7 T’AQA
Dios llaqtanta kacharichirqan
Diosmi Egipto runakunata ñak’arichirqan. Moiseswan Egiptomanta llaqtanta horqochispan Kamachikuy Siminta paykunaman qorqan
ISRAEL runakunaqa askha watakunan Egiptopi allinta kawsarqanku askhamantaq tukurqankupas. Qhepamanmi Joseta mana reqsiq millay rey Egiptopi kamachikuyta qallarirqan. Chay reyqa Israel runakunaq askhayasqanta rikuspan kamachiman tukuchipurqan, chayllaraq naceq qhari wawakunatataq Nilo mayuman wikch’uyachirqan. Ichaqa huk warmin wawanta canastaman churaspa t’otora-t’otora ukhupi pakarqan. Faraonpa ususinmi chay wawata tarispa Moisés nispa suticharqan, Faraonpa wasinpitaq uywarqan.
Moisesqa 40 watayoq kashaspan sasachakuykunapi tarikurqan llaqtamasinta capatazmanta hark’asqanrayku, hinan ayqekuspa karu llaqtata ripurqan. 80 watanpi kashaqtinmi Dios kamachirqan Egiptoman kutispa llaqtanta horqomunanpaq.
Faraón Israel runakunata manapuni kachariyta munaqtinmi Dios chunka ñak’ariykunawan paykunata muchuchirqan. Chaykuna ñawpaqtan Moisés Faraonman riq Israel llaqtata kacharipunanpaq, Faraontaq hatunchakuspa astawan Moisés contra Dios contra hatariq. Chunka kaq ñak’ariypin Jehová Dios huk angelta kachamurqan llapa phiwi wawakunata wañuchinanpaq. Diosta kasukuspa wasi punkunkuq k’aspinkunata ovejaq yawarninwan ch’aqchuqkunaq wawankunallan mana wañurqankuchu. Chay p’unchayta yuyarinankupaqmi Israel runakuna Pascua fiestata sapa wata ruwarqanku.
Phiwi churin wañupusqan qhepamanmi Faraonqa Moisesta Israel runakunatawan kamachirqan Egipto llaqtamanta lloqsinankupaq. Chaymi paykunaqa usqhaylla ripurqanku. Faraonmi ichaqa kacharisqanmanta pesapakuspa soldadokunantin maqanakunanku carretakunapi qatiparqanku. Puka lamar-qochaman israelitakuna chayaspankun mana maymanpas ayqeyta atirqankuchu. Chaymi Jehová Dios lamar-qochata iskayman t’aqarqan, hinan ch’aki hallp’anta chimparqanku. Faraón soldadokunantin qhepankuta phawaykuqtintaq unu paykunata millp’urqan.
Chay qhepamanmi Israel runakuna Sinaí orqoq ladonpi karpakurqanku chaypin Jehová Dios paykunawan rimanakurqan, Moiseswantaq Kamachikuyninkunata qorqan, chaykunawan tukuy ima ruwasqankupi yanapachikunankupaq. Chay kamachikuykunata kasukuqtinkuqa Diosmi paykunawan kanman, llapa llaqtakunataqmi paykunarayku bendicionninta chaskikunkuman.
Yaqa llapa Israel runakunan ichaqa mana Diosta kasukurqankuchu. Chaymi Diosqa tawa chunka wata ch’inneq aqo pampapi paykunata purichirqan. Qhepamanmi Israel runakunaqa Abrahamman Diospa prometesqan hallp’ata hap’ikapunankupaqña kasharqanku. Chaypin Moisés Josueta churarqan rantinpi llaqtata umallinanpaq.
(Éxodo; Levítico; Números; Deuteronomio; Salmo 136:10-15; Hechos 7:17-36.)