4 YACHACHIKUY

Huk sipasmi taytantapas Jehová Diostapas kusichirqan

Jefté Diosmanta mañakushan israelitakuna enemigonku contra maqanakushanankukama — ¿Imatan Jefté prometeshan Jehová Diosman?

Jefté maqanakusqanmanta kutimuspa ususinta abrazaykushan, ususinqa paywan tupananpaqmi lloqsimurqan — Sasaña kaqtinpas, Jefteq ususinqa taytanpa promesa ruwasqantan hunt’arqan

¿Rikushankichu dibujopi kashaq sipaschata?... Bibliaqa manan willanchu sutinta, ichaqa willawanchismi Jefté runaq ususin kasqanta. Chay sipaschaqa taytantapas Jehová Diostapas kusichirqanmi. ¿Munawaqchu astawan yachayta Jeftemanta ususinmantapas?

Jefteqa allin runan karqan, askha tiempotataqmi t’aqaq Jehová Diosmanta ususinman yachachinanpaq. Payqa kallpasapan karqan, llaqtatapas allintan umalliq. Chayraykun israelitakunaqa nirqanku: “¿Munawaqchu umalliqniyku kayta?”, nispa.

Jefteqa Diospa yanapaynintan mañakurqan maqanakuypi atipananpaq. Payqa Diosmanmi huk promesata ruwarqan, maqanakuypi atipaspaqa wasinman kutipushaqtin pi runachus ñawpaqta lloqsimuqtan Diosman qopunan karqan. Chay runaqa tukuy tiempon Diosta yupaychana karpapi kawsanan, llank’anan karqan. Ñawpaqpiqa chay karpamanmi runakuna riqku Diosta yupaychanankupaq. ¡Jefteqa atiparqanmi maqanakuypi! Wasinman kutipushaqtin, ¿yachankichu pin ñawpaqta lloqsimurqan?...

¡Jefteq ususinmi lloqsimurqan! Payqa sapallan ususinmi, kunanqa karumanmi payta kachapunan kanqa. Chaywanmi Jefteqa nishuta llakikurqan. Ichaqa yuyariy, payqa Diosmanmi huk promesata ruwarqan. Chayraykun ususinqa nirqan: “Taytay, Diosmanmi huk promesata ruwarqanki, kunanqa chay nisqaykiman hina ruway”, nispa.

Jefteq ususinqa Dios yupaychana karpapaqmi llant’ata huñushan; amigankunan payta visitaq hamushanku — Jefteq ususinpa amigankunaqa sapa watanmi payta visitaqku

Jefteq ususinpas qallariypiqa llakikurqanmi. Diosta yupaychana karpapi kaspaqa, payqa manan casarakuyta atinmanchu. Ichaqa payqa munarqanpunin taytanpa promesa ruwasqan hunt’ayta, Jehová Diosta kusichiytapas. Paypaqqa chaymi aswan importante karqan casarakuymanta wawayoq kaymantapas. Hinan payqa wasinmanta ripuspa Diosta yupaychana karpapi tukuy tiempo kawsarqan.

Jefteq ususinpa ruwasqan, ¿kusichirqanchu taytanta Jehová Diostapas?... Arí, ¡kusichirqanmi! Sichus qanpas Jefteq ususin hina Jehová Diosta kasukunki munakunki chayqa, qanpas kusichinkin tayta-mamaykita Jehová Diostapas.

BIBLIAYKIPI LEEY

a Ñawpaq Hebreo qelqakunapin kay texto rikuchin, Jefteq ususin tukuy tiempo Diosta yupaychana karpapi kawsasqanta, mana casarakusqantapas.