre kaqta, kamachita ima paña makinkupi otaq mat’inkupi marcasqa kanankupaq,+ 17 chhaynapi marcasqa kaqkunalla rantinankupaq vendenankupaqpas. Chay marcaqa manchay phiña animalpa sutinmi,+ otaq sutinpa numeron.+ 18 Pipas allin yuyayniyoq kaqqa allinta tanteachun chay manchay phiña animalpa numeronta, chay numeroqa runaq numeronmi, 666 numerotaqmi.+ Pichus yachayniyoq kaqllan chaytaqa entiendenqa.

14 Chayllamanmi rikuruni corderota+ Sion orqopi sayashaqta,+ paywan kuskan kashasqaku 144.000 runakunapas,+ paykunaq mat’inpin qelqasqa kasqa corderoq sutin Taytanpa sutin ima.+ 2 Chayllamanmi uyarini janaq pachamanta juj suenayta, unuq* rimarisqan jina suenayta, rayoq t’ojasqan jina suenayta; chay uyarisqay suenayqa arpawan compañachikuspa takiqkunaq takisqan jinan kasqa. 3 Paykunaqa juj mosoq takita jinan takishasqaku+ tronoq ñaupanpi, tawa kausashaqkunaq ñaupanpi,+ kuraq runakunaq ñaupanpi ima.+ Manan pipas chay takitaqa takiyta atirqanchu, aswanpas jallp’a pachamanta rantisqa chay 144.000 runakunallan+ takirqanku. 4 Paykunaqa manan warmikunawan qhellichakurqankuchu, manan piwanpas jayk’aqpas karqankuchu.+ Paykunaqa corderoq qhepallantan purinku, maytaña riqtinpas qhepallantapunin rishanku.+ Chaymantapas paykunaqa runakuna ukhumantan rantisqa karqanku,+ Diospaq corderopaqwan ñaupaq ruru jina kanankupaq.+ 5 Paykunaq siminpiqa manan ima engañopas tarikurqanchu, mana ima juchayoqtaqmi* kashankupas.+

6 Chayllamanmi rikuruni juj angelta altonta phalashaqta, paymi wiñaypaq allin willakuykunata willanan kasqa jallp’a pachapi llapa tiyaqkunaman, llapa nacionkunaman, ayllukunaman, rimaykunaman, llaqtakunamanwan.+ 7 Paymi fuerteta nishasqa: “Diosta manchakuychis, payta jatunchaychis, juzganan horan chayamunña,+ chayrayku payta adoraychis, paymi cielota, jallp’a pachata, lamar-qochata,+ pujyukunatawan kamaqqa”, nispa.

8 Chayllamanmi rijurimullarqantaq iskay kaq ángel, paymi nishasqa: “¡Urmaykapunñan! Arí, ¡urmaykapunñan+ Jatun Babiloniaqa!+ Paymi llapa nacionkunaman vinonta ujachiqqa, chay vinoqa qhelli jucha* ruwayta sinchita munapayasqanmi”,+ nispa.

9 Chayllamanmi kinsa kaq angelñataq rijurimurqan, paymi fuerteta nishasqa: “Pipas chay manchay animalta rijch’aynintawan adoraqqa,+ jinallataq mat’inpipas makinpipas marcasqa kaqqa,+ 10 Diospa phiñakusqan vinotan ujallanqataq; chay vinotaqa mana imawan chhaqrusqatan Diospa colerasqan copaman jich’akurqan.+ Chaymantapas ch’uya angelkunaq ñaupanpi corderoq ñaupanpi iman chhayna runakunaqa ninawan azufrewan ima ñak’arichisqa kanqaku.+ 11 Ñak’arisqanku q’osñipas wiñay-wiñaypaqmi q’osñishallanqa,+ tuta-p’unchaymi mana samanqakupaschu. Chhaynan kanqa chay manchay phiña animalta rijch’aynintawan adoraqkunawanqa, sutinpa marcanta chaskiqkunawanpas.+ 12 Chayraykun ch’uya kaqkunaqa, Diospa kamachikuyninkunata kasukuqkunaqa, Jesuspi iñiqkunaqa*+ aguantananku kanqa”,+ nispa.

13 Chayllamanmi uyarini janaq pachamanta juj kunkata, chay kunkan nimushasqa: “Kayta qelqay: Kusisqan kanku kunanmantapacha Señorwan jujllachasqa wañuqkunaqa.+ Espirituq* nisqan jina, llank’anankumanta samachunku paykunaqa, imachus ruwasqankuqa paykunawan kuskan rinqa”, nispa.

14 Chayllamanmi rikuruni juj yuraq phuyuta, chay phuyupin pichá tiyashasqapas, payqa runaq Churin jinan kasqa,+ umanpin kasqa juj qori corona, makinpitaq juj filo ichhuna.

15 Chaymantan templomanta* juj ángel lloqsimullarqantaq, paymi fuerteta wajarqan chay phuyu patapi tiyashaqta: “Ichhunaykita jap’ispa cosechamuy, ñan cosechana horaña kashan, jallp’a pachapi cosechaqa ñan allin poqosqaña kashan”,+ nispa. 16 Jinan phuyu patapi tiyashaqqa jallp’a pachata ichhunanwan ichhurqan, chhaynapin jallp’a pachamanta llapa cosecha oqarisqa kapurqan.

17 Juj angelmi lloqsimullarqantaq janaq pachapi kashaq templomanta, paypas juj filollaña ichhunantinmi jamushallasqataq.

18 Chaymantan altarmantañataq juj ángel lloqsimullarqantaq, payqa ninata kamachinanpaq atiyniyoqmi kasqa. Paymi fuerteta wajarqan filollaña ichhunayoq angelta: “Chay ichhunaykita jap’ispa jallp’a pachapi uvas ch’ampakunata rutumuy, chay uvaskunaqa ñan poqosqaña kashan”,+ nispa. 19 Jinan chay angelqa ichhunanwan ichhurqan jallp’a pachapi uvas sach’ata, chaytataq wijch’uykurqan jatunkaray uvas sarunaman, chay uvas sarunaqa Diospa phiñakuyninwanmi tupan.+ 20 Chay uvasqa llaqta jawapin sarusqa karqan, chay uvas sarunamantataq askha yawar lloqsimurqan caballokunaq siminkamaraq, chaymantapas 296 kilómetro jina* sayaytaraqmi mast’arikurqan chay yawarqa.

