Sonqochay kallpachaytaq

IÑIQ T’AQAQA pakakuna qaqa hinan kanan, chaypin iñiqkunaqa kallpachayta sonqochaytapas tarinanku ima sasachakuypiña tarikuspapas. Chayraykun umallikunaqa sonqochanankupaq hina discursota otaq ima yuyaychaytapas qonanku. Sapankankun “wayramanta pakakuna hina, chikchi pukllaymanta pakakuna hina, ch’aki hallp’api qarpana unu yarqha hina, ch’in pampapi llanthuykukuna hatun qaqa hina” kananku (Isa. 32:2).

¿Kallpachanchu sonqochanchu uyariqniykikunata discurso qosqayki? ¿Yanapanchu tukuy sonqo Diosta servishanallankupaq? ¿Kallpachanchu hark’asqaña kaspankupas manaña runakuna uyariqtinkupas Diospa munayninta ruwashanallankupaq? ¿Sonqochanchu qolqe pisichikuypi otaq mana hampina onqoyniyoq kasqankurayku llakiq ñit’isqan uyariqkunata? ‘Sumaq rimayniykin’ paykunata kallpachanqa (Job 16:5).

Discursokunata qospan iñiqmasikunata kallpachawaq Jehová Diospi suyakunankupaq, bendicionninkunata chaskinankupaqpas (Rom. 15:13; Efe. 6:10).

Jehová Diospa ruwasqankunata yuyarichiy. Ñawpa tiempopi Israel llaqta sasachakuykunapi tarikuqtin Jehová Diospa yanapasqanmanta willaypas kallpachanqan (Rom. 15:4).

Manaraq Prometesqa Hallp’aman haykushaqtinkun Jehová Dios Moisesta nirqan Josueta ‘kallpachananpaq yuyaychananpaqwan’. ¿Imaynatan Moisés chayta ruwarqan? Egipto suyumanta Israel llaqta lloqsimushaqtin, imaymanata Jehová Dios paykunarayku ruwasqanta yuyarichispan, chaytan ruwarqan Josuepa ñawpaqenpi (Deu. 3:28; 7:18). Yuyarichillarqantaqmi Jehová Diospa yanapayninwan Amor runakunata maqanakuypi atipasqankuta. Chaymantataq Moisesqa Josueta nirqan: “Kallpachakuy, allin qhari kay”, nispa (Deu. 31:1-8). Qanpas Jehová Diospa paykunarayku ruwasqankunata yuyarichispaykin iñiqmasikunata kallpachawaq.

Mayninpiqa sinchi sasachakuykuna kasqanraykun iñiqmasikuna iskayankuman Diospa Gobiernonmanta bendicionkuna chaskikuyta. Chhayna kaqtinqa yuyarichiy Diospa promesankuna hunt’akunantapuni (Jos. 23:14).

Predicacionta hark’asqanku nacionkunapiqa, sumaq sonqo umallikunaqa iñiqmasikunatan kallpachankuman apostolkunaq imaymana pasasqankuta willaspa (Hech. 4:1–5:42). Hinaspapas sichus Bibliamanta Ester qelqata t’aqwinkuman chayqa, astawanraqmi kallpachankuman.

Wakinqa huñunakuykunamanmi hamunku ichaqa manan iñiyninkupi astawan wiñayta munankuchu. Yaqapaschá yuyaykunku: “Jehová Diosqa manan hayk’aqpas ñawpaqpi huchakuna ruwasqaytaqa pampachawanqachu”, nispa. Chhayna kaqtinqa, Jehová Diospa khuyapayakuyninmanta willay, imaynatas Manasés reyta pampacharqan, Corinto llaqtayoqkunatapas millay ruwayninkuta saqepuspa cristianoman tukupuqtinku pampachasqanta hinaspa ch’uyapaq qhawarisqantapas (2 Cró. 33:1-16; 1 Cor. 6:9-11).

Wakin uyariqkunaqa sasachakuykunapi tarikuspan Jehová Diospa mana allin qhawarisqan sientekunku. Chhaynapi tarikuqkunata yuyarichiy Jobpa pruebakuna pasasqanta, imaynatas Jehová Dios qhepaman bendecirqan hunt’aq sonqo kasqanmanta chaytapas (Job 1:1-22; 10:1; 42:12, 13; Sal. 34:19). Jobta yanqa sonqochaqkunaqa, Dios contran huchallikun nispan tumparqanku (Job 4:7, 8; 8:5, 6). Pablowan Bernabewanmi ichaqa sumaqta iñiqkunata sonqocharqanku kallpacharqankupas iñiyninkupi qaqata sayanankupaq, nirqankun: “Imaymana sasachakuytan muchunanchis Diospa qhapaqsuyunman haykunanchispaqqa”, nispa (Hech. 14:21, 22). Chhaynallatataqmi kunan tiempopipas sasachakuypi tarikuqkunata kallpachana aguantanankupaq, chay ruwasqankuqa Diostan anchata kusichin (Pro. 27:11; Mat. 24:13; Rom. 5:3, 4; 2 Tim. 3:12).

