2 capítulo

Sapallan cheqaq Jehová Diosta hatunchasun

1. ¿Pitaq sapallan cheqaq Diosri?

ASKHA dioskunaña kan chaypas, Biblia nin: “Ñoqanchispaqqa sapan Dios Yayallan kan”, nispa (1 Corintios 8:5, 6). “Sapan Dios” nispaqa tukuy Kamaq Jehová Diosmantan rimashan (Deuteronomio 6:4; Apocalipsis 4:11). Jesusmi Diosmanta niran: ‘Diosniymi Diosniykichistaqmi’, nispa (Juan 20:17), Moisespas nillarantaqmi: Jehová ‘Diosqa cheqaq Diosmi [...] manan paymanta wak Diosqa [kanchu]’, nispa (Deuteronomio 4:35). Jehová Diosmi aswan atiyniyoq idolokunamanta, yupaychasqa runakunamanta, “kay pacha kamachiq” Satanás Saqra awqanmantapas (2 Corintios 4:3, 4). Jesuspa nisqan hina Jehová Diosmi ‘sapallan cheqaq Diosqa’ (Juan 17:3).

2. ¿Imata ruwanapaqmi kallpachawanchis Diosmanta yachasqanchis?

² Agradecekuq runakunaqa Diospa sumaq kayninkunamanta, ñoqanchispaq ruwasqanmanta, hamuq tiempopaq ruwananmantawan yachaspan astawan Diosman asuykunku. Payta astawan munakuspataq sonqomanta hatunchanku. ¿Imaynata hatunchanku? Jehová Diosmanta runamasinkuman yachachimuspa. Biblia nin: “Qespichisqa kanapaqqa siminchiswanmi willana”, nispa (Romanos 10:10, NM). Hinaspapas rimayninchispi ruwayninchispi iman payta qatikunanchis. Efesios 5:1 texto nin: “Diospa munasqa wawankunan kankichis, chayrayku payman rikch’akuq kaychis”, nispa. Chay kamachikuyta kasukunapaqqa astawanmi Jehová Diosta reqsinanchis.

3. ¿Mayqenkunan Jehová Diospa aswan sumaq kayninkuna?

³ Biblia willan Diospa sumaq kayninkunamanta. Diospa aswan sumaq kayninkunaqa tawan: yachaynin, chanin kaynin, atiynin, munakuyninpiwan. ‘Diosllan yachayniyoqqa.’ (Job 12:13.) “Chaninmi ruwasqankunaqa.” (Deuteronomio 32:4.) “Payqa sinchi atiyniyoqmi.” (Isaías 40:26.) “Diosqa munakuymi.” (1 Juan 4:8.) ¿Chay tawantin sumaq kayninkunamanta mayqenmi aswan hatun?

“Diosqa munakuymi”

4. ¿Mayqen sumaq kayninmi Jehová Diosta tanqaran kay pachata hanaq pachata, llapa kawsaqkunatapas kamananpaq?

⁴ ¿Imarayku Jehová Dios hanaq pachata kay pachata, angelkunata, runakunatapas kamaran? ¿Yachayniyoq kasqanrayku? ¿Atiyniyoq kasqanrayku? Manan. Chay sumaq kayninkunawanña kamaran chaypas manan yachayniyoq atiyniyoq kasqanraykuchu kamaran. Manan chaninniyoq kaspachu lliwman kawsayta qoran. Aswanmi ancha munakuq kayninpi angelkunata runakunatapas kamaran, kasukuq runakunapaqtaq Paraisota ruwaran chaypi wiñay kawsanankupaq (Génesis 1:28; 2:15). Hinaspapas munakuq kayninpin yuyaykuran Adanpa paqarichisqan huchata chinkachinanpaq.

5. Bibliaq nisqan hina, ¿Jehová Diospa mayqen sumaq kayninmi aswan hatun, imarayku?

⁵ Jehová Diospa llapa sumaq kayninkunamanta aswan hatunqa munakuyninmi. Jehová Diospa yachaynin, chanin kaynin, atiyninpas ancha allinmi, ichaqa munakuyninmi aswan hatunqa. Arí, Jehová Diosqa munakuymi. Chay munakuyninqa manan yanqa munakuyllachu aswanpas cheqaqpunin chanintaqmi kanpas. Jehová Diospa munakuyninqa ancha hatunmi, chay munakuytan rikuchin hukkunarayku tukuy imaymana ruwasqanpi.

