Animalkunamanta

¿Imaynatan animalkunata tratananchis?

¿IMA NINKUN RUNAKUNA?

Wakin runakunan ninku: “Animalkunawanqa munasqanchistan ruwasunman”, nispa. Hukkunataq ninku: “Runakunata hinan animalkunataqa tratananchis”, nispa.

• Animalkunata defiendeq runan nin: “Runakunata hinan animalkunataqa tratana, manan negociollapaqchu nitaqmi cosaskunata hinallapaschu qhawarina”, nispa.

• Leona Helmsley sutiyoq warmiqa qhapaqmi karqan chaymi 12 millones dolarkunata alqonman herenciata saqerqan, testamentonpipas qelqasqatan saqerqan alqon wañuqtin paypa ladonpi p’ampanankupaq.

Chhaynaqa, ¿imaynatan animalkunata tratananchis?

¿IMA NINMI BIBLIA?

Llapa kawsaqkunata kamaq Jehová Diosmi runakunata kamachirqan kayta: “Kamachiychistaq challwakunata, phalaq animalkunata, kay pachapi puriq, suchuq llapa animalkunatapas”, nispa (Génesis 1:28). Chay textopi nisqan hina, Diosqa runakunatan kamarqan animalkunata kamachinanpaq.

Génesis 1:27 texton astawan chayta sut’inchan, ninmi: “Diosqa runata kamarqan, Diosman rikch’akuqtan [...], qharita warmitawanmi kamarqan”, nispa.

Kay textopi nisqan hina, Diosqa kamawarqanchis payman rikch’akuqtan. Chayraykun kanchis yachayniyoq, munakuq, chanintan imatapas ruwanchis. Chaymantapas yachanchismi iman allin imataq mana allinchu kasqanta, Diosmantapas yachaytan munanchis. Chaytaqa manan animalkunaqa ruwayta atinkumanchu. Animalkunaqa manan ñoqanchis hina kamasqachu kanku, Diosninchispas manan ninchu “animalkunata runakunata hina trataychis” nispaqa.

Chaywanpas, ¿maltratananchischu animalkunata? Manapunin.

• Israelitakunaman kamachikuykunata qosqanpin Diosninchis nirqan animalninkuta cuidanankupaq, mikhuchinankupaq, samachinankupaq ima (Éxodo 23:4, 5; Deuteronomio 22:10; 25:4).

“Soqta p’unchaymi llank’anki, qanchiskaq p’unchaytaqmi samakunki, toroykipas asnoykipas samananpaq” (Éxodo 23:12)

¿Huchachu animalkunata wañuchiy?

¿IMA NINKUN RUNAKUNA?

Wakin runakunaqa pukllanankuraykullan otaq kusikunankuraykullan animalkunataqa wañuchinku. Wakintaq ichaqa piensanku Rusiamanta escritor León Tolstói runa hina, paymi nirqan animalkunata wañuchiypas mikhuypas “qhelli ruway” hina kasqanta.

¿IMA NINMI BIBLIA?

Diosninchisqa niwanchismi animalkuna dañota ruwawaqtinchis wañuchinanchispaq (Éxodo 21:28). Chaymantapas nillarqantaqmi: “Animalkunaqa mikhunaykichispaqmi kanqa”, nispa (Génesis 9:3). Jesucristopas discipulonkunatan yanaparqan challwata hap’inankupaq (Juan 21:4-13). Biblian nillantaq animalkunata p’achakunanchispaq wañuchinanchista (Marcos 1:6).

Ichaqa Bibliapin sut’ita nin: “Diosninchisqa ‘millay runakunatapas maqaylla maqaqkunatapas cheqnikunmi’”, nispa (Salmo 11:5). Chaypin rikunchis pukllanaraykulla otaq kusirikunaraykulla animanlkunata wañuchiyqa manapuni allinchu kasqanta.

Biblian yachachiwanchis animalkunaq kawsayninqa ancha valorniyoq Diosninchispaq kasqanta.

• Biblian nin Diospa kamasqanmanta: “Diosqa ruwarqan tukuy rikch’aq uywakunata, suchuq animalkunata, salqa uywakunatapas. Diosmi rikurqan allin kasqanta”, nispa (Génesis 1:25).

• Jehová Diosmantan Biblia nin: “Paymi uywakunaman mikhuchin”, nispa (Salmo 147:9). Diosqa kay pachatan kamarqan animalkuna thakpi kawsanankupaq askha mikhunayoq kanankupaq ima.

• Rey Davidmi huk oracionpi kayta nirqan: “Señor Diosníy, qanmi runatapas uywatapas kawsachishanki”, nispa (Salmo 36:6). Diluvio kaqtinpas Jehová Diosmi kawsachirqan 8 runakunata imaymana clase animalkunatawan (Génesis 6:19).

Yachasqanchis hina, Jehová Diosqa anchatan animalkunata valoran, chayraykun ñoqanchispas animalkunataqa mana ñak’arichinanchischu.

“Chanin runaqa uywankunatan allinta rikun” (Proverbios 12:10)