Jehová Diosta serviy ama Satanastachu

Sapankanchismi qhawarinanchis Jehová Diostachu servisun icha Satanasta supayninkunatawanchu. Manan iskaynintaqa servisunmanchu. Aswan allinqa Jehová Diosllata serviymi.

Jehová Diosqa munakuq Diosmi

Yachamusqanchis jina supaykunan runakunataqa ñak’arichinku. Jehová Diosqa manan chhaynachu. Imaynan juj taytapas munakun wawankunata, chhaynatan llapan runakunata munakun. Jehová Diosmantan jamun “tukuy allin kaqkunapas tukuy junt’asqa kaqkunapas” (Santiago 1:17). Payqa allin kaqkunallatan runakunaman qon, sonqo nanayña paypaq kaqtinpas (Efesios 2:4-7).

Jesusqa runakunata munakusqanraykun ñausakunata, upakunatapas qhaliyachirqan, wañusqakunatapas kausarichirqan — Diospa churin Jesusqa runakunata munakusqanraykun onqoyninkumanta qhaliyachirqan.

Diospa churin Jesusqa kay pachapi kashaspan upakunata rimachirqan, ñausakunata qhawarichirqan, lepra onqoyniyoqkunata wist’ukunata jampirqan, supaykunata qarqorqan, wañusqakunatapas kausarichirqanmi. Jesusqa chaykunataqa Diospa atiyninwanmi ruwarqan (Mateo 9:32-35; 15:30, 31; Lucas 7:11-15).

Diosqa manapunin engañawasunmanchu, cheqaqllatan imatapas willawanchis (Números 23:19).

Karunchakuy Satanaspa ruwayninkunamanta

Imaynan ch’uspiqa arañaq llikanwan mayt’uchikun, chhaynatan askha runakuna llulla yachachikuykunawan mayt’uchikushanku. Paykunaqa manchakunkun wañupuq runakunata supaykunatapas, llakikunkutaqmi pipas layqananmanta. Diosta serviqkunan ichaqa mana chayman urmaykunkuchu.

Jehová Diosmi Satanasmantaqa aswan atiyniyoq. Chaymi serviqninkunataqa pakaykun (Santiago 4:7). Nigeria nacionpin kinsa layqakuna Jehová Diospa testigonta layqaspa wañuchiyta munarqanku, llaqtanmanta mana ripuyta munaqtin. Layqa ruwasqanku mana imanaqtintaq jujnin layqaqa sinchita mancharikuspa, Jehová Diospa testigonta valekurqan khuyapayananpaq.

Éfeso llaqtapi Diosta serviqkunan layqa ruwananku librokunata kanaykurqanku — Éfeso llaqtapi Diosta serviqkunaqa layqa ruwananku librokunatan kanaykurqanku.

Supaykuna manchachisunki chayqa Jehová Diosta sutinmanta wajakuy, payqa pakaykusunkin (Proverbios 18:10). Chaypaqmi ichaqa layqa ruwaykunamanta kaqkunata wijch’upunayki. Chaytan Éfeso llaqtapi Diosta serviqkunapas ruwarqanku. Paykunaqa llapantan layqa ruwananku librokunata kanaykurqanku (Hechos 19:19, 20). Kunanpas chhaynallatataqmi Diosta serviqkunaqa ruwananchis. Manañan jap’inanchisñachu layqa ruwaykunawan tupaq cosaskunataqa.

Diosta yupaychay munasqanman jina

Sichus Diosta kusichiyta munanki chayqa manan mana allin costumbrekunallatachu, nitaq mana allin ruwaykunallatachu saqenayki, aswanpas Diostan munasqanman jina yupaychanayki. Bibliapin willashan imakunachus ruwanaykita.

Diosta yupaychanapaqqa juñunakuymanmi rinanchis Bibliatapas estudiananchis — Diosta yupaychana juñunakuykunaman riy (Hebreos 10:24, 25).

Bibliata estudiay (Juan 17:3).

Diosta yupaychanapaqqa jujkunamanmi Diosmanta willananchis, Diosmantan mañakunanchis bautizakunanchis iman — Jujkunaman Diosmanta willay (Mateo 24:14).

Jehová Diosmanta mañakuy (Filipenses 4:6, 7).

Bautizakuy (Hechos 2:41).

Jehová Diospa testigonkunawan juñukuy

Satanaswan supaykunawanqa runakunayoqmi kanku. Paykunan Diospa cheqnisqankunata ruwanku yachachinkupas. Ichaqa kallantaqmi Jehová Diospa runankunapas, paykunan Jehová Diospa testigonkuna kanku (Isaías 43:10). Pachantinpiqa pusaq millón masmi testigokunaqa kanku. Paykunaqa allin kaqkunata ruwanankupaqmi kallpachakunku, runakunatapas mana engañaspan yachachinku. Yaqa llapa nacionkunapin kan juñunakunanku wasikuna, chaypin paykunaqa sumaqta chaskisunkiku.

Paykunaqa runakunatan yanapanku Diosta servinankupaq. Munaqtiykiqa qantapas wasiykipin Bibliamanta gratislla yachachisunkikuman, yachachisunkikun imaynatas Jehová Diosta munasqanman jina yupaychawaq chayta. Testigokunaqa kusikunkun runakunaman Diosmanta yachachispa, paykunaqa anchatan runakunatapas Jehová Diostapas munakunku.

Jehová Diospa testigonkunan juñunakunanku wasipi sumaqta runakunata chaskishanku, Bibliamantapas yachachishanku — Jehová Diospa testigonkunan yanapasunkiku Diosta servinaykipaq.