6. Diospa ñawpaqenpi ancha huch’uylla kanchis chaypas, ¿iman yanapawasun payman rikch’akunapaq?

⁶ Chhayna munakuq kasqanraykun payman rikch’akuq kananchis. Diospa ñawpaqenpi sinchi huch’uylla kasqanchisrayku, huchayoq runa kasqanchisrayku imapaschá yuyaykusunman, manan hayk’aqpas Diosmanqa rikch’akuyta atiymanchu, nispa. Jehová Diosqa yachanmi atisqanchista mana atisqanchistapas, manataqmi chanin ruwanallanchistachu suyan, chaypin rikullanchistaq ancha munakuwasqanchista. Yachanmi huchallikuq kasqanchista (Salmo 51:5). Chayrayku Salmo 130:3, 4 texto nin: “Señor Diosníy, huchakunatachus yuyashawaq chayqa, ¿pitaq manaqa huchachasqachu kanman? Ichaqa qanmi hucha pampachaykuqqa kanki”, nispa. Arí, Jehová Diosqa ‘khuyapayakuq sumaq sonqo Diosmi [...], mana usqhaylla phiñakuqmi [...], tukuy tiempo munakuqmi cheqaqtaqmi’ kanpas (Éxodo 34:6). “Señor Diosníy, qanqa sumaqmi, hucha pampachaykuqmi kanki.” (Salmo 86:5.) ¡Ancha sumaqmi chayqa! ¡Maytan kusikunchis munakuwaqninchis khuyapayawaqninchis Diospa munayninta ruwaspa!

7. ¿Imaynatan Jehová Diospa munakuynin rikukun kamasqanpi?

⁷ Jehová Diospa munakuyninqa kamasqanpin rikukullantaq. Munakuwasqanchisraykun qowanchis sumaq orqokunata, sach’a-sach’a panpakunata, qochakunata, lamar qochakunatawan chaykunawan kusisqa kawsananchispaq. Qowallanchistaqmi imaymana sumaq mikhuykunata, sumaq q’apayniyoq t’ikakunata, imaymana rikch’ayniyoq animalkunatawan. Manaña pipas tanqaranchu chaykunata ruwananpaq chaypas, runakunata kusichinanpaqmi kamaran. Huchayoq kasqanchisrayku millay pachapi tiyasqanchisrayku iman mana tukuy kamasqanpichu kusikuyta tarinchis (Romanos 8:22). Jehová Diosmi ichaqa ñoqanchispaq Paraisopi imaymanata ruwanqa. Salmista sut’inchan: “Makiykita kicharispan llapa kawsaqkunata munasqankuwan saksaykachinki”, nispa (Salmo 145:16).

8. ¿Imapin astawan rikukun Jehová Diospa munakuynin?

⁸ ¿Imapin astawan rikukun Jehová Diospa munakuynin? Biblia willan: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). ¿Runakuna sumaq sonqo kasqanraykuchu Jehová Dios chayta ruwaran? Romanos 5:8 texto kutichin: “Diosmi ichaqa munakuyninta rikuchiwanchis, huchasaparaq kashaqtinchis Cristoq wañupuwasqanchiswan”, nispa. Arí, Diosqa huchamanta wañuymantawan qespichiwananchispaqmi ch’uya Churinta kay Hallp’aman kachamuran kawsayninta qonanpaq (Mateo 20:28). Chaywanmi Diosta munakuqkuna wiñay kawsayman aypanqaku. Munayninta ruway munaqkunamanmi Kamaqninchisqa munakuyninta mast’arin, chayrayku Biblia nin: “Diosqa manan mayqen runatapas rikch’ayninta qhawaspallachu akllan, aswanpas may suyupipas payta yupaychaspa chanin-kayta ruwaqtaqa chaskinmi”, nispa (Hechos 10:34, 35).

