8 YACHACHIKUY
Josiasqa allin amigokunayoqmi karqan
¿Sasachu Jehová Diosta kasukuy?... Yaqa llapa runakunan “nishu sasan” ninku. Biblian ichaqa willan mana chhaynachu kasqanta. Yachasun Josiasmanta, paytaqa allin amigokunayoq kasqanmi yanaparqan Jehová Diosta kasukunanpaq.
Josiaspa taytanqa Judá nacionpi reymi karqan, sutinmi karqan Amón. Amonqa sinchi millay runan karqan, idolokunatataqmi yupaycharqan. Amón wañupuqtinmi churin Josías pusaq watachallayoqraq kashaspa Judá nacionpi rey kapurqan. Payri, ¿taytan hina millaychu karqan?... Manan.
Sofoniasqa idolokunata ama yupaychanankupaqmi willarqan
Huch’uychanmantapachan Josiasqa Jehová Diosta kasukuyta munarqan. Chaymi Diosta kasukuq runakunallata akllarqan amigonkuna kanankupaq. Paykunan Josiastaqa yanaparqanku Diosta kasukunanpaq. ¿Pikunan karqan wakin amigonkuna?
Hukninmi karqan profeta Sofonías, paymi Judá nacionpi runakunaman willarqan idolokunata yupaychaqtinkuqa mana allinpi tarikunankuta. Josiasqa Sofoniaspa nisqantan kasukurqan, chaymi Jehová Diosllata yupaycharqan.
Huknin kaq amigontaqmi karqan Jeremías. Paykunaqa yaqa wiñaymasintinmi karqanku, qaylla-qayllallapitaqmi tiyarqankupas. Jeremiaswan Josiaswanqa yanapanakurqankun Jehová Diosta kasukunankupaq. Paykunaqa allin amigontinmi karqanku, chaymi Josías wañukapuqtin Jeremiasqa huk takita qelqarqan anchata paymanta llakikusqanrayku.
Josiaswan Jeremiaswanqa yanapanakurqankun Diosta kasukunankupaq
¿Imatan yachanchis Josiasmanta?... Josiasqa waynachallaraq kashaspapas Diostan kasukuyta munarqan. Chaymi Diosta munakuq runakunallawan huñunakurqan. ¿Qanpas munankichu Jehová Diosta kasukuyta? Chhaynaqa Diosta munakuq amigokunatan akllakunayki.