15 Chaymantataq janaq pachapi rikullanitaq admiranapaq jina juj jatun señalta. Chaypin kashasqa qanchis angelkuna,+ sapankapas juj plaga jap’iykusqakama. Chaykunawanmi tukupun plagakunaqa, chaykuna tukuqtinmi Diospa phiñakuyninpas tukupunqa.+

2 Chaymantan rikullanitaq imatachá kanpas vidrio jina qochaman rijch’akuqta,+ ninawan chhaqrusqata; chay qocha patapin sayashasqaku manchay phiña animalta, rijch’ayninta,+ sutinpa numerontawan+ venceqkuna,+ paykunan jap’ishasqaku Diospa arpankunata. 3 Paykunan Diospa kamachin Moisespa takinta,+ corderoq takintawan+ takishasqaku:

“Tukuy atiyniyoq+ Jehová* Dios, ancha jatunmi admiranapaq jinan tukuy ima ruwasqaykipas.+ Wiñay-wiñay rey,+ cheqaqmi chaninmi ñanniykikunapas.+ 4 Jehová* Dios, ¿pitaq qanta mana manchakunmanchu, pitaq mana sutiykitapas jatunchanmanchu? Qanllan kanki junt’aq Diosqa.+ Llapa nacionkunan qanman jamuspa ñaupaykipi adorasunkiku,+ chanin juicio ruwasqaykikuna sut’i rikusqa kasqanrayku”, nispa.

5 Chaykuna qhepatataq janaq pachapi rikuruni rimanakuy arcayoq yupaychana karpata,* chay karpan kichasqa karqan.+ 6 Chaymantan lloqsimurqan qanchis angelkuna qanchis plagakuna apaykusqa,+ chay angelkunaqa kasqa k’anchashaq limpio linowan p’achasqan, qhasqonkutaq* kasqa qori chumpiwan chumpisqa. 7 Chay tawa kausashaqkunamanta jujnintaq chay qanchis angelkunaman qorqan qanchis qori pocillokunata wiñay-wiñaypaq kausaq Diospa phiñakuyninwan junt’ata.+ 8 Chay yupaychana karpamantaq q’osñi junt’aykurqan, chay q’osñiqa karqan Diospa lliflli kayninrayku+ atiyninrayku iman; manan pipas chay karpamanqa jaykurqanchu chay qanchis angelkunaq apamusqan qanchis plagakuna tukukunankama.+

16 Chayllamanmi uyarini templomanta*+ juj fuerte kunkata, chay kunkan chay qanchisnintin angelkunata nimushasqa: “Phawaychis, Diospa phiñakuynin qanchis pocillokunata jallp’a pachaman jich’aykamuychis”,+ nispa.

2 Jinan ñaupaq kaq angelqa lloqsispa pocillonta jallp’a pachaman jich’aykamurqan,+ jinan pikunachus manchay phiña animalpa marcanwan marcachikuspa+ chay animalpa rijch’ayninta adoraqkunataqa+ millay lleq nishaq llaga onqoy+ jap’irqan.

3 Iskay kaq angeltaq lamar-qochaman pocillonta jich’aykurqan,+ chaywanmi lamar-qochaqa yawarman tukupurqan,+ wañuchisqa runaq yawarninman jinaraq; jinan llapa chaypi kausaqkuna wañupurqanku, lamar-qochapi tukuy imachus kaqkunan wañupurqanku.+

4 Kinsa kaq angeltaq pocillonta jich’aykurqan mayukunaman pujyukunaman ima,+ jinan chaykunaqa yawarman tukupurqan.+ 5 Chayllamanmi unukunata kamachinanpaq atiyniyoq angelta uyarini: “Diosníy, qanqa junt’aq Diosmi kanki,+ qanllan kunan kaqpas ñaupaq kaqpas kanki,+ chanin Diostaqmi kankipas, chay juiciokunata chayachimusqaykirayku.+ 6 Paykunan ch’uya runakunaq yawarninta, profetakunaq yawarnintapas jich’aqkunaqa kashanku,+ chaymi qanqa paykunaman yawarta qoshanki ujanankupaq,+ chaypaq jinapunitaqmi paykunaqa kankupas”,+ nispa nimuqta. 7 Chaymantataq altartañataq uyarini: “Arí, tukuy atiyniyoq+ Jehová* Dios, qanpa juicioykikunaqa cheqaqmi chaninmi”,+ nispa nimuqta.

8 Tawa kaq angeltaq intiman pocillonta jich’aykurqan,+ jinan intimanqa atiy qosqa karqan runakunata ruphananpaq. 9 Jinan runakunaqa intiq ruphasqan kaspa, chay plagakunata chayachimunanpaq atiyniyoq Diospa sutinta millayta k’amirqanku, manan juchankumantapas pesapakurqankuchu, nitaq Diostapas jatuncharqankuchu.

10 Pisqa kaq angeltaq manchay phiña animalpa trononman pocillonta jich’aykurqan, chaywanmi gobiernonqa tutayapurqan,+ jinan runakunaqa nanaymanta qallunkutaraq kanipakurqanku. 11 Chaymi paykunaqa nanaypi tarikuspanku millay llagakunaq jap’isqan kasqankurayku ima janaq pacha Diosta millayta k’amirqanku, manataqmi imachus ruwasqankumantapas pesapakurqankuchu.