9. Jehová Diosmi Churinta huchamanta qespichiwananchispaq kachamuran, ¿ima ruwanapaqmi chay kallpachawananchis?

⁹ Jehová Diosqa wiñay kawsananchista munaspan Churinta kachamuran huchamanta qespichiwananchispaq, ¿imapaqmi chay ruwasqan kallpachawananchis? Jehová Diosta astawan munakunapaq, kachamusqan Jesucristotawan uyarinanchispaq. “Llapapaqmi Cristoqa wañurqan, kawsaqkuna amaña paykuna kikinkupaq kawsanankupaq, aswanpas paykunarayku wañuspa kawsarimpuq Cristopaqña kawsanankupaq.” (2 Corintios 5:15.) Cristoq yupinta qatikuyqa ancha allinmi, Jehová Dios hina munakuq khuyapayakuq kasqanrayku. K’umuykukuq runakunaman kay simikunata nisqanpin chayta yachanchis: “Ñoqaman hamuychis llapa sayk’usqakuna q’episapakuna, ñoqan samachisqaykichis. Yugoyman k’umuykukuychis, hinaspa ñoqamanta yachaqakuychis llamp’ulla, huch’uyyaykukuq sonqoyoq kasqayta, chaymi qankunaqa samakuyta tarinkichis. Yugoyqa ch’usallan, q’epiypas manan llasachu”, nispa (Mateo 11:28-30).

Runamasinchista munakusun

10. ¿Imakunapin rikuchisunman cristianomasinchiskuna munakusqanchista?

¹⁰ ¿Imaynatan ñoqanchispas Jehová Dios hina Jesucristo hina cristianomasinchiskuna munakusqanchista rikuchisunman? Qhawarisun imakunapin munakuyninchista rikuchisunman: “Pipas munakuqqa muchukuqllan, sumaq sonqollan, munakuqqa manan envidiakunchu, manan k’ankaykachanchu, manan hatunchakunchu, manan mana ruwanakunatachu ruwan, manan payllapaq kanantachu munan, manan phiñakunpachachu, manan sientepakunchu, manan mana chanin kaqmantachu kusikun, aswanpas cheqaqkaqmantan kusikun. Munakuqqa tukuy imatan muchun, tukuy imatan creen, tukuy imatan suyakun, tukuy imapin pacienciakun. Munakuyqa wiñaypaqmi” (1 Corintios 13:4-8; 1 Juan 3:14-18; 4:7-12).

11. ¿Pikunatawanmi munakunanchis, imaynatan rikuchinanchis munakusqanchista?

¹¹ ¿Pikunatawanmi munakunanchis, imaynata? Jesusmi kayta kamachiran: “Chayrayku, rispa llapa suyu runakunata yachachimuychis, yachachisqaykuna kanankupaq, hinaspa Yayaq, Churiq, santo espirituq sutinpi paykunata bautizamuychis. Qankunaman lliw kamachisqaykunata paykunaman yachachimuychis kasukunankupaq” nispa (Mateo 28:19, 20). Chay kamachikuyta hunt’ananchispaqqa llapa runakunamanmi willananchis Jehová Dios as pisi tiempomanta sumaq paraíso apamunanta. Munakuyninchisqa manan cristianomasinchiskunallapaqchu kanan, chaytan Jesús rikuchiran kay nisqanpi: “Munakuqnillaykichista munakuwaqchis chayqa, ¿ima premioyoqtaq kawaqchis? ¿Manachu contribución cobraqkunapas chay hinallatataq ruwanku? Wawqeykichiskunallatachus napaykunkichis chayqa, ¿hukkunaq ruwasqanmantaqa astawanchu ruwashankichis? ¿Manachu Diospi mana iñiqkunapas chay hinallatataq ruwashanku?” (Mateo 5:46, 47; 24:14; Gálatas 6:10).

Jehová Diospa sutinpi purisun

12. ¿Imarayku cheqaq Dioslla Jehová sutita apan?

¹² Chaymantapas sutinta reqsispa, sutinmanta waqyakuspa, sutinta runakunaman yachachispan cheqaq Diosta hatunchasun. Salmistan tukuy sonqowan khaynata mañakuran: “Qanllapuni Señor Diosqa [Jehová] kasqaykita yachachunku, qanllapuni teqsimuyuntinpi Ancha Hatun Dios kasqaykita reqsichunku”, nispa (Salmo 83:18). Jehová sutiqa kay ninanmi: “Ñoqan Munasqayman hina Kasaq”. Payqa ima yuyaykusqantapas munasqanman hinan hunt’an. Cheqaq Diosllan chay sutitaqa apanan, runakunaqa manan yachankumanchu yuyaykusqanku hunt’akunqachus icha manachus chayta (Santiago 4:13, 14). Jehová Diosllan ninman: ‘Kamachisqayqa llapallanpunin hunt’akunqa’, nispa (Isaías 55:11). Askha runakunan kusikunku Bibliapi Diospa sutinta tarispa, chay suti imaninanta yachaspanku ima (Éxodo 6:3, NM). Sichus mana Jehová Diosta ‘wiñay-wiñaypaqchu kasukunqaku yupaychanqakupas [otaq mana sutinpichu purinqaku]’ chayqa yanqapaqmi yachasqanku kanqa (Miqueas 4:5).

