Saúl Israelpi ñawpaq kamachiq

QHAWARIY Samuelpa ruwasqanta, chay runaq umanmanmi aceiteta hich’ashan. Chaytan ruwaranku Jehová Diospa akllasqan runakunata kamachikuq kasqanta rikuchinankupaq. Jehová Diosmi Samuelta kamachin Saulpa umanman aceiteta hich’ananpaq. Chay aceiteqa sumaqtan q’apan.

Saulqa niranmi, manan kamachinaypaq hinachu kani, nispa. Samuelta nin: ‘Ñoqaqa kani Israelpi Benjamín huch’uy ayllumantan. ¿Ima raykun niwanki kamachiqmi kanki nispa?’ Jehová Diosqa kusikunmi Saulwan, payqa manan munanchu allin reqsisqa kayta nitaq hatun kaytapas. Chay raykun akllan kamachiq kananpaq.

Saulqa manan wakchachu nitaq huch’uy runapaschu. Qhapaq familiamantan, sumaq rikch’ayniyoqmi, hatun runataq. ¡Israelpi llapan runakunamantan sayaypiqa aswan hatun! Allin phawaqmi kallpasapataq kanpas. Llapa runan kusikun Saulta kamachiq kananpaq Jehová Dios akllasqanmanta. Llapankun qaparinku: ‘¡Kawsachun kamachikuq!,’ nispa.

Israelitakunaq awqankunaqa kallpasapakunan. Kamachiq kananpaq Saulta akllasqanku qhepallamanmi, amonitakunaqa Israel contra hatarinku. Saulmi ichaqa huñun askha soldadokunata hinaspa atipan amonitakunata. Kusikunmi llaqta Saúl kamachiqninku kasqanmanta.

Saulpa kamachisqan watakunapin israelitakunaqa askha kutita maqanakuykunapi atipanku. Saulpa churin Jonatanqa mana manchakuq runa. Yanapanmi Israelta askha maqanakuykunapi atipananpaq. Filisteokunaqa israelitakunaq millay awqankunan. Huk kutinmi filisteokunaqa waranqanpi rinku Israelwan maqanakunankupaq.

Samuelmi Saulta niran, Jehová Diosman sacrificio haywanaypaq suyawanki, nispa. Samuelmi ichaqa mana usqhaychu rin. Filisteokuna maqanakuy qallarinanta manchakuspan, Saulqa pay kikin Jehová Diosman sacrificiota haywan. Chayamuspan Samuelqa, Saulta nin mana kasukuq kasqanta. Samuelmi nin: ‘Rantiykitan huk runata Jehová Diosqa akllanqa Israelpi kamachiq kananpaq,’ nispa.

Huk kutipipas Saulqa manan Diosta kasukunchu. Samuelmi nin: ‘Jehová Dios kasukuymi aswan allin, sumaq ovejakuna haywaymantaqa. Jehová Diosta mana kasukusqayki raykun payqa manaña munanchu Israelpi kamachiq kanaykita,’ nispa.

Kaymantan ñoqanchispas horqosuman allin yachachiyta. Jehová Diosta kasukuymi imamantapas aswan allinpuni. Pipas Saúl hina allin runa kashaspapas, millay runamanmi tukupunman. ¡Ama hayk’aqpas chhaynaqa kasunchu!