¿Ima ninmi Biblia yawar churachikuymanta?
¿Ima ninmi Biblia?
Bibliapiqa ninmi “aman yawarta mijunkichu” nispa. Chayrayku cheqaq cristianokunaqa manapuni yawartaqa mijunanchischu ni churachikunanchispaschu, manallataqmi churachikusunmanchu glóbulos rojos, glóbulos blancos, plaquetas, plasma chaykunatapas. Wakin textokunata qhawarisun:
Génesis 9:4. Millp’uq para chayasqan qhepamanmi Jehová Diosqa Noeman familianmanwan permisota qoran animalkunaq aychanta mijunankupaq, ichaqa niranmi: “Yawarnintin aychatan ichaqa ama mijunkichischu”, nispa. Noqanchispas kasukunanchismi chay kamachikuytaqa Noepa miraynin kasqanchisrayku.
Levítico 17:14. Chaypin Diosqa Israel llaqtanta kamachiran: “Aman ima animalpa yawarnintapas mijunkichischu, llapa kausaqpa kausayninqa yawarninpi kasqanrayku. Pipas chayta mijuqqa qarqosqan kanqa”, nispa. Jehová Diospaqqa kausaypas yawarpas kaqllan, paymantataqmi kausayqa paqarimun. Israel llaqtamanña chay kamachikuyta qoran chaypas, allintan chaypi rikukun yawar mijuyqa jucha kasqanta.
Hechos 15:20. Diosqa cristianokunatapas kamachiranmi ‘yawarmanta karunchakunankupaq’, arí, yawarwan ama imatapas ruwanankupaq. Noemanpas chay kamachikuytan qoran ñaupa tiempopi. Ñaupa tiempopi cristianokunapas manapunin yawartaqa mijurankuchu nitaq chaywan jampichikurankupaschu.
¿Imaraykun yawarta mana mijunanchischu nitaq churachikunanchispaschu?
Imaymana peligrokunan kan yawar churachikuqkunapaqqa, chaymi mana churachikusunmanchu. Ichaqa kanmi aswan importante razón yawarta mana churachikunapaqqa. Yawartaqa kausayta jinan Diosqa qhawarin, chayraykun manapuni yawartaqa churachikusunmanchu (Levítico 17:11; Colosenses 1:20).