12 Soqta kaq angeltaq Éufrates jatun mayuman pocillonta jich’aykurqan,+ jinan chay mayuqa ch’akipurqan+ chhaynapi inti lloqsimuy ladomanta jamuq reykunapaq ñan preparasqa kananpaq.+

13 Chaymantataq rikuruni dragonpa siminmanta,+ manchay phiña animalpa siminmanta, falso profetaq siminmantawan kinsa millay rimaykuna* k’ayraman rijch’akuq jina lloqsimushaqta. 14 Chay rimaykunaqa supaykunamantan jamun, chay rimaykunan imaymana señalkunata ruwanku,+ jallp’a pachapi llapa reykunamantaqmi chayanpas, chhaynapi tukuy atiyniyoq Diospa jatun p’unchaynin+ guerraman chay reykunata juñunankupaq.+

15 “¡Qhawariy! Noqaqa suwa jinan jamushani.+ Ichaqa kusisqan pipas rijch’ashaqlla kaspa+ p’achasqalla kaqqa; p’achasqalla kanqa chayqa manan q’alallachu purinqa, manataqmi runakunapas p’enqaytachu qhawanqa”.+

16 Chay reykunatan juñurqanku hebreo rimaypi Armagedón*+ nisqa partepi.

17 Qanchis kaq angeltaq wayraman pocillonta jich’aykurqan. Chayllamanmi templopi*+ tronomanta juj fuerte kunkata uyarini: “¡Tukukapunñan!”, nispa nimuqta. 18 Jinan rayo lliphipipiyta qallarirqan, kunkakunapas rayo t’ojaykunapas uyarikurqan, kallarqantaqmi juj jatun terremotopas, chhaynaniraq jatun terremotoqa manapunin jayk’aqpas karqanchu jallp’a pachapi runa kamasqa kasqanmantapacha.+ 19 Chaywanmi jatun llaqtaqa+ kinsaman partekapurqan, llapa nacionkunapi kaq llaqtakunapas urmaykapurqan. Jatun Babilonia+ llaqtatan Diosqa yuyarirqan sinchi phiñakuypi colerasqan vino copata payman qonanpaq.+ 20 Chaymantapas llapa islakunan ayqekurqanku, orqokunapas manan tarisqachu karqan.+ 21 Chaymantataq cielomanta jatuchachaq chijchi runakunaman chayarqan,+ chay chijchikunaqa sapankan iskay chunka kilota jinaraq pesasqa,* chay chijchi plagaqa+ manchakuypunin karqan, chaymi runakunaqa chay jawa Diosta k’amirqanku.

17 Chay qanchis pocillokunata jap’ishaq angelkunamanta jujnintaq+ jamuspa niwan: “Jamuy, kunanmi rikuchimusayki askha unukunapi tiyaq+ atiyniyoq ramera warmiq castigon imaynachus kanqa chayta. 2 Paywanmi jallp’a pachapi reykunaqa qhelli juchata* ruwarqanku,+ chaypi lliu tiyaqkunapas qhelli jucha ruway vinonwanmi macharqanku”,+ nispa.

3 Chaymantan chay angelqa espirituq atiyninwan juj ch’inneqman apawan. Chaypin juj warmi kashasqa juj manchay phiña animalpi sillaykusqa, chay animalqa k’anchaq puka colormi kasqa, qanchis umayoq chunka waqrakunayoq iman kasqapas; chaymantapas chay animalqa Diosta k’amiq sutikunawanmi junt’a kasqa. 4 Chay warmitaq pukaniraq azul p’achawan,+ k’anchaq puka p’achawan p’achasqa kasqa; chaymantapas qoriwan, sumaq qespi rumikunawan, perlakunawan*+ iman sumaqchasqa kasqa, makinpitaq jap’isqa juj qori copata, chay copan sinchi millay ruwaykunawan, millay qhelli jucha ruwaykunawan ima junt’a kashasqa. 5 Mat’inpitaq qelqasqa kasqa juj mana entiendey atina suti, chay sutin nisqa: “Jatun Babilonia, ramera warmikunaq,+ jallp’a pachapipas sinchi millay ruwaykunaq maman”,+ nispa. 6 Chay warmiqa ch’uya runakunaq yawarninwan Jesuspa testigonkunaq yawarninwan+ iman machasqa kashasqa.

Chay warmita rikuspaymi noqaqa ancha admirasqa kasharqani. 7 Chaymi chay angelqa niwan: “¿Imaraykun admirasqa kashanki? Noqan willasayki chay warmimanta juj pakasqa yachayta,+ chay q’epiykuqnin qanchis umayoq chunka waqrayoq manchay phiña animalmanta pakasqa yachaytapas.+ 8 Chay rikusqayki manchay phiña animalqa kaypin kasharqan, kunanmi ichaqa mana kapunchu; ichaqa ñan lloqsimunqaña chinkay-chinkay ukhumanta,+ chaymantataq wañuchisqa kanqa. Jallp’a pachapi llapa kausaqkunataq, pikunaq sutinchus runakunaq qallariyninmantapacha* kausay qelqa k’uyupi mana qelqasqachu kashan chaykuna,+ anchata admirakunqaku chay animal chinkasqa kasqanmanta kutimusqanta rikuspanku.

9 ”Kayta entiendenapaqqa allin yachayniyoqmi* kana. Chay qanchis umakunaqa+ qanchis orqokunawanmi tupan, chaykuna patapin chay warmiqa tiyashan. 10 Chaykunataq qanchis reykunawan tupan. Pisqaqa ñan urmapunkuña, jujtaq kunan actual kashan, jujnin kaqmi ichaqa mana chayamunraqchu, chay chayamunqa chayqa pisi tiempollan kanqa. 11 Chay kaypi kashaq jinaspa chinkapuq manchay phiña animalpas+ pusaq kaq reymi, paymi ichaqa qanchisnintin reykunamanta paqarimun, ichaqa chinkachisqan paypas kanqa.

12 Chay rikusqayki chunka waqrakunataq chunka reykunawan tupan, paykunaqa manan chaskinkuraqchu atiyta rey kanankupaq, ichaqa atiytan chaskinqaku manchay phiña animalwan kuska reykuna jina juj horata gobiernanankupaq. 13 Chay chunka reykunaqa llapankupas juj yuyaynillayoqmi kanku, chaymi chay manchay phiña animalman atiyninkuta autoridadninkutawan qonku. 14 Paykunan guerrata ruwanqaku corderowan;+ corderon ichaqa paykunata vencenqa+ señorkunaq Señornin, reykunaq reynin kasqanrayku.+ Corderowan kaqkunapas vencenqakun,+ paykunaqa Diospa wajasqankuna, paypa ajllasqankuna, paypaq junt’aq sonqokuna iman kanku”, nispa.

