¿Tukunmanchu warmi-qhari maqanakuy?

ADMIRAKUNKIÑA chaypas ñawpaqpi leesqanchisqa Frankpa Isabelpa casarasqa kawsayninkun.

Esposankuta maqaq askha qosakunan Frank hina kanku, runakunaq qhawarinanpaqmi allin runa kanku, suegronkuq ñawpaqenpipas. Sapallankupi kaspan ichaqa esposankuta sinchita maqanku.

Askha tayta-mamakunan wawankuq ñawpaqenpi maqanakunku, chhayna familiapin Frankpas wiñarqan, chaymi kurakña kaspanku chhaynapuni kawsay kananpaq yuyaykunku. Ichaqa esposankuta maqaq qharikunamanta uyarispan askha runakuna ninku “imayna sonqoyoqtaq kanku chhaynata ruwanankupaqri” nispa.

Chhayna kawsayqa tukuypin kashan. Estados Unidospin huk minutopi chunka soqtayoq runakuna telefonopi waqyarqanku warmi-qhari maqanakuqkunata yanapaq oficinata. Chayqa onqoy hinaraqmi pachantinpi mast’arikushan, wakchapas qhapaqpas chhayna kawsaypin tarikushanku. Ichaqa manan llapa maqachikuqkunachu denunciata churanku, paykunatawan yupaspaqa aswan askharaqmi kankuman.b

Noticiakunapiqa uyarishallanchismi warmi-qhari maqanakuykunamanta, chaymi kaykunata tapukunchis: “¿Imaynapitaq huk runari esposanta chhaynaniraqta maqanman? ¿Ima yanapayllapas kanchu chhayna maqaq qosakunapaq?”, nispa.

Kay revistata qelqamuq Jehová Diospa testigonkunaqa manan iskayyankuchu Bibliapi allin yuyaychaykuna kasqanmanta, chaypi yanapaykunaqa maqakuq qosakunatan llanp’u sonqoman tukuchin. Ñawpaqpin askha runakuna t’impuq sonqo karqanku ichaqa Bibliaq yanapayninwanmi sumaq sonqo respetakuq runa kapurqanku, sasaña karqan chaypas atirqankun (Colosenses 3:8-10). Yachasun Tomasmanta Valeriamantawan.

¿Imaynan karqan kawsayniykichis qallariypi?

Valeria: Kuska tiyanaykupaq rimanakusqayku tutapin Tomasqa ch’aqlawarqan, huk semanan q’oyo uyantin karqani. Chay qhepamanmi niwarqan manaña hayk’aqpas chhaynata ruwawananpaq. Ichaqa watan-watanmi chaytaqa niwashallarqan.

Tomás: Imallamantapas k’araktan phiñakuq kani, mikhunata mana horasninpi chayachiqtinpas. Huk kutinmi pistolawan Valeriata q’asurqani. Huk kutinpipas chhaynatan q’asurqani chaymi wañurqonanpaq yuyaykurqani. Chaymantataqmi wawaykuq kunkanman huk cuchillota churaspay “wañurachisaqmi” nispa manchachirqani.

Valeria: Manchasqallan kawsarqani. Mayninpiqa wasiymantan ayqekuq kani Tomaspa sonqon tiyaykunankama. Chaywanpas rimasqanmi astawanqa k’iriwaq maqawasqanmantaqa.

¿Chhaynapunichu karqanki Tomás?

Tomás: Arí, huch’uyniymantapachan chhayna karqani. Taytayqa mamaytan maqaq wawqe-panaykunapas ñoqapas rikushaqtiyku. Taytayqa saqepuwarqankun, mamayqa huk qhariwanmi tiyarqan ichaqa paypas maqallarqantaqmi. Chaymantapas chay runan ñoqatapas panaytapas violawarqanku chaymi carcelman haykurqan. Ichaqa manan chay hawachu ninay “ñoqaqa chayraykun chhayna kani” nispaqa.

¿Imaraykun mana saqepurqankichu Valeria?

Valeria: Manchakurqanin. Kaykunapin yuyaykurqani: “Ripuqtiyqa maskhamuwanqapaschá hinaspa wañurqachiwanqa otaq tayta-mamaytapas wañurqachinqa. Denunciata churaqtiyqa aswan mana allinpipaschá rikukusaq”, nispa.

¿Hayk’aqmantapachan manaña maqanakuspachu kawsankichis?

