Moisés waqtan qaqata

¡CHUNKA wata, 20 wata, 30 wata, 39 watakunaña pasan! Israelitakunan ichaqa ch’inneq aqo pampapiraq kashanku. Chay watakunapin Jehová Diosqa paykunata sumaqta qhawarin. Maná nisqatan qon mikhunankupaq. P’unchaytan pusan phuyuwan, tutataq rawrashaq k’anchaywan. Manan p’achanku thantakunchu nitaq chakinkupas punkinchu.

Kunanqa 40 watapi qallariy killañan kashan Egipto suyumanta lloqsimusqankumantapacha. Hukmantan israelitakunaqa Cadespi kashanku. Kaypin kasharanku 12 qhamiyaqkuna Canaanta rishaqtinku yaqa 40 wata ñawpaqta. Moisespa panan Miriampas Cadespin wañun. Ñawpaq hinan, kaypi sasachakuykuna kallantaq.

Manan unuta tarinkuchu. Chaymi Moisesman rimapakunku: ‘Aswanchá wañupuykuman karan. ¿Imapaqmi Egipto suyumanta horqomuwarankiku mana ima wiñaq aqo pampaman? Kaypiqa manan kanchu higokunapas, uvaskunapas, granadakunapas. Manan unullapas ukyanapaq kanchu,’ nispa.

Moiseswan Aaronwan yupaychana karpata Diosmanta mañakuq riqtinkun, Jehová Dios Moisesta nin: ‘Llaqtata huñuy. Llapankuq ñawpaqenpi chay qaqata rimapayay. Chaymantan askha unu lloqsimunqa qankunapaq llapan animalkunapaqpas,’ nispa.

Chaymi runakunata huñuspa, Moisesqa nin: ‘¡Uyariychis, Diospi mana iñiq runakuna! ¿Kay qaqamantachu ñoqapas Aaronpas unuta horqopusaykichis?’ Chaymi Moisesqa k’aspiwan iskay kutita qaqata waqtaqtin askha unu qaqamanta lloqsimun. Llapa runakunapaqpas animalkunapaqpas askhan unu kan.

Jehová Diosmi ichaqa Moiseswan Aaronwanpas phiñakun. ¿Ima rayku?, Moiseswan Aaronwanmi niranku, ñoqaykun kay qaqamanta unuta horqosaqku, nispa. Jehová Diosmi unutaqa horqoran. Kaymanta mana kaqta willaqtinkun, Jehová Diosqa Moisesta Aarontapas wanachinqa. ‘Manan qankunachu llaqtayta Canaán suyuman pusankichis,’ ninmi.

Chay qhepallamanmi israelitakunaqa Cadesmanta lloqsinku. Pisi tiempollapin chayanku Hor sutiyoq orqoman. Chay orqo patapin Aaronqa 123 watanpi wañupun. Anchatan israelitakunaqa llakikunku, 30 p’unchaytataq waqanku Aaronpa wañusqanmanta. Aaronpa churin Eleazarmi kunanqa Israelpi uma sacerdote.