Allin yachachikuykunata reparachiy

¿MAYQENKUNAN discursopi allin yachachikuyninkuna kanman? Aswan importante kaq yachachikuykunan, chaykunatan aswan allinta sut’inchanayki, chhaynapi discursoykiwan uyariqkunata yanapanaykipaq.

Sichus discursoykipi yachachikuykunata allinta akllanki allintataq chaykunata tupachinki chayqa, atinkin allin yachachikuykunata sut’ita reparachiyta. Chaypaq preparakushaspaykiqa askha yachachikuykunatachá tarinki. Chhaynaqa, ¿imaynatan yachawaq mayqenkuna akllayta?

Ñawpaqtaqa uyariqniykikunapi yuyaykuy. Tapukuwaqmi: “¿Hayk’atan uyariqniykuna kaymanta yachanku? ¿Llapankuchu kaymanta Bibliaq yachachisqanta allinpaq hap’inku, icha iskayankuraqchu? ¿Ima sasachakuykunapin sapa p’unchay tarikunku Bibliaq nisqanta hunt’anankupaq?” nispa. Chaymantataq qhawariy imaynatachus chay discursowan paykunata yanapawaq chayta. Chayman hina discursoykiq yachachikuyninkunata qhawarinki chayqa, allintan yachanki mayqenkunamanta rimayta.

Discursota qonaykipaq qelqapi willakushanmanña allin yachachikuykunata chayqa, chayman hinalla ruway. Chaywanpas chaykunataqa aswan allinta reparachinki ñawpaqpi qhawarisqanchisman hina ruwaspaykin. Discursopaq qelqata mana qorqasunkikuchu chayqa, qanñan allin yachachikuykunataqa akllanayki.

Sichus allin yachachikuykunata allinta entiendenki, chaykunata sut’inchanaykipaq yachachikuykunatapas allin tupasqata churanki chayqa, mana sasachakuspallan discursoykita qonki, uyariqniykikunaq allinninpaqtaq kanqapas.

¿Imaynatan discursoykipi yachachikuykunata tupachiwaq? Discursoykipi yachachikuykunataqa imaymananmantan tupachiwaq. Chaytaqa ruwawaq imatachus yachachiyta munanki chayman hinan.

Discursoykiq yachachikuyninkunatan t’aqa-t’aqapi churawaq. (Chaykunawanmi uyariqkunaqa discursoq temanta allinta entiendenqaku, imachus yachachisqaykitapas allinta hap’ikunqaku.) Chaymantapas ima tiempopichus sucedesqanman hinan churawaq. (Willawaqmi Millp’uq Para manaraq chayamushaqtin imayna kawsay kasqanmanta, chaymantataq willawaq manaraq Jerusalén thunichisqa kashaqtin 70 wata ñawpaqta imayna kawsay kasqanmanta, hinaspataq willawaq kay tiemponchismanta.) Ruwallawaqtaqmi imarayku imapas sucedesqanman hina. (Kay tiempopi imapas sucedesqanmantan rimawaq, hinaspataq qhawarichiwaq imarayku chay sucedesqanta.) Discursoykitan tupachillawaqtaq imapas mana kaqllachu kasqanmanta rimaspa. (Qhawarichiwaqmi imachus allin mana allin kasqanta, imachus allinninchispaq, mana allinninchispaq kasqantapas.) Wakin discursokunapiqa manan hukllatachu chaykunamanta churanayki kanqa.

Contranpi rimasqanku mana cheqaqchu kasqanta rikuchinanpaqmi Estebanqa judío umallikunaq ñawpanpi kallpawan rimarqan ñawpa Israel runakunawan imachus pasasqanmanta, chaytan ruwarqan hayk’aqchus imapas sucedesqanman hina (Hech. 7:2-53). Ñawpaqtaqa uyariqninkunaq imachus yachasqankutan allinta sut’incharqan, hinaspataq willarqan Jehová Diosqa Josewan serviqninkunata yanapasqanmanta, paytan wawqenkuna cheqnikusqaku. Chaymantataq qhawarichirqan judío runakunaqa Diospa churasqan Moisesta mana kasukusqankuta. Tukunanpaqtaq sut’ita nirqan Jesusta wañuchiqkunapas chay judiokuna hina kasqankuta.

