Umalliq T’aqaq cartan

Munasqa wawqe-panaykuna:

2008 watapi 1 enero killapin Qhawaq revistapi lloqsiyta qallarimurqan “Paykuna hina kay” nisqa yachachikuy. Chay kutimantapachan askha simikunapi sapa kinsa killa lloqsimurqan.

¿Imatan chayta leespa nirqanku? Martamanta leespan huk cristiana nirqan: “Ñoqaqa pay hinapunin kani, chaymi paymanta leesqaypi anchatapuni asikurqani, invitadoykunata allinta chaskinaypaqmi ñoqaqa imaymanata ruwani. Mayninpiqa manan paykunawan huk rato tiyaykuyta atinichu chay ruwayña aswan importante kaqtinpas”, nispa. Estermanta leesqan qhepamanmi huk sipas nirqan: “Chay willakuyqa ñoqapaq hinapunin karqan. Nishutapunin munapayani chayllaraq lloqsimuq p’achakunawan churakuyta. Allintaña p’achakunanchis chaypas manan nishutaqa chayllapiñachu yuyaykunanchis. Jehová Diosqa astawanqa qhawan imayna runa kasqanchistan”, nispa. Huk cristianapas Pedromanta leespan anchata kusikurqan, nirqanmi: “Chaypipas kashayman hinatapunin leerqani. Rikushaymanpas uyarishaymanpas hinan karqan”, nispa.

Chay yachachikuykunamanta chhaynata qelqamuspa agradecekusqankuqa rikuchinmi apóstol Pabloq kay nisqanta: “Ñawpa tiempopi Qelqasqakunaqa yachaqananchispaqmi qelqasqa karqan”, nispa (Rom. 15:4) Jehová Diosmi chay runakunaq kawsayninmanta Bibliapi qelqachirqan chhaynapi paykunaq ruwasqankumanta yachananchispaq. Chayrayku hayk’a wataña Diosta reqsinchis chaypas llapanchispas askhatan yachasunman chay willakuykunata leespa.

Maytapunin munayku kay librota chaskispa hinalla leenaykichista. Familiantin Diosta Yupaychasqaykichis Ch’isipipaschá leewaqchis, wawaykikunaqa anchatan munanqaku. Iñiq t’aqaykipi kay librota estudiakuqtinqa amapuni ni huk huñunakuymanpas faltakuychu. Kay librotaqa tukuy yuyayniykiwan leey ama hawan ukhuntachu, rikushawaqpas hinata leey, qanpas chaypi ruwaysikushawaq hina sientekuy. Chay runakunapas kawaq hinatapuni qhawarikuy hinaspa reparay imaynapi tarikusqankuta, yuyaykuy chay runa kaspayki imatan ruwawaq karqan chaypi.

Ñoqaykuqa anchatapunin kusikushayku kay librota apachimusqaykumanta. Familiaykitan allinta yanapanqa. Anchatan munakuykichis iñiqmasiykuna.

Jehová Diospa testigonkunata Umalliq T’aqa