15 Chaymantan niwallantaq: “Maypichus chay ramera warmi tiyashan chay unukunaqa llaqtakunawan, runakunawan, nacionkunawan, rimaykunawan iman tupan.+ 16 Chay rikusqayki chunka waqrakunan+ manchay phiña animalwan+ kuska chay ramera warmita cheqnikunqaku,+ jinan payta lliuta ch’utinqaku, jinaspa q’alallata saqerparinqaku, aychantapas mijunqakun, chaymantataq ninawan lliuta kanaykapunqaku.+ 17 Diosmi sonqonkuman juj yuyayta churarqan, chhaynapi paypa imachus piensasqanta ruwanankupaq,+ paykunaqpas imachus piensasqankuta ruwanankupaq; chaytan ruwanqaku chay manchay phiña animalman gobierno atiyninkuta qospa,+ Diospa tukuy ima rimasqan junt’akunankamataqmi chayqa kanqapas. 18 Chay rikusqayki warmiqa+ jallp’a pacha reykunata kamachiq ancha jatun llaqtawanmi tupan”, nispa.

18 Chaykuna qhepatataq rikuruni juj angelta jatun autoridadwan janaq pachamanta uraykamushaqta, lliflli kayninpas lliu jallp’a pachamanmi k’ancharirqan. 2 Paymi fuertetapuni nimun: “¡Urmaykapunñan! Arí, ¡urmaykapunñan Jatun Babiloniaqa!+ Kunanqa supaykunan chaypi tiyapun, chaymantapas millay espiritukuna,* phalaq cheqnisqa qhelli animalkuna iman chaypiqa muyushan.+ 3 Qhelli jucha* ruwayta sinchi munasqan vinowanmi llapa nacionkuna macharqan,+ jallp’a pachapi llapa reykunataqmi paywanqa qhelli juchatapas ruwarqanku,+ chaymantapas jallp’a pachapi llapa negocio ruwaqkunan qhapaqman tukurqanku chay warmi mana p’enqakuspa imaymana qhapaq kaykunata juñusqanwan”, nispa.

4 Chayllamanmi janaq pachamanta juj kunka nimullantaq: “Llaqtalláy, lloqsipuychis chaymanta,+ ama paykunaq juchallikuqmasinqa kaychischu, mana chayqa qankunapas castigasqan kankichis.+ 5 Chay warmiq jucha ruwasqanqa janaq pachakamaraqmi tauqasqa kashan,+ chaymi Diosqa tukuy mana chanin ruwasqankunamanta payta juzganqa.+ 6 Imaynatachus jujkunata ruwasqanta jina paytaqa ruwaychis.+ Arí, chay ruwasqanmantapas iskay kutitaraq paytaqa ruwaychis.+ Ujanata tupachisqan copapi+ aswan fuertetaraq paypaq tupachipuychis.+ 7 Imaynachus jatunchakusqanman jina, imaynachus mana p’enqarikuspa qhapaqyasqanman jina paytaqa ñak’arichispa qaparichiychis. Payqa “noqaqa reinan kani, manan viudachu kani, manataqmi jayk’aqpas waqasaqchu”+ nispan sonqonpi nishan. 8 Chaymi juj p’unchayllapi paypa castigonqa jamunqa, yarqay, waqay, wañuy iman paymanqa chayamunqa. Chaymantataq jujpaqkama ninawan kanaykusqa kanqa,+ juzgaqnin Jehová* Diosqa ancha kallpayoqmi.+

9 ”Paywan qhelli juchata ruwaq, mana p’enqarikuspa juñusqan qhapaq kaynintapas gastaysiqmasin reykunataq, chay kanaykusqa warmimanta q’osñi lloqsimuqta rikuspanku waqaspa sonqonkuta takakunqaku. 10 Pay jina ñak’arichisqa kayta manchakuspankutaq karullapi sayaykuspa ninqaku: ¡Ay, imay sonqon qanta kay pasarusunki! Qanqa jatun llaqtamá karqanki,+ atiyniyoq Babilonia llaqtamá karqanki, ¡imaynapitaq juicioykiri juj horallapi chayaramun!, nispa.

11 ”Jallp’a pachapi negocio ruwaqkunapas manaña pipas tukuy imankuta rantiqninku kaqtinmi llakisqa paymanta waqaykunqaku. 12 Arí, manañan pipas paykunamanta rantinqachu tukuy ima vendesqanku qorita, qolqeta, sumaq qespi rumikunata, perlakunata,* sumaq lino telakunata, azulniraq puka telakunata, sedamanta telakunata, k’anchaq puka telakunatapas; chaymantapas manañan pipas rantinqachu sumaq q’apaq k’aspimanta tukuy ima ruwasqakunata; jinallataq marfilmanta, ancha sumaq k’aspimanta, cobremanta, fierromanta, mármol rumimanta tukuy ima ruwasqakunatapas. 13 Manallataqmi pipas paykunamantaqa rantinqachu canelata, Indiamanta sumaq q’apaq kaqkunata, inciensota, sumaq q’apaq jawinata, yuraq inciensota,* vinota, aceituna aceiteta,* allin jak’uta, trigota, wakakunata, ovejakunata, caballokunata, carretakunata, kamachikunata ni runakunatapas. 14 Arí, allin poqosqa frutakuna munapayasqaykiqa manañan kapunchu, tukuy ima sumaqllaña kaqkunapas, tukuy ima k’ancharishaq kaqkunapas manañan qanpiqa kanñachu, manañataqmi jayk’aqpas chaykunaqa qanpiqa kanqañachu.

15 ”Chaymantapas tukuy chaykunata payman vendespa qhapaqyaq negocio ruwaqkunaqa chay warmi jina ñak’arichisqa kayta manchakuspankun karullapi sayaykuspa sinchi llakisqa paymanta waqaykunqaku: 16 ¡Ay imay sonqotaq kay jatun llaqtawanri kay pasarun! Sumaq lino p’achawan, azulniraq puka p’achawan, k’anchaq puka p’achawan, qorimanta alajakunawan, sumaq qespi rumikunawan, perlakunawan ima churaykusqamá+ payqa puriq. 17 ¡Imaynapitaq juj horallapiri chhaynaniraq qhapaq kaykuna ch’usaqman tukurapun!, nispanku.