Ama askhataqa allin yachachikuykunata discursoykipi churaychu. Huk discursopiqa manan nishu askha allin yachachikuykunaqa kananchu. Phisqata, chunkata, kinsa chunkata, otaq más minutotaña rimanayki kanman chaypas, discursoykipi allin yachachikuykunaqa tawa otaq phisqa hinallan kanan. Chayrayku discursoykipiqa ama askha yachachikuykunamanta rimaychu, mana chayqa uyariqniykikunan mana llapantachu entiendenkuman. Discursoyki aswan hatun kaqtinqa, astawanmi chaykunata reparachinayki kanqa.

Hayk’a allin yachachikuykunaña discursopi kanqa chaypas, allintan chaykunataqa sut’inchanayki, chhaynapi uyariqkuna umankupi allinta hap’inankupaq.

Askhataña otaq pisillataña discursoykipi rimanayki kanqa chaypas, discurso qosqaykiqa manan sasa entiendeychu kanan. Sichus allin yachachikuykuna discursoykipi allin t’aqasqa kashan chayqa, ch’ulla-ch’ullallamantataq chaykunamanta rimanki chayqa, fácil entiendeymi discursoyki kanqa, manataq qonqanqakuchu.

Allinta reparachiy. Discursoykipi yachachikuykunata allinta tupachispaqa mana sasachakuspan allin yachachikuykunata reparachinki.

Allin yachachikuykunata reparachinaykipaqqa allintan sut’inchanayki chaymanta willaq textokunata yachachikuykunatapas. Allin yachachikuyman qatiq yachachikuykunawanqa allintan reparachinayki chay allin yachachikuy importante kasqanta, chayraykun chaykunataqa chaypaq hina churanayki. Sut’ita rikuchiy imaynatachus chay yachachikuykuna allin yachachikuywan tupashasqanta. Chaytan ruwawaq allin yachachikuykunata sut’inchaq simikunata yapa-yapamanta rimaspa, otaq rato-ratomanta allin yachachikuymanta pisillapi rimarispa.

Wakin discursantekunaqa huk-hukmanta yupaspan allin yachachikuykunata qhawarichinku. Chaytaqa ruwananku yachachikuykunata allinta tupachispan manataq hawan ukhuntachu.

Allin yachachikuyta sut’inchaq yachachikuykunamanta manaraq rimashaspaykin ñawpaqta rimariwaq mayqenchus chay allin yachachikuy kasqanta. Chhaynapin chay yachachikuyta allinta reparachinki, uyariqkunapas tukuy yuyaymi qatipanqaku discursoykita. Chaymantapas chay allin yachachikuymanta rimayta tukuspa wakmanta chayta pisillapi qhawarichinki chayqa, aswan allintaraqmi reparachinki.

Predicacionpi rimaspayki. Tukuy chaykunataqa manan discursota qospallachu ruwana, predicacionpi runakunawan rimaspapas chhaynatan ruwana. Predicacionpaq preparakuspaykiqa allinta qhawariy imachus predicanayki runakunata llakichishanman chayta, hinaspa chaypaq hina huk temata akllay chaymanta Bibliaq nisqanta qhawarichinaykipaq. Yaqapaschá iskay allin yachachikuykunawan chayta sut’inchawaq. Ima textokunatachus leenaykipaq akllasqayki qhepatan yuyaykuwaq imaynata rimayta qallarinaykipaq. Chhaynata preparakunki chayqa, predicacionpi uyariqniykikunapaq hinan rimanki, manataqmi qonqanqakuchu imachus nisqaykitapas.