13. ¿Iman Jehová Diospa sutinta yachay sutinpi puriypas?

¹³ Salmo 9:10 texto Diospa sutinmanta nin: ‘Qanpin suyakunku [sutiykita] reqsiqkunaqa’, nispa. Ichaqa manan sutinta reqsispallachu paypi hap’ipakusun. Sutinta yachayqa cheqaq Dios kasqanta yachaymi, kamachikuq kasqanta respetaymi, kamachikuyninkunata kasukuymi, tukuy sonqowan paypi hap’ipakuymi (Proverbios 3:5, 6). Hinaspapas Jehová Diospa sutinpi puriyqa payman qokuymi, Diospa munayninman hina kawsaspa pay yupaychaq kasqanchista reqsichikuymi (Lucas 10:27). ¿Chaytachu ruwashanki?

14. Diospa munayninta ruwashanchisña chaypas, ¿iman yanapawasun wiñaypaq Diospa munayninta ruwananchispaq?

¹⁴ Jehová Diospa munayninta wiñaypaq ruwayta munanchis chayqa, manan hawa sonqollachu ruwana. Timoteo unayña Jehová Diospa munayninta ruwashaqtinmi apóstol Pablo payman kayta qelqaran: “Dios sonqo kawsanaykipaq yachaqashallaypuni”, nispa (1 Timoteo 4:7). “Dios sonqo” kayqa tukuy sonqowan Jehová Diosta yupaychaymi, sumaq kasqanmanta, ñanninkuna reqsichiwasqanchismanta anchata munakuy. Dios sonqo kasqanchisraykun munanchis llapa runakuna Diospa sutinta sumaqpaq qhawarinankuta. Sapallan cheqaq Diospa sutinpi wiñaypaq purinanchispaqqa Dios sonqon kananchis (Salmo 37:4; 2 Pedro 3:11).

15. ¿Imapin rikuchisun Jehová Diosllata yupaychasqanchista?

¹⁵ Jehová Dios chaskiwananchispaqqa payllatan yupaychananchis ‘Sienteq Dios kasqanrayku’ (Éxodo 20:5). Diosta munakuspaqa manan Satanaspa kamachikusqan millay pachata munakunachu (Santiago 4:4; 1 Juan 2:15-17). Jehová Diosqa yachanmi imayna runa kay munasqanchista (Jeremías 17:10). Payqa rikunmi chanin kaqta ruwananchisrayku kallpachakusqanchista, yanapawasuntaqmi sasachakuykunata atipanapaq. Santo espirituntan qowasun kay pachapi mana allin kawsayta atipanapaq (2 Corintios 4:7). Yanapawasuntaqmi sumaq paraisopi wiñay kawsayta suyakushanallanchispaq. ¡Ancha sumaq kawsaymi kanqa! Jehová Diostan anchata agradecekunanchis chay sumaq kawsay suyachiwasqanchismanta, tukuy sonqowantaqmi munayninta ruwananchis.

16. ¿Millonninpi runakunawan kuska imata ruwanaykipaqmi kallpachakunayki?

¹⁶ Millonninpi runakunan sonqomanta kasukushanku salmistaq kay mink’asqanta: “Señor Diosta kuskalla qhapaqchaspa yupaychasun, sutintapas kuskalla hatunchasun” (Salmo 34:3). Qantapas Jehová Diosmi mink’ashasunki chay runakunawan kuska payta hatunchanaykipaq.

Yuyarinapaq

• ¿Imayna Diosmi Jehová? ¿Imapin yanapawanchis Jehová Diospa sumaq kayninkunamanta yachay?

• ¿Imaynatan runamasinchista yanapasunman Diosmanta cheqaqta yachanankupaq?

• ¿Iman Diospa sutinta yachay sutinpi puriypas?

[14 paginapi fotokuna]

Ancha munakuq kayninpin Jehová Dios ‘makinta kicharispa llapa kawsaqkunata munasqankuwan saksaykachinqa’