”Barcopi capitankunapas, chaypi viajaqkunapas, barcopi llank’aqkunapas, lamar-qochapi llapa llank’aqkunapas karullapi sayaykuspan 18 chay warmimanta q’osñi lloqsimusqanta rikuspanku ninqaku: ¿Ima llaqtataq kay jatun llaqta jina kanman?, nispa. 19 Jinaspa umankuman jallp’ata jach’ikuspa, sinchi llakisqa qaparinqaku waqanqaku ima: ¡Ay, imay sonqotaq kay jatun llaqtawanri kay pasarun! Paywanmá lamar-qochapi llapa barcoyoqkunaqa qhapaqyarqanku, ¡imaynapitaq juj horallapiri ch’usaqman tukuchisqa karapun!,+ nispanku.

20 ”Chayrayku, ¡kusikuychis qankuna janaq pachapi kaqkuna,+ ch’uya kaqkuna,+ apostolkuna,* qankuna profetakunapas; qankunaraykun Diosqa chay warmiman juiciota apamun!”,+ nispa.

21 Chayllamanmi juj kallpasapa ángel juj jatun molino rumiman rijch’akuq rumita oqarispa lamar-qochaman wijch’uykurqan, jinaspa nirqan: “Chhayna wijch’uykusqan kanqa chay jatun Babilonia llaqtaqa, manataqmi jayk’aqpas tarisqachu kanqa.+ 22 Yau Babilonia llaqta, manañan qanpiqa jayk’aqpas uyarikunqañachu arpawan compañachikuspa takiqkuna, musicokuna, flauta* tocaqkuna ni trompeta tocaqkunapas. Manañan ima artesanopas qanpiqa kanqañachu, manañan molino rumiq kutasqanpas qanpiqa uyarikunqañachu. 23 Manañataqmi qanpiqa ima k’anchaypas k’anchanqañachu, manañan casarakuq qhariq kunkanpas ni casarakuq warmiq kunkanpas qanpiqa uyarikunqañachu. Qanwan negocio ruwaqkunaqa atiyniyoq runakunan karqanku, layqa ruwasqaykikunawanmi llapa nacionkunapas pantachisqa karqanku.+ 24 Arí, chay llaqtapin tarisqa karqan profetakunaq yawarnin, ch’uya runakunaq yawarnin,+ jallp’a pachapi mana khuyapayaspa wañuchisqa runakunaq yawarninpas”,+ nispa.

19 Chaykuna qhepatataq janaq pachamanta uyarini juj fuerte kunkata, ancha askha runakunaq kunkanpas kanman jinata, chay kunkan nimushasqa: “¡Jehová* Diosta jatunchaychis!*+ Diosninchispan salvacionpas, jatunchaypas, atiypas. 2 Cheqaqmi chaninmi paypa juicionkunaqa,+ chaymi jallp’a pachata qhelli jucha* ruwaywan qhellichaq atiyniyoq ramera warmitapas castigan, arí, kamachinkunata wañuchiqmantan payqa vengakun”,+ nispa. 3 Chayllamanmi wajmanta nimullantaq: “¡Jehová* Diosta jatunchaychis!*+ Chay Babilonia llaqtamantaqa wiñay-wiñaypaqmi q’osñi lloqsimushallanqa”,+ nispa.

4 Chay iskay chunka tawayoq kuraq runakunataq+ tawa kausashaqkunapiwan+ qonqorikuspa tronopi tiyashaq Diosta adorarqanku, jinaspa nirqanku: “¡Amén! ¡Jehová* Diosta jatunchaychis!”,*+ nispa.

5 Tronomantan juj kunka nimullantaq: “Diosninchista alabaychis, qankuna payta manchakuq llapa kamachinkuna,+ juch’uyña jatunña kankichis chaypas”,+ nispa.

6 Chayllamanmi uyarillanitaq ancha askha runakunaq kunkanta jina, askha unuq rimarisqan suenayta jina, fuerte rayo t’ojaykunata jina, chaykunan nimushasqa: “¡Jehová* Diosta jatunchaychis!*+ ¡Tukuy atiyniyoq+ Jehová* Diosninchisñan kunanqa kamachishan!+ 7 Ñan corderoq casarakunan tiempopas chayamunña, novianpas listoñan kashan paywan casarakunanpaq, chayrayku ancha kusikuywan Diosta jatunchasun. 8 Corderoq novianmanmi qosqa karqan sumaq k’anchashaq limpio lino p’acha, chaywan churakunanpaq; chay sumaq lino p’achaqa ch’uya runakunaq allinkuna ruwasqanwanmi tupan”,+ nispa.

9 Chay angelmi niwallantaq: “Kusisqan kanku corderoq casarakuynin jatun mijuyman invitasqa kaqkunaqa,+ nispa qelqay”, nispa. Chaymantan niwallantaq: “Kay simikunaqa Diospa rimasqan cheqaq simikunan”, nispa. 10 Chaymi noqaqa paypa ñaupanman pampakama k’umuykuni adoranaypaq, jinan payqa niwan: “¡Imatan ruwashanki! ¡Ama chayta ruwaychu!+ ¡Diosllatan adoranayki!+ Noqaqa kamachimasillaykin kani, Jesusmanta willanankupaq churasqa wayqeykikunaq kamachimasillantaqmi kanipas.+ Profeciakunaqa Jesusmanta cheqaq kaqta willanapaqmi”,+ nispa.

11 Chayllamanmi janaq pachata rikuruni kicharayashaqta, chaypin kashasqa juj yuraq caballo,+ chay caballopi sillakuqpa sutinmi kasqa Junt’aq Kaq,+ Cheqaq Kaq nisqa;+ payqa chanin kayman jinan juzganpas guerratapas ruwan.+ 12 Ñawinmi kasqa nina rauray jina,+ umanpitaq askha coronakuna kasqa, chaymantapas paypin mana piqpa reqsisqan suti qelqasqa kasqa, payllan chay sutitaqa reqsisqa. 13 Jawa p’achanpas yawarwan yawarchasqan* kasqa, sutintaq Diospa Simin nisqa kasqa.+ 14 Qhepantan yuraq caballokunapi jamushasqaku janaq pacha ejercitokuna, paykunan p’achasqa kasqaku limpiollaña sumaq lino yuraq p’achawan. 15 Siminmantataq juj filollaña jatun espada lloqsimushasqa,+ chaywan nacionkunata k’irinanpaq, fierro varawantaqmi paykunataqa michinqapas.+ Paymi sarunqa tukuy atiyniyoq Diospa manchay phiñakuynin uvas sarunatapas.+ 16 Jawa p’acha chakanpitaq qelqasqa kasqa “reykunaq reynin, señorkunaq Señornin”+ nisqa suti.