Tomás: Esposaymi Jehová Diospa testigonkunawan Biblia estudiayta qallarirqan. Manan thakchu karqani chay runakunawan reqsinakushasqanmanta, chaymi yuyaykurqani chay “sectamanta” lloqsipunanpaq. Hinan aswan millaytaraq Valeriata Testigokunatapas tratarqani. Tawa watayoq Daniel churiymi ataque onqoyniyoq karqan hinan huk kutin kinsa semana hospitalman haykurqan. Chay kutipin Testigokunaqa imaymanapi yanapawarqanku, soqta watachayoq Teresa ususichaytapas cuidarqanku. Huk Testigon tutapi llank’asqan qhepaman Danielta ch’isiyaq cuidarqan chhaynapin Valeriaqa puñuq ripurqan. Paykunataqa millaytan tratarqani ichaqa sumaq sonqo kasqankun sonqoyman chayarqan. Rikurqanin cheqaq cristianokuna imayna kasqankuta, chaymi Testigokunata valekurqani Bibliamanta yachachiwanankupaq. Bibliata estudiasqaypin yacharqani esposanta huk qosa imayna munakunanta, hinan manaña k’arak sonqoñachu kapurqani. Qhepamanqa bautizakapurqanin Jehová Diospa testigon kanaypaq.

¿Bibliapi ima textokunan yanaparqasunki?

Tomás: Askha textokunan karqan. 1 Pedro 3:7 textopin Biblia willan warmikunata ‘sumaqta respetana’ kasqanta. Gálatas 5:23 texton nin ‘llamp’u sonqo’ “cuerpo kamachiq” kanapaq. Efesios 4:31 textotaqmi huchachan rimasqanchiswan k’iriyta. Hebreos 4:13 texton willallantaq Diospa qayllanpiqa mana imapas “pakasqachu” kasqanta. Diosqa tukuy ruwasqaytan rikushan manaña wasimasiykuna rikuwanchu chaypas. Hinaspapas wakin runakunawanqa manañan amigontinchu kanay karqan “mana allin runakunawan huñukuspaqa” paykuna hinan kayman (1 Corintios 15:33). Ñawpaqpi amigoykunaqa allinpaqmi qhawariqku k’arak phiñakuq kasqayta. Paykunaqa niqkun “warmitaqa maqaspallan purichina” nispa.

¿Imaynatan kunan kawsashankichis?

Valeria: Tomasqa iskay chunka phisqayoq watañan Jehová Diospa testigon kashan. Chay kutimantapachan payqa munakuq sumaq sonqo runa kapurqan.

Tomás: Familiaypa sonqonta k’irisqaytaqa manañan allichayta atiymanñachu, sinchi millaytapunin esposaytaqa tratarqani. Maytan munashani Isaías 65:17 textopi nisqan hunt’akunanta, manañan chay tiempopiqa yuyarisaqkuñachu chay mana chanin ruwasqaykunata.

¿Imatan niwaqchis maqanakuspa kawsaq warmi-qharikunata?

Tomás: Sichus pipas familianpi kaqkunata maqan otaq rimasqanwanpas k’irin chayqa reparakunanmi yanapana kasqanta. Maskhanki chayqa tarinkin. Ñoqataqa Testigokunawan Bibliata estudiasqaymi, paykunawan huñunakusqaymi yanapawarqan amaña k’arak sonqo kanaypaq.

Valeria: Imaynapi tarikusqaykitaqa ama hukkunaq kawsayninwan tupanachiychu, wakinkunaqa yachaqpaqmi qhawarikunku imachus allinniykipaq kananmanta, paykunaq nisqasuykikutaqa ama kasuychu. Manan llapa runaq sasachakuyninchu kaqllapi tukun, ichaqa warmi-qhari allinta kawsanaykupaq kallpachakusqaykuqa manan yanqachu karqan, kunanqa kusisqan kawsayku.

¿TUKUNMANCHU WARMI-QHARI MAQANAKUY?

Biblian nin: “Diospa Simin Qelqakunaqa llapallanmi Diospa yuyaychasqan, chayraykun allinpuni yachachinapaq, anyanapaq, wanachinapaq”, nispa (2 Timoteo 3:16). Tomasqa Bibliaq kamachikuyninkunatan kasukurqan chhaynapin manaña k’araq sonqoñachu kapurqan, pay hinan askha runakunapas mana allin kawsayninkuta saqepurqanku.

Casarasqakunata imaynata Biblia yanapasqanmanta astawan yachayta munanki chayqa Jehová Diospa testigonkunata maskhay otaq Internetpi maskhay www.pr418.com/es nisqapi.