Uyariqkunata yuyaymanachiy Jehová Dios paykunaman prometekusqanta imayna hunt’asqanmanta. Qhawarichiwaqmi Diosqa paykunarayku ruwasqanta imaynan prometerqan hinata. Salmo 32:8 textopin nin: “Qantan qhawashayki. Ñoqan yachachisqayki, ñoqan yuyaychasqayki, ñoqan maynin purinayki ñanta yachachisqayki”, nispa. Chaypi Jehová Diospa kallpachasqanta sonqochasqanta ima yuyarispaqa, entiendenqakun paykunapi Dios interesakusqanta chayrayku ima sasachakuypiña kaqtinkupas yanapananta (Isa. 41:10, 13; 1 Ped. 5:7).

Diospa ruwasqanmanta kusikuy. Jehová Dios kunan tiempopi kamachinkunapaq ruwasqanmanta rimay kallpachakunankupaq. Chay ruwasqanmanta kusikuywan rimaspa iñiqmasikunatapas kusichiy.

Sapa p’unchay sasachakuyninchiskunata atipanapaq Jehová Dios yanapawasqanchispi yuyaymanay. Diosninchisqa yachachiwanchismi sumaqta kawsananchispaq (Isa. 30:21). Paymi niwanchis imaraykun millay mana chanin ruwaykuna, wakchayay, onqoykuna wañuypas kasqanta, niwallanchistaqmi imaynatas chaykunata tukuchinanmantapas. Llaqtan ukhupin sumaqta hap’iwanchis, paywan parlasqanchispas yanapawanchismi. Paypa testigonkunan kanchis. Cristo hanaq pachapi rey kasqanta, millay runakunaq kawsaynin tukukunanpaqña kasqantapas willawanchismi (Apo. 12:1-12).

Hatun huñunakuykunata, iñiq t’aqapi huñunakuykunatapas allinninchispaqmi qowanchis. Sichus chay sumaq bendicionkunamanta kusikuywan rimanki chayqa, uyariqkunaq huñunakuy munasqankutan astawan kallpachanki (Heb. 10:23-25).

Willakuykunan rikuchin Jehová Dios predicasqanchista saminchasqanta, chaykunata yachaymi anchata kallpachawanchis. Ñawpa tiempopi Pablopas Bernabepas Jerusalén llaqtaman rispankun ‘llapan iñiqkunata kusichirqanku’ mana judío runakuna Diosman kutirikusqankuta willaspanku (Hech. 15:3). Qanpas paykuna hinan willawaq kallpachaq experienciakunata anchata kusikunankupaq.

Uyariqkunata reparachinki ruwasqanku ancha allinpaq kasqanta chayqa, aswan kallpachasqan sientekunqaku. Sumaqta kallpachay predicasqankumanta. Onqosqa otaq kurak kasqankurayku, manaña ñawpaqpi hinachu predicanku chaypas, hunt’aq sonqo aguantasqankumanta kallpachay. Yuyarichiy Jehová Diosqa sutinta munakusqankurayku ruwasqankuta mana qonqasqanta (Heb. 6:10). Sapa kutillanmi wawqe-panakunata yuyarichina sasachakuykunawan iñiyninku probasqa kasqanqa, qaqa sayanankupaq kasqanta (1 Ped. 1:6, 7).

Suyakuyninchismanta tukuy sonqowan rimay. Hamuq tiempopaq Diospa promesankunaqa anchatan Dios sonqo runakunata kallpachan. Chaykunamantaqa yaqapaschá askha kutitaña uyarirqanku. Chhayna kaqtinpas, sichus tukuy sonqowan chay promesakunamanta rimanki chayqa, uyariqkunatan yanapanki chay promesakunapi suyakunankupaq agradecekunankupaqpas. Bibliamanta Allin Yachachiq Kanapaq Escuelapi yachasqaykiman hina uyariqkunata yachachispaykin anchata sonqochanki kallpachankipas.

Jehová Diosña llaqtanta kallpachan chaypas qanpas yanapakuwaqmi. Sapa kutin iñiq t’aqata yachachispan chayta ruwanayki.