17 Chayllamanmi rikurullanitaq juj angelta intipi sayashaqta, paymi llapa phalaq animalkunata fuerteta wajashasqa: “Jamuychis Diospa jatun cenanman juñukamuychis,+ 18 chaypin mijunkichis reykunaq aychanta, ejercitopi comandantekunaq aychanta, kallpasapa runakunaq aychanta,+ caballokunaq aychanta, chaypi sillakuqkunaq aychanta,+ jinallataq libre kaqkunaq, kamachikunaq, juch’uykunaq, jatunkunaq aychantawan, arí, lliupa aychanta”, nispa.

19 Chaymantan rikullanitaq manchay phiña animaltapas, jallp’a pacha reykunatapas, ejercitonkunatapas; paykunan juñukusqaku caballopi sillakuqwan ejercitonwan ima guerrata ruwanankupaq.+ 20 Jinan chay manchay phiña animalqa falso profetawan+ kuska jap’isqa karqan, chay falso profetan chay manchay animalpa ñaupanpi imaymana señalkunata ruwarqan, chaywantaq chay animalpa marcanta chaskiqkunata,+ chay animalpa rijch’ayninta adoraqkunatawan+ pantachirqan. Iskayninkun kausashaqlla wijch’uykusqa karqanku azufreyoq nina qochaman.+ 21 Wakintaq caballopi sillakuqpa siminmanta lloqsimuq jatun espadawan wañuchisqa karqanku.+ Jinan phalaq animalkunaqa paykunaq aychanta sajsanankukama mijurqanku.+

20 Chayllamanmi rikuruni juj angelta chinkay-chinkay ukhuq llaven apaykusqa+ jatun cadena apaykusqa ima janaq pachamanta uraykamushaqta. 2 Jinan ñaupa mach’aqway+ nisqa dragonta jap’irqan,+ paymi Saqraqa+ Satanaspas,+ jinaspa waranqa watapaq watarqan. 3 Chaymantataq chinkay-chinkay ukhuman wijch’uykurqan,+ chaypi wisq’aspataq juj sellota churarqan, chhaynapi chay waranqa wata tukunankama amaña nacionkunata pantachinanpaq. Chay qhepamanmi ichaqa pisi tiempollapaq kacharisqa kanqa.+

4 Chaymantataq rikuni tronokunata, chaypi tiyaqkunamanmi juzganankupaq atiy qosqa karqan, arí, pikunachus Jesusmanta Diosmantawan willasqankurayku wañuchisqa* karqanku chaykunatan rikuni;* paykunaqa manan manchay phiña animalta ni rijch’aynintapas adorarqankuchu, nitaq mat’inkupipas ni makinkupipas chay manchay animalpa marcantaqa chaskirqankuchu.+ Paykunan kausarimuspa Cristowan kuska waranqa watantin reykuna jina kamachinqaku.+ 5 Chaymi chay ñaupaq kaq kausarimpuyqa.+ (Wakin wañusqa kaqkunan+ ichaqa chay waranqa wata tukuytaña kausarimpunqaku). 6 May kusisqan pipas ñaupaq kaq kausarimpuypi kausarimuqqa.+ Paykunataqa manan imananqapaschu+ iskay kaq wañuyqa,+ aswanmi paykunaqa Diospa sacerdotenkuna+ Cristoq sacerdotenkuna ima kanqaku, waranqa watataqmi kamachinqakupas.+

7 Chay waranqa wata tukuqtinmi Satanasqa maypichus preso kasqanmanta kacharisqa kanqa, 8 jinan lloqsimuspa jallp’a pachaq tawantin esquinakunapi kaq nacionkunata pantachinqa, arí, Gogta, Magogtawanmi pantachinqa, jinaspa guerrata ruwanankupaq juñunqa. Chay juñusqakunaqa lamar-qocha patapi aqo jinaraqmi kanqaku. 9 Chay nacionkunan jallp’a pachantinman ch’eqerispanku ch’uya runakunaq karpakusqankuta, munasqa llaqtata ima muyuykunqaku. Ichaqa janaq pachamantan nina lloqsimunqa jinaspa paykunata ruphapunqa.+ 10 Pantachiqninku Saqrataq azufreyoq nina qochaman wijch’uykusqa kanqa, chaypiñan kasharqanku manchay phiña animalpas+ falso profetapas;+ chaypin tuta-p’unchay wiñay-wiñaypaq carcelasqa* kanqaku.

11 Chaymantan rikullanitaq juj jatun yuraq tronota, chay tronopi tiyashaqtawan.+ Paypa ñaupanmantan jallp’a pachawan cielowan ima ayqekurqanku,+ manañan tarisqachu karqanku. 12 Chaymantan rikullanitaq wañusqakunata, juch’uykunata jatunkunatawan tronoq ñaupanpi sayashaqta, chaypin qelqa k’uyukuna kichasqa karqan. Chaymantan waj qelqañataq kichasqa karqan, chayqa kausay libron kasqa.+ Chay wañusqakunaqa imachus ruwasqankuman jina, qelqa k’uyukunapi imachus qelqasqa kasqanman jinan juzgasqa karqanku.+ 13 Lamar-qochapas chaypi wañusqa kaqkunatan entregarqan, wañuypas Sepulturapas* chaypi wañusqakuna kaqtan entregarqanku, jinan paykunaqa imachus ruwasqankuman jina sapankanku juzgasqa karqanku.+ 14 Chaymantataq wañuypas Sepulturapas nina rauray qochaman wijch’uykusqa karqanku,+ chay nina rauray qochaqa+ iskay kaq wañuywanmi tupan.+ 15 Chaymantapas piqpa sutinchus mana kanchu kausay libropi qelqasqa chay runapas+ nina rauray qochamanmi wijch’uykusqa karqan.+

