Lección 8
Diospa munasqanman hina kawsaq familia
¿Pitaq familiapi umari? (1)
¿Imaynatan qosa warminta tratanan? (2)
¿Iman taytaq obligacionin? (3)
¿Ima ruwanayoqtaq warmiri familiapi? (4)
¿Imatan Dios kamachin tayta-mamakunaman churikunamanpas? (5)
¿Imaninmi Biblia separakuymanta divorciakuymantapas? (6, 7)
1. Biblian nin qosan familiapi umaqa, nispa. (1 Corintios 11:3.) Ch’ulla warmillayoqmi qhariqa kanan, casarakuspataq warmiwanqa tiyananpas. (1 Timoteo 3:2; Tito 3:1.)
2. Kikinta hinan qosaqa warminta munakunan. Imaynan Jesuspas discipulonkunata trataran ahinatan qosapas warminta tratanan. (Efesios 5:25, 28, 29.) Manan hayk’aqpas maqananchu nitaq imawanpas ñak’arichinanchu. Aswanmi, respetaspa munakunan. (Colosenses 3:19; 1 Pedro 3:7.)
3. Allintan taytaqa llank’anan familian mantienenanpaq. Mikhunata, p’achata, wasita iman qonan warminman churinkunamanpas. Diosmantapas yachachinanmi. (1 Timoteo 5:8.) Paymi familianta yanapanan Diosmantapas Munayninmantapas yachanankupaq. (Deuteronomio 6:4-9; Efesios 6:4.)
4. Qosanpaq allin yanapaqmi kanan warmiqa. (Génesis 2:18.) Wawakuna yachachiypin yanapanan qosanta. (Proverbios 1:8.) Munakuywanmi warmiqa familianta atiendenan, chaytan Jehovaqa munan. (Proverbios 31:10, 15, 26, 27; Tito 2:4, 5.) Warmiqa anchatan qosanta respetanan. (Efesios 5:22, 23, 33.)
5. Churikunatan Diosqa kamachin tayta-mamankuta kasukunankupaq. (Efesios 6:1-3.) Diosmi munan tayta-mamakuna wawankuta yachachinanta correginantapas. Tayta-mamakunaqa tiempotan hap’inanku churinkuwan kuska kanankupaq, Bibliata estudiaspanku espiritual necesidadninkupipas ima munasqankupipas yanapanankupaq. (Deuteronomio 11:18, 19; Proverbios 22:6, 15.) Manan hayk’aqpas wawankuta sinchi millaytaqa disciplinanankuchu. (Colosenses 3:21.)
6. Warmi-qhari kawsaypi problema kaqtinqa, Bibliaq consejonman hinan allichananku. Bibliaqa yachachiwanchismi munakuyta perdonaytapas. (Colosenses 3:12-14.) Diospa Palabranqa manan recomendanchu separakuyta huch’uy problema allichanapaqqa. Warmin ichaqa qosanmanta separakunman sichus 1) pay manapuni munanmanchu familian mantieneyta, 2) sinchi millay kaspa warminta wañuchiyta munanman, saludnintapas peligropi churanman, otaq 3) sinchita hark’akuspa Jehová servinanta mana munanmanchu chayqa. (1 Corintios 7:12, 13.)
7. Casado warmi-qhariqa sapankankupaqmi fiel kananku. Adulterioqa qosawan warmiwan, Dioswanpas huchallikuymi. (Hebreos 13:4.) Huk warmiwan, huk qhariwanpas pantallaqtinkun divorciakunkuman ninmi Bibliaqa, chayraqmi mayqenpas libre kanman hukwan casarakunanpaq. (Mateo 19:6-9; Romanos 7:2, 3.) Adulterio mana kashaqtin divorciakuspa hukwan casarakuytaqa anchatan Jehovaqa cheqnikun. (Malaquías 2:14-16.)
[16, 17 paginakunapi fotokuna]
Diosmi munan tayta-mamakuna wawankuta yachachispa correjinanta
[17 paginapi foto]
Munakuq taytan qon familianman imaymanata, espiritualpi necesitasqantapas