Hatun torreta runakuna ruwanku

ASKHA watakuna qhepatan Noepa churinkuna askha wawayoq kasqaku. Wiñaspataq wawankupas askha wawakunayoq karanku. Pisi tiempollapin runaqa askhaman mirasqa.

Chay runakunamanta hukninmi karan Noeq hawayninpa churin, Nemrod sutiyoq. Payqa millay runan karan, wañuchiranmi animalkunata runakunatapas. Nemrodqa kamachiqman tukuspan runakunata kamachiran. Diosqa manan Nemrodta munakuranchu.

Chay tiempopi runakunaqa huk simillatan rimaranku. Nemrodqa llapa runakunatan huk llaqtallapi huñuyta munaran kamachinanpaq. ¿Imaynatan chayta ruwaran? Runakunatan kamachiran llaqtata ruwaspa chaypi hatun torreta ruwanankupaq. Kay dibujopin rikushanki ladrillokuna ruwasqankuta.

Jehová Diosqa manan allintachu qhawariran chay torre ruwasqankuta. Payqa munaran chay llaqtamanta ripuspa Allpantinpi runakunaq tiyananta. Paykunan ichaqa niranku: ‘¡Hamuychis! Huk llaqtata perqasunchis, hanaq pachakama aypaq torretawan. Allin reqsisqa runakunataq kasunchis,’ nispa. Dios hatunchanankutaqa paykunan hatunchakuyta munaranku.

Chay raykun Diosqa tatichiran torre ruwasqankuta. ¿Imaynatan ruwaran? Qonqayllamantan runakunaqa hukniray simikunata rimasqaku. Manañan entiendenakurankuchu. Chay raykun llaqtankuqa sutichakusqa Babel, otaq Babilonia nisqa sutiwan, chay sutiqa “mana entiendenakuy” ninanmi.

Chayraqmi runakunaqa Babelmanta ripuranku. Kaq simi rimaq runakunan hukllachakuspa ripuranku huk cheqaskunapi kuska tiyanankupaq.