21 Chayllamanmi rikullanitaq mosoq cielota mosoq jallp’a pachatawan,+ ñaupaq kaq cielopas ñaupaq kaq jallp’a pachapas manañan kasqachu,+ lamar-qochapas+ manañan kapusqachu. 2 Chaypin rikullanitaq juj ch’uya llaqtata, arí, Mosoq Jerusalén llaqtata, chay llaqtan janaq pachamanta Diosmantapacha uraykamushasqa,+ qosanpaq munay allichasqa novia jina.+ 3 Chayllamanmi uyarini tronomantapacha juj fuerte kunkata: “¡Qhawariy! Diospa karpanqa runakuna ukhupin kashan, paymi runakunawan kuska tiyanqa, paykunan llaqtan kanqa. Dios kikinmi paykunawan kashanqa.+ 4 Diosmi runakunaq ñawinmanta tukuy weqeta pichanqa,+ manan wañuypas kanqañachu,+ manañataqmi llakikuypas, waqaypas, ni nanaypas kanqañachu.+ Arí, ñaupaq kaqkunaqa manañan kanqachu”, nispa nimuqta.

5 Tronopi tiyaqpas+ “¡qhawariy!, tukuy imatan mosoqta ruwashani” nispan nimun.+ Chaymantan nimullantaq: “Kaykunata qelqay, kay simikunaqa confianapaq jinan cheqaqtaqmi kanpas”, nispa. 6 Chaymantataq niwan: “¡Ñan junt’akunña! Noqan kani alfapas omegapas,* arí, noqan kani qallariypas tukukuypas.+ Pipas ch’akichikuqmanqa kausay pujyu unutan gratislla qosaq.+ 7 Pipas venceqqa lliu kaykunatan herenciapaq chaskinqa, noqan Diosnin kasaq, paytaq waway kanqa. 8 Manchapakuqkuna, mana iñiqkuna,+ millakunapaq kaqkunata ruwaq qhelli runakuna, runa wañuchiqkuna,+ qhelli juchapi* puriqkuna,+ layqa ruwaypi* puriqkuna, ídolo adoraqkuna, llullakuna+ iman ichaqa azufreyoq nina qochaman wijch’uykusqa kanqaku.+ Chayqa iskay kaq wañuywanmi tupan”,+ nispa.

9 Chaymantataq tukukuy qanchis plagakunawan junt’a kaq qanchis pocillokunata jap’iq qanchis angelkunamanta jujnin+ jamuspa niwan: “Jamuy, corderoq novianta, arí, paypa esposanta rikuchimusayki”,+ nispa. 10 Jinan payqa espirituq atiyninwan juj jatunkaray alto orqoman apawaspa rikuchiwan ch’uya Jerusalén llaqtata, chay llaqtan janaq pachamanta Diosmantapacha uraykamushasqa,+ 11 Diospa lliflli kayninwantaqmi junt’a kasqapas.+ Ancha sumaq qespi rumi jinaraqmi k’ancharisqapas, jaspe rumi jinan waputapuni k’ancharisqa.+ 12 Perqankunapas jatunkaray altollañan kasqa, punkunkunataq chunka iskayniyoq kasqa, sapanka punkupitaq juj ángel kashasqa, chaymantapas Israel llaqtaq chunka iskayniyoq ayllukunaq sutinmi punkunkunapi qelqasqa kasqa. 13 Inti lloqsimuy ladopin kasqa kinsa punkukuna, wichay ladopipas kinsa punkukunan kasqa, uray ladopipas kinsa punkukunallataqmi kasqa, inti jaykuy ladopipas kinsa punkukunan kallasqataq.+ 14 Chay llaqta muyuriq perqaq cimentacionninpin kasqa chunka iskayniyoq cimentación rumikuna, chaykunapin qelqasqa kasqa corderoq chunka iskayniyoq apostolninkunaq sutin.+

15 Chay noqawan rimaq angelqa medinapaq qori carrizotan* jap’isqa, chaywan chay llaqtata, punkunkunata, perqankunatawan medinanpaq.+ 16 Chay llaqtaqa cuadradon kasqa, largonpas anchon jina jatunllañan kasqa. Jinan chay angelqa jap’isqan carrizowan chay llaqtata medirqan, chay llaqtan kasqa 2220 kilómetro jina* sayay; largonpas, anchonpas, altonpas kaqllan kasqa. 17 Chaymantataq perqankunata medirqan, runaq medida churasqanman jinaqa pachaj tawa chunka tawayoq codotan* medisqa chay perqaqa, chay medidallawantaqmi chay angelpas medirqan. 18 Chaymantapas chay llaqtaq perqankunaqa jaspe rumimantan kasqa,+ lliu llaqtataq vidrio jina k’anchashaq ch’uya qorimanta kasqa. 19 Chay llaqta muyuriq perqaq cimentacionninkunataq imaymana sumaq qespi rumikunamanta kasqa: Ñaupaq kaq cimentacionmi kasqa jaspe rumimanta, iskay kaqtaq kasqa zafiro rumimanta, kinsa kaqtaq kasqa calcedonia rumimanta, tawa kaqtaq kasqa esmeralda rumimanta, 20 pisqa kaqtaq kasqa sardónica rumimanta, soqta kaqtaq kasqa sardio rumimanta, qanchis kaqtaq kasqa crisólito rumimanta, pusaq kaqtaq kasqa berilo rumimanta, isqon kaqtaq kasqa topacio rumimanta, chunka kaqtaq kasqa crisoprasa rumimanta, chunka jujniyoqtaq kasqa jacinto rumimanta, chunka iskayniyoqtaq amatista rumimanta kasqa. 21 Chay chunka iskayniyoq punkukunaqa chunka iskayniyoq perlakunan* kasqa, sapanka punkun juj perlamanta kasqa. Llaqtapi jatun kaq callepas ch’uya qorimantan kasqa, vidrio jinataqmi kasqapas.

