Uyariqniykita qhawarispa rimay

UYALLANCHISPIRAQMI runakunaqa reparankuman admirasqachus manchasqachus kasqanchista, hinallataq khuyapayakuywanchu munakuywanchu llakikuywanchu icha iskayaspachu imatapas ruwasqanchista. Huk llaqtapi runakunan sinchita imaymanawan ñak’arisqaku, paykunamanta huknin yuyaq runan nin: “Uyaykupin rikukun imaynachus tarikusqaykuqa”, nispa.

Rimashaspa maymanchus qhawashanchis chayman hinan uyariqninchiskunaqa allinpaq otaq mana allinpaq qhawariwasunman. Wakin llaqtakunapiqa confianku uyariqninkuta sumaqta qhawarispa rimaqkunapin, pampata qhawaspa otaq imatapas qhawaspa rimaqkunamantaqa. Huk llaqtakunapiqa pitapas rimapayashaspayki mana chinkachispa allinta qhawaykunki chayqa, mana p’enqarikuqta otaq maqanakuy munaqta hinan qhawarisunkikuman. Chay llaqtakunapiqa manan chhaynata qhawariwaqchu jefeykita, otaq pi kamachikuqtapas, nitaqmi huk qharipas warmita chhaynata qhawarinmanchu. Huk llaqtakunapitaq mana respetoyoqta hina wayna-sipaskunata qhawarinku kurakkunata uya-uyapura rimapayaqtinku.

Tiyasqayki llaqtapi pitapas uya-uyapura rimapayaqtiyki mana phiñakunqachu chayqa, qhawawaqmi uyariqniykiyta imatapas allinta reparachinaykipaq, chaywanmi rikuchinki mana iskayaspa rimasqaykita. Huk kutinmi Jesusta tapurqanku: “¿Pillañataq qespichisqaqa kanman?” nispa. Hinan Jesusqa “paykunata qhawarispa” nirqan: “Runakunapaqqa mana atikuqmi kayqa, Diospaqmi ichaqa tukuy imapas atikun”, nispa (Mat. 19:25, 26). Apóstol Pablopas makillan qhawaq runakuna imapas ruwasqanta. Huk kutinmi wist’u naceq runa Pablota uyarisharqan predicasqanta, Pablotaq payta “allinta qhawaykurqan, hinaspan qhaliyananpaq iñiyniyoq kasqanta reparaspa” kunkayoqta nirqan: “¡Sayariy allinta!” nispa (Hech. 14:9, 10).

¿Imaynatan uya-uyapura rimawaq predicashaspayki? Predicashaspaqa munakuywan amigo hina rimay. Yuyaymanachiq hina wasiyoqman imatapas tapuy imachus munasqanmanta rimapayanaykipaq. Qallariymantapacha respetowan sumaq sonqowan uyariqniykiwan uya-uyapura rimanaykipaq kallpachakuy. Chaypaqmi asirikuspa kusikuywan rimayta qallariwaq, chhaynapin wasiyoqqa mana manchakuspa uyarisunki, allinpaqtaq qhawarisunkipas.

Chaymantapas reparashallay imayna uyayoqchus uyarisqasuykita chayta, phiñasqapaschá kashan, manapaschá imapas qokunchu rimasqaykimanta otaq mana imatapas entiendesunkichu. Allinta qhawarispaqa reparallankitaqmi tukuy yuyaywanchus uyarishasunki icha manachus chayta. Chayman hinataq yachanki as allillamantachus as usqhaytachus rimanaykita, tapunaykichus icha chayllapichus tukunayki chaytapas, hinallataq Bibliata imayna estudianata qhawachinaykichus chaytawan.

Predicashaspapas estudiota qoshaspapas respetowan uya-uyapura uyariqniykiwan rimay. Ichaqa ama mana chinkachispaqa qhawashallaychu, mana chayqa p’enqachiwaqmi otaq phiñachiwaqpas (2 Rey. 8:11). Aswanpas maynin-maynillanpi allintaqa qhawaykuy sumaq sonqowan, chhaynapin reparanqa sonqomantapuni rimasqaykita. Bibliata otaq mayqen qelqataña leeshanki chaypas, imatapas allinta reparachinaykipaqqa qhawawaqmi uyariqniykita huk chhikallantapas. Maynillanpipas uyariqniykita qhawaykunki chayqa, reparankin leesqayki imayna chayasqanta.