22 Chaypiqa manan ima templopas kasqachu, tukuy atiyniyoq+ Jehová* Dioswan corderowan iman temploqa kasqaku. 23 Chay llaqtaqa manan necesitasqachu intiq k’anchaynintapas ni killaq k’anchaynintapas, Diospa lliflli kayninmi chay llaqtataqa k’anchaykusqa,+ corderopas k’anchaymi* kasqa.+ 24 Chay k’anchaywanmi llapa nacionkunaqa purinqaku,+ jallp’a pacha reykunapas chaymanmi lliflli kayninkuta apanqaku. 25 Punkunkunapas manan jayk’aqpas wisq’akunqachu, chaypiqa p’unchayllan kanqa manan tutaqa kanqachu.+ 26 Chay llaqtamanmi apasqa kanqa nacionkunaq lliflli kaynin jatunchasqa kayninpas.+ 27 Ichaqa manapunin ima qhelli kaqpas, ni ima millakunapaq kaqta ruwaqpas, ni engañaspa puriqpas chay llaqtamanqa jaykunqachu.+ Aswanpas pikunaq sutinchus corderoq kausay qelqa k’uyunpi qelqasqa kashan, chaykunallan chaymanqa jaykunqaku.+

22 Chaymantataq chay angelqa rikuchiwan kausay unu mayuta,+ chay mayuqa qespi rumi jinan ch’uyallaña kasqa, Diospa trononmanta corderoq trononmantawanmi lloqsimusqapas,+ 2 chay llaqtaq jatun callentataqmi jaykushasqapas. Chaymantapas chay mayuq sapanka chimpanpin kasqa kausay sach’akuna, chay sach’akunan sapa watan chunka iskayniyoq kutita cosechata qoq kasqa, arí, sapa killanmi ruruq kasqa, raphinkunataq nacionkunaq qhaliyananpaq kasqa.+

3 Chay llaqtapiqa manañan ima ñakaypas kanqañachu, Diospa tronon corderoq tronon iman+ chay llaqta ukhupi kashanqa; kamachinkunataq Diosta servinqaku, 4 uyantapas rikunqakun,+ mat’inkupitaq paypa sutinta apanqaku.+ 5 Chaymantapas chay llaqtapiqa manañan kanqachu tuta,+ chaymi manaña necesitakunqachu mecheroq* k’anchaynintapas ni intiq k’anchaynintapas, Jehová* Diosmi paykunataqa k’anchaykunqa,+ paykunataq wiñay-wiñaypaq reykuna kanqaku.+

6 Chaymantataq niwan: “Kay simikunaqa confianapaq jinapunin, cheqaqtaqmi kanpas;+ arí, profetakunata yuyaychaq+ Jehová* Diosmi angelninta kachamurqan imakunachus pisi tiempollamanta pasanqa chaykunata kamachinkunaman rikuchinanpaq. 7 Noqaqa ñan jamusaqña.+ Kusisqan pipas kay qelqa k’uyupi profeciaq nisqanta kasukuqqa”,+ nispa.

8 Noqa Juanmi tukuy chaykunataqa uyarini rikunipas. Chaykunata rikuspay uyarispay iman noqaqa chaykunata rikuchiwaqniy angelpa ñaupanman pampakama k’umuykurqani payta adoranaypaq. 9 Jinan payqa niwan: “¡Imatan ruwashanki! ¡Ama chayta ruwaychu! Noqaqa kamachimasillaykin kani, wayqeyki profetakunaq kamachimasin, kay qelqa k’uyupi imachus nisqanta kasukuqkunaq kamachimasin imallan kani. Diostan adoranaykiqa”,+ nispa.

10 Chaymantan niwallantaq: “Aman sellankichu kay qelqa k’uyupi profeciaq imachus nisqankunataqa, señalasqa tiempoqa ñan chayamushanña. 11 Pipas mana chanin kaqta ruwaqqa ruwashallachunyá mana chanin kaqta, millay qhellita kausaqpas kausashallachun chhayna qhellita; pipas chanin kaqta ruwaq ichaqa chanin kaqllatapuni ruwashachun, ch’uya kaqpas ch’uyallapuni kashachun”, nispa.

12 “Noqaqa ñan jamusaqña, chaypachan sapankaman pagonta qopusaq imachus ruwasqanman jina.+ 13 Noqan kani alfapas omegapas,*+ arí, noqan kani ñaupaq kaqpas qhepa kaqpas, qallariypas tukukuypas. 14 Kusisqan kanku pampakama p’achankuta t’aqsaqkunaqa,+ paykunan libre kanqaku kausay qoq sach’akunamanta mijunankupaq,+ chay llaqtaman punkunta jaykunankupaqwan.+ 15 Alqokuna,* layqa ruwaypi* puriqkuna, qhelli jucha* ruwaypi puriqkuna, runa wañuchiqkuna, ídolo adoraqkuna, llullakuqkuna, chay ruwayta munakuqkuna iman+ ichaqa jawapi qhepakapunqaku”.

16 “Noqa Jesusmi angelniyta kachamurqaykichis iñiq t’aqakunaq allinninpaq lliu kaykunata willanasuykichispaq. Noqan Davidpa saphinqa kani, noqan mirayninpas kani,+ noqan pacha illarimuypi k’anchaq ch’askapas kani”.+

17 Santo espirituwan noviawanmi+ nishanku: “¡Jamuy!”, nispa. Pipas chayta uyariqqa “¡jamuy!” nichun, pipas ch’akichikuqqa jamuchun;+ pi munaqpas gratislla ujachun kausay unuta.+

18 “Kay qelqa k’uyupi profeciaq imachus nisqanta uyariqkunatan nini: Pipas kay qelqaman imatapas yapaykunqa chayqa,+ Diosmi payman yapanqa kay qelqa k’uyupi qelqasqa plagakunata.+ 19 Pipas kay qelqa k’uyupi profeciaq imachus nisqanmanta imatapas orqonqa chayqa, manan Diosqa payman qonqachu kay qelqa k’uyupi imachus qelqasqa kashan chaykunata, manan mijuchinqachu kausay sach’a ruruta,+ manataqmi jaykuchinqachu chay ch’uya llaqtamanpas.+

20 ”Tukuy chaykunata willaqmi nin: Arí, noqaqa ñan jamusaqña,+ nispa”.

“¡Amén! Jamuy Señor Jesús”.

21 Llapa ch’uya kaqkunawan kachun Señor Jesuspa ancha sumaq sonqo kaynin.