Sichus p’enqali otaq manchali kasqaykirayku sasachakushanki piwanpas uya-uyapura rimanaykipaq chayqa, ama pisipaychu, aswanpas tukuy atisqaykita kallpachakushallay, tiempowanqa atillankin sumaq rimayta.

Discursota qoshaspa uyariqniykikunata qhaway. Bibliaq nisqan hina, Jesús orqo patapi kashaspa manaraq uyariqkunaman rimaykushaspaqa ‘yachachisqankunata qhawarirqan’ (Luc. 6:20). Qanpas manaraq discursoykita qallarishaspaykiqa huk chhikanta uyariqniykikunata qhawariy, allin kaqtinqa uya-uyapura wakinta qhawariy. Chayta ruwaspaykiqa manañan nishutachu khatatatanki, uyariqniykikunapas reparanqakun imayna sonqoyoqchus uyayoqchus rimayta qallarisqaykita, tiyaykunqakutaq tukuy yuyaywan uyarinasuykikupaq.

Discursota qoshaspaykiqa uyariqkunatan qhawarinayki, ichaqa ama llapankuta comunta qhawarispallachu, aswanpas uya-uyapura wakinta qhawarispa. May llaqtapipas runakunaqa munankupunin discurso qoq uyariqkunaman imaynallamantapas qhawarimunanta.

Uyariqkunataqa manan huk cantonmanta huk kaq cantokama kuti-kutirispachu qhawanayki. Aswanpas respetowanmi sapankaq uyanta qhawarinayki. Mana p’enqakuqkinkuqa, hukkunaq uyantañataq qhawariwaq, hinaspa imallatapas rimaykuwaq; rimasqaykita imayna chaskikusqanta reparaspataq huktañataq chhaynata rimapayawaq. Ichaqa ama nishu unaytaqa piwanpas rimaychu mana chayqa p’enqachiwaqmi, amallataq wakillantachu sapa rato rimapayay.

Discurso qonapaq ruwasqayki qelqataqa atril patapi, makiykipi otaq Bibliaykipin hap’inayki, chhaynapi mana k’umuspalla chayta qhawanaykipaq. K’umusparaqchus qelqaykita qhawarinki chayqa, manan allintachu uyariqniykikunata qhawarinki. Chaymantapas manan sapa ratochu chayta qhawashanayki; importante kaqta willashaspaykipas manan qhawanaykichu anotasqayki qelqataqa, mana chayqa manan rikunkichu uyariqniykikunaman imayna chayasqanta, manataqmi allintañachu paykunata kallpachanqa.

Pimanpas huk bolata chanqaspaykiqa qhawankin imayna hap’isqanta. Chay hinallataqmi discursota qoshaspaykipas reparawaq rimasqaykita hap’ikushankuchus manachus chayta. Sichus uyariqniykikuna makilla uyarishasunkiku qhawashasunkiku chayqa, chaskikushankun rimasqaykita. Chayta reparanaykipaqmi uyariqniykikunata allinta qhawarinayki.

Iñiq t’aqaman leeshanki chayri, ¿qhawanaykichu uyariqkunata? Arí, qhawanaykin. Paykunaqa Bibliankupichá qatipashanqaku leemusqaykita, manataq qantachu qhawamushasunkiku. Chaywanpas paykunata qhawarispaqa rikunkin imaynachus paykunaman leesqayki chayasqanta, hinataq atinki tukuy sonqowan leeyta. Chaymantapas paykunata qhawaspaykiqa distraekuqkunatan kallpachanki leeshasqaykita Bibliankupi qatipanankupaq. Ichaqa as pisi tiempollatan qhawarinayki, mana chayqa pantawaqmi leesqaykipi. Chayrayku makiykipi Bibliata hap’iy, amataq k’umurayaspachu leey.

Wakin umallikunan leenapaq discursota qonku kinsa p’unchay huñunakuykunapi. Chaypaqmi paykunaqa yachananku imayna ruwayta, allinta preparakuspataq askha kutita practicananku. Leellanqakutaq chayqa, manan atinqakuchu as allinta uyariqninkuna qhawayta, chaywanpas allinta preparakunqaku chayqa, atinqakun askha kuti qhawariyta, leesqankupi mana pantaspalla. Chhaynapin uyariqkunaqa tukuy yuyaywan uyarinqaku leemusqaykipi ancha chaniyoq yachachikuykunata, allintataq chaywan yanapachikunqaku.